27.08.2025
27 августи соли 2025 дар Вазорати маориф ва илми Ҷумҳурии Тоҷикистон таҳти раёсати муовини Сарвазири Ҷумҳурии Тоҷикистон Дилрабо Мансурӣ ҷаласаи корӣ оид ба рафти иҷрои дастуру супоришҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва сатҳи амалисозии барномаҳои давлатии марбут ба таҳсилоти томактабӣ дар ҷумҳурӣ доир гардид.
Дар кори ҷаласа вазири маориф ва илм Раҳим Саидзода, муовини раиси шаҳри Душанбе, раисони ноҳияҳои пойтахт, сардорони раёсатҳои дахлдори вазорат, сардори сарраёсат ва мудирони шуъбаҳои маорифи пойтахт ва дигар шахсони масъул иштирок намуданд.
Муовини Сарвазири кишвар Дилрабо Мансурӣ зимни ифтитоҳи ҷаласа зикр намуд, ки таҳсилоти томактабӣ яке аз самтҳои афзалиятноки сиёсати иҷтимоии давлат ба ҳисоб рафта, дар ташаккули шахсияти кӯдак ва омодасозии онҳо ба зинаҳои минбаъдаи таҳсил нақши муҳимму ҳалкунанда дорад. Бо таваҷҷуҳи Роҳбарияти олии кишвар ба рушди ин зинаи таҳсилот, солҳои охир як қатор иқдомҳои назаррас дар самти таҳкими инфрасохтор, тайёр намудани мутахассисон ва фароҳамсозии муҳити мусоиди таълимӣ амалӣ шуда истодааст.
Дар идома, муовини Сарвазир таъкид кард, ки бо мақсади боз ҳам беҳтар гардонидани вазъи фарогирии кӯдакон ба таълиму тарбияи томактабӣ, мақомоти иҷроияи маҳаллии ҳокимияти давлатии шаҳру ноҳияҳои ҷумҳурӣ ҷиҳати амалисозии дастуру ҳидоятҳои Пешвои миллат муҳтарам Эмомалӣ Раҳмон дар ҳар маҳаллаи аҳолинишин, ки беш аз 100 хоҷагӣ дорад, муассисаи томактабиро таъсис диҳанд, ки ин иқдом метавонад барои фарогирии бештари кӯдакон заминаи мусоид фароҳам оварад.
Сипас, вазири маориф ва илм иброз дошт, ки рафти татбиқи ду барномаи давлатии амалкунанда дар самти таҳсилоти томактабӣ - «Барномаи давлатии рушди таҳсилоти томактабӣ барои солҳои 2020-2025» ва «Барномаи рушди муассисаҳои томактабӣ ва таҳсилоти умумии хусусӣ барои солҳои 2022-2027» зери таваҷҷуҳи доимӣ қарор дошта, ҷиҳати иҷрои босифати онҳо тадбирҳои мушаххас андешида мешаванд.
Нахуст, ҷараёни иҷрои «Барномаи давлатии рушди таҳсилоти томактабӣ барои солҳои 2020-2025» мавриди баррасӣ қарор гирифт. Зикр шуд, ки дар доираи татбиқи барнома дар давоми солҳои охир шумораи муассисаҳои томактабӣ тадриҷан афзоиш ёфта, инфрасохтор ва фарогирии кӯдакон беҳтар гардида истодааст. Бо мақсади тавсеаи минбаъдаи шабакаи муассисаҳои томактабӣ ва расидан ба нишондиҳандаҳои пешбинишуда, Вазорати маориф ва илм ҳамкориро бо мақомоти маҳаллӣ тақвият бахшида, ҷиҳати ҷалби сармояи дохиливу хориҷӣ, бахши хусусӣ ва саҳмгузории ҷомеа чораҷӯӣ мекунад.
Ҳамзамон, «Барномаи рушди муассисаҳои томактабӣ ва таҳсилоти умумии хусусӣ барои солҳои 2022-2027», ки ҷалби бахши хусусӣ ва афзоиши муассисаҳои ғайридавлатиро аз самтҳои афзалиятноки рушди соҳа қарор медиҳад, дар маркази таваҷҷуҳ қарор гирифт. Дар доираи ин барнома бунёди 134 муассисаи томактабӣ ва 114 муассисаи таҳсилоти миёнаи умумии хусусӣ ба нақша гирифта шудааст, ки татбиқи он дар ду марҳила амалӣ хоҳад шуд.
