19.03.2025
Ҷаласаи якуми ҳайати Комиссияи Озмуни ҷумҳуриявии «Фурӯғи субҳи доноӣ китоб аст» дар соли 2025 таҳти раёсати раиси комиссияи озмун, муовини Сарвазири Ҷумҳурии Тоҷикистон Дилрабо Мансурӣ баргузор гардид. Дар ин хусус ба АМИТ «Ховар» аз маркази матбуоти Вазорати маориф ва илми Ҷумҳурии Тоҷикистон хабар доданд.
Раиси комиссия доир ба вазифаҳои Комиссияи ҷумҳуриявӣ ва салоҳияти он тибқи Низомномаи Озмуни ҷумҳуриявии «Фурӯғи субҳи доноӣ китоб аст» сухан гуфта, вазифаҳои комиссияро дар самти баргузор намудани озмун иброз намуд.
Иброз гардид, ки соли ҳафтум аст, ки озмун таҳти сарпарастии Президенти Ҷумҳурии Тоҷикистон муҳтарам Эмомалӣ Раҳмон бо мақсади баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ ва тақвияти ҷаҳони маънавӣ дар байни аҳолии мамлакат баргузор мегардад.
Озмун байни хонандагони муассисаҳои таҳсилоти миёнаи умумӣ, хонандагон ва донишҷӯёни муассисаҳои таҳсилоти ибтидоӣ, миёна ва олии касбӣ, баъд аз муассисаҳои таҳсилоти касбӣ, омӯзгорони ҳамаи зинаҳои таҳсилот, ходимони илмию адабии муассисаҳои илмиву эҷодӣ, фарҳангу санъат, калонсолон, намояндагони касбу кори гуногун ва дигар табақаҳои аҳолии мамлакат доир мегардад.
Тибқи Амри Президенти Ҷумҳурии Тоҷикистон аз 2 январи соли 2025 ба Низомномаи Озмуни ҷумҳуриявии «Фурӯғи субҳи доноӣ китоб аст» тағйиру иловаҳо ворид гардида, дар соли 2025 номинаи эҷоди назм ва наср тибқи хулоса ва пешниҳоди коршиносон аз низомнома берун карда шуд. Ҳамзамон барои боз ҳам такмил ва таҳким бахшидани раванди баргузории озмун ва ҳавасмандсозии бештари иштирокчиён бо дастури Роҳбари давлат ба Низомномаи озмун дар соли 2025 навгониҳо ворид карда шуданд.
Ҳамин тавр, вобаста ба иштирокдорони озмун маҳдудият бартараф карда шуда, минбаъд дар озмун дар баробари шаҳрвандони Ҷумҳурии Тоҷикистон шаҳрвандони кишварҳои хориҷӣ, аз ҷумла тамоми тоҷикони ҷаҳон ва ҳамватанони бурунмарзӣ низ метавонанд фаъолона иштирок намоянд.
Бар замми ин, мукофотпулӣ барои ғолибони озмун ду баробар зиёд карда шуда, маблағи умумӣ барои баргузорӣ ва қадршиносии ғолибони озмун 6 670 000 (шаш миллиону шашсаду ҳафтод ҳазор) сомониро ташкил медиҳад.
Дар ҷаласа масъалаҳои зиёде, аз қабили дастрас намудани китобҳои бадеии электронӣ ба иштирокчиён, аз рӯйи принсипи ягона баҳо гузоштан ба иштирокчиён мавриди баррасӣ қарор гирифт.
Инчунин таъкид шуд, ки ба хотири таъмини пурраи шаффофият, пешгирӣ аз ҳолатҳои баҳогузории ғайримеъёрӣ ва қонеъ гардонидани дархости иштирокчиён зарур аст, ки баргузории даврҳои сеюм ва чоруми озмун пурра ба навор гирифта шавад.
Хабарҳои дигар
-
Дар Донишгоҳи давлатии Кӯлоб озмоишгоҳи «Химияи аналитикӣ» ва синфхонаи компютерӣ ифтитоҳ ёфт Дар Донишгоҳи давлатии Кӯлоб ба номи Абуабдуллоҳи Рӯдакӣ озмоишгоҳи химиявии «Химияи аналитикӣ» ва синфхонаи компютерӣ мавриди истифода қарор дода шуд. Дар ин хусус ба АМИТ «Ховар» аз ин донишгоҳ хабар доданд. Зимни ифтитоҳи озмоишгоҳи химиявии «Химияи аналитикӣ» ва синфхонаи компютерӣ ректори донишгоҳ, профессор Дилшод Раҳмон аз нақш ва аҳамияти Наврӯзи байналмилалӣ дар таҳкими ҳамбастагӣ, эҳёи суннатҳои миллӣ ва тарғиби фарҳанги сулҳу дӯстӣ ёдовар шуда, бо руҷуъ ба таъкиди Президенти Ҷумҳурии Тоҷикистон муҳтарам Эмомалӣ Раҳмон иброз дошт, ки «имрӯз бе илму инноватсия, технологияҳои иттилоотиву коммуникатсионӣ ва ташаккули ҷаҳонбинии техникӣ қадаме ба пеш гузошта намешавад». Эълон шудани «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» (2020-2040) аз ҷониби Президенти Ҷумҳурии Тоҷикистон муҳтарам Эмомалӣ Раҳмон ба омӯзиш ва рушди илмҳои риёзию табиӣ такони ҷиддӣ бахшида, барои амалӣ намудани саноатикунонии босуръати мамлакат заминаи мусоид фароҳам меорад. Озмоишгоҳҳои муосири химиявии донишгоҳ бо дастовардҳои инноватсионии илму техника муҷаҳҳаз буда, барои таълими дарсҳои самараноки озмоишии омӯзгорони фанҳои соҳавӣ, барангехтани шавқу завқи муҳассилин, ташвиқ ва ҷалби онҳо ба масири илму ихтироот, пажуҳишҳо дар мавриди обу иқлим, тадбирҳои ҳифзи пиряхҳо, ҳамгироии илм бо истеҳсолот, татбиқи ҳадафи стратегии Ҳукумати ҷумҳурӣ бобати саноатикунонии босуръати мамлакат, дарёфту коркард, пешниҳод ва татбиқи механизмҳои иқтисоди «сабз» ва таъмини рушди устувор заминаи воқеию муътамад мегузоранд.
