05.08.2026
Дар доираи Нақшаи чорабиниҳои Вазорати маориф ва илми Ҷумҳурии Тоҷикистон ва Мақомоти иҷроияи ҳокимияти давлатии шаҳри Душанбе бахшида ба таҷлили 35-солагии Истиқлоли давлатии Ҷумҳурии Тоҷикистон, 4 августи соли 2026 дар боғи фарҳангӣ-фароғатии «Кӯли ҷавонон»-и шаҳри Душанбе бо ташаббуси Донишгоҳи технологии Тоҷикистон аз ҷониби ансабли "Зуҳал"- и Донишгоҳ барномаи фарҳангӣ баргузор гардид.
Дар чорабинӣ роҳбарият, устодон, кормандон ва донишҷӯёни донишгоҳ бо пешниҳоди суруду таронаҳои ватандӯстона, рақсҳои миллӣ ва барномаи ҷолиби консертӣ иштирок намуда, ба сокинону меҳмонони пойтахт рӯҳияи идона ва фазои гарми фарҳангӣ эҳдо намуданд.
Барномаи фарҳангӣ ба тарғиби арзишҳои миллӣ, таҳкими ҳисси ватандӯстӣ, худшиносии миллӣ, арҷгузорӣ ба дастовардҳои даврони соҳибистиқлолӣ ва муаррифии фарҳанги ғании тоҷикон равона гардида, боиси болидахотирии иштирокчиён гардид.
Қобили зикр аст, ки тибқи нақшаи тасдиқгардидаи Вазорати маориф ва илми Ҷумҳурии Тоҷикистон, бахшида ба 35-солагии Истиқлоли давлатии Ҷумҳурии Тоҷикистон ҳар ҳафта дар боғҳои фарҳангӣ-фароғатии пойтахт бо иштироки муассисаҳои таҳсилоти олии касбӣ чорабиниҳои фарҳангиву маърифатӣ баргузор мешаванд.
Хабарҳои дигар
-
МУЛОҚОТИ МУОВИНИ ЯКУМИ ВАЗИРИ МАОРИФ ВА ИЛМ БО НАМОЯНДАИ ВАЗОРАТИ МАОРИФ ВА ТАҲСИЛОТИ ОЛИИ ДАВЛАТИ ҚАТАР Имрӯз, 5 августи соли 2026 дар Вазорати маориф ва илми Ҷумҳурии Тоҷикистон мулоқоти муовини якуми вазири маориф ва илм Ҳомид Ҳошимзода бо доктор Ҳориб Муҳаммад Саид Ал-Ҷабрӣ, намояндаи Вазорати маориф ва таҳсилоти олии Давлати Қатар баргузор гардид. Дар оғози мулоқот муовини якуми вазири маориф ва илм меҳмононро ба Ҷумҳурии Тоҷикистон ва Вазорати маориф ва илм хайрамақдам гуфта, сафари ҳайати Давлати Қатарро нишонаи муносибатҳои дӯстона ва таваҷҷуҳи муштараки ҷонибҳо ба густариши ҳамкориҳо дар соҳаҳои маориф ва илм арзёбӣ намуд. Зимни мулоқот таъкид гардид, ки муносибатҳои Тоҷикистону Қатар бар асоси эҳтироми мутақобил, ҳусни тафоҳум ва иродаи сиёсии роҳбарони олии ду давлат пайваста рушд намуда, ҳамкориҳои кишварҳо дар соҳаи маориф ва илм дорои заминаи устувори ҳуқуқӣ мебошанд. Аз ҷумла, зикр гардид, ки Созишнома байни Ҳукумати Ҷумҳурии Тоҷикистон ва Ҳукумати Давлати Қатар оид ба ҳамкорӣ дар соҳаи маориф, таҳсилоти олӣ ва таҳқиқоти илмӣ, ки моҳи феврали соли 2017 ба имзо расидааст, барои табодули донишҷӯёну