16.04.2025
Дар бинои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷаласаи навбатии Шурои ҳамоҳангсозии байнисоҳавӣ оид ба ғизои мактабӣ баргузор гардид.
Дар ҷаласа Музаффарзода Бадриддин, муовини вазири маориф ва илми Ҷумҳурии Тоҷикистон, масъулини соҳа ва аъзоёни Шуро ширкат варзида, масъалаҳои муҳими марбут ба ғизои мактабӣ мавриди баррасӣ қарор гирифтанд.
Зимни нишаст раванди амалисозии “Барномаи давлатии рушди ғизои мактабӣ дар Ҷумҳурии Тоҷикистон барои солҳои 2022 -2027” ҷамъбаст гардида, дурнамо ва масъалаҳои ҷорӣ дар самти таъмини ғизои солим ба кӯдакону наврасон муҳокима шуданд.
Аъзоёни Шуро ҳамчунин пешниҳодҳои худро доир ба такмили бандҳои дахлдори лоиҳаи Кодекси маорифи Ҷумҳурии Тоҷикистон ҷиҳати беҳтарсозии ташкил ва танзими ғизои мактабӣ дар муассисаҳои томактабӣ, таҳсилоти умумӣ ва махсус ироа намуданд.
Дар ҷаласа инчунин масъалаҳои омодагӣ ба сафари назоратӣ ба муассисаҳои таълимии манотиқи кишвар, баргузории ҷаласаҳои сайёр ва Форуми байналмилалии ғизои мактабӣ, ки моҳи ноябри соли 2025 баргузор хоҳад шуд, мавриди баррасӣ қарор гирифтанд.
Хабарҳои дигар
-
ТРЕНИНГИ ОМӮЗИШӢ БАРОИ ОМӮЗГОРОНИ МУАССИСАҲОИ ҲАДАФИИ ЛОИҲАИ «ТАКМИЛИ ТАҲСИЛОТИ МИЁНА ДАР СОҲАҲОИ ИЛМҲОИ ТАБИӢ, ТЕХНОЛОГӢ, МУҲАНДИСӢ ВА МАТЕМАТИКА» Рӯзҳои 14-15 июли соли 2025 дар толори тренингии Гурӯҳи идоракунии лоиҳаи “Такмили таҳсилоти миёна дар соҳаҳои илмҳои табии, технологӣ, муҳандисӣ ва математика” тренинги омӯзишӣ таҳти унвони “Муаррифии лоиҳаи “STEM” баргузор шуд. Дар он муовинони ректорон, деканҳо, омӯзгорони фанҳои марбут ба STEM ва методистони Коллеҷи омӯзгории шаҳри Душанбе ва Донишгоҳи давлатии омӯзгории Тоҷикистон ба номи С.Айнӣ иштирок намуданд. Дар ҷараёни тренинг мутахассисони лоиҳа ба иштирокдорон мавзуъҳои муҳимми зеринро пешниҳод намуданд: • шиносоӣ бо мазмун ва ҳадафҳои асосии лоиҳа; • роҳҳои беҳтар намудани таълими STEM барои омӯзгорон ва хонандагон тавассути машғулиятҳо, тренингҳо ва конфронсҳо; • фаҳмондани консепсия ва татбиқи барномаи таълимии гендерӣ дар соҳаи STEM; • муҳокимаи масъалаҳои марбут ба мафҳум, аҳамият ва мушкилоти гендерӣ дар таълими фанҳои дақиқ; • омӯзиши паёмадҳои тағйирёбии иқлим ва роҳҳои муқовимат бо офатҳои табиӣ; • пешгирии истисмори шаҳвонӣ, зӯроварӣ ва озори ҷинсӣ дар доираи татбиқи лоиҳа; • шиносоӣ бо сиёсати давлатии Ҷумҳурии Тоҷикистон оид ба рушди илмҳои табиӣ ва санадҳои ҳуқуқии марбут ба ин самт. Қайд гардид, ки баргузории чунин тренингҳо дар оянда барои омӯзгорони дигар муассисаҳои таълимии шомили лоиҳа низ ба нақша гирифта шудааст.
