Семинари дуюми М&А: Тақвияти мониторинг ва арзёбӣ
07.12.2024
Аз 4 то 6 декабри соли 2024, лоиҳаи “Дастгирии Иттиҳоди Аврупо ба соҳаҳои маориф ва меҳнати Ҷумҳурии Тоҷикистон” семинари дуюм оид ба Мониторинг ва Арзёбӣ (М&А)-ро баргузор намуд, ки ҳадафи он тақвияти малакаҳо ва ҷорӣ намудани таҷрибаҳои инноватсионӣ буд.
Дар ҷараёни семинар мавзӯъҳо, аз қабили хулосагирӣ аз омӯзишҳои онлайнӣ, таҳияи барномаи сертификатсияи М&А, баррасии ояндаи М&А дар соли 2030 ва истифодаи зеҳни сунъӣ барои мониторинги лоиҳаҳо баррасӣ гардиданд. Иштирокчиён аз Донишкадаи такмили ихтисос ва бозомӯзии кормандони соҳаи маориф, Институти бозомӯзии Вазорати меҳнат ва муҳоҷират ва дигар ҷонибҳои манфиатдор дар муҳокимаҳо ва машғулиятҳо иштирок намуда, чаҳорчӯбаҳо ва нақшаҳои соли 2025-ро тартиб доданд.
Ин семинар як қадами дигар дар роҳи тақвияти иқтидори М&А ва мутобиқ шудан ба таҷрибаҳои байналмилалӣ мебошад.
Хабарҳои дигар
-
НАТИҶАГИРӢ АЗ РАФТИ ИҶРОИ ЛОИҲАИ “КӮМАКИ ИТТИҲОДИ АВРУПО БА СОҲАҲОИ МАОРИФ ВА МЕҲНАТИ ҶУМҲУРИИ ТОҶИКИСТОН” 29-уми январи соли ҷорӣ дар толори меҳмонхонаи “Ҳилтон” вобаста ба натиҷагирӣ аз рафти иҷрои лоиҳаи “Кӯмаки Иттиҳоди Аврупо ба соҳаҳои маориф ва меҳнати Ҷумҳурии Тоҷикистон” семинар баргузор гардид. Дар семинари мазкур муовини вазири маориф ва илм Равшан Каримзода, муовини раиси Кумита оид ба таҳсилоти ибтидоӣ ва миёнаи касбӣ Алишер Ализода, роҳбари шуъбаи ҳамкорӣ Изабел Уриз, менеҷер оид ба соҳаи маорифи намояндагии Иттиҳоди Аврупо дар Ҷумҳурии Тоҷикистон Диана Димова, намояндагони Вазорати меҳнат, муҳоҷират ва шуғли аҳолӣ, сардорон ва кормандони раёсату шуъбаҳои дахдори дастгоҳи марказӣ ва муассисаҳои тобеи Вазорати маориф ва илм иштирок намуданд. Зимни сухани ифтитоҳӣ муовини вазири маориф ва илм аз таваҷҷуҳу ғамхориҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба соҳаи маориф ёдовар шуда, ҳамкориҳои Вазорати маориф ва илми Ҷумҳурии Тоҷикистонро бо шарикони рушд дар самтҳои гуногуни соҳа дар партави сиёсати маорифпарваронаи Сарвари давлат боиси рушди соҳаи маориф унвон намуд. Сипас, намояндагони лоиҳа дар ҳамкорӣ бо намояндагони соҳаи маориф аз корҳои басомонрасида дар доираи лоиҳаи мазкур натиҷагирӣ намуда, нақшаҳои ва муҳлати амалишавии онҳоро пешниҳоди ҳозирин намуданд. Дар охир гуфта шуд, ки рушди босуботи соҳаи маориф тақозо мекунад, ки низоми маориф ба стандартҳои байналмилалӣ мутобиқ карда шавад ва ҳамкориҳо бо ташкилоту созмонҳои байналмилалӣ вусъат пайдо кунад.
