28.03.2025
28-уми марти соли ҷорӣ дар Вазорати маориф ва илм таҳти раёсати муовини якуми вазири маориф ва илм Ҳомид Ҳошимзода ҷаласаи навбатии ҳайати мушовараи Вазорати маориф ва илми Ҷумҳурии Тоҷикистон баргузор гардид, ки дар он аъзои ҳайати мушовара, муовинони вазири маориф ва илм, сардорони раёсату шуъбаҳои дастгоҳи марказӣ, роҳбарони муассисаҳои тобеъ ва ректорони муассисаҳои таҳсилоти олии касбии кишвар тариқи ҳузурӣ ва маҷозӣ иштирок намуданд.
Нахуст, муовини якуми вазири маориф ва илм ҷаласаро оғоз карда, ҳозиринро ба рӯзномаи ҷаласа ва масъалаҳои ҷории баррасишаванда шинос намуд.
Сипас, вобаста ба масъалаҳои асосии ҷаласа гузоришҳои сардори раёсати таҳсилоти олии касбӣ Ҳ. Саидзода оид ба «Натиҷаи қабули донишҷӯён ба муассисаҳои таҳсилоти олии касбии ҷумҳурӣ дар соли таҳсили 2024-2025», сардори раёсати илм ва инноватсия А. Раҳмонзода доир ба вазъи амалишавии «Барномаи давлатии тайёр кардани кадрҳои сатҳи баланди илмӣ барои солҳои 2021-2030» (қарори Ҳукумати Ҷумҳурии Тоҷикистон аз 30.06.2021, №264), директори Маркази ҷумҳуриявии дарёфт ва рушди истеъдодҳо М. Ғафорзода оид ба лоиҳаи низомномаи «Шурои миллии дастгирии наврасон ва ҷавонони болаёқат» шунида шуд.
Зимни баррасии масъалаҳои мазкур раиси ҷаласа иброз дошт, ки муассисаҳои таҳсилоти олии касбии кишвар дар асоси стандартҳои миллии таҳсилоти олии кишвар ва ҷаҳонӣ мутобиқ карда шуда, ҳамасола мутахассисони соҳибмалака ва рақобатпазир дар бозори меҳнатро омода месозанд. Ҳамзамон, натиҷаи қабули донишҷӯён ба муассисаҳои таҳсилоти олии касбӣ дар соли таҳсили 2024-2025 нишон дод, ки дар ин самт баъзе мушкилиҳо ба назар мерасанд ва барои рафъи онҳо ҷиҳати бештар дохил шудани ҷавонон ба муассисаҳои таҳсилоти олии касбӣ барои солҳои 2025-2026, масъулони муассисаҳои мазкурро мебояд чораҳои муассир андешанд.
Қайд гардид, ки «Барномаи давлатии тайёр кардани кадрҳои сатҳи баланди илмӣ барои солҳои 2021-2030» баҳри баланд бардоштани қобилияти зеҳниву таҳлилии насли нави илмӣ, тайёр кардани кадрҳои сатҳи баланди илмӣ ва ба талаботи бозори хизматрасониҳои илмиву таҳсилотӣ мутобиқ намудани онҳо таҳия шуда, вазорат бо мақсади иҷрои саривақтии бандҳои барномаи мазкур, дар асоси нақшаи барнома, нақшаи чорабиниҳои дохили вазоратиро оид ба амалисозии барномаи мазкур таҳия ва тасдиқ намудааст.
Дар идомаи ҷаласа бо баррасии як қатор масъалаҳои дигар таклифу пешниҳодҳо илова гардида, қарорҳои дахлдор қабул гардид.
Дар охир муовини якуми вазири маориф ва илм дар доираи дастуру супоришҳои Пешвои миллат муҳтарам Эмомалӣ Раҳмон ба масъулин доир ба иҷрои ҳатмию саривақтии стратегия, барнома, консепсия, қарорҳои ҳайати мушовара ва фармоишҳои вазири маориф ва илм, боло бурдани сифати таълиму тарбия, иштироки бештари хонандагону омӯзгорон дар озмунҳои ҷумҳуриявию байналмилалӣ, нашр ва бознашри китобҳои дарсӣ ва чанде дигар дастуру супоришҳои мушаххас дод.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
Сафари корӣ ба шаҳри Самарқанди Ҷумҳурии Узбекистон 3 апрел Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои иштирок дар Ҳамоиши сарони давлатҳои “Осиёи Марказӣ – Иттиҳоди Аврупо” ба шаҳри Самарқанди Ҷумҳурии Узбекистон сафар карданд. Дар фурудгоҳи байналмилалии Душанбе Президенти Ҷумҳурии Тоҷикистон муҳтарам Эмомалӣ Раҳмонро Раиси Маҷлиси миллии Маҷлиси Олии Ҷумҳурии Тоҷикистон, Раиси Маҷлиси намояндагони Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон, муовини якуми Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ гусел намуданд. Дар ин сафар Президенти Ҷумҳурии Тоҷикистон муҳтарам Эмомалӣ Раҳмонро Вазири корҳои хориҷӣ, ёрдамчиёни Президенти Ҷумҳурии Тоҷикистон оид ба масъалаҳои робитаҳои хориҷӣ ва оид ба масъалаҳои иқтисодӣ, Вазири рушди иқтисод ва савдо, Раиси Кумитаи ҳифзи муҳити зист ва дигар шахсони расмӣ ҳамроҳӣ менамоянд.
