07.07.2025
Рӯзи 7-уми июли соли равон дар Донишгоҳи давлатии молия ва иқтисоди Тоҷикистон маросими навбатии супоридани дипломҳои аъло ба хатмкунандагони зинаи бакалавриат ва магистратура бо иштироки роҳбарият, ҳайати профессорону устодон ва волидони хатмкунандагон баргузор гардид.
Ҷаласаро ректори ДДМИТ Сатторзода Бобоҷон Абдуҷаббор оғоз бахшида, сараввал хатмкунандагонро бо хатми бомуваффақияти донишгоҳ бо дипломи аъло табрик намуда, иброз дошт: «Боиси хушнудист, ки ҳамасола раёсати ДДМИТ дипломи донишҷӯёнеро, ки донишгоҳро бо баҳои хубу аъло хатм намуда, сазовори дипломи аъло гардидаанд, тантанавор тақдим менамояд. Ин навбат, Шумо шогирдони азиз, аз ҷумлаи хушбахттарин донишҷӯёне ҳастед, ки ДДМИТ-ро бомуваффақият хатм намуда, сазовори дипломи аъло гардидаед. Солҳо мегузаранд, вале ин лаҳза барои Шумо чун хотироти бебаҳо боқӣ мемонад. Мо таманно дорем, ки донишу маҳорат, таҷрибаву матонати ҳар яки Шумо ба хотири ояндаи неки рӯзгоратон ва рушду пешрафти Ватани азизамон - Тоҷикистон истифода карда шавад", - афзуд ректор.
Ректори муассиса, инчунин қайд намуд, ки имрӯзҳо ба масъалаи рушду ташаккули маърифату дониши ҷомеа, махсусан ҷавонон таваҷҷуҳи хосса зоҳир гардида, илму дониш ба манбаи арзишманду пурқимати зиндагонии инсоният табдил ёфтааст.
Пешвои миллат муҳтарам Эмомалӣ Раҳмон барои донишманд шудани насли ҷавон диққати ҷиддӣ зоҳир намуда, дар паёмҳои ҳамасолаи худ ба Маҷлиси Олии Ҷумҳурии Тоҷикистон паҳлуҳои нав ба нави илму маориф, махсусан баланд бардоштани сатҳу сифати таҳсилотро пайваста таъкид менамоянд.
Ректор дар идомаи суханронии хеш илова кард, хурсандиовар аст, ки ҳамасола шумораи гирандагони дипломҳои аъло дар донишгоҳ афзоиш ёфта, онҳо дар муассисаҳои гуногуни иқтисодиву молиявӣ фаъолият намуда, баҳри тадбиқи бомароми ҳадафҳои миллии рушди кишварамон саҳмгузорӣ менамоянд. Мо натиҷаи фаъолияти босамари хатмкунандагони донишгоҳро омӯхта, хушнуд аз он мешавем, ки шогирдонамон моҳияти сиёсати созандаву бунёдкоронаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дарк намуда, бо як ҳисси баланди худшиносиву худогоҳии миллӣ дар раванди татбиқи ҳадафмандонаи ин сиёсат чун пайравони асили Пешвои миллат фаъолона ширкат меварзанд.
Раёсати донишгоҳ дар доираи ҳамкориҳои худ имкон дорад, ки хатмкунандагонро барои таъмин гардидан ба ҷойи кори доимӣ дар Вазорати молияи Ҷумҳурии Тоҷикистон, субъектони зертобеи он ва дигар вазорату кумитаҳо, ташкилоту муассисаҳо, махсусан муассисаҳои бонкиву молиявӣ пешбарӣ намояд.
Дар идомаи маросими хатм, доктори илмҳои иқтисодӣ, профессор Эмомалӣ Нуралӣ хатмкунандагонро табрику таҳният гуфта, ба онҳо дар фаъолиятҳои минбаъдаашон барору муваффақият таманно кард.
