29.09.2026
Имрӯз, 29 сентбяри соли 2026 муовини вазири маориф ва илми Ҷумҳурии Тоҷикистон Илҳомуддин Иброҳимзода аз Донишгоҳи миллии Тоҷикистон боздид намуда, ба раванди таълиму тарбия, назорати сифати таҳсилот, давомоти донишҷӯён ва дигар масъалаҳои марбут ба фаъолияти таълимии донишгоҳ шинос шуд.
Зимни боздид раванди баргузории дарсҳо мавриди таваҷҷуҳ қарор гирифта, бо донишҷӯён ва омӯзгорон суҳбат анҷом дода шуд. Дар ҷараёни суҳбат ба масъалаҳои иштироки фаъолона ва саривақтии донишҷӯён дар дарсҳо, риояи талаботи муқарраргардида вобаста ба сару либос, омодагии донишҷӯён ба машғулиятҳо ва сатҳи азхудкунии фанҳои таълимӣ таваҷҷуҳи махсус зоҳир гардид.
Ҳамзамон, вобаста ба фанҳои тадрисшаванда бо донишҷӯён суҳбатҳои мустақим баргузор гардида, донишу малакаи онҳо, фаҳмиши аҳамияти фанҳои омӯхташаванда ва муносибати онҳо ба раванди таълим мавриди таҳлил қарор гирифт.
Дар раванди боздид масъалаи омӯзиши забонҳои хориҷӣ низ баррасӣ гардида, таъкид шуд, ки баланд бардоштани сатҳи забондонии донишҷӯён, дар баробари азхуд намудани донишҳои тахассусӣ, барои омодасозии мутахассисони рақобатпазир аҳаммияти муҳим дорад.
Муовини вазир ба масъалаи барномаҳои таълимӣ ва силлабусҳои фаннӣ низ таваҷҷуҳ намуда, таъкид кард, ки муҳтавои таълим бояд ба талаботи муосир ҷавобгӯ буда, дар раванди дарсҳо ҳадафу вазифаҳои муайяншудаи барномаҳои таълимӣ пайгирона амалӣ карда шаванд.
Дар суҳбат бо омӯзгорон масъалаи омодагии ҳамаҷониба ба дарс, истифодаи усулҳои нави таълим, таҳлили ҷузъиёти дарсҳо ва баланд бардоштани самаранокии машғулиятҳо баррасӣ гардид. Таъкид шуд, ки омодагии хуби омӯзгор, истифодаи дурусти усулҳои муосири таълим ва ба роҳ мондани муносибати фаъоли донишҷӯ ба раванди таълим аз омилҳои муҳими баланд бардоштани сифати таҳсилот мебошанд.
Ҳамчунин, ба аҳаммияти дарсҳои амалӣ ва машғулиятҳои иловагӣ дар таҳкими донишҳои назариявӣ ва ташаккули малакаҳои амалии донишҷӯён таваҷҷуҳ зоҳир карда шуд. Дар ин замина, зарурати истифодаи самараноки имкониятҳои таълимӣ ва фароҳам овардани шароити мусоид барои иштироки фаъоли донишҷӯён дар раванди таълим таъкид гардид.