58
15.07.2025 -
Сафари расмии ҳайати Тоҷикистон ба Бавария ҷиҳати таҳкими ҳамкориҳо дар соҳаи таҳсилоти касбӣ 13 июли соли 2025 ҳайати Ҷумҳурии Тоҷикистон сафари омӯзиширо ба Баварияи Ҷумҳурии Федеративии Олмон оғоз намуда, ҳадафи он шиносоӣ бо низоми дуалии таҳсилоти касбии Олмон мебошад. Ин сафар дар доираи лоиҳаи Иттиҳоди Аврупо «Дастгирии соҳаҳои маориф ва меҳнати Ҷумҳурии Тоҷикистон» ташкил гардид. Ҳайати расмиро ташкил медоданд: • Фарҳод Раҳимӣ, раиси Кумитаи таҳсилоти ибтидоӣ ва миёнаи касбӣ назди Ҳукумати Ҷумҳурии Тоҷикистон; • Солеха Холмаҳмадзода, вазири меҳнат, муҳоҷират ва шуғли аҳолӣ; • Штефан Зиверт, роҳбари лоиҳаи Иттиҳоди Аврупо. Ҳадафи асосии сафар омӯзиши таҷрибаи Олмон дар самти таҳсилоти дуалӣ ва баррасии имкониятҳои ҳамкорӣ бо муассисаҳои таҳсилоти касбӣ дар Бавария мебошад. Дар доираи сафар ҳайати Тоҷикистон аз муассисаҳои таълимии шаҳрҳои Ротенбург ва Хам боздид ба амал оварда, бо тарзи муттаҳидсозии назария ва таҷриба дар низоми таҳсилоти касбии Олмон шинос гардид. Ин ташаббус намунаи равшани он аст, ки кумаки Иттиҳоди Аврупо ба рушди малакаҳо, афзоиши имкониятҳои шуғл ва эҷоди шароити мусоид барои ҷавонони Тоҷикистон мусоидат менамояд.
35
14.07.2025 -
БАРГУЗОРИИ ТРЕНИНГИ ОМӮЗИШӢ ДАР ШАҲРИ ХУҶАНД Рӯзҳои 9 ва 10 июли соли 2025 дар шаҳри Хуҷанди вилояти Суғд тренинги омӯзишӣ дар мавзуи “Муаррифии лоиҳаи “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика (STEM)” баргузор гардид. Тренинги мазкур барои директорон, муовинони директор, омӯзгорони фанҳои STEM, методистон ва кормандони шуъбаҳои маорифи шаҳри Панҷакент ва ноҳияи Мастчоҳ доир шуд. Зимни баргузории тренинг, мутахассисони лоиҳа доир ба мазмуну муҳтавои лоиҳа ба иштирокчиён маълумот бо рӯнамоҳо пешниҳод намуданд. Аз ҷумла, масъалаҳои рушди таълими фанҳои STEM, имкониятҳои иловагӣ барои омӯзгорону хонандагон тавассути семинарҳо, тренингҳо ва конфронсҳо, татбиқи консепсия ва барномаи таълими гендерӣ дар таълими STEM, фаҳмиш ва маҳдудиятҳои гендерӣ дар муҳити таълимӣ, тағйирёбии иқлим ва вокуниш ба офатҳои табиӣ, ҳамчунин роҳҳои пешгирии зӯроварӣ ва озори ҷинсӣ баррасӣ гардиданд. Илова бар ин, сиёсати давлатӣ дар соҳаи дастгирии илмҳои дақиқ ва санадҳои меъёрии ҳуқуқии қабулшуда низ мавриди муҳокима қарор гирифт.
61
10.07.2025