Аз номи хатмкунандагон бошад, Манижа Солеҳзода, Ҳусейнҷон Илҳомзода, Бузургмеҳр Ғаффорзода ва Зарина Зиёзода баромад намуд, ба роҳбарият ва коллективи меҳнатии донишгоҳ изҳори сипосу миннатдорӣ намуданд.
Дар фарҷом дар шароити тантанавӣ ба 82 нафар хатмкунандагоне, ки донишгоҳро соли таҳсили 2024-2025 бомуваффақият хатм намуданд, дипломи аъло тақдим карда шуд.
Шуъбаи иттилоот ва нашрия
Хабарҳои дигар
-
ОЗМУНИ АТТЕСТАТИ АЪЛОИ УНИВЕРСАЛӢ ВА РАВИЯВӢ БО МЕДАЛИ ТИЛЛО ВА НУҚРА ОҒОЗ ГАРДИД 28 июли соли 2026 дар Муассисаи давлатии таълимии «Мактаби байналмилалии Президентӣ» дар шаҳри Душанбе маросими ифтитоҳи озмуни аттестати аълои универсалӣ бо медали тилло ва нуқра, инчунин аттестати аълои равияҳои табиӣ-риёзӣ ва ҷамъиятӣ-гуманитарӣ бо медали тилло ва нуқра баргузор гардид. Озмунро муовини вазири маориф ва илми Ҷумҳурии Тоҷикистон Равшан Каримзода ифтитоҳ намуда, зимни суханронии худ аҳаммияти онро дар ҳавасмандгардонии хонандагон ба таҳсили амиқ, дарёфти донишҳои муосир ва рушди неруи зеҳнии ҷавонон таъкид кард. Зимни суханронӣ таъкид гардид, ки соҳаи маориф дар сиёсати Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун яке аз самтҳои афзалиятноки рушди кишвар эътироф гардида, барои баланд бардоштани сифати таҳсилот, тарбияи насли донишманд ва омода намудани мутахассисони рақобатпазир тамоми шароити зарурӣ фароҳам оварда шудааст. Муовини вазир иброз дошт, ки дар озмуни танҳо он хатмкунандагоне иштирок доранд, ки муассисаҳои таҳсилоти умумиро бо натиҷаҳои аъло хатм намуда, баъди пешниҳоди ҳуҷҷатҳо ва гузаштан аз санҷиши комиссияи Вазорати маориф ва илм ба даври ниҳоӣ роҳхат гирифтаанд. Қайд гардид, ки солҳои охир шумораи гирандагони медалҳои тилло ва нуқра мунтазам афзоиш меёбад. Агар соли 2017 ҳамагӣ 8 нафар хатмкунанда соҳиби медали тилло ва нуқра гардида бошад, ин нишондиҳанда соли 2021 ба 53 нафар ва соли 2025 ба 73 нафар расидааст. Ин тамоюл аз беҳтар гардидани сифати таҳсил, болоравии масъулияти муассисаҳои таълимӣ ва афзоиши таваҷҷуҳи хонандагон ба донишомӯзӣ шаҳодат медиҳад. Тибқи маълумоти пешниҳодшуда, соли ҷорӣ аз ҷониби раёсату шуъбаҳои маорифи шаҳру ноҳияҳои ҷумҳурӣ ва муассисаҳои таълимии мақоми ҷумҳуриявӣ 178 нафар довталаб барои иштирок дар озмуни аттестати аълои универсалӣ ва равиявӣ пешниҳод гардидаанд. Дар идомаи суханронӣ Равшан Каримзода таваҷҷуҳи масъулони соҳаи маорифро ба масъалаи дуруст омода ва пешниҳод намудани ҳуҷҷатҳои довталабон ҷалб намуда, иброз дошт, ки риояи талаботи санадҳои меъёрӣ барои таъмини шаффофият ва адолати озмун аҳаммияти муҳим дорад. Ҳамзамон, таъкид гардид, ки озмуни мазкур на танҳо