20.08.2026
РАФТИ ДАВРАИ МУТОБИҚШАВИИ КӮДАКОНИ БА СИНФИ ЯКУМ ҚАБУЛШАВАНДА ДАР МУАССИСАҲОИ ТАЪЛИМИИ НОҲИЯИ ИСМОИЛИ СОМОНӢ
Шуъбаи маорифи мақомоти иҷроияи ҳокимияти давлатии ноҳияи Исмоили Сомонӣ ҷиҳати иҷрои фармоиши вазири маориф ва илми Ҷумҳурии Тоҷикистон аз 28 июли соли 2026, №824 «Дар бораи татбиқи Барномаи давраи мутобиқшавии кӯдакони ба синфи якум қабулшаванда ба муҳити муассисаи таълимӣ дар соли таҳсили 2026-2027» ва қарори ҳайати мушовараи Вазорати маориф ва илми Ҷумҳурии Тоҷикистон аз 30 июни соли 2026, №9/2 дар муассисаҳои таҳсилоти умумии ноҳия тадбирҳои заруриро амалӣ намуда истодааст.
Тибқи фармоиши мазкур давраи мутобиқшавии кӯдакони ба синфи якум қабулшаванда аз 17 то 28 августи соли 2026 ба муҳлати 10 рӯзи таълимӣ муайян гардида, он дар тамоми муассисаҳои таҳсилоти умумии ҳудуди ноҳия, новобаста аз шакли ташкилию ҳуқуқӣ ва тобеияти идоравӣ, ба роҳ монда шудааст.
Мақсади асосии давраи мазкур фароҳам овардани муҳити бехатар, солим, дӯстона ва ҳавасмандкунанда барои воридшавии тадриҷии кӯдакон ба ҳаёти мактабӣ, шиносоии онҳо бо омӯзгор, ҳамсинфон, тартибу қоидаҳои муассисаи таълимӣ ва ташаккули муносибати мусбат ба таҳсил мебошад.
Аз рӯзҳои аввали баргузории давраи мутобиқшавӣ дар муассисаҳои таълимии ноҳия кӯдакон бо муҳити мактаб, синфхонаҳо, китобхона, толори варзишӣ, ошхона, нуқтаи тиббӣ ва дигар иншооти муассиса шинос карда шуданд. Ҳамзамон, омӯзгорон ба кӯдакон тартиби воридшавӣ ба муассиса, қоидаҳои рафтор дар синфхона, муносибат бо омӯзгорону ҳамсинфон, риояи тозагӣ ва талаботи бехатариро бо усулҳои содаю фаҳмо шарҳ дода истодаанд.
Бо дарназардошти хусусиятҳои синнусолӣ, равонӣ ва физиологии кӯдакон машғулиятҳо дар шакли суҳбат, шиносоӣ, бозиҳои таълимӣ, корҳои эҷодӣ, расмкашӣ, машқҳои сабуки ҷисмонӣ, сайри дохили муассиса ва дигар фаъолиятҳои шавқовар ташкил карда мешаванд. Чунин тарзи кор имкон медиҳад, ки кӯдакон бе эҳсоси тарсу изтироб ба муҳити нав ворид гардида, бо омӯзгор ва ҳамсолони худ муносибати дӯстона барқарор намоянд.
Роҳбарони муассисаҳои таълимӣ вазифадор гардидаанд, ки барои баргузории босифати давраи мутобиқшавӣ шароити зарурӣ фароҳам оварда, фаъолияти омӯзгорони синфҳои ибтидоӣ, риояи қоидаҳои санитарию гигиенӣ, таъмини бехатарии кӯдакон ва ҳамкории мунтазам бо падару модаронро зери назорати доимӣ қарор диҳанд.
Шуъбаи маориф рафти татбиқи Барномаи давраи мутобиқшавиро мавриди назорат қарор дода, ба роҳбарон ва омӯзгорони муассисаҳои таълимӣ ҷиҳати ташкили дурусти машғулиятҳо ва муносибати инфиродӣ бо кӯдакон дастуру тавсияҳои методӣ пешниҳод менамояд.
