08.05.2025

 img

Ҳамватанони азиз!

 

Рафиқон генералҳо ва афсарону сарбозон!

 

Мо имрӯз 80-солагии ғалаба дар Ҷанги дуюми ҷаҳонро бо ифтихор ва посдорӣ аз хотираи неки фарзандони Тоҷикистон ва корнамоиву қаҳрамониҳои онҳо дар мубориза бо фашизми гитлерӣ таҷлил менамоем.

 

Ба муносибати ин санаи муҳимми таърихӣ – иштирокчиёни Ҷанги Бузурги Ватанӣ, собиқадорони меҳнат, шахсоне, ки дар он давраи вазнин дар ақибгоҳ заҳмат кашидаанд ва кулли мардуми Тоҷикистонро самимона табрик мегӯям.

 

Мусаллам аст, ки Ҷанги дуюми ҷаҳон дар таърихи навини башарият аз лиҳози миқёс ва фоҷиаи инсонӣ ҷанги даҳшатноктарин ба шумор меравад.

 

Беш аз 70 кишвари ҷаҳон ба гирдоби ҷанг кашида шуда, дар он зиёда аз 55 миллион нафар одамон қурбон гардиданд.

 

Даҳҳо ҳазор шаҳрҳои хурду бузург вайрону валангор ва ба хок яксон шуданд.

 

Тибқи арзёбии мутахассисону коршиносон хароҷоти ҳарбӣ ва зарари умумии ин ҷанг ба ҳисоби имрӯза 4,5 триллион долларро ташкил медиҳад.

 

Наслҳои имрӯзу оянда бояд ҳамеша дар хотир дошта бошанд, ки маҳз дӯстиву бародарӣ ва ҳамёриву дастгирии миллатҳои гуногуни собиқ Иттиҳоди Шӯравӣ омили асосии шикасти истилогарон ва пешгирӣ аз доман паҳн кардани «вабои фашизм» дар асри бистум гардид.

 

Мо, ҳамчунин, бояд ҳамеша бо ифтихор хотирнишон созем, ки барои расидан ба ин пирӯзӣ дар баробари дигар миллатҳое, ки бар зидди истибдоди фашистӣ мубориза бурдаанд, мардону занони бонангу номуси Тоҷикистон низ саҳми муассиру сазовор гузоштаанд.

 

Ҳарчанд майдони набардҳои хунин аз Тоҷикистон ҳазорҳо фарсах дур буд, вале акси садои он дар саросари диёри мо ба гӯш мерасид ва ҳар хонадони тоҷик гирифтори фоҷиаҳои он буд.

 

На танҳо дар шаҳрҳо, балки ҳатто дар дурдасттарин деҳаҳои кишвари мо оилае набуд, ки падар, бародар, фарзанд ё хешу ақрабояшро ба хотири мубориза бар зидди фашистони истилогар ба майдони ҷанг гусел накарда бошад.

 

Ин ҷанги даҳшатнокро мо низ сиёҳтарин саҳифаи таърих ва фоҷиаи бузург барои миллати худ меҳисобем.

 

Зеро аз якуним миллион нафар аҳолии Тоҷикистон дар он замон зиёда аз 300 ҳазор нафар ба майдони набард сафарбар шуданд, ки 50 фоизи аҳолии қобили меҳнати кишварро ташкил медод.

 

Беш аз 100 ҳазор нафари онҳо дар муҳорибаҳо қурбон шуда, зиёда аз 40 ҳазор беному нишон гардиданд ва 60 ҳазор нафари дигар аз ҷанг бо маъюбият баргаштанд.

 

Ҳамаи ин ҷоннисориҳо, ки дар таърихи муосири мо абадан сабт гардидаанд, саҳми миллати тоҷикро дар ин ғалабаи бузург ва таъмини сулҳу амнияти ҷаҳонӣ таҷассум мекунанд.

 

Мо номи неку хизмати онҳоеро, ки аз ҷанг барнагаштанд, ҳаргиз фаромӯш намекунем ва эҳтироми онҳоеро, ки бо пирӯзӣ ба Ватан баргаштаанд, ҳамеша ба ҷой меоварем.