омӯзгорон, татбиқи таҳқиқоти муштараки илмӣ, иштирок дар конференсияву ҳамоишҳои байналмилалӣ, омӯзиши технологияҳои муосири таълимӣ ва мубодилаи маводи илмию таълимӣ имкониятҳои мусоид фароҳам овардааст. Муовини якуми вазири маориф ва илм аз ҷудо гардидани бурсияҳои таҳсилӣ аз ҷониби Давлати Қатар барои шаҳрвандони Ҷумҳурии Тоҷикистон изҳори қаноатмандӣ намуда, зиёд намудани шумораи чунин бурсияҳоро аз рӯйи ихтисосҳои муҳандисӣ, технологияҳои иттилоотӣ, зеҳни сунъӣ, тиб, иқтисод ва дигар самтҳои барои иқтисоди миллӣ афзалиятнок муҳим арзёбӣ кард. Дар идома қайд гардид, ки Донишгоҳи миллии Тоҷикистон, Донишгоҳи славянии Россия ва Тоҷикистон ва Донишгоҳи давлатии Хуҷанд ба номи академик Бобоҷон Ғафуров дорои имкониятҳои муносиби таълимӣ, кадрӣ ва инфрасохторӣ буда, метавонанд масъалаи қабули донишҷӯёни қатариро аз рӯйи ихтисосҳои мувофиқ баррасӣ намоянд. Ҳамзамон, ҷонибҳо пешниҳоди таъсиси Маркази омӯзиши забонҳои арабӣ ва англисӣ дар шаҳри Душанбе, рушди омӯзиши забонҳои хориҷӣ ва густариши ҳамкорӣ бо Фонди «Маориф аз ҳама боло»-ро ҷиҳати бунёд ва муҷаҳҳазгардонии муассисаҳои таълимӣ дар Ҷумҳурии Тоҷикистон мавриди баррасӣ қарор доданд. Дар анҷоми мулоқот ҷонибҳо омодагии худро барои татбиқи тавофуқҳои ҳосилшуда, роҳандозии ташаббусҳои нави муштарак ва ба сатҳи сифатан нав баровардани ҳамкориҳои Тоҷикистону Қатар дар соҳаи маориф, таҳсилоти олӣ ва илм изҳор намуданд. Маркази матбуоти Вазорати маориф ва илми Ҷумҳурии Тоҷикистон
21
05.08.2026 -
ЧОРАБИНИИ ФАРҲАНГӢ БА ИФТИХОРИ 35-СОЛАГИИ ИСТИҚЛОЛИ ДАВЛАТӢ Шоми 4 августи соли 2026 дар доираи Нақшаи чорабиниҳои Вазорати маориф ва илми Ҷумҳурии Тоҷикистон бахшида ба ҷашни 35-солагии Истиқлоли давлатии Ҷумҳурии Тоҷикистон ва бо ибтикори раёсати Донишгоҳи байналмилалии сайёҳӣ ва соҳибкории Тоҷикистон дар Боғи фарҳангӣ-фароғатии ба номи Куруши Кабири шаҳри Душанбе чорабинии фарҳангӣ баргузор гардид. Дар чорабинӣ барномаи рангини фарҳангӣ иборат аз суруду таронаҳои ватандӯстона ва дилнишин пешкаши сокинону меҳмонони пойтахт гардида, фазои идона ва руҳияи баланди миллӣ фароҳам овард. Баргузории чунин чорабиниҳо дар доираи таҷлили ҷашни 35-солагии Истиқлоли давлатии Ҷумҳурии Тоҷикистон ба таҳкими эҳсоси ватандӯстӣ, худшиносии миллӣ, арҷгузорӣ ба дастовардҳои даврони соҳибистиқлолӣ ва тарғиби арзишҳои фарҳангии миллӣ миёни ҷавонон мусоидат менамояд.