Дар идома гуфта шуд, ки дар соли таҳсили 2024-2025 шумораи умумии муассисаҳои таҳсилоти томактабӣ ба 744 адад расида, фарогирии кӯдакон дар зинаи мазкур 114 ҳазорро ташкил медиҳад.
Муовини Сарвазир дар фарҷом бо таваҷҷуҳ ба таҳлили вазъи иҷроиши барномаҳои болозикр таъкид намуд, ки мақомоти маҳаллӣ ва сохторҳои масъул бояд иҷрои сифатноки барномаҳои давлатӣ, таъсиси муассисаҳои нав, таъмини онҳо бо мутахассисон, таҷҳизоти зарурӣ ва муҳити муносибро таъмин намоянд.
Ҷаласа бо таҳлили ҳамаҷониба, вазифагузории мушаххас ва даъвати масъулин ба иҷрои босамари сиёсати давлатӣ дар соҳаи таҳсилоти томактабӣ анҷом ёфта, афзалияти таҳкими заминаҳои моддию техникӣ, дастрасии кӯдакон ба таҳсилоти томактабӣ ва баланд бардоштани сифати таълиму тарбия дар зинаи таҳсилоти томактабӣ мавриди таваҷҷуҳи хос қарор гирифт.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
ҶАЛАСАИ НАВБАТИИ ҲАЙАТИ МУШОВАРАИ ВАЗОРАТИ МАОРИФ ВА ИЛМ БАРГУЗОР ГАРДИД 29 августи соли 2025 таҳти раёсати вазири маориф ва илм Раҳим Саидзода ҷаласаи навбатии ҳайати мушовараи Вазорати маориф ва илми Ҷумҳурии Тоҷикистон баргузор гардид. Ҷаласа бо иштироки аъзои ҳайати мушовара, муовини якум, муовинони вазир, сардорони сарраёсат, раёсат ва мудирони шуъбаҳои маорифи вилоятҳо ва шаҳру ноҳияҳои кишвар ва директорони муассисаҳои таълимӣ ба таври ҳузурӣ ва маҷозӣ иштирок намуданд. Вазири маориф ва илм дар оғози ҷаласа ҳозиринро ба Рӯзи дониш, оғози соли нави таҳсил ва омад-омади Ҷашни пуршукуҳи Истиқлоли давлатӣ табрик намуд. Сипас, таъкид дошт, ки соҳаи маориф ҳамеша дар маркази таваҷҷуҳи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, барои рушди ин соҳа дар кишвар шароити мусоид муҳайё карда шудааст. Гуфта шуд, ки дар солҳои охир барои баланд бардоштани сифати таълиму тарбия, беҳтар кардани инфрасохтори соҳа ва баланд бардоштани нуфузи омӯзгорон тадбирҳои муассиру чашмрас амалӣ гардида истодааст. Дар идома сардори раёсати маорифи вилояти Хатлон З. Абдулзода оид ба фаъолияти раёсат дар соли таҳсили 2024-2025 гузориш пешниҳод намуда, қайд намуд, ки давоми соли 2025 дар ҳудуди вилоят баистифодадиҳии 139 иншооти гуногуни соҳаи маориф иборат аз 1277 адад синфхона барои 31925 ҷои нишаст дар як баст ва дар ду баст барои 63850 ҷои нишаст ба нақша гирифта шудааст, ки кушодашавии иншоотҳои мазкур зина ба зина аз моҳи марти соли ҷорӣ оғоз гардидаанд. Дар нимсолаи якуми соли ҷорӣ дар шаҳру ноҳияҳои вилоят 24 иншоотҳои гуногуни соҳа иборат аз 136 синфхона барои 3350 ҷои нишаст дар як баст ва дар ду баст барои 6700 ҷои нишаст сохта ба истифода дода шудаанд. Сипас, директори Маркази ҷумҳуриявии дарёфт ва рушди истеъдодҳо М. Ғафорзода вобаста ба Лоиҳаи Низомномаи Олимпиадаи байналмилалӣ аз фанҳои математика ва информатика (KhIMIO) гузориш пешниҳод намуда, таъкид дошт, ки таҳияи Низомномаи мазкур ба рушди зеҳнии хонандагони болаёқат, тақвияти малакаҳои тадқиқотӣ ва баланд бардоштани нуфузи илмии Тоҷикистон дар арсаи байналмилалӣ мусоидат хоҳад кард. Зимни шарҳи ҷузъиёти лоиҳа зикр гардид, ки Олимпиадаи байналмилалӣ аз фанҳои математика ва информатика (KhIMIO) имкони баробар барои ҳамаи хонандагони болаёқати кишварҳои иштирокчӣ фароҳам оварда, заминаи мусоид барои мубодилаи таҷрибаи таълимӣ ва таҳкими ҳамкориҳои илмӣ байни муассисаҳои таълимии кишварҳои гуногунро фароҳам месозад. Раиси ҷаласа зимни баррасии масъалаи мазкур иброз дошт, ки татбиқи амалии ин лоиҳа на танҳо ба болоравии сатҳи дониш ва ҳавасмандии хонандагон мусоидат менамояд, балки барои муаррифии қобилият ва истеъдоди хонандагони тоҷик дар арсаи байналмилалӣ нақши муҳим хоҳад дошт. Ҳамчунин, дар идома директори Маркази ҷумҳуриявии дарёфт ва рушди истеъдодҳо М. Ғафорзода оид ба тасдиқи «Низомномаи Олимпиадаи муштарак аз фанҳои табиӣ-риёзӣ» ва «Дафтари қайди машғулиятҳои таълимӣ», намояндаи Прократураи генералии Ҷумҳурии Тоҷикистон дар бораи Пешниҳоди Прокуратураи генералии Ҷумҳурии Тоҷикистон «Оид ба бартараф намудани камбудию қонунвайронкуниҳои ҷойдошта ва сабабу шароитҳои ба он мусоидаткунанда» ва сардори раёсати таҳсилоти миёнаи умумӣ Ш. Асомиддинзода дар бораи омодагиҳо бораи гузариш ба низоми баҳогузории 10-хола маълумот доданд. Дар ҷаласа вазири маориф ва илм аз дар доираи дастуру супоришҳои Асосгузори сулҳу ваҳдати миллӣ - Пешвои миллат, Президенти кишвар муҳтарам Эмомалӣ Раҳмон, ки дар маҷлиси Ҳукумати кишвар дода шуданд, таъкид дошт, ки моро зарур аст, вобаста ба масъалаҳои фарогирии хонандагон ба синфи 10, ҷалби саромягузориҳои дохилӣ ва хориҷӣ барои бунёди муассисаҳои таълимӣ, баррасии гузариш ба низоми таҳсили 12-сола, омодагӣ ба тирамоҳу зимистони солҳои 2025-2026 ва корҳои ободонию созандагӣ, аз ҷумла вусъат бахшидани тадбирҳо баҳри сазовор истиқбол гирифтани ҷашни умумимиллӣ – 35-солагии истиқлоли давлатӣ чораҳои муассир ва саривақтӣ андешем. Маркази матбуоти Вазорати маориф ва илми Ҷумҳурии Тоҷикистон
40
29.08.2025 -
АМРИ ПРЕЗИДЕНТИ ҶУМҲУРИИ ТОҶИКИСТОН 1. Дар соли 2026 Озмуни ҷумҳуриявии «Шоҳномахонӣ» баргузор карда шавад. 2. Низомнома, ҳайати комиссия ва ҷоизаи Озмуни ҷумҳуриявии «Шоҳномахонӣ» тасдиқ карда шаванд (замимаҳои 1, 2 ва 3). 3. Вазоратҳои маориф ва илм, фарҳанг, Академияи миллии илмҳои Тоҷикистон, Муассисаи давлатии «Китобхонаи миллӣ»-и Дастгоҳи иҷроияи Президенти Ҷумҳурии Тоҷикистон, кумитаҳои оид ба таҳсилоти ибтидоӣ ва миёнаи касбӣ, кор бо ҷавонон ва варзиш, телевизион ва радио, кор бо занон ва оила, Иттифоқи нависандагони Тоҷикистон ҷиҳати дар сатҳи баланд доир гардидани Озмуни мазкур чораҳои зарурӣ андешанд. 4. Мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳо иҷрои талаботи амри мазкурро таъмин намуда, ғолибони Озмун ва омӯзгоронеро, ки шогирдонашон дар даври ҷумҳуриявии Озмун барандаи ҷоизаҳо шуданд, аз ҷиҳати моддӣ ва маънавӣ ҳавасманд гардонанд. 