19 августи соли 2025 дар Қасри фарҳанги шаҳри Бохтари вилояти Хатлон машварати августии кормандони соҳаи маориф баргузор гардид.

Дар машварат раиси вилояти Хатлон Давлаталӣ Саид, вазири маориф ва илми Ҷумҳурии Тоҷикистон Раҳим Саидзода, муовинони раисони шаҳру ноҳияҳо, ректорони донишгоҳ ва донишкадаҳои вилоят, мудирони шуъбаҳои маориф, адибон, собиқадорони соҳаи маориф, директорон ва омӯзгорони муассисаҳои таълимии вилоят ва намояндагони воситаҳои ахбори омма иштирок доштанд.

Дар оғоз ширкаткунандагон аз намоиши дастовардҳои муассисаҳои таълимӣ, маҳфилҳои илмӣ ва марказҳои ҳунаромӯзии хонандагон дидан намуданд.

Раиси вилояти Хатлон иштирокчиёни машваратро бо фарорасии соли нави таҳсил, Рӯзи дониш ва 34-умин солгарди Истиқлоли давлатии Ҷумҳурии Тоҷикистон муборакбод гуфта, саҳми арзандаи омӯзгорону кормандони соҳаи маорифро дар пешбурди сиёсати маорифпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вилоят муҳим арзёбӣ намуд.

Зимни суханронии худ вазири маориф ва илм оид ба дастовардҳои назаррас ва ташаббусҳои стратегии Ҳукумати Ҷумҳурии Тоҷикистон дар самти ислоҳоти соҳаи маориф, татбиқи барномаҳои давлатӣ ва тақвияти раванди таълим ва тарбия, сифати таҳсилот, тайёр кардани кадрҳои болаёқат, таҳкими заминаи моддиву техникии муассисаҳо ва таъмини устувори кормандони соҳа бо музди меҳнати шоиста суханронӣ намуд.

Вазир таъкид намуд, ки бо дастгирии бевоситаи Пешвои миллат дар самти беҳтар намудани шароити иҷтимоии омӯзгорон қадамҳои устувор гузошта шуда, аз ҷумла, тибқи қарори Ҳукумати Ҷумҳурии Тоҷикистон аз 1 сентябри соли 2025 музди меҳнати кормандони муассисаҳои таҳсилоти томактабӣ ва таҳсилоти умумӣ ба андозаи 30 фоиз зиёд хоҳад шуд.

Сипас, дар ҷараёни машварат ҳисоботи муфассал дар бораи нишондиҳандаҳои рушди соҳаи маориф дар нимсолаи аввали соли 2025 пешниҳод гардид. Аз ҷумла, зикр шуд, ки дар вилоят сохтмони 137 муассисаи таҳсилоти умумӣ ва синфхонаҳои иловагӣ барои 33 114 ҷойи нишаст ба нақша гирифта шуда, корҳои сохтмонӣ дар бештари иншоот дар марҳилаи амалишавӣ қарор доранд. Ҳамчунин, дар доираи лоиҳаҳои сармоягузорӣ сохтмони 155 иншооти соҳаи маориф барои 43 048 ҷойи нишаст пешбинӣ гардида, дар 50 иншоот корҳои сохтмонӣ идома доранд.

Дар самти таҳсилоти томактабӣ дар доираи лоиҳаи “Инкишофи барвақтии кӯдакон барои густариши сармояи инсонӣ дар Тоҷикистон” сохтмон ва азнавсозии 489 Маркази рушди барвақтии кӯдак, аз ҷумла 273 марказ дар шаҳру ноҳияҳои вилояти Хатлон ба нақша гирифта шудааст. Айни замон дар 158 марказ корҳои сохтмонӣ идома доранд.

Бинобар маълумоти пешниҳодгардида, айни замон дар 1397 муассисаи таҳсилоти умумии вилоят 900 ҳазору 598 нафар хонанда ба таҳсил фаро гирифта шудаанд. Дар таълиму тарбияи онҳо 48 ҳазору 263 омӯзгор машғуланд.