Дар маҷмуъ, то санаи 20 августи соли 2026 давраи мутобиқшавии кӯдакони ба синфи якум қабулшаванда дар муассисаҳои таълимии ноҳияи Исмоили Сомонӣ муташаккилона ва тибқи талаботи барномаи тасдиқгардида идома дорад. Шуъбаи маориф ҷиҳати таъмини иҷрои пурраи фармоиши вазири маориф ва илми Ҷумҳурии Тоҷикистон, фароҳам овардани шароити мусоид барои кӯдакон ва ҷамъбасти босифати давраи мутобиқшавӣ то 28 августи соли 2026 тадбирҳои заруриро минбаъд низ амалӣ менамояд.
Хабарҳои дигар
-
“НАВОИ ИСТИҚЛОЛ”-И ДОНИШГОҲИ ДАВЛАТИИ ХУҶАНД БА НОМИ АКАДЕМИК БОБОҶОН ҒАФУРОВ Бахшида ба ҷашни 35-солагии Истиқлоли давлатии Ҷумҳурии Тоҷикистон, дар боғи фарҳангӣ-фароғатии ба номи Камоли Хуҷандӣ чорабинии фарҳангии устодону донишҷӯёни Донишгоҳи давлати Хуҷанд ба номи академик Бобоҷон Ғафуров таҳти унвони “Навои Истиқлол” баргузор гардид. Дар ин чорабинии идона ректори донишгоҳ М. Набизода ширкат намуда, кулли устодону донишҷӯён ва ҳозиринро ба муносибати ҷашни бузурги миллӣ, 35-солагии Истиқлоли давлатӣ аз номи Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон, Вазорати маориф ва илми Ҷумҳурии Тоҷикистон ва Мақомоти иҷроияи ҳокимияти давлатии вилояти Суғд табрик гуфт. Ҳамчунин роҳбари ин муассисаи олии таълимӣ зимни суханронӣ Истиқлолро неъмати бузург барои халқи тоҷик номида, таъкид кард, ки дар даврони соҳибистиқлолии мамлакат ҷавонон таҳти дастгириву таваҷҷуҳи ҳамешагии Ҳукумати Ҷумҳурии Тоҷикистон, махсусан Пешвои миллат муҳтарам Эмомалӣ Раҳмон қарор дода шуда, барои илмомӯзиву соҳибкасб гардидани ҷавонон ва дар рӯҳияи худшиносиву меҳнатдӯстӣ ва ватандӯстӣ тарбия ёфтани онҳо шароити мусоид фароҳам оварда шудааст. Сипас аз ҷониби омӯзгорони факултети санъат ва бахши фарҳанги донишгоҳ барномаи ҷолиби консертӣ пешкаши ҳозирин карда шуд.