Дар маҷмуъ, зимни боздид ба масъалаҳои баланд бардоштани сифати таҳсилот, таҳкими назорати раванди таълим, таъмини иштироки саривақтию фаъоли донишҷӯён, баланд бардоштани масъулияти омӯзгорон, истифодаи усулҳои нави таълим ва таҳкими робитаи мустақим бо донишҷӯён таваҷҷуҳи ҷиддӣ зоҳир карда шуд.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
БОЗДИДИ МУОВИНИ ВАЗИР АЗ ДОНИШКАДАИ ОМӮЗГОРИИ ТОҶИКИСТОН ДАР ШАҲРИ ПАНҶАКЕНТ 30 сентябри соли 2026 муовини вазири маориф ва илми Ҷумҳурии Тоҷикистон Илҳомуддин Иброҳимзода бо мақсади шиносоӣ бо вазъи раванди таълиму тарбия, фаъолияти таълимӣ ва илмӣ, шароити таҳсил ва заминаи моддию техникии муассиса аз Донишкадаи омӯзгории Тоҷикистон дар шаҳри Панҷакент боздид намуд. Зимни боздид роҳбарияти донишкада оид ба самтҳои асосии фаъолияти муассиса, раванди омодасозии мутахассисон, фаъолияти илмӣ-таҳқиқотӣ ва шароити таълим маълумот пешниҳод намуд. Муовини вазир аз синфхонаҳо ва дигар сохторҳои таълимӣ дидан карда, ба сатҳи таҷҳизонидани онҳо, истифодаи технологияҳои муосири таълимӣ ва фароҳам овардани шароити мусоиди таҳсил таваҷҷуҳ зоҳир намуд. Ҳамзамон, Илҳомуддин Иброҳимзода устодону донишҷӯёнро ба муносибати 35-солагии Истиқлоли давлатии Ҷумҳурии Тоҷикистон табрик намуда, бо донишҷӯён суҳбати озод анҷом дод. Дар суҳбат масъалаҳои сифати таҳсилот, забономӯзӣ, иштироки донишҷӯён дар корҳои илмӣ-таҳқиқотӣ ва рушди малакаҳои касбӣ мавриди баррасӣ қарор гирифтанд. Дар фарҷоми боздид масъалаҳои баланд бардоштани сифати таълим, таҳкими фаъолияти илмӣ-таҳқиқотӣ, беҳтар намудани шароити таҳсил ва тақвияти заминаи моддию техникии донишкада аз самтҳои муҳими фаъолияти минбаъда таъкид гардиданд.
3
30.09.2026 -
Маҷлиси Ҳукумати Ҷумҳурии Тоҷикистон 30 сентябр таҳти раёсати Президенти Ҷумҳурии Тоҷикистон, Раиси Ҳукумати кишвар, Пешвои миллат муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид. Дар кори маҷлис нахуст лоиҳаи Барномаи давлатии рушди маърифат ва фарҳанги экологии аҳолии Ҷумҳурии Тоҷикистон барои солҳои 2026-2030 баррасӣ шуда, гузориши раиси Кумитаи ҳифзи муҳити зист Баҳодур Шерализода шунида шуд. Таъкид гардид, ки мақсад аз таҳия ва қабули Барномаи мазкур, ин баланд бардоштани сатҳи саводнокии экологии табақаҳои аҳолӣ, ташаккули арзишҳои устувори экологӣ ва малакаҳои рафтори бомасъулият дар шаҳрвандон, ҷалби ҷавонон, созмонҳои ҷамъиятӣ ва корхонаҳо барои иштироки фаъолона дар татбиқи ташаббусҳои экологӣ ва тақвияти корҳои маърифатӣ мебошад. Гуфта шуд, ки дар барномаи таҳияшуда, ҳамчунин, ташаккули фарҳанги экологӣ ба инобат гирифта шудааст, ки яке аз масъалаҳои афзалиятноки ҳифзи муҳити зист маҳсуб меёбад. Сарвари давлат муҳтарам Эмомалӣ Раҳмон дастур доданд, ки Барномаи давлатии рушди маърифат ва фарҳанги экологии аҳолии Ҷумҳурии Тоҷикистон барои солҳои 2026-2030 ва Нақшаи чорабиниҳои амалигардонии Барномаи мазкур тасдиқ гардида, сохторҳои марбута аз натиҷаи корҳо ҳар сол то 1 март ба Ҳукумати Ҷумҳурии Тоҷикистон маълумот пешниҳод намоянд. Сипас, дар маҷлис лоиҳаҳои як қатор қарорҳои Ҳукумати Ҷумҳурии Тоҷикистон, аз ҷумла дар бораи Нақшаи амали Барномаи рушди кинои Ҷумҳурии Тоҷикистон барои солҳои 2023-2027 дар соли 2027 ва дурнамои нишондиҳандаҳои асосии макроиқтисодии Ҷумҳурии Тоҷикистон дар соли 2028 ва параметрҳои асосии он барои солҳои 2029-2030 баррасӣ гардид. Президенти кишвар муҳтарам Эмомалӣ Раҳмон баъди муҳокимаи масъалаҳои зикршуда барои дар амал татбиқ кардани нишондиҳандаҳои барномаҳо ба вазорату идораҳои марбута ва мақомоти иҷроияи ҳокимияти давлатии вилоятҳо ва шаҳру ноҳияҳо дастуру тавсияҳо доданд. Дар фароварди маҷлис Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон таваҷҷуҳи аъзои Ҳукумати кишвар ва роҳбарони дигар сохторҳоро ба иҷрои ҳатмӣ ва саривақтии супоришҳои қаблии маҷлиси Ҳукумат ва масъалаҳои имрӯза, ҷалб намуданд. Роҳбари давлат муҳтарам Эмомалӣ Раҳмон вобаста ба масъалаҳои мубрам ва рӯзмарра, аз ҷумла омодагии ҳамаҷониба ба зимистони солҳои 2026-2027, захираи маводи сухт ва хурокворӣ, ҷамъоварии ҳосили боқимондаи пахта ва меваю сабзавот, кишти тирамоҳии ғалла, идома ва вусъати корҳои ободонию созандагӣ дар назди масъулин вазифаҳои мушаххас гузоштанд.