9
26.03.2025 -
Дар деҳоти Навбаҳори ноҳияи Мастчоҳ кӯдакистон сохта мешавад Дар деҳоти Навбаҳори ноҳияи Мастчоҳ барои 120 кӯдак кӯдакистони хусусӣ бунёд мешавад. Тавре АМИТ «Ховар» бо истинод ба Мақомоти иҷроияи ҳокимияти давлатии ноҳияи Мастчоҳ хабар медиҳад, кӯдакистон аз ду ошёна иборатбуда, масоҳати умумии замини он 3500 метри мураббаъ мебошад. Лоиҳаи кӯдакистон бо дарназардошти меъёрҳои байналмилалӣ ва талаботи замони муосир таҳия шуда, барои таълиму тарбияи кӯдакон шароити беҳтарин фароҳам меорад. Бояд гуфт, ки айни замон дар деҳоти Навбаҳор як муассисаи таҳсилоти томактабӣ фаъолият дорад, ки дар он 142 кӯдак ба тарбия фаро гирифта шудаанд. Бо дарназардошти он ки аҳолии деҳот 16 ҳазор нафарро ташкил медиҳад, таъсиси кӯдакистони нав барои таъмини бештари кӯдакон бо таҳсилоти томактабӣ муҳим мебошад.
9
25.03.2025 -
Дар ЮНЕСКО аз ташаббусҳои ҷаҳонии Тоҷикистон гуфтанд Дар қароргоҳи ЮНЕСКО дар шаҳри Парижи Фаронса дар доираи таҷлили Рӯзи байналмилалии об ва Рӯзи ҷаҳонии пиряхҳо, ки бо ташаббуси Ҷумҳурии Тоҷикистон қабул гардидаанд, чорабинии сатҳи баланд доир шуд, ки дар он Вазири маориф ва илми ҷумҳурӣ Раҳим Саидзода иштирок ва суханронӣ намуд. Вазири маориф ва илм иброз дошт, ки сиёсати давлатии Ҷумҳурии Тоҷикистон дар соҳаи об ба ҳалли масъалаҳои мубрами иҷтимоиву иқтисодии минтақа ва ҷаҳон нигаронида шуда, дар ин самт мамлакати мо аз минбарҳои бонуфузи созмонҳои байналмилалӣ пешниҳодҳои мушаххас, созанда ва дурнамосоз ироа намуд ва ҳоло аз ҷониби ҷомеаи ҷаҳонӣ ҳамчун ташаббускори ин соҳаи ҳаётан муҳим пазируфта шудааст. «Боиси сарфарозии мост, ки дар натиҷаи талошҳои зиёд аз ҷониби Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон масъалаҳои вобаста ба об дар рӯзномаи ҷаҳонии рушд мақоми хосса пайдо намуда, мавриди баррасии дақиқ қарор дода шуд ва аксари ташаббусҳои байналмилалӣ оид ба ҳалли масоили об пешниҳодгардида аз ҷониби ҷомеаи ҷаҳонӣ дастгирии ҳамаҷониба ёфтаанд», — изҳор дошт ӯ. Гуфта шуд, ки тағйирёбии иқлим ба захираҳои об таъсири ҷиддӣ мерасонад. Тибқи гузоришҳои байналмилалӣ, дар соли гузашта ҳаҷми обшавии пиряхҳо ба 600 гигатон расид, ки ба 2 миллиард нафар аҳолии ҷаҳон, ки ба оби тозаи нӯшокӣ аз ҳисоби пиряхҳо дастрасӣ доранд, таъсир гузошт. Иттилоъ дода шуд, ки Тоҷикистон ҳамчун мамлакати дорои 60% захираҳои обии Осиёи Марказӣ тайи чанд даҳсолаи охир зиёда аз 1000 пиряхи худро аз даст додааст. Ин раванд оқибатҳои ҷиддии экологии худро дошта, боиси биёбоншавӣ, бӯҳрони кишоварзӣ ва деградатсияи хок мегардад. Талафоти иқтисодии Тоҷикистон аз офатҳои табиии вобаста ба об солона беш аз 400 миллион долларро ташкил медиҳад. Вазири маориф ва илм инчунин аз ташаббусҳои ҷаҳонии Тоҷикистон дар самти ҳифзи захираҳои об ва иқлим ёдовар шуд. Ӯ таъкид дошт, ки Маҷмаи Умумии Созмони Милали Муттаҳид 14 қатъномаи пешниҳоднамудаи Тоҷикистонро қабул кардааст. Аз ҷумла, соли 2025 ҳамчун «Соли байналмилалии ҳифзи пиряхҳо» ва 21 март ҳамчун «Рӯзи ҷаҳонии пиряхҳо» эълон гардидааст.
9
22.03.2025
