22.07.2026
Имрӯз, 22 июли соли 2026 дар Вазорати маориф ва илми Ҷумҳурии Тоҷикистон таҳти раёсати муовини вазири маориф ва илм Бадриддин Музафарзода ҷаласаи корӣ оид ба натиҷаҳои татбиқи лоиҳаҳо дар нимсолаи якуми соли 2026 баргузор гардид.
Дар ҷаласа директорону менеҷерони лоиҳаҳои давлатии сармоягузорӣ, роҳбарону намояндагони воҳидҳои сохтории вазорат ва дигар шахсони масъули соҳа иштирок намуданд.
Дар ҷаласа рафти татбиқи лоиҳаҳои “Муҳити таълим – асоси таҳсилоти босифат”, “Сохтмон ва муҷаҳҳазгардонии мактабҳо” (марҳилаи 5), “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика” ва “Дастгирии амалисозии Стратегияи миллии рушди маорифи Ҷумҳурии Тоҷикистон” (марҳилаи II) баррасӣ шуд.
Зимни ҷаласа директорону менеҷерони лоиҳаҳо оид ба корҳои анҷомдодашуда, ҳаҷми маблағҳои азхудгардида, рафти корҳои сохтмонӣ ва иҷрои нақшаҳои молиявӣ ҳисобот пешниҳод намуданд.
Қайд гардид, ки дар доираи лоиҳаи “Муҳити таълим – асоси таҳсилоти босифат” дар 22 иншооти таълимӣ корҳои сохтмону азнавсозӣ идома дошта, фарогирии 10 ҳазор корманди соҳаи маориф ба курсҳои такмили ихтисос ба нақша гирифта шудааст. Инчунин, арзёбии байналмилалии PIRLS – 2026 бо иштироки 6945 нафар хонандаи синфи чорум баргузор гардид.
Дар доираи лоиҳаи “Сохтмон ва муҷаҳҳазгардонии мактабҳо” дар 11 иншооти таълимӣ корҳои сохтмонӣ идома дошта, зиёда аз 200 нафар мутахассиси маҳаллӣ ба кор ҷалб гардидаанд. Ҳамзамон, Созишномаи қарзӣ оид ба лоиҳаи “Рушди мактабҳо” ба имзо расонида шудааст.
Зикр гардид, ки дар доираи лоиҳаи рушди таҳсилоти STEM дар 18 муассисаи таълимӣ биноҳои иловагӣ бо озмоишгоҳҳои замонавӣ сохта мешаванд. Ҳамчунин, таъсиси платформаи омӯзиши фосилавӣ ва рушди салоҳиятҳои рақамии омӯзгорону хонандагон пешбинӣ гардидааст.
Дар доираи лоиҳаи “Дастгирии амалисозии Стратегияи миллии рушди маориф” сохтмон ва муҷаҳҳазгардонии 53 муассисаи таълимӣ барои фароҳам овардани шароити муосир ба 17 ҳазору 736 хонанда ба нақша гирифта шудааст.
Дар ҷараёни муҳокимаҳо ба масъалаҳои сифати корҳои сохтмонӣ, истифодаи самараноки маблағҳо, иҷрои саривақтии нақшаҳо ва тақвияти назорат таваҷҷуҳи махсус зоҳир гардид.
