14.10.2025
14 октябри соли 2025 дар Вазорати маориф ва илми Ҷумҳурии Тоҷикистон бо ташаббуси Агентии назорати давлатии молиявӣ ва мубориза бо коррупсияи Ҷумҳурии Тоҷикистон тибқи Нақшаи баргузории семинарҳои омӯзишӣ семинар дар мавзуи «Роҳҳои пешгирии коррупсия дар санадҳои меъёрии ҳуқуқӣ ва лоиҳаҳои онҳо» баргузор гардид.
Дар кори семинар муовини якуми вазири маориф ва илм Ҳомид Ҳошимзода, намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон, сардорони раёсату шуъбаҳои дастгоҳи марказии вазорат, роҳбарони муассисаҳои тобеи вазорат ва дигар кормандони соҳаи маориф иштирок намуданд.
Муовини якуми вазири маориф ва илм зимни суханронӣ таъкид намуд, ки роҳбарияти Вазорати маориф ва илм пайваста барои таҳкими низоми қонунмеҳварӣ, шаффофият ва масъулиятшиносӣ дар фаъолияти худ тадбирҳои муҳим меандешад ва мубориза бо коррупсия ва таҳкими механизмҳои зиддикоррупсионӣ яке аз самтҳои афзалиятноки фаъолияти вазорат ба шумор меравад. Зеро соҳаи маориф бевосита ба ташаккули маърифати шаҳрвандӣ ва ахлоқи ҳуқуқии насли наврас пайванд аст.
Гуфта шуд, ки дар доираи татбиқи Қонуни Ҷумҳурии Тоҷикистон «Дар бораи экспертизаи зиддикоррупсионии санадҳои меъёрии ҳуқуқӣ ва лоиҳаҳои санадҳои меъёрии ҳуқуқӣ» ва қарори Ҳукумати Ҷумҳурии Тоҷикистон аз аз 3 июни соли 2014, №355 «Дар бораи Тартиби гузаронидани экспертизаи зиддикоррупсионии санадҳои меъёрии ҳуқуқӣ, санадҳои меъёрии ҳуқуқии хусусияти умумиҳатмидоштаи вазоратҳо, кумитаҳои давлатӣ, дигар мақомоти давлатӣ, мақомоти маҳаллии ҳокимияти давлатӣ, мақомоти худидоракунии шаҳрак ва деҳот ва лоиҳаҳои онҳо, арзёбии дохилиидоравии зиддикоррупсионии лоиҳаҳои санадҳои меъёрии ҳуқуқӣ» бо супориши вазири маориф ва илм аз 7 марти соли 2024 дар вазорат гурӯҳи корӣ таъсис дода шудааст, ки вазифаи он гузаронидани арзёбии дохилиидоравии зиддикоррупсионии ҳамаи лоиҳаҳои санадҳои меъёрии ҳуқуқӣ ва таҳкими назорати иҷрои онҳо мебошад. Гурӯҳи мазкур аз ҳисоби роҳбарони сохторҳои дастгоҳи марказии вазорат таъсис ёфта, фаъолияти он мунтазам ба таҳлил ва бартарафсозии омилҳои эҳтимолии коррупсионӣ равона гардидааст.
Зимни семинар таъкид гардид, ки дар асоси санадҳои меъёрии ҳуқуқӣ ва нақшаи тасдиқгардида, то моҳи октябри соли 2025 дар Вазорати маориф ва илм 18 санади меъёрии ҳуқуқӣ аз арзёбии дохилиидоравии зиддикоррупсионӣ гузашта, ҳамаи лоиҳаҳои нави пешниҳодшуда тибқи тартиби муқарраргардида мавриди таҳлил ва баррасии ҳаматарафа қарор мегиранд.
