26.02.2025
26-уми феврали соли равон дар Вазорати маориф ва илми Ҷумҳурии Тоҷикистон оид ба амалишавии «Барномаи давлатии мақсадноки рушди илмҳои риёзӣ, дақиқ ва табиӣ барои солҳои 2021-2025» (қарори Ҳукумати Ҷумҳурии Тоҷикистон аз 30 апрели соли 2021, № 170) ҷаласаи корӣ баргузор гардид. Дар он вазири маориф ва илми Ҷумҳурии Тоҷикистон Раҳим Саидзода, муовинони вазири маориф ва илм, сардорони раёсату шуъбаҳои дастгоҳи марказӣ ва сохторҳои тобеи вазорат иштирок намуданд.
Нахуст, вазири маориф ва илм қайд кард, ки рушди илмҳои риёзӣ, дақиқ ва табиӣ зери таваҷҷуҳи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, дар ин самт 20 – солаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф барои солҳои 2020-2040 амалӣ мегардад. Аз ин рӯ, иҷроиши барномаҳои соҳавӣ, махсусан, «Барномаи давлатии мақсадноки рушди илмҳои риёзӣ, дақиқ ва табиӣ барои солҳои 2021-2025» барои рушди илмҳои риёзӣ, дақиқ ва табиӣ зарурӣ ва саривақтӣ ба ҳисоб меравад.
Дар идома ҳисоботи сардори раёсати илм ва инноватсияи вазорат Сироҷиддин Ниёзӣ доир ба амалишавии «Барномаи давлатии мақсадноки рушди илмҳои риёзӣ, дақиқ ва табиӣ барои солҳои 2021-2025» шунида шуд.
Қайд гардид, ки Вазорати маориф ва илми Ҷумҳурии Тоҷикистон рафти амалишавии «Барномаи давлатии мақсадноки рушди илмҳои риёзӣ, дақиқ ва табиӣ барои солҳои 2021-2025»-ро мунтазам пайгирӣ намуда, то кунун дар ин самт корҳои зиёдеро ба анҷом расонидааст.
Дар ҷаласа гуфта шуд, ки барномаи мазкур бо мақсади дастгирӣ ва рушди таҳқиқот дар соҳаи илмҳои риёзӣ, дақиқ ва табиӣ, табдил додани илмҳои риёзӣ, дақиқ ва табиӣ дар Ҷумҳурии Тоҷикистон ба соҳаи пешрафтаи дониш ва фаъолият, муҷаҳҳаз гардонидани лабораторияҳои физика, химия, биология бо таҷҳизоти замонавӣ дар муассисаҳои таҳсилоти олии касбӣ ва илмии ҷумҳурӣ, такмили низоми омодакунии кадрҳои илмӣ дар муассисаҳои таҳсилоти олии касбӣ ва илмии ҷумҳурӣ таҳия гардидааст.
Ҳамчунин, таъкид гардид, ки дар баробари корҳои анҷомдодашуда камбудиҳо дар самти амалишавии барномаи мазкур ҷой дорад. Аз ҷумла, ҷиҳати таҷҳизонидани озмоишгоҳҳои илмию таҳқиқотии илмҳои риёзӣ, дақиқ ва табиӣ аз ҷониби аксарият муассисаҳои таҳсилоти олии касбӣ асбобу анҷоми илми муосир харидорӣ ва муҷаҳҳаз гардонида нашудаст, ки ҷиҳати дар сатҳи зарурӣ пешбурди корҳои илмӣ-таҳқиқотӣ монеагӣ эҷод мекунад. Аз ҷумла, харидорӣ ва таҷҳизонидани озмоишгоҳҳои илмию таҳқиқотии илмҳои риёзӣ, дақиқ ва табиӣ дар доираи барномаи мазкур аз ҳисоби маблағҳои махсуси муассиса дар Донишгоҳи давлатии Кӯлоб ба номи Абуабдуллоҳи Рӯдакӣ, Донишгоҳи славянии Россия ва Тоҷикистон, Донишгоҳи давлатии молия ва иқтисоди Тоҷикистон, Донишгоҳи байналмилалии сайёҳӣ ва соҳибкории Тоҷикистон, Донишгоҳи давлатии Бохтар ба номи Носири Хусрав, Донишгоҳи техникии Тоҷикистон ба номи академик М.С. Осимӣ, Донишгоҳи давлатии тиббии Хатлон, Донишгоҳи давлатии Хуҷанд ба номи академик Бобоҷон Ғуфуров, Донишкадаи тарбияи ҷисмонии Тоҷикистон ба номи Саймуъмин Раҳимов, Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд, Донишкадаи тиббӣ-иҷтимоии Тоҷикистон, Донишкадаи технология ва менеҷменти инноватсионӣ дар шаҳри Кӯлоб ва Филиали Донишкадаи энергетикии Москва дар шаҳри Душанбе (МЭИ) чораандешӣ нагардидааст.
