15.10.2025
Дар шаҳри Алматои Ҷумҳурии Қазоқистон Конгресси якуми ҷаҳонӣ оид ба таҳсилоти фарогир бо иштироки вазирони маориф ва илми як қатор давлатҳо, коршиносони байналмилалӣ, намояндагони сохторҳои давлатӣ ва ҷамъиятӣ баргузор гардид.
Имрӯз, 15 октябри соли 2025 қабл аз ифтитоҳи расмии кори конгресс таҳти унвони “Тамоюлҳои ҷаҳонӣ дар таҳсилоти фарогир: мушкилот ва роҳҳои ҳалли онҳо” мизи мудаввар баргузор гардид.
Зимни баргузории мизи мудаввар вазири маориф ва илми Ҷумҳурии Тоҷикистон Раҳим Саидзода вобаста ба таҷрибаи рушди таҳсилоти фарогир дар Ҷумҳурии Тоҷикистон, фароҳам овардани муҳити мусоид барои таҳсил ва рушди ҳамаҷонибаи кӯдакон суханронӣ намуд.
Сипас, Конгресси якуми ҷаҳонӣ оид ба таҳсилоти фарогир кори худро расман оғоз намуда, дар қисмати пленарии он вазири маориф ва илми Ҷумҳурии Тоҷикистон суханронӣ намуд.
Вазири маориф ва илм дар суханронии худ қайд намуд, ки дар Ҷумҳурии Тоҷикистон таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба таҳкими асоси ҳуқуқии соҳаи маориф ва илм, бахусус дар самти таҳсилоти фарогир, таваҷҷуҳи ҷиддӣ зоҳир мегардад. Гуфта шуд, ки имрӯз дар кишвари мо дар доираи қонунҳои Ҷумҳурии Тоҷикистон “Дар бораи маориф” ва “Дар бораи таълиму тарбияи томактабӣ” ислоҳоте татбиқ мешавад, ки ҳадафи онҳо таъмини дастрасии бештари кӯдакон ба таҳсилот, аз ҷумла, кӯдакони дорои эҳтиёҷоти махсус, мебошад. Ҳамзамон, дар доираи Стратегияи миллии рушди маориф барои давраи то соли 2030 тадбирҳои мушаххас барои густариши таҳсилоти фарогир, аз ҷумла, рушди инфрасохтор, навсозии барномаҳои таълимӣ, таҳияи китобҳои насли нав ва таҳкими нақши омӯзгорон, пешбинӣ шуда, давра ба давра амалӣ шуда истодаанд. Дар доираи лоиҳаҳо ва ташаббусҳои амалии соҳаи маорифи Ҷумҳурии Тоҷикистон корҳо дар самти беҳтарсозии омодагии кӯдакон ба мактаб, навсозии барномаҳои томактабӣ бо дарназардошти ниёзҳои кӯдакони маъюб аз ақаллиятҳои миллӣ, таҷҳизонидани муассисаҳои томактабӣ, боло бурдани савияи тахассусии кормандони соҳа, ҷалби волидон ва ҷомеа идома дорад.
Вазири маориф ва илм дар идома иброз дошт, ки Ҷумҳурии Тоҷикистон дар миёни кишварҳои Осиёи Марказӣ аз рӯйи таҳия ва нашри китобҳо барои намояндагони ақаллиятҳои миллӣ мавқеи пешсафро соҳиб аст, ки ин нишондиҳандаи муҳимми пешрафт дар соҳаи таҳсилоти фарогир мебошад.
Дар фароварди суханронии худ вазир иброз намуд, ин ҳамоиши байналмилалӣ ба таҳкими муносибатҳои устувор дар ҳамаи самтҳои ҳамкорӣ дар соҳаи маориф ва илм мусоидат намуда, бешак дӯстӣ ва эътимод байни кишварҳоро боз ҳам мустаҳкамтар месозад.
Дар идомаи чорабинӣ вазирони маорифи дигар давлатҳо, намояндагони ташкилотҳои байналмилалӣ ва муассисаҳои давлатӣ бо гузоришҳои худ баромад намуданд.