Муовини якуми вазири маориф ва илм афзуд, ки Вазорати маориф ва илм на танҳо дар сатҳи идоракунии дохилӣ, балки дар тамоми низоми маориф бар зидди падидаҳои коррупсионӣ сиёсати фаъоли пешгирикунандаро пеш мебарад. Дар ин замина, бо ҷалби мутахассисон ва роҳбарони муассисаҳои таълимӣ корҳои фаҳмондадиҳӣ, мулоқотҳо ва семинарҳои омӯзишӣ мунтазам доир гардида, маърифати зиддикоррупсионии кормандон пайваста таҳким меёбад.
Дар ҷараёни семинар намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Д. Азамзода, дар бораи таҷрибаҳои муосири таҳлилу арзёбии зиддикоррупсионии санадҳои меъёрии ҳуқуқӣ, роҳҳои ошкорсозии омилҳои коррупсионӣ, баланд бардоштани масъулиятшиносии хизматчиёни давлатӣ ва зарурати таъмини шаффофият дар фаъолияти мақомоти давлатӣ суханронӣ намуд.
Дар ҷамъбасти семинар зикр шуд, ки Вазорати маориф ва илми Ҷумҳурии Тоҷикистон минбаъд низ бо такя ба сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фаъолияти зиддикоррупсионии худро густариш дода, дар ҳамбастагӣ бо дигар ниҳодҳои давлатӣ ва ҷомеаи шаҳрвандӣ барои таъмини муҳити софу шаффоф дар низоми маориф тадбирҳои судманд меандешад.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
Иштирок дар Форуми байналмилалии сармоягузории “Душанбе Инвест - 2025” 14 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Кохи Ваҳдати пойтахт дар Форуми байналмилалии сармоягузории “Душанбе Инвест - 2025” иштирок ва суханронӣ намуданд. Президенти кишвар муҳтарам Эмомалӣ Раҳмон нахуст иштирокдорони форумро ба Тоҷикистон хайрамақдам гуфтанд. Таъкид гардид, ки ҳадафҳои асосии ҳамоиш ин муаррифии захира ва имкониятҳои фарохи Тоҷикистон барои сармоягузорӣ, омодагии кишвар ба ҳамкорӣ ва фановариву ғояҳои нав, инчунин тасмими Ҳукумати кишвар ба идомаи ислоҳоту дигаргуниҳое, ки шароити мусоидро барои рушди устувор ва ташаккули шарикии дарозмуддат фароҳам меоранд, ба ҳисоб меравад. Сарвари давлат муҳтарам Эмомалӣ Раҳмон таъкид доштанд, ки Форуми Душанбе сармоягузориҳои “сабз”-ро, ки рушди устувори иқтисодиро бо дарназардошти адолати иҷтимоӣ ва истифодаи сарфакоронаи захираҳои табиӣ таъмин менамояд, дар маркази таваҷҷуҳ қарор додааст. Гуфта шуд, ки маҳз ба ҳамин хотир, Форум зери унвони “Сармоягузориҳои сабз: имкониятҳои имрӯза барои устувории фардо” баргузор карда мешавад. Роҳбари давлат муҳтарам Эмомалӣ Раҳмон изҳор доштанд, ки Форум барои таҳияи қарорҳои амалӣ, таҳкими эътимоди тарафайн, кушодани иқтидори сармоягузории минтақа дар асоси принсипҳои устуворӣ ва манфиати мутақобила заминаи муҳим фароҳам меорад. Аз ҷумла, гуфта шуд, ки ҷойгиршавии стратегии Тоҷикистон дар маркази Авруосиё ба мо имкон медиҳад, ки ҳамчун пайвандгари минтақаҳо ва қитъаҳо баромад карда, долонҳои нави нақлиётӣ, энергетикӣ ва логистикӣ, ки бозорҳо ва мардумони гуногунро муттаҳид мекунанд, таъсис диҳем. Сарвари давлат муҳтарам Эмомалӣ Раҳмон таъкид доштанд, ки “Тоҷикистони муосир кишвари дорои иқтисодиёти босуръат тараққиёбанда, рушди боэътимоди муносибатҳои байналмилалӣ ва фазои боз ҳам мусоиди сармоягузорӣ мебошад”. Зикр карда шуд, ки таи солҳои охир кишвари