Ҳамзамон, масъалаҳои зиёд намудани маблағгузории корҳои илмию таҳқиқотии соҳаҳои илмҳои риёзӣ, дақиқ ва табиӣ дар муассисаҳои таҳсилоти олии касбӣ, васеъ намудани ҳамкориҳои байналмилалӣ дар соҳаи илмҳои риёзӣ, дақиқ ва табиӣ, омода намудани кадрҳои баландихтисос-технологҳо, нанотехнологҳо, муҳандисон, конструкторон, барномасозон ва мутахасисони соҳаи иттилоот дар муассисаҳои таҳсилоти олии касбӣ, иштироки магистрантон, докторантони анъанавӣ ва докторантон аз рӯйи ихтисос (PhD), муҳаққиқони ҷавон ва олимон дар конференсия, симпозиум, анҷуман ва семинарҳои байналмилалӣ, ташкили озмунҳо, олимпиадаҳо аз фанҳои риёзӣ, дақиқ ва табиӣ миёни донишҷӯёни муассисаҳои таҳсилоти олии касбӣ, вусъат бахшидани фаъолияти патенту ихтироот миёни донишҷӯён, магистрантон, докторантон аз рӯйи ихтисос (PhD) ва олимони равияҳои илмҳои риёзӣ, дақиқ ва табиӣ, нашри маводи илмӣ дар соҳаи илмҳои риёзӣ, дақиқ ва табиӣ, мавриди баррасӣ қарор гирифт.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
ТАҶЛИЛИ РӮЗИ МАТБУОТИ ТОҶИК ДАР ДОНИШГОҲ Санаи 10-уми марти соли равон дар Донишгоҳи давлатии Кӯлоб ба номи Абуабдуллоҳи Рӯдакӣ конфронси илмӣ-назариявӣ бахшида ба “Рӯзи матбуоти тоҷик” таҳти унвони “Нақши ВАО-и минтақаи Кӯлоб дар таҳкими худшиносии миллӣ” баргузор гардид. Дар конфронс ректори Донишгоҳ, доктори илмҳои ҳуқуқшиносӣ, профессор Раҳмон Дилшод Сафарбек, Шоири халқии Тоҷикистон Ҳақназар Ғоиб, муовинони ректор, собиқадорони матбуот ва рӯзноманигорони минтақаи Кӯлоб иштирок доштанд. Ректори Донишгоҳ, профессор Раҳмон Дилшод Сафарбек зимни ироаи сухани шодбошӣ ҳайати рӯзноманигорон, кормандони воситаҳои ахбори омма ва устодону донишҷӯён-рӯзноманигорони ояндаро ба Рӯзи матбуоти тоҷик табрику таҳният гуфта, барояшон комёбиҳои эҷодӣ ва рӯзгори саодатбору пурнишот таманно намуд. Боиси нишот ва саодати мардуми тоҷик дониста шуд, ки ҳамчун нишони эҳтиром ва эътибори аҳли матбуот, нақши созандаи рӯзноманигорон ҷиҳати бунёди ҷомеаи шаҳрвандӣ, ҳалли масоили иҷтимоиву иқтисодӣ ва сиёсию маданӣ, муаррифии шоистаи миллату давлат дар арсаи байналмилалӣ дар даврони соҳибистиқлолии кишвар аз соли 1994 инҷониб ҳамасола санаи 11 март ҳамчун Рӯзи матбуоти тоҷик таҷлил мешавад. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар робита ба нақш ва ҷойгоҳи аҳли матбуот ва васоити ахбори омма дар пешбурди ҳаёти иқтисодӣ ва иҷтимоии ҷомеа барҳақ таъкид намудаанд: “Имрӯз беш аз пеш маълум мегардад, ки нақши воситаҳои ахбори омма дар ҳаёти ҷомеаи муосир чӣ гуна бузург аст. Дар воқеъ, рӯзноманигорӣ касбест бошараф, пурзаҳмат, ки ғайр аз илму дониш, инчунин, маҳорату истеъдодро талаб менамояд. Рӯзноманигорон аз равшанфикрони созандаи ҷомеа буда, бешубҳа, ҷомеаро ба сӯйи музаффарият ва тараққиёт роҳнамоӣ мекунанд ва ин рисолати таърихиро бо сеҳри хома ва қудрати сухани созанда анҷом медиҳад. Сипас, Шарофат Худойдодова, дотсент, муовини ректор оид ба муносибатҳои байналмилалӣ дар мавзуи “ВАО-и муосир: таҳдидҳо ва дурнамо”, Алишери Абдулмаҷид, дотсент, мудири кафедраи журналистика дар мавзуи “Рӯзнома-шоҳроҳи тафаккури миллӣ” баромад намуданд. Маърӯзакунандагон иброз доштанд, ки