сатҳи дониш ва омодагии хонандагонро муайян месозад, балки онҳоро барои омӯзиши минбаъда, рушди қобилияти зеҳнӣ ва расидан ба қуллаҳои баланди илм ҳавасманд менамояд. Изҳори итминон карда шуд, ки аз миёни иштирокчиёни имсола олимон, муҳаққиқон ва мутахассисони соҳибкасби оянда ба камол расида, дар рушди Тоҷикистони соҳибистиқлол саҳми арзанда хоҳанд гузошт. Озмуни аттестати аълои универсалӣ ва равиявӣ бо медали тилло ва нуқра ҳамасола бо мақсади муайян намудани хонандагони болаёқат, ҳавасмандгардонии ҷавонон ба таҳсили аъло, рушди рақобати солим ва қадршиносии дастовардҳои беҳтарин хатмкунандагони муассисаҳои таҳсилоти умумии кишвар баргузор гардида, яке аз муҳимтарин чорабиниҳои ҷумҳуриявӣ дар соҳаи маориф ба ҳисоб меравад. Маркази матбуоти Вазорати маориф ва илми Ҷумҳурии Тоҷикистон
42
28.07.2026 -
ВАБОИ АСР Таҳлилгарон ва олимон омилҳои гуногунро дар пайдоиш ва паҳншавии ифротгароӣ муайян кардаанд. Ин омилҳо ба якдигар алоқамандӣ дошта, маҷмуи онҳо заминаҳоеро барои радикалшавии мафкуравии шахс фароҳам меоварад. Аз ҷумла, омилҳои иқтисодиву иҷтимоӣ, пеш аз ҳама, бекорӣ, камбизоатӣ ва нобаробарии иҷтимоӣ ба назар мерасанд. Дар баробари ин, манфиатҳои сиёсии давлатҳои абарқудрат асосан бо ҷалби ташкилотҳои ифротиву тундрав зери шиори ҳифзу эҳёи дин тарғиб гардида, боиси нооромиву низоъ дар кишварҳои гуногун мегарданд. Буҳронҳои сиёсӣ, низоъҳои мусаллаҳона ва ноустувории давлатдорӣ замина барои паҳншавии терроризм мебошанд. Яке аз омилҳои паҳншавии ифротгароӣ дар замони муосир, истифодаи васеи шабакаи ҷаҳонии Интернет ва расонаҳои иҷтимоӣ мебошад. Ташкилотҳои тундрав аз ин имконот барои ҷалби аъзои нав, алалхусус, ҷавонон, ба таври васеъ истифода мебаранд. Дар шароити кунунӣ зарурати таҳияи равишҳои нави инноватсионии муборизаи муштарак бар зидди паҳншавии идеологияи ифротгароӣ, аз ҷумла, бо истифода аз технологияҳои муосир ба миён омадааст. Мубориза бар зидди терроризми байналмилалӣ ва ифротгароӣ ба хотири ҳифзи манфиатҳои миллӣ, сохти конститутсионӣ ва истиқлоли кишвар вазифаи муқаддастарини тамоми мақомоти давлатӣ ва ҳар як шаҳрванди Тоҷикистон мебошад. Кишвари мо барои мубориза бо терроризм ва ифротгароӣ низоми мукаммали ҳуқуқиро эҷод кардааст. Аз ҷумла, дар Конститутсияи Ҷумҳурии Тоҷикистон, Қонуни Ҷумҳурии Тоҷикистон «Дар бораи мубориза бар зидди терроризм» (1999), Консепсияи ягонаи Ҷумҳурии Тоҷикистон оид ба мубориза бар зидди терроризм ва ифротгароӣ (2006), Конвенсияи Созмони Ҳамкории Шанхай бар зидди терроризм ва Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025 зикр шудааст. Мактаб ва маориф заминаи аввалиндараҷаи