19-уми сентябри соли 2025 вазири маориф ва илми Ҷумҳурии Тоҷикистон Раҳим Саидзода бо мақсади шиносоӣ бо вазъи ҷории муассисаҳои таълимӣ, сатҳу сифати омодагиҳо ба мавсими тирамоҳу зимистонгузаронии солҳои 2025-2026, риояи қоидаҳои тартиботи дохилӣ, татбиқи низоми баҳогузории 10-хола ва таъмини шароити мусоиди таҳсил барои хонандагон, аз Муассисаи таҳсилоти миёнаи умумии №14-и ноҳияи Рӯдакӣ боздид намуд.

Дар ҷараёни ин боздид вазири маориф ва илм бо ҳолати умумии муассисаи таълимӣ аз наздик шинос гардида, бо хонандагон, омӯзгорон ва ҳайати роҳбарияти мактаб суҳбат анҷом дод.

Дар муассисаи мазкур ба зиёда аз 1800 хонанда 60 омӯзгор дарс медиҳанд. Муассиса пурра бо кадрҳои омӯзгорӣ таъмин буда, вобаста ба норасоии кадрӣ ва ҷойи нишаст камбудӣ дида намешавад. Ҳамзамон, дар назди муассиса бо ибтикорӣ волидон сохтмони синфхонаҳои нави иловагӣ дар арафаи анҷомёбӣ қарор дорад.

Дар рафти боздид як қатор мушкилот ва камбудӣ ошкор шуд. Аз ҷумла, зимни боздид маълум гардид, ки директори муассиса (Раҳмонов Амриддин) дар вақти корӣ бе сабабҳои узрнок дар ҷойи кор ҳузур надошт. Набудани роҳбари муассиса дар ҷойи кор дар рӯзҳои дарсӣ ва дар вақти фаъолият, хилофи принсипҳои масъулияти роҳбарӣ ва риояи интизоми меҳнатӣ мебошад.

Муассисаи мазкур ба мавсими тирамоҳу зимистонгузаронӣ омодагии кофӣ надошта, бо вуҷуди наздик шудани рӯзҳои сармо, то ҳол миқдори зарурии ҳезум захира нашудааст.

Дигар мушкилоте, ки дар ҷараёни боздид ба мушоҳида расид, ин набудани лавҳаи расмӣ бо номи муассиса дар қисми пеши бинои таълимӣ мебошад. Мувофиқи талаботи амалкунанда, ҳар як муассисаи таҳсилоти миёнаи умумӣ бояд дар даромадгоҳи худ дорои аломати шиносоии муайянкунанда ва лавҳаи иттилоотии расмӣ бошад, ки дар он номи пурраи муассиса, рақам ва дигар маълумоти зарурӣ нишон дода мешавад. Вазъияти техникии синфхонаҳо низ камбудиҳои муайянро дар бар дошт. Аз ҷумла, дар як қатор синфхонаҳо чароғҳо (лампаҳои равшанидиҳӣ) сӯхтаанд ва то ҳол иваз карда нашудаанд, ки ин боиси коҳиш ёфтани равшании синфҳо мегардад ва шароити умумии таҳсилро ба таври назаррас душвор месозад. Дар муассиса умуман камераҳои назоратӣ насб нашудааст.

Масъалаи дигаре, ки дар ҷараёни боздид мавриди таваҷҷуҳи махсус қарор гирифт, татбиқ нагардидани кофии низоми баҳогузории 10-хола дар муассиса буд. Тибқи дастурҳои амалкунанда ин низом бояд дар тамоми муассисаҳои таҳсилоти миёнаи умумӣ амалӣ мегардид, аммо дар муассисаи мазкур омӯзгорон то ҳол баҳогузориро 10-холаро ба таври кофӣ ҷорӣ накардаанд, ки ин гувоҳ аз камбудиҳои марбут ба омодагӣ, омӯзиш ва беназоратии роҳбарияти муассиса мебошад. Ҳангоми иштирок дар дарсҳо маълум гардид, ки аксари хонандагон забонҳои хориҷиро намедонанд.

Ҳамзон, вазири маориф ва илм аз ҳолати муассисаи томактабии назди Муассисаи таҳсилоти миёнаи умумии №14, ки 105 кӯдакро ба таълим фаро гирифтааст, дидан намуд. Зимни боздид аз муассисаи томактабӣ вазир аз камбудиҳои ҷойдошта, аз ҷумла дар вақти корӣ бе сабабҳои узрнок дар кор набудани мудири боғча (Файзова Зарагул), ғайритахасус фаъолият намудани мураббия, ҷойи хоби кӯдакон ва ҳолати гигиенӣ изҳори нигаронӣ намуд.

Дар охир вазири маориф ва илм ба масъулини муассиса ва раёсати маориф дастур дод, ки тамоми камбудиҳои зикршударо дар муҳлатҳои муқарраргардида бартараф намуда, аз имкониятҳои мавҷуда ва дастгирии мақомоти иҷроияи маҳаллӣ истифода бурда, зимистонгузаронии муассисаро таъмин намоянд, муҳити гигиениро беҳтар созанд, равшанидиҳиро барқарор намоянд, лавҳаи муассисаро насб кунанд ва ба татбиқи пурраи низоми баҳогузории 10-хола шуруъ намоянд. Илова бар ин масъалаи риояи интизоми меҳнат ва ҳузури надоштани роҳбарони муассисаҳо дар ҷойи кор мавриди санҷиш ва арзёбии иловагӣ қарор хоҳад гирифт.

Маркази матбуоти

Вазорати маориф ва илми

Ҷумҳурии Тоҷикистон