63
29.01.2025 -
МУҲОКИМАИ “ЧАҲОРЧӮБАИ МИЛЛИИ РУШДИ ТАҲСИЛОТ ДАР ҶУМҲУРИИ ТОҶИКИСТОН” Имрӯз, 27-уми декабри соли 2024 бо ташаббуси Вазорати маориф ва илми Ҷумҳурии Тоҷикистон дар Китобхонаи миллии Тоҷикистон муҳокимаи “Чаҳорчӯбаи миллии рушди таҳсилот дар Ҷумҳурии Тоҷикистон” доир гардид. Дар муҳокимаи “Чаҳорчӯбаи миллии рушди таҳсилот дар Ҷумҳурии Тоҷикистон” муовини вазири маориф ва илм Сафарзода Дилшод, сардори раёсати таҳсилоти миёнаи умумии вазорат, ҳамҳангсози лоиҳаи “Муҳити таълим – асоси таҳсилоти босифат”, намояндагони Кумитаи падару модарони муассисаҳои таҳсилоти миёнаи умумии шаҳри Душанбе иштирок намуданд. Зимни муҳокима муовини вазири маориф ва илм қайд намуд, ки Ҳукумати Ҷумҳурии Тоҷикистон маорифро ҳамчун самти калидии пешрафти кишвар ба таври мунтазам рушд ва тавсеа мебахшад. Роҳбарияти олии кишвар пайваста кӯшиш мекунанд, ки тамоми сатҳҳои таҳсилот, аз боғча то мактаби олӣ таълим ба талаботи ҷаҳонӣ ва эҳтиёҷоти ҷомеа мутобиқ карда шаванд. Ҳадафи асосии “Чаҳорчӯбаи миллии рушди таҳсилот дар Ҷумҳурии Тоҷикистон” тарҳрезӣ ва татбиқ кардани як низоми таълимие мебошад, ки дастрасӣ ва сифати таҳсилотро баланд бардошта, барои омодасозии насли нав ба талаботи бозори меҳнат дар арсаи ҷаҳонӣ ҷавобгӯ бошад. Зеро рушди устувори кишвар аз рушди соҳаи маориф вобастагии калон дорад. Инчунин дар доираи ин чаҳорчӯба бунёди муассисаҳои таълимии замонавӣ низ дар назар дошта шудааст. Гуфта шуд, ки “Чаҳорчӯбаи миллии рушди таҳсилот дар Ҷумҳурии Тоҷикистон” самтҳои муҳимми стратегии таъмини дастрасии баробар ба таҳсилот дар муҳити фарогир ва муҷаҳҳаз, баланд бардоштани сифати таълим, ворид намудани технологияи муосир ба раванди таълим ва ҳамкории оила ва муассисаҳои таълимиро дар бар мегирад. Дар идома як қатор иштирокчиёни чорабинӣ вобаста ба моҳияти “Чаҳорчӯбаи милли рушди таҳсилот дар Ҷумҳурии Тоҷикистон” фикру андешаҳои худро ироа намуда, таъкид гардид, ки “Чаҳорчӯбаи милли рушди таҳсилот дар Ҷумҳурии Тоҷикистон” қадами дигаре барои рушди маориф дар партави сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буда, дар ҳамкорӣ бо шарикони рушд амалӣ карда мешавад. Ҳадафи асосии он фароҳам овардани муҳити таълими созгор ба ҳар як хонандаи тоҷику тоҷикистонӣ мебошад. Таҳияи ин ҳуҷҷати муҳим дар Паёми Президенти Ҷумҳурии Тоҷикистон 28 декабри соли 2023 «Дар бораи самтҳои асосии сиёсати дохилӣ ва хориҷии ҷумҳурӣ» ироа гардида буд. Маркази матбуоти Вазорати маориф ва илми Ҷумҳурии Тоҷикистон
409
27.12.2024 -
Баргузории семинари якум оид ба дурнамои малакаҳо Дар доираи лоиҳаи “Дастгирии Иттиҳоди Аврупо ба соҳаҳои маориф ва меҳнати Ҷумҳурии Тоҷикистон”, ки бо маблағгузории Иттиҳоди Аврупо амалӣ мегардад, якум семинари оид ба Дурнамои малакаҳо баргузор гардид. Ҳадафи семинар баланд бардоштани иқтидори мақомоти Тоҷикистон барои мутобиқ намудани малакаҳои кадрҳо бо талаботи бозори меҳнат буд. Иштирокчиён бо усулҳои дурнамои малакаҳо шинос шуда, соҳаҳои асосӣ, аз ҷумла технологияҳои иттилоотӣ, гузариш ба энергетикаи сабз ва сохтмонро барои таҳқиқоти оянда муайян намуданд. Ҳамчунин, нақшаи корӣ барои қадамҳои минбаъда таҳия гардид. Ин ташаббус, ки бо маблағгузории Иттиҳоди Аврупо дастгирӣ шудааст, як қадами муҳим дар роҳи пешгӯии ниёзҳои ояндаи бозори меҳнат дар Тоҷикистон мебошад.
134
13.12.2024
