Зимни суҳбат Р. Саидзода-вазири маориф ва илм аз ҳамкориҳои судманди ҷойдошта ёдовар шуда, иброз дошт, ки Бонки ҷаҳонӣ давоми 20 сол аст, ки бо Вазорати маориф ва илм ҳамкориро ба роҳ мондааст ва  ҷиҳати рушди соҳаи маориф як қатор корҳои судмандро анҷом додааст, ки лоиҳаҳои гузариши муассисаҳои таълимӣ ба маблағгузории меъёрӣ, низоми иттилоотии идоракунии соҳаи маориф, таъсиси Маркази миллии тестӣ ва таҳияи низоми ягонаи имтиҳонсупорӣ тавассути ин марказ, таълими муносибати босалоҳият, коркарди лоиҳаи низоми баҳогузории синфҳои ибтидоӣ, татбиқи лоиҳаи “Рушди таҳсилоти олӣ”, аз курсҳои омӯзишӣ ва бозомӯзӣ гузаронидани беш аз 6 ҳазор омӯзгор, нашри беш аз 9 миллион китоби дарсӣ, таъмиру сохтмони беш аз 300 муассисаи таълимӣ аз зумраи онҳост.

-Бо вуҷуди корҳои анҷомдодаистода ҳанӯз ҳам чанд мушкилоте ҷой дорад, ки дар ҳамбастагӣ бояд ҷиҳати рафъи онҳо мусоидат намуд ва яке аз ин мушкилот бо назардошти афзоиши босуръати аҳолӣ норасоии ҷойи нишаст ва зарурати сохтмони муассисаҳои таълимӣ мебошад ва умедворем, ки Бонки ҷаҳонӣ дар бунёду таҷдиди муассисаҳои нави таълимии замонавӣ моро дастгирӣ хоҳад кард, - зикр кард вазир. – Айни замон, муассисаҳои таълимие вуҷуд доранд, ки ҳанӯз солҳои 20-30-и асри гузашта сохта шуда, имрӯз дар ҳолати садамавӣ қарор доранд ё маҳаллаҳои зиёди навбунёд аст, ки ниёз ба сохтмони мактабҳо аст. Ҷиҳати ҳалли мушкилоти номбаршуда Ҳукумати Ҷумҳурии Тоҷикистон тамоми чораҳоро андешида истодааст ва ба бахши хусусӣ тамоми имтиёзҳо дода шуда, ҳамкорию дастгирии шарикони рушд низ назаррас аст. 

Озан Севимли-намояндаи доимии Бонки ҷаҳонӣ дар Тоҷикистон зикр кард, ки дар низоми кории Бонки ҷаҳонӣ инсон сармояи асосӣ ба ҳисоб меравад ва маорифро яке аз сутунҳои асосии ин сармоя меҳисобанд. Ҳамзамон, таъкид намуд, ки аҳамияти сармоягузорӣ ба сармояи инсон дар сандуқи ҷорабиниҳое, ки Бонки ҷаҳонӣ дар Тоҷикистон амал мекунад, афзуда истодааст. Айни ҳол мо дар таҳияи лоиҳаи ҷадид қарор дорем ва ҳангоми он ки мо бо намояндагони вазорат ҳамкории зичро дар роҳи таҳияи ин лоиҳа ба роҳ монем, мехоҳем, ки лоиҳаи мазкур ба афзалиятҳо ва ҳадафҳои стратегии шумо низ мувофиқат намояд. 

-Лоиҳае, ки мо бо намояндагони соҳаи маориф таҳия карда истодаем “Муҳити омӯзиш заминаи таҳсилоти босифат” унвон дорад ва лоиҳаи мазкур сандуқи 50 млн долларро дар бар мегирад. Лоиҳаи зикргадида ба такмил ва тақвияти сифат ва устуворӣ дар мактабҳои таҳсилоти миёнаи умумии ҷумҳурӣ амалӣ карда мешавад. Гурӯҳҳои кории ҳардуҷониб корро ба таври мунтазам бурда истодаанд, то ин ки лоиҳаро барои тасдиқ ба роҳбарияти Бонки ҷаҳонӣ моҳи июн ва ё июли соли 2022 пешниҳод намоянд. Айни замон, лоиҳаи “Рушди таҳсилоти олӣ” хуб пеш рафта истодааст ва як чорабиние, ки боқӣ мондааст, дар ҳоли амалӣ гардонидани он ҳастем. Нисбати лоиҳаи “Рушди бармаҳали кӯдак” бояд гуфт, ки ин лоиҳа аллакай фаъолияти худро оғоз кардааст ва айни ҳол мо таъсири онро мушоҳида карда истодаем, - зимни суҳбати онлайнӣ қайд кард Ҳари Патронис-роҳбари амалияҳои Бонки ҷаҳонӣ дар минтақаи Аврупо. 

Дар охир ҷонибҳо ба мувофиқа расиданд ва таъкид доштанд, ки ҷиҳати рушди ҳамкориҳо тамоми чораҳои заруриро меандешанд.