25
21.08.2026 -
Боздид аз cарбанди Неругоҳи Роғун Дар идомаи боздиди корӣ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Неругоҳи Роғун бо ҷараёни корҳои сохтмонӣ дар сарбанди ин иншооти бузурги гидроэнергетикӣ шинос шуданд. Сарбанди Неругоҳи Роғун аз қисмҳои ядро, филтрҳои минтақаи гузариши дуюм ва сеюм, призмаи такядевори поёнӣ, призмаи такядевори болоӣ, борсангҳои биефи болоӣ ва поёнӣ иборат буда, баъди пурра ба анҷом расидан бо баландии 335 метр баландтарин сарбанди регусангӣ дар ҷаҳон хоҳад буд. Бино ба иттилоъ паҳноии сарбанд дар поёни он 1800 метр, паҳноии он дар боло 612 метр, паҳноии тахтапушти сарбанд 20 метр ва ҳаҷми умумии маводи дар сарбанд хобонидашаванда 79 миллион метри мукаабро ташкил медиҳад. Неруи тоза ва хастанопазири сохтмончиёну муҳандисон, садои баланди техникаву механизмҳои пуриқтидори муосир дар сарбанди неругоҳ шаҳодати он аст, ки дар ин корзори бесобиқа раванди корҳои сохтмонӣ лаҳзае қатъ намегардад. Корҳои сохтмонӣ дар сарбанд дар навбати аввал то баландии 1050 метр аз сатҳи баҳр шуруъ гардида, таҳкурсии ядрои сарбанд аз бетони кубидашуда бо ҳаҷми 293 ҳазору 446 метри мукааб, сементатсияи мустаҳкамкунандаи таҳкурсии ядро бо шумораи 3 ҳазору 359 чоҳ, сементатсияи пардаи оббанд бо шумораи 125 чоҳ бо чуқуриҳои аз 44 то 149 метр ба анҷом расидааст. Зимни мулоқоти қаблӣ бо муҳандисону бунёдкорони Неругоҳи Роғун Президенти Ҷумҳурии Тоҷикистон муҳтарам Эмомалӣ Раҳмон дастур дода буданд, ки корҳои бардоштани сарбанд дар соли 2026 ба баландии 1155 метр аз сатҳи баҳр ва пуркунии обанборро то сатҳи 1140 метр расонида шавад. Дар робита ба ин, ба Пешвои миллат муҳтарам Эмомалӣ Раҳмон иттилоъ дода шуд, ки бунёди сарбанд тибқи дастур ва нақшаи кории тасдиқгардида ба роҳ монда шуда, сарбанди неругоҳ ба нуқтаи 1155 метр пеш аз муҳлат бардошта шуда, пуркунии обанбор дар муҳлатҳои наздик то ба сатҳи 1140 метр аз сатҳи баҳр расонида мешавад. Неругоҳи Роғун, ки ҷавобгӯи талаботи стандартҳои экологӣ, техникӣ ва бехатарист, ифтихори миллати созандаи тоҷик буда, имшабу рӯзҳо ҳазорон фидоиёни роҳи дурахшони кишвар дар ин майдони корзор меҳнат мекунанд ва бо ғурури рустамона ҷиҳати дар фурсати муайян ба истифода додани ин иншооти гидроэнергетикӣ заҳмат мекашанд. Президенти кишвар муҳтарам Эмомалӣ Раҳмон, ҳамчунин, аз баландии 1300 метр аз сатҳи баҳр бо раванди корҳои сохтмонӣ дар назди баромадгоҳи нақби нақлиётии 9 ба суйи сарбанди неругоҳи Роғун шинос шуданд. Ба Пешвои миллат муҳтарам Эмомалӣ Раҳмон иттилоъ дода шуд, ки дар минтақаи сарбанди неругоҳи Роғун кор ба таври шабонарӯзӣ дар ду баст ба роҳ монда шуда, ҳамарӯза зиёда аз 160 техникаю механизми муосир ба он сафарбар гардидааст. Зимни суҳбат бо кормандони муҳандисию техникии неругоҳ Пешвои миллат муҳтарам Эмомалӣ Раҳмон таъкид намуданд, ки дар иҷрои корҳои сохтмонии сарбанд сифати кор ва риояи ҳатмии стандартҳои байналмилалӣ дар мадди аввал гузошта шавад, зеро рисолати ватандӯстона ва бунёдкоронае, ки имрӯз бо нангу номуси миллӣ ва иродаи шикастнопазир анҷом дода мешавад, барои садсолаҳо ва ояндаи дурахшони Тоҷикистони соҳибистиқлол пешбинӣ гардидааст. Зимни боздид аз Неругоҳи Роғун, Президенти Ҷумҳурии Тоҷикистон муҳтарам Эмомалӣ Раҳмонро Сарвазири Ҷумҳурии Тоҷикистон Қоҳир Расулзода, дигар масъулини ҳукуматӣ ва роҳбарони вазорату идораҳои дахлдор ҳамроҳӣ намуданд.