Аз рӯйи натиҷаҳои ҷаласа ба масъулин ҷиҳати таъмини иҷрои босифати лоиҳаҳо ва бартараф намудани камбудиҳои мавҷуда дастуру супоришҳои мушаххас дода шуданд.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
БАРРАСИИ РУШДИ МАҲОРАТИ КАСБИИ КОРМАНДОНИ ТАҲСИЛОТИ ТОМАКТАБӢ Имрӯз, 22 июли соли 2026 дар ҷаласаи назоратии назди вазири маориф ва илми Ҷумҳурии Тоҷикистон масъалаи фарогирии мураббиён ва омӯзгорони марказу гурӯҳҳои инкишофи барвақтии кӯдак ба курсҳои такмили ихтисос, семинарҳо ва тренингҳо мавриди баррасӣ қарор гирифт. Ҷаласаро муовини якуми вазири маориф ва илми Ҷумҳурии Тоҷикистон Ҳомид Ҳошимзода ифтитоҳ намуда, таъкид кард, ки рушди таҳсилоти томактабӣ яке аз самтҳои афзалиятноки сиёсати давлатии Ҷумҳурии Тоҷикистон дар соҳаи маориф ба ҳисоб рафта, баланд бардоштани сатҳи касбияти кормандони ин зинаи таҳсилот омили муҳимми таъмин намудани сифати таълиму тарбия ва рушди ҳамаҷонибаи кӯдакон мебошад. Зикр гардид, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамеша ба масъалаи тарбия ва инкишофи барвақтии кӯдакон таваҷҷуҳи махсус зоҳир намуда, таъкид мекунанд, ки сармоягузорӣ ба таҳсилоти томактабӣ сармоягузорӣ ба ояндаи давлат ва миллат мебошад. Дар ин замина, Вазорати маориф ва илм барои фароҳам овардани шароити мусоид ҷиҳати рушди мунтазами касбии мураббиён ва омӯзгорони муассисаҳои таҳсилоти томактабӣ тадбирҳои заруриро амалӣ намуда истодааст. Дар ҷаласа ректори Донишкадаи ҷумҳуриявии такмили ихтисос ва бозомӯзии кормандони соҳаи маориф Н. Мирзозода оид ба фаъолияти донишкада дар самти такмили ихтисоси кормандони таҳсилоти томактабӣ, аз ҷумла мураббиён ва омӯзгорони марказу гурӯҳҳои инкишофи барвақтии кӯдак маълумоти таҳлилӣ пешниҳод намуд. Ректори донишкада таъкид кард, ки маҳз бо дастгирӣ ва таваҷҷуҳи доимии Пешвои миллат ба рушди соҳаи маориф ва баланд бардоштани сатҳу сифати таълиму тарбия, дар донишкада ҷиҳати рушди касбии кормандони соҳаи таҳсилоти томактабӣ як қатор тадбирҳои мақсаднок роҳандозӣ гардидаанд. Қайд гардид, ки бо мақсади фарогирии бештари кормандони соҳаи таҳсилоти томактабӣ барномаҳои таълимӣ такмил дода шуда, шаклҳои гуногуни омӯзиш васеъ гардонида, ҳамкорӣ бо мақомоти маҳаллии идоракунии маориф тақвият бахшида шуд. Ҳамчунин, бо ҷалби мутахассисони соҳавӣ ва истифодаи имкониятҳои курсҳои такмили ихтисос, семинарҳои махсус, тренингҳо ва коучингҳо тадбирҳои зарурӣ амалӣ гардиданд. Тибқи маълумоти пешниҳодшуда, дар нимсолаи якуми соли 2026 дар донишкада ва филиалҳои он дар маҷмуъ 5542 нафар кормандони муассисаҳои таҳсилоти томактабӣ ба шаклҳои гуногуни рушди касбӣ фаро гирифта шуданд. Дар ҷаласа таъкид гардид, ки рушди мунтазами касбии кормандони соҳаи таҳсилоти томактабӣ яке аз омилҳои калидии баланд бардоштани сифати таълиму тарбия, татбиқи усулҳои муосири омӯзиш ва фароҳам овардани заминаи мусоид барои рушди зеҳнӣ, маънавӣ ва иҷтимоии кӯдакон ба шумор меравад. Аз рӯйи натиҷаи баррасии масъала қарор қабул гардид, ки Донишкадаи ҷумҳуриявии такмили ихтисос ва бозомӯзии кормандони соҳаи маориф ҷиҳати фарогирии пурраи мураббиён ва омӯзгорони марказу гурӯҳҳои инкишофи кӯдак ба шаклҳои гуногуни рушди касбӣ чораҳои иловагӣ андешад. Ҳамчунин, сардорони сарраёсат, раёсат ва мудирони шуъбаву бахшҳои маорифи шаҳру ноҳияҳои ҷумҳурӣ вазифадор гардиданд, ки ҳамкориро бо донишкада тақвият бахшида, тибқи нақшаҳои тасдиқшуда фарогирии пурраи кормандони мазкурро ба курсҳо, семинарҳо ва тренингҳо таъмин намоянд. Тибқи нақшаҳои тасдиқшуда, то охири соли 2026 фарогирии 6000 нафар мудир, мураббӣ ва омӯзгорони марказҳои инкишофи кӯдак ба курсҳо, семинарҳо ва тренингҳо дар назар дошта шудааст.