матбуоти тоҷик дар тӯли таърихи мавҷудияташ ҳамеша бозгӯкунандаи вазъи воқеии сиёсӣ, иқтисодӣ, иҷтимоӣ ва фарҳангии кишварамон буда, дар марҳилаи нав ҷиҳати иҷрои рисолати созандагиву бунёдкорӣ ва таҳкими ҳамдигарфаҳмию гиромидошти суботи сартосарӣ дар кишвар ба дастовардҳои назаррас ноил гардида истодааст. Дар идома Шоири халқии Тоҷикистон - Ҳақназар Ғоиб, намояндаи шуъбаи таҳлилию иттилоотии Дастгоҳи раиси вилояти Хатлон Сафаров Бахтиёр, роҳбари намояндагии Муассисаи давлатии “Телевизиони Сафина” дар минтақаи Кӯлоб Сафарзода Ширинҷон ва хабарнигори рӯзномаи “Навиди Кӯлоб” Фарҳод Мадаминов доир ба нақши матбуот дар ҳаёти ҷамъиятӣ ибрози андеша намуда, таъкид бар он намуданд, ки воситаҳои ахбори омма барои инъикоси таҳаввулоти азими иқтисодиву иҷтимоӣ, таҳкими сулҳу ваҳдат, ҳифзи манофеи миллӣ, сари вақт ба аҳолӣ расонидани ахбори зарурӣ оид ба cамтҳои гуногуни хоҷагии халқ ва ҳалли мушкилоти мавҷуда нақши барҷаста ва муассир доранд. Дар анҷоми ҳамоиш ба 3 нафар устодон Шаҳодатномаи узви нави Иттифоқи Журналистони Тоҷикистон супорида шуда, ин гурӯҳе аз омӯзгорону кормандони муассиса ва намояндагони ВАО дар минтақаи Кӯлоб бо Сипосномаҳои ректори Донишгоҳ ва Иттифоқи журналистони Тоҷикистон қадрдонӣ шуданд.
71
10.03.2025 -
БАРГУЗОРИИ ДАВРИ ИНТИХОБИИ ОЛИМПИАДАИ БАЙНАЛМИЛАЛИИ МЕДЕЛЕЕВ АЗ ФАННИ ХИМИЯ Имрӯз, 7-уми марти соли 2025 дар Маркази ҷумҳуриявии дарёфт ва рушди истеъдодҳо даври интихобии Олимпиадаи байналмилалии Менделеев аз фанни химия баргузор гардид. Дар Олимпиада 33 нафар хонандагон аз муассисаҳои таҳсилоти умумии ҷумҳурӣ, аз ҷумла хонандагони вилояти Суғд ба гунаи онлайнӣ иштирок варзиданд. Бояд қайд намуд, ки Олимпиадаи мазкур аз 5 то 13 май дар шаҳри Белу Ҳирозонтии Ҷумҳурии Федеративии Бразилия бо мизбонии Донишгоҳи Федералии Минас-Жейрас баргузор хоҳад гардид.
40
07.03.2025 -
МОДАР САРЧАШМАИ ЗИНДАГИСТ. Паёми табрикии вазири маориф ва илми Ҷумҳурии Тоҷикистон Саидзода Раҳим Ҳамро ба ифтихори Рӯзи модар Модарони азиз! Бонувон ва хоҳарони арҷманд! Хеле хушоянду фараҳафзост, ки дар Тоҷикистони соҳибистиқлоли мо Рӯзи модар бо шукӯҳу тантанаи хос дар нахустрӯзҳои зеботарин фасли сол - баҳори нозанину ҷаҳоноро таҷлил мешавад. Модар худ ҳамчун рамзи меҳру муҳаббат, вафодорию садоқат ва ҳусну тароват эътироф гардидааст ва ҳаёти ҳар як фард аз домани поки ӯ оғоз меёбад. Зиндагии мо аз ҳастии модарон ва аз шафоатҳои онҳо нуру сафо мегирад, равнақу ривоҷ мепазирад. Модаронанд, ки моро ба корҳои нек, ба иродатмандию покизагӣ ва ба фардои саодатбор ҳидояту раҳнамоӣ мекунанд ва пайваста бар он талош меварзанд, ки рӯзгори мо пурнишоту хушу хуррам бошад. Модарон олиҳаи зиндагии моянд ва мекӯшанд, ки дар дили мо, пеш аз ҳама, меҳру муҳаббат ба Ватан, ба зодбум ва ба халқу миллатро бипарваранд. Барои ҳаёти осоиштаю файзбори мо дасти дуои модарони меҳрубон ҳамеша болост: Сад ҷону дил фидои як муддаои модар, Фатҳу кушоиш орад дасти дуои модар. Эҳтироми модар, хидмату арҷгузорӣ ба ӯ ва поси хотири ӯро нигоҳ доштан аз умдатарин фазилатҳои ҳар як фарзанди шоистаю асил аст. Мо ифтихормандем, ки модари тоҷик обрую шарафи баланд дорад