Дар анҷом иштирокчиён Декларатсияи Алмато оид ба таҳсилоти фарогирро муҳокима намуданд, ки ҳадафи он таҳкими ҳамкорӣ миёни кишварҳо барои фароҳам овардани таҳсилоти босифат ва баробар барои тамоми кӯдакон мебошад.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
БАРНОМАИ ИТТИЛООТИИ «KUDAK.TJ» БАРОИ МУАССИСАҲОИ ТОМАКТАБӢ РӮНАМО ШУД 27 апрели соли ҷорӣ дар бинои «IT Park Dushanbe» маросими расмии рӯнамоии барномаи иттилоотии «Kudak.tj» барои муассисаҳои таҳсилоти томактабии шаҳри Душанбе доир гардид. Дар чорабинӣ сардори Сарраёсати маорифи шаҳри Душанбе Б. Исмоилзода, муовини директори Агентии назорат дар соҳаи маориф ва илми назди Президенти Ҷумуҳрии Тоҷикистон Д. Муқимӣ, доктори илмҳои педагогӣ академик, ноиби Президенти Академияи таҳсилоти Тоҷикистон И. Каримова, сардори раёсати таҳсилоти томактабии Вазорати маориф ва илми Ҷумҳурии Тоҷикистон Д. Назарализода, сардори раёсати Агентии назорат дар соҳаи маориф ва илми назди Президенти Ҷумуҳрии Тоҷикистон дар шаҳри Душанбе Т. Маҳмадова, директори Маркази ҷумҳуриявии таълимию методии назди Вазорати маориф ва илми Ҷумҳурии Тоҷикистон Ш. Каримзода, директори Муассисаи давлатии «Маркази таҳлилӣ‑иттилоотии назди Сарраёсати маорифи шаҳри Душанбе» З. Муродзода, намояндагони мақомоти иҷроияи ҳокимияти давлатии шаҳри Душанбе, роҳбарият ва ҳайати кормандони Маркази таҳлилӣ‑иттилоотии назди Сарраёсати маорифи шаҳри Душанбе, менеҷерони барнома, мудирони муассисаҳои таҳсилоти томактабии шаҳри Душанбе ва доираи васеи рӯзноманигорон иштирок намуданд. Чорабинӣ бо ташаббуси Мақомоти иҷроияи ҳокимияти давлатии шаҳри Душанбе ва аз ҷониби Сарраёсати маорифи шаҳри Душанбе баргузор шуда, ба марҳалаи нави рақамикунонии равандҳои таҳсилоти томактабӣ дар пойтахт оғоз бахшид. Бояд гуфт, ки барномаи иттилоотии «Kudak.tj» низоми ягонаи рақамӣ барои бақайдгирии кӯдакон ба кӯдакистонҳо, идоракунии раванди қабул, ташкили омори дақиқ ва такмили ҳамкории муассисаҳо бо волидайн мебошад. Он бо мақсади содагардонии расмиёти бақайдгирӣ, таъмини шаффофияти навбат ва роҳхат, автоматикунонии журнали давомот ва беҳтар намудани назорати дохилии муассисаҳои томактабӣ таҳия шудааст. Гуфта шуд, ки барнома дар асоси Қарори Раиси шаҳри Душанбе аз 17 сентябри соли 2025, №575 роҳандозӣ гардида, аввалин маротиба маҳз дар муассисаҳои таҳсилоти томактабии пойтахт ба кор дароварда шудааст. Ба таъкиди роҳбарияти соҳа, таҷрибаи Душанбе минбаъд метавонад барои дигар шаҳру ноҳияҳо низ ҳамчун намуна хизмат кунад. Дар қисми амалии чорабинӣ менеҷерони барнома аз Муассисаи давлатии «Маркази таҳлилӣ‑иттилоотии назди Сарраёсати маорифи шаҳри Душанбе» сохтор ва тартиби истифодаи «Kudak.tj»-ро бо баргузории рӯнамо ва намоиши слайдҳо шарҳ доданд. Иштирокчиён аз ҷорӣ гардидани чунин низоми ягонаи рақамӣ истиқбол намуда, омодагии худро барои ҳамкорӣ дар ҷараёни татбиқи минбаъдаи барнома баён карданд. Дар анҷом таъкид гардид, ки «Kudak.tj» барои таҳким бахшидани шаффофият, сарфаи вақт, баланд бардоштани сифати идоракунӣ ва таҳкими робитаи муассисаҳои томактабӣ бо волидайн нақши муҳим хоҳад бозид. Ба гуфтаи масъулон, ҳамзамон бо тавсеаи ҷуғрофии барнома, пайваста такмил додани муҳтавои рақамӣ ва беҳтар намудани хизматрасонӣ ба корбарон дар назар дошта шудааст.
