Бо мақсади шиносоӣ аз раванди таълиму тарбия, корҳои ободонӣ, шароити синфхонаҳо ва интизоми меҳнат, имрӯз, 19 сентябри соли 2025, вазири маориф ва илми Ҷумҳурии Тоҷикистон Раҳим Саидзода беогоҳӣ аз Муассисаи таҳсилоти миёнаи умумии №16 ноҳияи Ёвон боздид намуд.

Дар шароите ки таваҷҷуҳу дастгириҳои Ҳукумати Ҷумҳурии Тоҷикистон, хосса Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба соҳаи маориф рӯз ба рӯз бештар гардида, барои пешрафти низоми таҳсил шароити мусоиди моддиву техникӣ ва ҳуқуқӣ фароҳам оварда шудааст, вале таҳлилҳо нишон медиҳанд, ки дар баъзе муассисаҳои таълимӣ татбиқи самараноки ин сиёсати давлатӣ бо мушкилот рӯбарӯ мебошад.

Зимни боздид маълум гардид, ки дар муассисаи мазкур, бо вуҷуди дастгирии доимии давлат, дар самтҳои таълиму тарбия, корҳои тарбиявӣ ва таъмини интизоми меҳнат камбудиҳои муайян ҷой доранд. Муассиса, ки соли 2016 таъсис ёфтааст, бояд аз лиҳози шароит, муҳити омӯзишӣ ва сатҳи ташкили дарсҳо ҷавобгӯи талаботи замони муосир бошад, вале вазъ дар шароити нигаҳдории муассиса нигаронкунанда мебошад.

Дар муассиса 54 нафар омӯзгор ба таълими 1680 хонанда дар ду баст машғул мебошанд. Бо вуҷуди ин, дар ҷараёни дарси яке аз гурӯҳҳо мушоҳида гардид, ки танҳо 21 нафар аз 29 хонанда ҳузур доштанд, ки ин нишонаи таваҷҷуҳи нокофӣ ба масъалаи ҳозиршавии хонандагон ба дарс мебошад. Илова бар ин, аз 21 компютердар синфхонаи компютерӣ, танҳо 3 адади он фаъол буд, ки ин ҳолат нигаронкунанда арзёбӣ гардид. Ҳолати мазкур равшан мекунад, ки нигоҳубини таҷҳизот ва таъмини дарс бо шароити зарурӣ ба таври мунтазам ба роҳ монда нашудааст ва баъзан муассисаҳо ба шуъбаҳои маориф аз бемасъулиятӣ омори саҳеҳ ироа намекунанд.

Ҳатто хонандагони ҳузурдошта натавонистанд ба саволҳои оддӣ, аз ҷумла, муаррифии худ ба забонҳои русӣ ва англисӣ ё фаҳмиши мафҳуми “технологияи иттилоотӣ” ҷавоби дуруст диҳанд. Ин ҳолат на танҳо нишондиҳандаи камбуд дар раванди омӯзиш аст, балки то андозае, сатҳи масъулияти худи хонандагон ва инчунин саҳми волидонро дар раванди таълиму тарбия зери суол мебарад.

Дар баробари ин, омезиши гуруҳҳои синфҳои 8 ва 9 дар як соати дарсӣ хилофи талаботи меъёрҳои таълим буда, нишон медиҳад, ки ташкили дарсҳо дар баъзе мавридҳо аз рӯйи принсипҳои равшан ва қонунӣ сурат намегирад. Ҳамзамон, ҳолати дарсшиканӣ аз ҷониби баъзе хонандагон, дар ҳолате ки соати дарсӣ ҳанӯз ба анҷом нарасида буд, баёнгари заъфи назорат дар дохили муассиса ва ноогоҳии баъзе хонандагон аз аҳамияти таҳсил мебошад.

Сару либоси тавсиявии хонандагон низ риоя нагардидааст, ки дар ин самт низ назорати дурусти маъмурият ва корҳои фаҳмондадиҳӣ бо волидон ва худи хонандагон зарур аст.

Вазири маориф ва илм зимни боздид, вобаста ба вазъи муассиса ва камбудиҳои мушоҳидагардида, таъкид намуд, муносибати масъулин бояд боз ҳам ҷиддитару бо масъулияти бештар ба роҳ монда шавад. Камбудиҳо дар сатҳи таҳсил, интизом, муҳити омӯзиш ва сатҳи омодагии хонандагон бояд ба таври таҳлилӣ баррасӣ гардида, ислоҳи онҳо ба таъхир гузошта нашавад.

Дар баробари масъулияти омӯзгорон ва маъмурияти муассиса, вазорат зикр мекунад, ки нақши волидон дар таъмини интизоми фарзандон ва дастгирии раванди таълим хеле муҳим аст. Бетафовутӣ ва беназоратии баъзе волидон нисбат ба рафтор ва таҳсили фарзандон, сабаби дуҷонибаи ба вуҷуд омадани мушкилот гаштааст.

Вазир таъкид кард, ки ҳар як корманди соҳаи маориф вазифадор аст, ки бо эҳсоси ватандӯстӣ ва садоқат ба Пешвои муаззами миллат муҳтарам Эмомалӣ Раҳмон, фаъолияти худро ба роҳ монда, ба татбиқи амалии сиёсати маориф ҷиддӣ мусоидат намояд. Махсусан дар ҳамкорӣ бо волидон ва ҷомеа, шароити муассисаҳо беҳтар шуда, сатҳи таълим ва интизоми хонандагон ба маротиб баланд мегардад.

Маркази матбуоти

Вазорати маориф ва илми

Ҷумҳурии Тоҷикистон