16
22.07.2026 -
Имзои санадҳои нави ҳамкории дуҷониба оид ба ҳамкорӣ миёни Ҷумҳурии Тоҷикистон ва Муғулистон Пас аз анҷоми мулоқоту музокироти сатҳи олӣ миёни Тоҷикистон ва Муғулистон маросими имзои санадҳои нави ҳамкорӣ баргузор гардид. Дар ҳузур ва бо иштироки Сарони давлатҳо 12 санад ба имзо расид. Нахуст Изҳороти муштараки Президенти Ҷумҳурии Тоҷикистон муҳтарам Эмомалӣ Раҳмон ва Президенти Муғулистон муҳтарам Ухнаагийн Хурэлсух дар бораи густариш ва рушди муносибатҳои дӯстӣ ва ҳамкорӣ миёни Ҷумҳурии Тоҷикистон ва Муғулистон қабул ва эълон гардид. Сипас, санадҳои зерин ба имзо расид: - Созишнома миёни Ҳукумати Ҷумҳурии Тоҷикистон ва Ҳукумати Муғулистон оид ба бекор намудани талаботи раводид барои дорандагони шиносномаҳои дипломатӣ ва хизматӣ; - Созишнома миёни Ҳукумати Ҷумҳурии Тоҷикистон ва Ҳукумати Муғулистон оид ба ҳамлу нақли байналмилалии автомобилӣ; - Ёддошти тафоҳум миёни Кумитаи бехатарии озуқавории назди Ҳукумати Ҷумҳурии Тоҷикистон ва Вазорати озуқаворӣ, кишоварзӣ ва саноати сабуки Муғулистон оид ба ҳамкорӣ дар соҳаи карантин ва ҳифзи растаниҳо; - Ёддошти тафоҳум миёни Вазорати маориф ва илми Ҷумҳурии Тоҷикистон ва Вазорати маорифи Муғулистон оид ба ҳамкорӣ дар соҳаи маориф; - Ёддошти тафоҳум миёни Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон ва Вазорати маорифи Муғулистон оид ба ҳамкорӣ дар соҳаи таҳсилоти техникӣ ва касбӣ ва омӯзиш; - Ёддошти тафоҳум миёни Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Вазорати фарҳанг, варзиш, сайёҳӣ ва ҷавонони Муғулистон оид ба ҳамкорӣ дар соҳаи ҷавонон ва варзиш; - Лоиҳаи Ёддошти тафоҳум миёни Саридораи геологияи назди Ҳукумати Ҷумҳурии Тоҷикистон ва Идораи захираҳои маъданӣ ва нафти Муғулистон оид ба ҳамкорӣ дар соҳаи таҳқиқоти геологӣ; - Ёддошти тафоҳум миёни Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон ва Вазорати истихроҷи маъдан ва саноати вазнини Муғулистон; - Ёддошти тафоҳум миёни Агентии содироти назди Ҳукумати Ҷумҳурии Тоҷикистон ва Агентии сармоягузорӣ ва савдои Муғулистон; - Ёддошти тафоҳум миёни Кумитаи ҳифзи муҳити зисти назди Ҳукумати Ҷумҳурии Тоҷикистон ва Вазорати муҳити зист ва тағйирёбии иқлими Муғулистон оид ба ҳамкории стратегӣ дар самти барқарорсозии чарогоҳҳо, ҳифзи пиряхҳо, мутобиқшавӣ ва устуворӣ ба тағйирёбии иқлим, инчунин коҳиш додани биёбоншавӣ; - Харитаи роҳ доир ба рушди минбаъдаи ҳамкорӣ дар соҳаи кишоварзӣ ва амнияти озуқаворӣ миёни Вазорати кишоварзии Ҷумҳурии Тоҷикистон