Муовини Сарвазири мамлакат М.Сатториён зимни суханронӣ зикр кард, ки озмуни “Фурӯғи субҳи доноӣ китоб аст” тули чор сол аст, ки бо ташаббус ва сарпарастии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар сар то сари кишвар ҳаводорони зиёдеро ба ҳам оварда, дар муаррифии чеҳраҳои китобхон, донишманд, суханвар ва эҷодкор нақши боризе гузошта истодааст. Боиси хушнудист, ки мардуми шарифи Тоҷикистон, падару модарон, хонандагону омӯзгорон, донишҷӯёну намояндагони касбу кори гуногун ҷиҳати дастгирии ташаббуси Пешвои миллат тамоми неруи зеҳнии худро равона карда, дар чор зинаи озмун донишу маҳорати худро муаррифӣ карданд.

Дар идома як қатор кормандони Вазорати маориф ва илм, Китобхонаи миллии Тоҷикистон, директорон ва ректорони муассисаҳои таҳсилоти миёна ва олии касбӣ, масъулини Вилояти Мухтори Кӯҳистони Бадахшон, вилоятҳои Суғду Хатлон, ноҳияҳои тобеи ҷумҳурӣ ва шаҳри Душанбе барои саҳми арзанда дар баргузории озмуни ҷумҳуриявии “Фурӯғи субҳи доноӣ китоб аст” бо ифтихорномаю сипосномаҳои Вазорати маориф ва илм ва Китобхонаи миллии Тоҷикистон, инчунин 45 нафар падару модари ғолибон бо нишони “Маърифатпарвар” ва як қатор омӯзгорон бо нишони “Аълочии маориф ва илми Ҷумҳурии Тоҷикистон” қадрдонӣ шуданд.

Дар баробари ин, бо дастури Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба 127 нафар иштирокчии фаъоли озмун, хусусан, пиронсолону ятимон ва шахсони дорои имконияташон маҳдуд, ки ҷойҳои ифтихориро сазовор шудаанд, “Ифтихорнома”-и Вазорати маориф ва илм ва туҳфаҳои молӣ тақдим гардид.