16
05.08.2026 -
ҶАЛАСАИ КОРӢ ВОБАСТА БА ИҶРОИ ДАСТУРУ СУПОРИШҲОИ ПЕШВОИ МИЛЛАТ МУҲТАРАМ ЭМОМАЛӢ РАҲМОН 5 августи соли 2026 дар Донишкадаи ҷумҳуриявии такмили ихтисос ва бозомӯзии кормандони соҳаи маориф ҷаласаи корӣ таҳти раёсати муовини вазири маориф ва илми Ҷумҳурии Тоҷикистон Илҳомуддин Иброҳимзода баргузор гардид. Дар ҷаласа сардорони воҳидҳои сохтории Вазорати маориф ва илм, роҳбарону намояндагони муассисаҳои таҳсилоти олии касбӣ ба таври ҳузурӣ ва маҷозӣ иштирок намуданд. Муовини вазири маориф ва илм зимни суханронӣ таъкид намуд, ки соҳаи маориф таҳти таваҷҷуҳи доимии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, татбиқи саривақтии дастуру супоришҳои роҳбарияти олии мамлакат, баланд бардоштани сифати таҳсилот ва омодагии ҳамаҷониба ба соли нави таҳсил аз вазифаҳои афзалиятноки соҳа мебошанд. Дар ҷаласа масъалаҳои омодагии муассисаҳои таҳсилоти олии касбӣ ба соли нави таҳсил, иҷрои нақшаи қабули донишҷӯён пас аз тақсимоти Маркази миллии тестӣ, таҷдиди Стандарти давлатии таҳсилоти олии касбӣ ва нақшаву барномаҳои таълимӣ, омода намудани омӯзгорони самти илмҳои табиатшиносӣ, дақиқ ва риёзӣ, таъсиси ихтисосҳо дар самти зеҳни сунъӣ, технологияҳои иттилоотӣ ва низоми дуалии таҳсил, рушди аккредитатсияи байналмилалӣ, густариши ҳамкориҳои байналмилалӣ ва ҷалби донорҳо, тарбияи идеологӣ, татбиқи барномаҳои фарҳангӣ, инчунин иҷрои қарори ҳайати мушовараи Вазорати маориф ва илми Ҷумҳурии Тоҷикистон аз 14 июли соли 2026, №10 «Оид ба ҷамъбасти фаъолияти Вазорати маориф ва илми Ҷумҳурии Тоҷикистон дар нимсолаи якуми соли 2026 ва вазифаҳо то охири сол» мавриди баррасӣ қарор гирифтанд. Ҳамзамон, иштирокчиён бо омодагии Донишкадаи ҷумҳуриявии такмили ихтисос ва бозомӯзии кормандони соҳаи маориф барои оғози курсҳои такмили ихтисос шинос гардида, аз синфхонаҳо ва маҷмӯи маводи таълимӣ боздид намуданд. Зикр гардид, ки тамоми маводи таълимӣ мутобиқ ба талаботи муосир таҳия гардида, ҳам дар шакли электронӣ ва ҳам чопӣ омода мебошад. Ректори донишкада Н. Мирзозода зимни муаррифии маҷмӯи маводи таълимӣ иброз дошт, ки аз 10 августи соли 2026 курсҳои такмили ихтисос бо истифода аз низоми модулӣ оғоз гардида, барои ҳамаи шунавандагон маводи таълимӣ пешакӣ омода шудааст. Ба гуфтаи ӯ, Донишкада ва филиалҳои он барои қабули шунавандагон пурра омода буда, таҷрибаи ҷорӣ намудани таҳсилоти ба салоҳият асосёфтаро минбаъд низ густариш хоҳанд дод. Дар анҷоми ҷаласа ба роҳбарони воҳидҳои сохторӣ ва муассисаҳои таҳсилоти олии касбӣ ҷиҳати иҷрои саривақтии вазифаҳои гузошташуда, таъмини омодагии босифат ба соли нави таҳсил ва татбиқи пурраи дастуру супоришҳои роҳбарияти олии мамлакат супоришҳои мушаххас дода шуданд.
33
05.08.2026