46
27.04.2026 -
МАРОСИМИ ҶОИЗАСУПОРИИ ОЗМУНҲОИ ҶУМҲУРИЯВӢ БАХШИДА БА РӮЗИ ИЛМИ ТОҶИК Имрӯз, 24 апрели соли 2026 маросими тантанавии ҷоизасупории ғолибони як қатор озмунҳои ҷумҳуриявӣ, аз ҷумла, «Олими сол», «Муҳаққиқ ва ихтироъкори ҷавон» ва «Магистранти сол» баргузор гардид. Чорабинии мазкур бо ташаббуси Вазорати маориф ва илми Ҷумҳурии Тоҷикистон ба ифтихори Рӯзи илми тоҷик ва ҷашни 35-солагии Истиқлолияти давлатии Ҷумҳурии Тоҷикистон роҳандозӣ шуд. Дар оғози чорабинӣ вазири маориф ва илми Ҷумҳурии Тоҷикистон Раҳим Саидзода суханронӣ намуда, ҳамаи иштирокчиёнро ба муносибати Рӯзи илми тоҷик ва маросими ҷоизасупорӣ самимона табрик намуда, таъкид кард, ки рушди илму маориф яке аз самтҳои афзалиятноки сиёсати давлатии Ҷумҳурии Тоҷикистон ба ҳисоб меравад. Зикр шуд, ки Истиқлолияти давлатии Ҷумҳурии Тоҷикистон рушди фаъолияти босамари ҳамаи сохторҳои ҷамъиятии кишварро таъмин намуда, болоравии сатҳу сифати зиндагии аҳолиро давра ба давра таъмин намуда истодааст. Маҳз бо шарофати ин неъмати бузург ва сиёсати созандаю ободкоронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кишвар пояҳои давлати демократӣ, дунявӣ ва ҳуқуқбунёд мустаҳкам гардида, Ҷумҳурии Тоҷикистон дар арсаи байналмилалӣ мавқеъ ва нуфузи худро боло бурда истодааст. Дар баробари рушди соҳаҳои иқтисодиву иҷтимоӣ ва фарҳангиву сиёсии кишвар, соҳаи илму маорифи ҷумҳурӣ низ тадриҷан рушд ёфта истодааст. Дар ин даврон дар самти таъмини заминаҳои рушди илм дар Ҷумҳурии Тоҷикистон як қатор стратегия ва барномаҳои соҳавӣ қабул гардиданд, ки ҳадафи аслияшон тақвияти нақши илм дар рушди ҷумҳурӣ мебошад. Қабули санадҳои муҳим, аз ҷумла, «Дар бораи Номгӯйи самтҳои афзалиятноки таҳқиқоти илмӣ ва илмию техникӣ дар Ҷумҳурии Тоҷикистон барои давраи то 2030», «Стратегияи илм, технология ва инноватсия барои давраи то соли 2030», «Барномаи мақсадноки давлатии рушди илмҳои риёзӣ, дақиқ ва табиӣ барои солҳои 2026-2030», «Барномаи давлатии тайёр кардани кадрҳои сатҳи баланди илмӣ барои солҳои 2021-2030» аз ҷумлаи чунин иқдомҳоянд, ки дар рушди илм нақши муҳим мебозанд. Бо ташаббус ва ҳидоятҳои маорифпарваронаи Пешвои муаззами миллат дар кишварамон ҳамасола озмунҳои ҷумҳуриявии «Фурӯғи субҳи доноӣ китоб аст», «Илм – фурӯғи маърифат», «Тоҷикистон – Ватани азизи ман» ва имсол «Шоҳномахонӣ» баргузор мегардад, ки дар онҳо теъдоди зиёди хонандагону донишҷӯён, магистрантону докторантон аз рӯйи ихтисос (PhD), омӯзгорон ва намояндагони касбу кори гуногуни ҷомеаи кишвар ширкат варзида, малакаву маҳорат ва истеъдоди эҷодиву ихтироъкории худро нишон