мо ислоҳоти фарогир ба таҳкими уствории макроиқтисодӣ, рушди бахши хусусӣ, дастгирии соҳибкорӣ, рақамикунонӣ ва татбиқи қарорҳои инноватсионӣ нигаронидаро амалӣ менамояд. Муҳтарам Эмомалӣ Раҳмон иқтидори бузурги гидроэнергетикии Тоҷикистон, захираҳои ғании маъдан ва сарватҳои муҳими стратегӣ, сармояи инсонии ҷавон ва пурнеруро аз афзалиятҳои рақобатпазири кишвари мо номиданд. Оид ба зарурати таваҷҷуҳ ба рушди иқтисоди сабз ва қабули Стратегияи рушди иқтисоди сабз дар Ҷумҳурии Тоҷикистон барои давраи то соли 2037 низ андешаронӣ сурат гирифт. Бо ба назар гирифтани имконияту иқтидорҳои соҳаи энергетика ба ширкатҳои манфиатдор лоиҳаҳои ояндадори ин бахш барои сармоягузорӣ пешниҳод карда шуд. Ҳамчунин, аз сармоягузороне, ки дар самти истеҳсоли технологияҳои муосир, батареяҳо, истифодаи манбаъҳои барқароршавандаи энергия фаъолият мекунанд, барои саҳм гузоштан дар амалисозии лоиҳаҳои бузургмиқёси ин соҳаҳо истиқбол карда шуд. Сарвари давлат муҳтарам Эмомалӣ Раҳмон ба самъи иштирокдорони форум имкониятҳои дигари сармоягузории кишвар, аз ҷумла саноати сабук ва хӯрокворӣ, кимиё ва дорусозӣ, истеҳсоли масолеҳи сохтмонӣ, комплекси агросаноатӣ ва соҳаи сайёҳиро муаррифӣ намуданд. “Ҳукумати Тоҷикистон барои ташкили фазои мусоиди соҳибкорӣ пайваста чораҷӯйӣ менамояд. Имрӯз мо ба сармоягузорон зиёда аз 240 кафолат ва имтиёзҳои гуногун пешниҳод менамоем, ки зиёда аз 110-тои онҳо имтиёзҳои андозӣ ва гумрукӣ мебошанд”, изҳор доштанд Президенти кишвар муҳтарам Эмомалӣ Раҳмон. Муҳтарам Эмомалӣ Раҳмон ҳамзамон панҷ минтақаи озоди иқтисодии Тоҷикистонро барои фаъолияти тиҷоратии соҳибкорон ва сармоягузорон созгор номиданд. Президенти кишвар муҳтарам Эмомалӣ Раҳмон таъкид намуданд, ки ҳадафи стратегии мо табдил додани Тоҷикистон ба макони боэътимоди сармоягузории дарозмуддат мебошад, ки ба ҳамкорӣ баҳри рушди устувор ва ҳамгироӣ ба иқтисоди ҷаҳонӣ нигаронида шудааст. 14 октябр дар Тоҷикистон Рӯзи соҳибкорон таҷлил мегардад. Бо истифода аз фурсат, Сарвари давлат муҳтарам Эмомалӣ Раҳмон ҳамаи соҳибкоронро ба ин муносибат самимона табрик гуфта, ба онҳо саломатӣ ва барору муваффақиятҳо орзу намуданд. Дар фарҷоми сухан Роҳбари давлат изҳори итминон намуданд, ки Форум ба оғози ташаббусҳои нави судманд замина гузошта, ҳамкориро таҳким мебахшад ва барои мардумони кишварҳо ва тараққиёти ҷаҳон натиҷаҳои намоён медиҳад. Баъди суханронии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маросими ифтитоҳии Форуми байналмилалии сармоягузории “Душанбе Инвест - 2025”, ҳамчунин, Султон Раҳимзода - Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Арипов Абдулло - Сарвазири Ҷумҳурии Узбекистон, Скляр Роман - муовини якуми Сарвазири Ҷумҳурии Қазоқистон, Тунку Алӣ Ризауддин ибни Туанку Муҳриз - Валиаҳди Шоҳигарии Нигери-Сембилан, Малайзия, Татяна Молчан - Муовини котиби генералӣ, котиби иҷроияи Комиссияи иқтисодии Созмони Милали Муттаҳид дар Аврупо, Сайид Али Маданизаде - Вазири иқтисод ва молияи Ҷумҳурии Исломии Эрон ва Холид бин Абдулазиз Ал-Фолеҳ - Вазири сармоягузории Подшоҳии Арабистони Саудӣ суханронӣ намуданд.