43
03.04.2025 -
Оғози сафари корӣ дар шаҳри Самарқанди Ҷумҳурии Узбекистон 3 апрел Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо мақсади иштирок дар Ҳамоиши сарони давлатҳои “Осиёи Марказӣ – Иттиҳоди Аврупо” вориди шаҳри Самарқанди Ҷумҳурии Узбекистон шуданд. Дар фурудгоҳи байналмилалии шаҳри Самарқанд Сарвари давлат муҳтарам Эмомалӣ Раҳмонро Сарвазири Ҷумҳурии Узбекистон Абдулло Орипов ва дигар намояндагони воломақоми Ҷумҳурии Узбекистон истиқбол гирифтанд.
37
03.04.2025 -
БАРГУЗОРИИ ДАВРИ НИҲОИИ ОЗМУНИ ҶУМҲУРИЯВИИ «МАГИСТРАНТИ СОЛ» 3-юми апрели соли 2025 ҷиҳати сазовор пешвоз гирифтани Рӯзи илми тоҷик дар Вазорати маориф ва илми Ҷумҳурии Тоҷикистон озмуни ҷумҳуриявии «Магистранти сол» миёни магистрантони муассисаҳои таҳсилоти олии касбӣ ва илмии Ҷумҳурии Тоҷикистон баргузор гардид. Зимни ифтитоҳи озмун вазири маориф ва илм Раҳим Саидзода, муовини якуми вазири маориф ва илм, аъзои кумитаи тадорукоти озмун, ҳайати доварон, магистрантони муассисаҳои таҳсилоти олии касбӣ ва илмии ҷумҳурӣ иштирок намуданд. Зимни ифтитоҳи чорабинӣ вазири маориф ва илм қайд намуд, ки рӯз то рӯз таваҷҷуҳи Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон ва Ҳукумати кишвар ба соҳаҳои илму маориф, техникаву технология ва донишандӯзиву дар амал татбиқ намудани донишҳои муосир зиёд гардида, барои дар сатҳи баланд омода намудани мутахассисон ва ба стандартҳои ҷаҳонӣ баробар намудани илми муосири тоҷик ҷораҳои таъхирнопазир андешида шуда истодааст. Вазири маориф ва илм таъкид дошт, ки озмуни мазкур бояд дар сатҳи баланд ва шаффоф баргузор гардида, беҳтаринҳо ғолиби он гарданд. Гуфта шуд, ки соли равон аз 21 донишгоҳу донишкадаи ҷумҳурӣ ва Академияи миллии илмҳои Тоҷикистон 21 кори озмунӣ пешниҳод гардид, ки ҷиҳати баҳогузорӣ намудани корҳои озмуни мазкур бо фармоиши вазири маориф ва илм аз 27.03.2025, №366 гурӯҳи корӣ таъсис дода шуд. Қайд кардан бамаврид аст, ки озмун бо мақсади ба ҳам овардани магистрантон, дарёфти чеҳраҳои нави лаёқатманд, соҳибмаърифат ва ташаббускор, роҳ надодан ба ҳар гуна ақидаҳои ифротӣ ва омилҳои номатлуб, ки ба зеҳни магистрантон таъсири манфӣ доранд, ташаккули афкори солим, ғанӣ гардонидани сатҳи ҷаҳонбинӣ ва маърифатнокӣ, ҳимояи арзишҳои миллӣ ва таҳкими эҳсоси худшиносию меҳанпарастӣ, эҳсоси масъулияти шаҳрвандӣ ва таҳкими зеҳни миллии ҷавонон, равона намудани онҳо ба илмомӯзӣ, бедор намудани завқи китобхонӣ ва илмдӯстӣ, тақвияти ҷаҳони маънавӣ, ахлоқӣ ва ҳозирҷавобӣ, инкишофи қобилияти эҷодӣ, таҳкими захираи луғавӣ, фаъолгардонии раванди забондонӣ, беҳтар намудани раванди таълим, такмили фаъолияти таълимии магистрантон, инкишофи қобилияти эҷодӣ, иштироки фаъолонаи онҳо дар ҳаёти илмӣ, сиёсӣ ва ҷамъиятӣ гузаронида мешавад. Тибқи талаботи банди 1.4 Низомномаи озмуни мазкур магистрантони муассисаҳои таҳсилоти олии касбӣ ва илмии ҷумҳурӣ новобаста аз шакли моликият ва тобеияти идоравӣ метавонанд иштирок намоянд. Ёдовар мешавем, ки ғолибони озмун дар ҷамъбасти ҳафтаи илм дар фазои тантанавӣ бо мукофоти пулӣ ва туҳфаҳои хотиравӣ қадрдонӣ мегарданд. Маркази матбуоти Вазорати маориф ва илми Ҷумҳурии Тоҷикистон
78
03.04.2025