10
30.09.2026 -
ИФТИТОҲИ ДАВРИ НИҲОИИ ОЗМУНИ ҶУМҲУРИЯВИИ «ОМӮЗГОРИ СОЛИ ТОҶИКИСТОН - 2026» Имрӯз, 30 сентябри соли 2026 дар Донишкадаи ҷумҳуриявии такмили ихтисос ва бозомӯзии кормандони соҳаи маориф даври ниҳоии озмуни ҷумҳуриявии «Омӯзгори соли Тоҷикистон - 2026» оғоз гардид. Дар маросими ифтитоҳи озмун вазири маориф ва илми Ҷумҳурии Тоҷикистон Раҳим Саидзода, кумитаи тадорукот, аъзои ҳакамон, иштирокчиёни озмун ва намояндагони соҳаи маориф иштирок намуданд. Зимни ифтитоҳи озмун вазири маориф ва илм таъкид намуд, ки бо ташаббус ва дастгириҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар солҳои соҳибистиқлолӣ барои рушди соҳаи маориф, беҳтар намудани шароити фаъолияти омӯзгорон, бунёду навсозии муассисаҳои таълимӣ ва баланд бардоштани сифати таҳсилот тадбирҳои муҳим амалӣ гардида истодаанд. Қабули Қонуни Ҷумҳурии Тоҷикистон «Дар бораи мақоми омӯзгор» яке аз намунаҳои равшани таваҷҷуҳи давлат ба мақоми омӯзгор мебошад. Таъкид шуд, ки ин санади муҳим мақоми омӯзгор, ҳифзи ҳуқуқ, кафолатҳои иҷтимоӣ ва таъмини иҷрои самараноки уҳдадориҳои касбии ӯро ба танзим медарорад. Ҳамчунин таъкид шуд, ки дар шароити рушди босуръати технологияҳои рақамӣ ва зеҳни сунъӣ вазифаи омӯзгори муосир танҳо расонидани дониш набуда, балки омӯзонидани қобилияти таҳлил, андешаронӣ, интихоби иттилооти дуруст ва истифодаи дониш дар ҳаёти воқеӣ мебошад. Дар ин раванд технология бояд ҳамчун воситаи ёрирасони омӯзгор истифода шавад. Зикр шуд, ки ҳадафи озмуни «Омӯзгори соли Тоҷикистон» кашф ва муаррифии омӯзгорони эҷодкор, омӯзиши таҷрибаи пешқадам ва паҳн намудани усулҳои самараноки таълиму тарбия мебошад. Дар даври ниҳоии озмун 5 нафар ғолибони даври шаҳрию вилоятӣ аз Вилояти Мухтори Кӯҳистони Бадахшон, вилоятҳои Суғду Хатлон, шаҳру ноҳияҳои тобеи марказ ва шаҳри Душанбе иштирок намуда, аз рӯйи ҳафт шарт маҳорати касбии худро месанҷанд. Таъкид гардид, ки озмун бояд барои иштирокчиён мактаби таҷриба, табодули андеша ва муаррифии ташаббусҳои нави педагогӣ бошад. Маркази матбуоти Вазорати маориф ва илми Ҷумҳурии Тоҷикистон
4
30.09.2026