медиҳанд. Дар ин раванд якчанд озмунҳои ҷумҳуриявии самти илм, аз зумраи «Олими сол», «Муҳаққиқ ва ихтироъкори ҷавон» ва «Магистранти сол» низ баргузор карда мешаванд, ки имрӯз ҳамаи мо дастаҷамъона дар маросими ҷоизасупории ин озмунҳо ширкат варзида истодаем. Бояд гуфт, соли равон ба озмуни «Олими сол» 47 парванда пешниҳод гардида, 13 нафар ғолиб дониста шуданд. Ба озмуни «Муҳаққиқ ва ихтироъкори ҷавон» 101 ҳуҷҷат ворид гардида, 41 нафар ғолиб муайян гардиданд, ки аз онҳо 10 нафарро бонувон ташкил медиҳанд. Дар озмуни «Магистранти сол» бошад, аз 44 кори илмӣ 7 нафар ғолиб эътироф шуданд, ки аксари онҳоро бонувон ташкил медиҳанд. Дар идомаи чорабинӣ маросими ҷоизасупорӣ баргузор шуда, нахуст ғолибони озмуни «Муҳаққиқ ва ихтироъкори ҷавон» қадрдонӣ гардиданд. Ғолибон вобаста ба зинаҳои таҳсил ва самтҳои илмӣ бо диплом, ҷом ва мукофотпулӣ сарфароз гардонида шуданд. Сипас, ғолибони озмуни «Магистранти сол» дар бахшҳои гуногуни илм, аз ҷумла кишоварзӣ, заминшиносӣ, гуманитарӣ, техникӣ, тиббӣ ва иҷтимоӣ-иқтисодӣ бо мукофотҳо қадрдонӣ гардиданд. Дар бахши дигар ғолибони озмуни «Олими сол» миёни омӯзгорон ва олимони муассисаҳои таҳсилоти олии касбӣ ва илмии кишвар бо диплом, ҷом ва мукофотпулӣ дар ҳаҷми 10 ҳазор сомонӣ сарфароз карда шуданд. Бояд гуфт, ғолибони озмунҳои ҷумҳуриявӣ дар озмуни «Муҳаққиқ ва ихтироъкори ҷавон» барои ҷойи якум миёни донишҷӯён ва магистрантон 3000 сомонӣ ва миёни унвонҷӯён, аспирантон ва докторантон (PhD) 5000 сомонӣ, барои ҷойи дуюм мутаносибан 2000 ва 3000 сомонӣ, барои ҷойи сеюм 1000 ва 2000 сомонӣ ҷудо гардида, дар озмуни «Магистранти сол» ғолибон дар ҳар як бахш бо 5000 сомонӣ ва дар озмуни «Олими сол» ғолибон бо 10000 сомонӣ қадрдонӣ карда шуданд.. Ҳамзамон, дар доираи чорабинӣ як қатор олимону кормандони соҳа барои саҳми арзандаашон дар рушди илм ва маориф, иштирок дар таҳияи санадҳои меъёрии ҳуқуқӣ ва фаъолияти пурсамари омӯзгорӣ бо нишони «Аълочии маориф ва илми Тоҷикистон» ва «Ифтихорнома»-и Вазорати маориф ва илм қадрдонӣ гардиданд. Дар фарҷоми чорабинӣ барномаи рангини фарҳангӣ пешниҳоди ҳозирин гардида шуд. Маркази матбуоти Вазорати маориф ва илми Ҷумҳурии Тоҷикистон
127
24.04.2026 -
ДАР ДУШАНБЕ ҒОЛИБОНИ ЯКЧАНД ОЗМУНҲОИ ҶУМҲУРИЯВӢ ҚАДРДОНӢ ГАРДИДАНД Имрӯз дар шаҳри Душанбе бо ташаббуси Вазорати маориф ва илми Ҷумҳурии Тоҷикистон ба муносибати Рӯзи илми тоҷик ва ҷашни 35-солагии Истиқлоли давлатӣ маросими ҷоизасупорӣ ба ғолибони якчанд озмунҳои ҷумҳуриявӣ, аз ҷумла «Олими сол», «Муҳаққиқ ва ихтироъкори ҷавон» ва «Магистранти сол» баргузор гардид. Дар ин хусус