34
21.08.2026 -
Мулоқот бо бунёдгарони Неругоҳи Роғун 21 август Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Роғун бо бунёдгарони Неругоҳи Роғун мулоқот намуданд. Нахуст Роҳбари давлат муҳтарам Эмомалӣ Раҳмон аз дастовардҳои даврони 35-соли соҳибистиқлолӣ, аз ҷумла бунёду таҷдиди ҳазорҳо километр роҳҳои байналмилаливу дохилӣ, неругоҳҳои обӣ, хатҳои интиқоли барқ, зеристгоҳҳо, корхонаҳои саноатӣ ва муассисаҳои таълимиву тандурустӣ ёдовар шуда, ҳамаи иштирокдорони вохуриро бо солгарди ин ҷашни умумимиллӣ табрику таҳният гуфтанд. Таъкид гардид, ки бунёди неругоҳи Роғун низ аз ҷумлаи муҳимтарин дастовардҳои даврони истиқлол мебошад. Сарвари давлат муҳтарам Эмомалӣ Раҳмон шиносоӣ бо вазъи корҳо дар иншооти асрро натиҷагирӣ карда, барои вусъати корҳои созандагӣ дар назди бунёдгарони неругоҳ вазифаҳои нав гузоштанд. Пешвои миллат муҳтарам Эмомалӣ Раҳмон ба роҳбарону кормандони ширкатҳои ҳамкори хориҷӣ, муҳандисону мутахассисон ва бунёдкороне, ки дар ин майдони созандагӣ бо матонат ва эҳсоси баланди ватандорӣ заҳмат мекашанд, изҳори сипос намуданд. Гуфта шуд, ки бо бунёд кардану ба кор андохтани Роғун мо имрӯзу фардои ободи Тоҷикистони азиз ва зиндагии босаодати наслҳои имрӯзу ояндаро таъмин менамоем. Таъкид гардид, ки Ҳукумати кишвар соли 2025 барои сохтмони неругоҳ аз ҳисоби буҷети ҷумҳуриявӣ, дар маҷмуъ, 8,1 миллиард сомонӣ равона намуд. Дар соли 2026 тибқи нақша 11,4 миллиард сомонӣ пешбинӣ гардидааст. Дар 7 моҳи соли равон барои корҳои сохтмону васлгарӣ аз ҳамаи манбаъҳои маблағгузорӣ 8,4 миллиард сомонӣ сарф шудааст. Умуман, аз соли 2008 то имрӯз Ҳукумати кишвар барои корҳои сохтмону барқарорсозии неругоҳ аз ҳисоби буҷети давлатӣ ва дигар манбаъҳо 60,3 миллиард сомонӣ маблағ равона кардааст. Зикр карда шуд, ки ҳоло дар иншооти неругоҳ зиёда аз 20 ҳазор коргарону кормандони муҳандисиву техникӣ фаъолият дошта, шумораи мошину механизмҳо ба 4000 расонида шудааст. Муҳтарам Эмомалӣ Раҳмон ба фармоишгар - Ҷамъияти саҳомии Неругоҳи барқи обии Роғун супориш доданд, ки ҷараёни корҳоро байни ҳамаи лотҳо мунтазам танзиму ҳамоҳанг сохта, иҷрои ҷадвалҳои тасдиқшударо таъмин намоянд. Вобаста ба Лоти 1 супориш дода шуд, ки Ҷамъияти саҳомии Неругоҳи барқи обии Роғун якҷо бо пудратчии Лоти 1 бояд тамоми чораҳои заруриро барои дар моҳи сентябри соли 2027 ба истифода додани агрегати рақами 4 амалӣ намояд. Намояндагони масъули лоти 3 - роҳбарияти Ҷамъияти саҳомии Неругоҳи барқи обии Роғун ва Ширкати Тоҷикгидроэлектромонтаж вазифадор гардиданд, ки бо вуҷуди корҳои то ҳол амалигардида, қафомониҳои ҷойдоштаро бартараф карда, суръати корҳоро боз ҳам вусъат диҳанд ва иҷрои