5. Вазорати молияи Ҷумҳурии Тоҷикистон аз ҳисоби маблағҳои фонди захиравии Президенти Ҷумҳурии Тоҷикистон, ки барои соли 2026 пешбинӣ гардидаанд, ба Дастгоҳи иҷроияи Президенти Ҷумҳурии Тоҷикистон ҷиҳати баргузор гаштани Озмуни мазкур 2 660 000 (ду миллиону шашсаду шаст ҳазор) сомонӣ ба таври нақд ҷудо намояд. 6. Дастгоҳи иҷроияи Президенти Ҷумҳурии Тоҷикистон истифодаи мақсадноки маблағи ҷудошударо таъмин карда, оид ба хароҷоти анҷомдода ба Вазорати молияи Ҷумҳурии Тоҷикистон ҳисобот пешниҳод намояд. 7. Назорати иҷрои амри мазкур ба зиммаи муовини Сарвазири Ҷумҳурии Тоҷикистон (сарпарасти соҳа) гузошта шавад. Президенти Ҷумҳурии Тоҷикистон Эмомалӣ Раҳмон ш. Душанбе 29 августи соли 2025 №АП-862
70
29.08.2025 -
Маҷлиси Ҳукумати Ҷумҳурии Тоҷикистон 28 август таҳти раёсати Президенти Ҷумҳурии Тоҷикистон, Пешвои миллат, Раиси Ҳукумати кишвар муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид. Дар маҷлис, нахуст, дар бораи Барномаи рушди соҳаҳои таҳсилоти ибтидоӣ ва миёнаи касбии Ҷумҳурии Тоҷикистон барои солҳои 2026-2030 раиси Кумита оид ба таҳсилоти ибтидоӣ ва миёнаи касбӣ Фарҳод Раҳимӣ гузориш дод. Таъкид гардид, ки барнома бо мақсади ҳалли мушкилоти соҳаҳои таҳсилоти ибтидоӣ ва миёнаи касбӣ, аз ҷумла навсозии низоми таълим, таҳкими заминаҳои моддию техникӣ, таъмир ва сохтмони биноҳо, озмоишгоҳҳо ва устохонаҳои таълимӣ, бозомӯзӣ ва такмили ихтисоси омӯзгорону устоҳои таълимӣ, баланд бардоштани сифати тайёр кардани кадрҳои коргарӣ, рақамикунонии соҳаҳои таҳсилоти ибтидоӣ ва миёнаи касбӣ ва фарогирии бештари ҷавонон ба касбомӯзӣ таҳия гардидааст. Баъди баррасии барнома барои дар амал татбиқ кардани он қарори Ҳукумати Ҷумҳурии Тоҷикистон қабул шуд. Вазорату идораҳои марбута дастур гирифтанд, ки барномаро дар доираи маблағҳои муайяншуда амалӣ карда, аз натиҷааш ҳамасола ба Ҳукумати кишвар маълумот пешниҳод намоянд. Сипас, Барномаи давлатии рушди пахши телевизиони рақамӣ дар Ҷумҳурии Тоҷикистон барои солҳои 2026-2030 муҳокима карда шуд. Гуфта шуд, ки мақсади таҳияи Барнома фарогирии пурраи минтақаҳои кишвар бо мавҷи шабакаҳои телевизион ва радиои давлатӣ дар пахши рақамӣ, инчунин такмили инфрасохтор ва қонеъсозии ниёзҳои иттилоотии ҷомеа ва шаҳрвандон мебошад. Қарор карда шуд, ки барнома ва нақшаи чорабиниҳо тасдиқ ва татбиқи босамари он таъмин карда шавад. Дар кори маҷлис, ҳамчунин, корҳо барои таҳияи дурнамои нишондиҳандаҳои асосии макроиқтисодии Ҷумҳурии Тоҷикистон дар соли 2027 ва параметрҳои асосии он барои солҳои 2028-2029 муҳокима карда шуд. Баъди баррасии масъалаҳои рӯзномаи маҷлис Президенти кишвар муҳтарам Эмомалӣ Раҳмон барои иҷрои дастуру супоришҳо ва амалисозии ҳадафҳои созанда дар назди масъулини соҳаҳои марбута вазифаҳо гузоштанд. Дар фароварди маҷлис Роҳбари давлат таваҷҷуҳи роҳбарони сохторҳои давлатиро ба масоили омодагӣ ба тирамоҳу зимистони солҳои 2025-2026 ва корҳои ободонию созандагӣ, аз ҷумла вусъат бахшидани тадбирҳо баҳри сазовор истиқбол гирифтани ҷашни умумимиллӣ – 35-солагии истиқлоли давлатӣ ҷалб намуда, дар назди масъулин супоришҳои мушаххас гузоштанд.
59
28.08.2025