Ҳамзамон, таъкид гардид, ки иштироки фаъолонаи хонандагони муассисаҳои таҳсилоти умумии вилоят дар озмунҳои сатҳи ҷумҳуриявӣ ва ғолибияти онҳо, аз ҷумла, дар озмуни “Фурӯғи субҳи доноӣ китоб аст” дар соли 2024 бо 35 ҷойи намоён ва ду Шоҳҷоиза, шаҳодат аз ин аст, ки раванди таҳсил бо истифода аз механизмҳои ҳавасмандгардонӣ ва ташвиқи қобилиятҳои инфиродӣ ба таври муассир ба роҳ монда шудааст.

Дар қисмати ниҳоии машварат иттилоъ дода шуд, ки лоиҳаи Қонуни Ҷумҳурии Тоҷикистон “Дар бораи мақоми омӯзгор” аз ҷониби Ҳукумати Ҷумҳурии Тоҷикистон тасдиқ гардида, барои баррасӣ ба Маҷлиси намояндагони Маҷлиси Олии Ҷумҳурии Тоҷикистон ирсол шудааст. Ин санад ба таҳкими мақом ва нуфузи иҷтимоии омӯзгор мусоидат намуда, барои боз ҳам беҳтар гардидани шароити касбии муаллимон замина хоҳад гузошт.

Ҳамзамон таъкид гардид, ки бо мақсади таъмини муҳити мусоиди таълим ва риояи ҳуқуқи хонандагон ва волидайн ҳар гуна фурӯши иҷбории лавозимоти хониш ва сару либоси мактабӣ дар дохили муассисаҳои таълимӣ қатъиян манъ аст. Хариди лавозимоти мактабӣ дар ярмаркаҳои мавсимии берун аз муассисаҳо танҳо бо ихтиёри пурраи волидайн ва хонандагон ба роҳ монда шуда, ҷараёни он набояд хусусияти ҳатмӣ ва маҷбурӣ дошта бошад.

Вазири маориф ва илм ба сардори раёсати маорифи вилояти Хатлон, мудирони шуъбаҳои маорифи шаҳру ноҳияҳои вилоят ва дигар шахсони масъули соҳа доир ба масъалаҳои таҳкими сифати таълим, фаро гирифтани кӯдакон ба муассисаҳои томактабӣ, таъмини саривақтии маводи сӯзишворӣ ва ҳезум барои муассисаҳо дар мавсими зимистон баланд бардоштани сатҳи касбияти кадрҳо ва ҳозир шудани мутахассисони ҷавон ба ҷои кор дастуру супоришҳои мушаххас дод.

Дар идома омӯзгорону муассисаҳои беҳтарин бо мукофотҳои пулии раиси вилояти Хатлон қадрдонӣ шуданд. Ҷоизаи “Омӯзгори ифтихории Хатлон” ба як қатор омӯзгорон супорида шуда, роҳбарону хатмкунандагони муассисаҳои таълимӣ барои дастовардҳои баланди таълимӣ бо ҷоизаҳои махсус қадршиносӣ гардиданд. Дар маҷмуъ, ба беш аз 100 нафар кормандони соҳа, хонандагон ва волидайн мукофотҳои пулии раиси вилоят дар ҳаҷми умумии 400 ҳазор сомонӣ тақдим карда шуд. Ҳамчунин, ба 23 нафар омӯзгори ҷавон шаҳодатномаи истифодабарии қитъаи замини наздиҳавлигӣ супорида шуд.

Бо назардошти натиҷаҳои баланди ноҳияҳо дар самти таҳсил, тибқи қарори ҳайати тадорукот, “Парчами сайёри ғолиб” ба ноҳияи Данғара тақдим гардида, роҳбарияти он бо 20 ҳазор сомонӣ мукофотонида шуд.

Ҳамзамон, як зумра омӯзгорони фаъоли вилоят бо нишони “Аълочии маориф ва илми Тоҷикистон” ва “Ифтихорнома”-и Вазорати маориф ва илм қадрдонӣ шуданд.

Маркази матбуоти

Вазорати маориф ва илми

Ҷумҳурии Тоҷикистон