Вазорати маориф ва илм сол аз сол робитаҳои байналмилалиро густариш медиҳад. Давоми се моҳи соли 2020 15 вохӯрии роҳбарият ва намояндагони Вазорати маориф ва илми Ҷумҳурии Тоҷикистон бо сафирони кишварҳои хориҷ дар Ҷумҳурии Тоҷикистон ва ташкилотҳои байналмилалӣ баргузор гардида, инчунин, дар ин давра 165 сафари хориҷӣ ба анҷом расидааст.

Ҳамчунин, дар давраи ҳисоботӣ байни Вазорати маориф ва илми Ҷумҳурии Тоҷикистон бо Ҳайати Шафқат созишномаи ҳамкорӣ ба имзо расида, айни ҳол 7 санади дигар дар баррасии ҷонибҳо қарор дорад.

Дар баробари ин, дар ин давра барномаи Анҷумани 6-уми омӯзгорон ва кормандони соҳаи маорифи кишварҳои иштирокчии ИДМ омода гардида, бо кишварҳои аъзои Шӯро оид ба ҳамкорӣ дар соҳаи маорифи кишварҳои иштирокчии ИДМ мувофиқа гардид. Раванди қабули ҳуҷҷатҳои номзадҳо аз кишварҳои узви Шӯрои мазкур ба Фестивали педагогӣ идома дорад.

Дар ин давра, фаъолияти шуъбаҳои робитаҳои хориҷии муассисаҳои таҳсилоти олии касбии ҳудуди шаҳри Душанбе ва вилояти Хатлон вобаста ба самтҳои фаъолият санҷида шуд.

Санҷиш нишон дод, ки дар баъзе муассисаҳои таълимӣ ҳуҷҷатгузорӣ тибқи “Қоидаҳои қабули довталабон-шаҳрвандони хориҷӣ ва шахсони бешаҳрванд ба муассисаҳаи таҳсилоти ибтидоӣ, миёна ва олии касбии Ҷумҳурии Тоҷикистон” ба роҳ монда нашуда, асосан талаботи банди 16-и қоида риоя карда намешавад.