тарбияи насли солим ва ватандӯст мебошанд. Барномаҳои тарбияи шаҳрвандӣ дар муассисаҳои таълимӣ дар чанд соли охир тавсеа ёфтааст. Ба ин хотир, дар мактабҳои олӣ конференсияҳо ва мизҳои мудаввар дар хусуси Стратегияи муқовимат ба ифротгароӣ ва терроризм баргузор мешаванд. Ба донишҷӯён фаҳмонда мешавад, ки бо тақлидҳои кӯркӯрона дунболи гурӯҳҳои ифротӣ нараванд. Ақидаҳо, андешаҳо ва пешниҳодҳое, ки тавассути расонаҳо, вохӯрӣ бо намояндагони мақомот ва дарсҳои тарбиявии устодон оид ба мубориза алайҳи терроризм ва ифротгароӣ пешниҳод мешаванд, дар ин самт нақши ҳалкунанда доранд. Вазифаи ҳар фарди ватанпарвару миллатдӯст, алалхусус, ҷавонон, ки неруи асосии пешбарандаи ҷомеа маҳсуб меёбанд, аз он иборат аст, ки барои ҳифзи сулҳу ваҳдати миллӣ, субот, осоиши зиндагӣ ва тараққиёти Ватани азиз ҳамвора талош намоянд. Сино САФАРЗОДА, магистри соли якуми ДМТ
42
27.07.2026 -
БОЗДИД АЗ РАФТИ СОХТМОНИ МУАССИСАҲОИ ТАЪЛИМӢ ДАР НОҲИЯИ ДАНҒАРА Муовини вазири маориф ва илми Ҷумҳурии Тоҷикистон Бадриддин Музафарзода аз рафти сохтмони муассисаҳои таълимӣ дар ноҳияи Данғара боздид намуда, бо ҷараёни корҳои бунёдкорӣ ва сатҳи иҷрои лоиҳаҳо шинос гардид. Зимни сафари корӣ муовини вазир аз сохтмони мактаби нав дар деҳаи Меҳтари Ҷамоати деҳоти Сафобахш, инчунин корҳои сохтмонӣ дар муассисаҳои таҳсилоти миёнаи умумии №4 ва №26-и ноҳия боздид ба амал овард. Мактаби нав дар деҳаи Меҳтар барои 640 хонанда дар як баст пешбинӣ гардидааст. Дар муассиса бунёди синфхонаҳои замонавӣ, ҳуҷраҳои фаннӣ, озмоишгоҳҳо, китобхона, толорҳои варзишию маҷлисгоҳ, ошхона ва дигар иншооти зарурӣ пешбинӣ гардидааст. Дар идомаи сафари корӣ рафти сохтмон дар Муассисаи таҳсилоти миёнаи умумии №26 мавриди шиносоӣ қарор гирифт. Иттилоъ дода шуд, ки баъди анҷоми корҳои сохтмонӣ дар муассиса барои хонандагону омӯзгорон шароити муносиб ва ҷавобгӯ ба талаботи муосири таълим фароҳам оварда мешавад. Ҳамчунин, масъалаҳои муҷаҳҳаз намудани муассисаҳо бо таҷҳизоти муосири таълимӣ, мизу курсӣ, лавозимоти озмоишгоҳӣ, технологияҳои иттилоотӣ ва дигар воситаҳои зарурии таълимӣ мавриди баррасӣ қарор гирифтанд. Таъкид шуд, ки дар баробари бунёди биноҳои таълимӣ, таъмини онҳо бо инфрасохтор ва шароити зарурӣ аҳаммияти аввалиндараҷа дорад. Ба масъулони соҳаи маорифи ноҳия, намояндагони ташкилотҳои сохтмонӣ ва дигар шахсони мутасаддӣ ҷиҳати тақвият бахшидани корҳои сохтмонӣ, бартараф намудани камбудиҳои ҷойдошта, риояи муҳлатҳои муайянгардида ва бо сифати баланд анҷом додани корҳо дастуру тавсияҳои мушаххас дода шуданд. Маркази матбуоти Вазорати маориф ва илми Ҷумҳурии Тоҷикистон
49
27.07.2026