босифату саривақтии ҳамаи корҳои мансуб ба Лоти 3-ро таъмин намоянд. Зикр карда шуд, ки корҳои сохтмони иншооти соҳили чап, яъне Лоти 4 низ яке аз бахшҳои муҳимми лоиҳа ба ҳисоб мераванд. Президенти кишвар муҳтарам Эмомалӣ Раҳмон хотирнишон сохтанд, ки тамоми корҳои сохтмони неругоҳи Роғун бояд бо риояи қатъии талаботи сифат, истифодаи технологияҳои пешрафтаи ҷаҳонӣ ва мутобиқ ба стандартҳои байналмилалӣ анҷом дода шаванд. Аз масъулин ҳамаҷониба таъмин намудани устуворӣ, эътимоднокӣ ва бехатарии корҳо талаб карда шуд. Муҳтарам Эмомалӣ Раҳмон таваҷҷуҳи масъулинро дар мадди аввал ба масъалаҳои ҳифзи ҳаёту саломатии бинокорон, фароҳам овардани шароити арзандаи кору зиндагӣ ва риояи қатъии талаботи бехатарии истеҳсолот ҷалб намуданд. Зимни суханронӣ Роҳбари давлат муҳтарам Эмомалӣ Раҳмон ба ҳалли саривақтии масъалаҳои иҷтимоии сокинони минтақаи зериобшаванда таваҷҷуҳи хос зоҳир намуданд. Муассисаи давлатии Мудирияти минтақаи зериобшавандаи неругоҳи Роғун, вазорату идораҳои дахлдор ва мақомоти иҷроияи маҳаллии ҳокимияти давлатӣ вазифадор гардиданд, ки иҷрои саривақтии ҳамаи чорабиниҳоро таъмин карда, барои ҳар як оилаи кӯчонидашуда шароити арзандаи зиндагӣ фароҳам оваранд. Аснои таҳлили вазъи маблағгузории лоиҳаи бузурги бунёди неругоҳ Пешвои миллат муҳтарам Эмомалӣ Раҳмон иброз доштанд, ки сохтмони неругоҳи Роғун бо суръати хуб идома дошта, барои дар муҳлатҳои пешбинишуда ба анҷом расонидани он заминаи боэътимод фароҳам оварда шудааст. Муҳтарам Эмомалӣ Раҳмон бо мақсади иҷрои босифату саривақтии корҳои сохтмон, дар муҳлатҳои муқарраргардида ба истифода додани иншооту иқтидорҳои навбатии неругоҳ, таҳкими ҳамкорӣ бо шарикони байналмилалии рушд ва иҷрои пурраи уҳдадориҳои шартномавӣ дар назди сохтору мақомоти дахлдор як қатор супоришҳо гузоштанд. Аз ҷумла, дастур дода шуд, ки барои дар муҳлатҳои муқарраргардида ба истифода додани иншооти фосилавӣ ва иқтидорҳои навбатии неругоҳ тадбирҳои зарурӣ андешида шавад. Аз масъулин талаб карда шуд, ки иҷрои ҳатмии корҳоро тибқи ҷадвали тасдиқгардида таъмин намуда, ҳамоҳангсозии онҳоро таҳти назорати қатъӣ қарор диҳанд. Ба сохторҳои марбута супориш дода шуд, ки бо истифода аз ҳамаи имконияту манбаъҳо пардохти саривақтии маблағи корҳои анҷомёфта, хариди масолеҳи сохтмон, таҷҳизот ва маводи сӯхтро таъмин намоянд. Дар фароварди сухан Роҳбари давлат муҳтарам Эмомалӣ Раҳмон иброз доштанд, ки “ман ба масъулиятшиносӣ, таҷриба ва заҳмати софдилонаи бунёдгарони Роғун эътимоди комил дорам”. Баъди суханронии Пешвои миллат муҳтарам Эмомалӣ Раҳмон, Сарвазири кишвар муҳтарам Қоҳир Расулзода аз руйи натиҷаи корҳо гузориш доданд.
24
21.08.2026
