Зимни баргузории ҷаласаи навбатии Шӯрои миллии таҳсилот аз ҷониби муовини вазири маориф ва илми Ҷумҳурии Тоҷикистон Латофат Назирӣ ба раисони гурӯҳҳои ҳамоҳангсози барнома ва китобҳои дарсӣ “Ифтихорнома”-и Вазорати маориф ва илми Ҷумҳурии Тоҷикистон тақдим карда шуд.

Бо мақсади баланд бардоштани сатҳи фаъолияти Шӯрои миллии таҳсилот, такмили барномаҳои таълимӣ ва китобҳои дарсӣ, инчунин, бо назардошти ворид гардидани тағйирот ба воҳидҳои сохтории Вазорати маориф ва илми Ҷумҳурии Тоҷикистон дар асоси фармоиши вазири маориф ва илм ҳайати Шӯрои миллии таҳсилот аз нав тасдиқ гардид.

Шӯрои миллии таҳсилот ҷузъи давлативу ҷамъиятии сохтори Вазорати маориф ва илми Ҷумҳурии Тоҷикистон буда, нақшаҳо, барномаҳои таълимӣ, китобҳои дарсӣ, маводи таълимиву методиро такмил ва баррасӣ намуда, фаъолиятро дар ин самт ҳамоҳанг месозад. 

Шӯрои миллии таҳсилотро вазири маориф ва илми Ҷумҳурии Тоҷикистон ва дар мавридҳои зарурӣ муовини якуми вазир роҳбарӣ  мекунад. Ба ҳайати Шӯрои миллии таҳсилот намояндагони дастгоҳи марказии Вазорати маориф ва илм, аз ҷумла муассисаҳои тобеи он, кормандони Академияи таҳсилоти Тоҷикистон, Маркази ҷумҳуриявии таълимию методӣ, Маркази таҳия, нашр ва муомилоти китобҳои дарсӣ, илмию методӣ, устодони донишгоҳу донишкадаҳо, роҳбарону омӯзгорони муассисаҳои таҳсилоти умумӣ, муассисаҳои таҳсилоти ибтидоӣ ва миёнаи касбӣ, раисони гурӯҳҳои ҳамоҳангсози барнома ва китобҳои дарсии тадрисшаванда шомил мегарданд.

 

                                                                                                                                                                       Маркази матбуоти Вазорати
                                                                                                                                                                              маориф ва илми
                                                                                                                                                                          Ҷумҳурии Тоҷикистон