ва ҳамеша баҳри ободонию фаровонӣ, хайру баракат, сулҳу ваҳдат ва дӯстию рафоқат садо баланд мекунад. Модари тоҷик дар дарозои таърих ҳазорҳо абармардонеро ба дунё овардаю парвардааст, ки дар рушду такомули тамаддуни башарият ҳиссаи сазовору мондагор гузоштаанд. Даврони истиқлол барои модари тоҷик ва кулли бонувони шарафманди ин миллати фархунда имконоти фаровонеро фароҳам овард. Ҳамакнун барои фаъолияти густардаи онҳо ва амалисозии тамоми орзую амалҳои некашон ҳеҷ монеае намондааст. Аз ин ҷост, ки бонувони сарбаланду озодаю фархундаи тоҷик арсаи фаъолияти худро пайваста вусъат мебахшанд ва ҷойгоҳи хешро дар ҷомеаи пешравамон ҳар чи бештар устувор месозанд. Имрӯз модарону бонувони мо дар радифи иҷрои рисолати азалию ифтихории худ - тарбияи фарзанд, ҳамчунин, дар вазифаҳои масъулиятбору муҳимми давлатию ҷамъиятӣ сарбаландона ва бо камоли кордонӣ фаъолият доранд ва баҳри рушду такомулу ободонии Ватани маҳбубамон ҳиссагузорӣ мекунанд. Мавқеъ, фаъолият ва азму иродаи неки бонувони тоҷик дар аҳди истиқлол дар асарҳо ва суханрониҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба таври хеле барҷастаю возеҳ ва бо эътиқоду эҳтироми самимӣ таҷассум ёфтааст. Гузашта аз ин, Пешвои миллат як китоби алоҳидаи худро, ки «Зиндагӣ аз модар сарчашма мегирад» ном дорад, ба ситоишу бузургдошти модарону бонувон бахшидаанд. Нақши бонувони мо, махсусан, дар соҳаи маориф хеле барҷастаю пурбаракат аст. Онҳо баҳри боло рафтани сатҳи таълиму тарбия дар тамоми муассисаҳои таълимӣ, аз кӯдакистонҳо то мактабҳои олӣ, пайваста заҳмат мекашанд ва дар ҷодаи татбиқи сиёсати маорифпарваронаи Сарвари кишвар ба комёбиҳои рӯзафзун ноил гаштаанд. Бонувон дар соҳаи маориф неруи меҳварианд, 73 дарсади кормандони ин соҳаро ташкил медиҳанд ва мекӯшанд, ки насли наврас-ояндасозони миллат дар руҳияи садоқат ва муҳаббат ба халқу Ватан парвариш ёбанд, хушодобу нексиришт бошанд. Суханони саршор аз эътиқоду боварии Пешвои муаззами миллат, ки дар Паёми навбатиашон ба Маҷлиси Олӣ (28.12.2024) садо доданд, бори дигар ифодагари нақши бузурги занону бонувон дар ҷомеаи кунунии мо гардиданд: «Бовар дорам, ки бонувону занон ва модарону духтарони азизи мо дар амалисозии талаботу муқаррароти қонунҳои миллӣ, пешгирӣ кардани бегонапарастӣ, аз ҷумла, сарулибос ва ойинҳои барои мардуми мо бегона, ба камол расондани наслҳои солим, таҳкими сулҳу субот дар ҷомеа, пешрафти давлат ва ободии Ватан минбаъд низ саҳми арзишманди худро мегузоранд». Бо боварии комил метавон гуфт, ки ин суханрони эътимодмандона, пеш аз ҳама, ба бонувоне, ки дар соҳаи маориф кор мекунанд, дахл доранд ва онҳоро ба фаъолияти боз ҳам фарогиртару густардатар ҳидоят мекунанд. Албатта, бонувони соҳа ҳамеша сазовор ба ин эътимоди баланд амал хоҳанд кард. Модарон ва бонувони арҷманд! Шуморо ба ифтихори фарорасии ҷашни фархунда-Рӯзи модар, ки барои ҳар як фарди ҷумҳурии маҳбубамон ҷашни писандидаву фараҳбор аст, самимона табрику таҳният мегӯям. Таманнои онро дорам, ки ҳамеша хушбахту саодатманд, тансиҳату сарбаланд ва бархурдор аз рӯзгори файзбору тинҷу осуда бошед. Ҷашн муборак, модарону бонувони азиз!
43
07.03.2025
