6 август дар шаҳри Хуҷанд таҳти раёсати муовини Сарвазири Ҷумҳурии Тоҷикистон Дилрабо Мансурӣ оид ба ҷараёни иҷрои барномаҳои давлатии соҳаи маориф ҷаласаи корӣ баргузор гардид.

Дар кори ҷаласа муовини вазири маориф ва илм Р. Каримзода, муовини раиси вилоят, роҳбарони шаҳру навоҳӣ, масъулони раёсату шуъбаҳои маорифи шаҳру ноҳияҳо ва директорони муассисаҳои таълимӣ ширкат намуданд.

Ҷаласа бо ҳадафи таҳлили раванди иҷрои барномаҳои давлатии марбут ба соҳаи маориф, аз ҷумла «Барномаи таъмини муассисаҳои таълимӣ бо кабинетҳои фаннӣ ва озмоишгоҳҳои муҷаҳҳази таълимӣ барои солҳои 2021–2025», «Барномаи давлатии рушди таҳсилоти томактабӣ барои солҳои 2020–2035», «Барномаи рақамикунонии муассисаҳои таълимӣ», ки дар заминаи сиёсати маорифпарваронаи Ҳукумати Ҷумҳурии Тоҷикистон ва бо дастгирии Пешвои миллат муҳтарам Эмомалӣ Раҳмон қабул гардидаанд, доир шуд.

Зимни баррасии масъалаҳо иброз гардид, ки бо мақсади баланд бардоштани сатҳу сифати таълим ва тақвияти имконияти муассисаҳои таълимӣ якчанд тадбир, аз ҷумла бунёди муассисаҳои нави таълимӣ, таъмиру таҷдиди синфхонаҳо, таъмини онҳо бо мизу курсӣ, ҷалби омӯзгорони соҳибихтисос (махсусан дар фанҳои дақиқ ва технологияи иттилоотӣ), ташкили даврҳои такмили ихтисосу семинарҳои омӯзишӣ, баргузории озмуну олимпиадаҳо, таъмини муассисаҳо бо компютер ва интернет, инчунин тавсеаи соҳаи таҳсилоти томактабӣ амалӣ карда мешаванд.

Муовини Сарвазири Тоҷикистон дар ҷаласа таъкид намуд, ки масъалаи ҷалби хонандагон ба зинаи сеюми таҳсилот (синфҳои 10-11) ҳамчун яке аз самтҳои афзалиятноки сиёсати соҳа арзёбӣ гардида, дар ҳамкорӣ бо волидон ва ҷомеаи шаҳрвандӣ барои фарогирии бештари хонандагон тадбирҳои мушаххас амалӣ карда шаванд. Дар робита ба омодагии хонандагон ба озмуну олимпиадаҳои ҷумҳуриявӣ, аз ҷумла «Тоҷикистон — Ватани азизи ман», «Фурӯғи субҳи доноӣ китоб аст» ва «Илм — фурӯғи маърифат» баён гардид, ки тадбирҳои ҷиддӣ ба роҳ монда шуда, дар ин самт натиҷаҳо бояд боз ҳам хубтар гарданд.

Гуфта шуд, ки дар асоси шумораи аҳолии шаҳру ноҳияҳо сохтмони муассисаҳои нави томактабӣ оғоз ёфта, ин раванд дар ҳамкорӣ бо шахсони саховатманд ва соҳибкорон суръат бахшида шавад. Иншооте, ки қаблан ҳамчун кӯдакистон истифода мешуданд, мавриди бозбинӣ қарор гирифта, дар ҳолати мувофиқат ба талабот ба мақсади аввал баргардонида шаванд. Шумораи марказҳои инкишофи кӯдак зиёд гардида, фарогирии бештари кӯдакон дар онҳо таъмин карда шавад. Ҳамзамон бо бунёди муассисаҳои томактабӣ масъалаи таъмини онҳо бо мутахассисон ва ҷалби кадрҳои ҷавон мавриди таваҷҷуҳ қарор гирад. Дар самти таъмини муассисаҳо бо кабинетҳои фаннӣ, таҷҳизоти озмоишӣ, компютер ва пайвастшавӣ ба интернет тадбирҳои амалӣ андешида шаванд.

Дар анҷоми ҷаласа муовини Сарвазири Тоҷикистон таъкид намуд, ки натиҷаҳои амалишавии барномаҳо ва озмунҳо ҷамъбаст гардида, барои баррасӣ ба Ҳукумати Ҷумҳурии Тоҷикистон пешниҳод карда шаванд.