ва Вазорати озуқаворӣ, кишоварзӣ ва саноати сабуки Муғулистон барои солҳои 2026-2028. Пас аз анҷоми мулоқоту музокироти сатҳи олии Тоҷикистон ва Муғулистон Сарони давлатҳо муҳтарам Эмомалӣ Раҳмон ва муҳтарам Ухнаагийн Хурэлсух барои доираи васеи намояндагони васоити ахбори омма нишасти матбуотӣ оростанд. Роҳбарони давлатҳо натиҷаи музокиротро барои таҳкиму тавсеаи муносибатҳои ҳамкории ду кишвар неку ояндадор маънидод намуданд. Мавриди зикри хос аст, ки рӯзҳои 20 - 21 июл дар ҳошияи сафари давлатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Улан-Батор Ҷаласаи нахустини Комиссияи байниҳукуматии Ҷумҳурии Тоҷикистон ва Муғулистон оид ба масъалаҳои тиҷоратию иқтисодӣ, Форуми соҳибкории Тоҷикистону Муғулистон ва Рӯзҳои фарҳанги Тоҷикистон дар Муғулистон дар сатҳи баланди ташкилӣ баргузор гардид.
50
21.07.2026 -
Мулоқот бо Сарвазири Муғулистон Ням-Осорин Учрал 21 июл дар шаҳри Улан-Батор Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Сарвазири Муғулистон Ням-Осорин Учрал мулоқот намуданд. Зимни мулоқот масоили рушду таҳкими ҳамкории ду кишвар баррасӣ гардид. “Мо ба таҳкиму густариши ҳамкории судманд бо Муғулистони дӯст таваҷҷуҳи пайваста зоҳир менамоем”, - изҳор доштанд дар оғози мулоқот Роҳбари давлати Тоҷикистон муҳтарам Эмомалӣ Раҳмон. Ҷонибҳо ба густариши робитаҳои судманд дар бахшҳои гуногуни тиҷоратию иқтисодӣ таваҷҷуҳи зиёд зоҳир намуданд. Аҳамияти махсуси фаъолияти муназзами Комиссияи муштарак оид ба ҳамкории тиҷоратию иқтисодӣ барои пешбурди тамоми маҷмӯи робитаҳо таъкид шуд. Ба роҳандозии ҳамкорӣ дар соҳаҳои гидроэнергетика, кишоварзӣ, бахусус бахши чорводорӣ, саноати кӯҳӣ ва геология таваҷҷуҳи зиёд зоҳир гардид. Татбиқи лоиҳаҳои муштарак оид ба истеҳсол, нигоҳдорӣ ва коркарди маҳсулоти кишоварзӣ, содироти навъҳои гуногуни маҳсулоти аз ҷиҳати экологӣ тозаи соҳаи кишоварзӣ ба Муғулистон ва таъсиси корхонаҳои муштараки коркарди маҳсулоти чорводорӣ низ мавриди таваҷҷуҳи ҷонибҳо қарор гирифт. Нақши робитаҳои мустақими доираҳои соҳибкорӣ ва баргузории Форуми соҳибкорони Тоҷикистону Муғулистон дар шаҳри Улан-Батор барои густариши робитаҳои тиҷоратӣ муҳим дониста шуд. Дар ин зимн пешниҳод гардид, ки Шурои муштараки соҳибкорони Тоҷикистон ва Муғулистон таъсис дода шавад. Алоқамандии ҷонибҳо ба густариши ҳамкории фарҳангию башарӣ, аз ҷумла роҳандозии робитаҳои мустақим миёни муассисаҳои таҳсилоти олӣ, марказҳои илмӣ-таҳқиқотӣ ва сайёҳӣ низ таъкид гардид.
35
21.07.2026