48
14.10.2025 -
Мулоқот бо Вазири сармоягузории Подшоҳии Арабистони Саудӣ Холид Ал-Фолеҳ 14 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ҳошияи Форуми сармоягузории “Душанбе Инвест - 2025” Вазири сармоягузории Подшоҳии Арабистони Саудӣ Холид Ал-Фолеҳро ба ҳузур пазируфтанд. Дар вохӯрӣ раванди рушди ҳамкории ду кишвар баррасӣ шуд. Аз фаъолияти Фонди саудии рушд дар Тоҷикистон изҳори қаноат карда шуд. Ҷонибҳо барои рушди робитаҳои ҳамкории иқтисодӣ, тиҷоратию сармоягузорӣ ва татбиқи лоиҳаҳо дар соҳаҳои энергетика ва кишоварзӣ алоқамандии худро иброз доштанд. Ба ҷоннок кардани фаъолияти василаҳои дуҷонибаи густариши ҳамкорӣ таваҷҷуҳи зиёд зоҳир гардид. Ҷалби сармояи саудӣ барои амалисозии лоиҳаҳои соҳаҳои саноати сабук, нассоҷӣ, дорусозӣ, истеҳсоли масолеҳи сохтмон, коркарди маъданҳо ва энергетика зарур шумурда шуд. Роҳандозии хатсайри ҳавоӣ дар масири Душанбе-Ҷидда-Душанбе намунаи хуби ҳамкории кишварҳо номида шуд. Табодули андеша, ҳамчунин, доир ба дигар мавзӯъҳои мавриди таваҷҷуҳи ду ҷониб сурат гирифт.
50
14.10.2025 -
БО ҲАМ БА ЗИДДИ КОРРУПСИЯ! Имрӯз, 14-уми октябри соли 2025, дар Муассисаи давлатии «Маркази ҷумҳуриявии дарёфт ва рушди истеъдодҳо» бо ҳадафи татбиқи «Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030», хониши идоравӣ баргузор гардид. Чорабиниро Нурулло Ғафуриён – муовини якуми директори Маркази ҷумҳуриявии дарёфт ва рушди истеъдодҳо ифтитоҳ намуда, таъкид кард, ки рушди маърифати ҳуқуқӣ ва баланд бардоштани сатҳи донишҳои қонунии кормандон, яке аз воситаҳои асосии пешгирӣ аз амалҳои коррупсионӣ ба ҳисоб меравад. Сипас, Нозири калони Раёсати муқовимат ба коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон, лейтенанти калони адлия Абдуллозода Одил Толиб дар мавзӯи «Баланд бардоштани маърифати ҳуқуқӣ ҳамчун воситаи муқовимат ба коррупсия» суханронӣ намуд. Дар фарҷоми чорабинӣ, бо назардошти саҳми назаррас дар баланд бардоштани сатҳи огоҳии ҳуқуқии кормандон ва ҳамкории судманд, лейтенанти калони адлия Абдуллозода Одил Толиб бо Сипосномаи Маркази ҷумҳуриявии дарёфт ва рушди истеъдодҳо қадрдонӣ шуд.
5
14.10.2025