ба АМИТ «Ховар» аз Вазорати маориф ва илм хабар доданд. Соли равон ба озмуни «Олими сол» 47 парванда пешниҳод гардида, 13 нафар ғолиб дониста шуданд. Ба озмуни «Муҳаққиқ ва ихтироъкори ҷавон» 101 ҳуҷҷат ворид гардида, 41 нафар ғолиб муайян гардиданд, ки аз онҳо 10 нафарро занон ташкил медиҳанд. Дар озмуни «Магистранти сол» аз байни 44 кори илмӣ 7 нафар ғолиб эътироф шуданд, ки аксари онҳо занон мебошанд. Ғолибони ин озмунҳо бо Диплом, ҷом ва мукофотпулӣ сарфароз гардонида шуданд. Дар оғози маросими ҷоизасупорӣ Вазири маориф ва илм Раҳим Саидзода иброз намуд, ки рушди илму маориф яке аз самтҳои афзалиятноки сиёсати давлатии Тоҷикистон ба ҳисоб меравад. Маҳз бо сиёсати созандаю ободкоронаи Президенти Ҷумҳурии Тоҷикистон муҳтарам Эмомалӣ Раҳмон дар мамлакат пояҳои давлати демократӣ, дунявӣ ва ҳуқуқбунёд мустаҳкам гардида, Тоҷикистон дар арсаи байналмилалӣ мавқеъ ва нуфузи худро баланд мебардорад. Такъид карда шуд, ки дар баробари рушди соҳаҳои иқтисодию иҷтимоӣ ва фарҳангию сиёсии давлат, соҳаи илму маорифи ҷумҳурӣ низ тадриҷан рушд меёбад. Дар ин давра дар самти таъмини заминаҳои рушди илм як қатор стратегия ва барномаҳои соҳавӣ қабул гардиданд. Аз ҷумла, «Дар бораи номгӯйи самтҳои афзалиятноки таҳқиқоти илмӣ ва илмию техникӣ дар Ҷумҳурии Тоҷикистон барои давраи то 2030», «Стратегияи илм, технология ва инноватсия барои давраи то соли 2030», «Барномаи мақсадноки давлатии рушди илмҳои риёзӣ, дақиқ ва табиӣ барои солҳои 2026-2030» ва «Барномаи давлатии тайёр кардани кадрҳои сатҳи баланди илмӣ барои солҳои 2021-2030» аз ҷумлаи чунин иқдомҳо мебошад, ки дар рушди илм нақши муҳим доранд. Тазаккур дода шуд, ки бо ташаббус ва ҳидоятҳои маорифпарваронаи Пешвои миллат муҳтарам Эмомалӣ Раҳмон дар мамлакат ҳамасола озмунҳои ҷумҳуриявии «Фурӯғи субҳи доноӣ китоб аст», «Илм – фурӯғи маърифат», «Тоҷикистон – Ватани азизи ман» ва имсол «Шоҳномахонӣ» баргузор мегардад, ки дар онҳо теъдоди зиёди хонандагону донишҷӯён, магистрантону докторантон аз рӯйи ихтисос (PhD), омӯзгорон ва намояндагони касбу кори гуногун иштирок менамоянд. Дар ин замина якчанд озмунҳои ҷумҳуриявии самти илм – «Олими сол», «Муҳаққиқ ва ихтироъкори ҷавон» ва «Магистранти сол» низ баргузор карда мешаванд. Дар доираи маросими ҷоизасупорӣ инчунин як зумра олимону кормандони соҳа барои саҳми арзанда дар рушди илм ва маориф, иштирок дар таҳияи санадҳои меъёрии ҳуқуқӣ ва фаъолияти пурсамари омӯзгорӣ бо нишони «Аълочии маориф ва илми Тоҷикистон» ва «Ифтихорнома»-и Вазорати маориф ва илми Ҷумҳурии Тоҷикистон қадрдонӣ гардиданд.
52
24.04.2026