 

Барои ҷасорату қаҳрамонӣ дар Ҷанги дуюми ҷаҳон 58 ҳазор нафар афсарону сарбозони тоҷик ба ордену медалҳо ва 55 нафар барои мардонагӣ ва шуҷоат ба унвони баланди «Қаҳрамони Иттиҳоди Шӯравӣ» мушарраф гардонида шуданд.

 

Беш аз 45 ҳазор нафар сокинони Тоҷикистон ба корхонаҳои саноатии минтақаҳои дигари Иттиҳоди Шӯравӣ фиристода шуда, қисми зиёдашон аз он ҷойҳо ба ҷанг сафарбар гардиданд.

 

Ҳамчунин, солҳои ҷанг зиёда аз 100 ҳазор нафар – асосан занону кӯдакон – аз минтақаҳои гуногуни ҷангзада ба Тоҷикистон кӯчонида шуданд ва ҷумҳурии мо барои онҳо хонаи дуюм гардид.

 

Мардуми мо онҳоро бегона нашумориданд, барояшон манзили зист, хӯроку сару либос муҳайё карданд ва аксари онҳоро ба камол расониданд.

 

Қобили зикр аст, ки дар ақибгоҳ низ аҳолии Тоҷикистон дар таъмини ғалаба саҳми бесобиқа гузошт.

 

Ҳамаи захираҳои инсонӣ ва моддиву техникии ҷумҳурии мо барои таъмин намудани ниёзҳои майдони муҳориба сафарбар гардида буданд.

 

Дар он рӯзҳои сангин кӯдакону занон ва калонсолон азобу машаққати гуруснагӣ ва дигар мушкилоти замони ҷангро таҳаммул карданд ва шабонарӯзӣ заҳмат кашида, ҳиссаи арзандаи худро барои расидан ба Рӯзи ғалаба гузоштанд.

 

Мардуми мо дар ҳоле, ки худашон гурусна буданд, ба майдони ҷанг ғаллаву озуқаворӣ, сару либос ва маблағ мефиристоданд.

 

Мехоҳам таъкид намоям, ки ҷасорату диловарӣ ва матонату фидокории афсарону сарбозони тоҷик дар давраи Ҷанги дуюми ҷаҳон барои шумо – хизматчиёни ҳарбии Қувваҳои Мусаллаҳи Тоҷикистони соҳибистиқлол намунаи ибрат мебошад.

 

Шумо ҳаргиз фаромӯш насозед, ки фазои орому осудаи имрӯзаи кишвар бо нархи бисёр гарон ба даст омадааст ва ҳимояи он ҳоло ҳамчун вазифаи пурмасъулу бошараф ба зиммаи шумо вогузор гардидааст.

 

Тоҷикистони соҳибистиқлоли мо дар ибтидои солҳои 90-уми асри гузашта, ҳамагӣ пас аз чанд даҳсола баъди Ҷанги дуюми ҷаҳон ба гирдоби ҷанги таҳмилии шаҳрвандӣ гирифтор гардид, ки барои кишвари мо оқибатҳои фоҷиабору сангин ба бор овард.

 

Шумораи қурбониён ва ҳисороти моддии ин ҷанг барои Тоҷикистони тозаистиқлол аз ҳисороти ҷониву молии кишвари мо дар Ҷанги дуюми ҷаҳон бештар буд: беш аз 150 ҳазор нафар ҳамватанони мо ҷони худро аз даст доданд, зиёда аз як миллион нафар гуреза шуданд ва ба иқтисоди миллии мо беш аз 10 миллиард доллар зарар ворид гардид.

 

Албатта, дар қатъи ҷангу хунрезӣ, барқарорсозии ҳокимияти конститутсионӣ ва таъмин намудани сулҳу оромӣ дар кишвар мардуми Тоҷикистон, хизматчиёни ҳарбии Қувваҳои Мусаллаҳ ва кормандони мақомоти ҳифзи ҳуқуқ нақши бузург ва ҳалкунанда бозиданд.

 

Дар ин роҳ ҳазорон нафар афсарону сарбозони далеру шуҷоъ ҷони худро қурбон карданд.

 

Мардум ва Ҳукумати мамлакат ба ин хизмати таърихии фарзандони содиқу далери худ ҳамеша арҷ мегузоранд.

 

Дар робита ба ин, хотиррасон менамоям, ки ҳифзи Ватан ва ҳимояи ҳаёти осоиштаи мардум дар ҳар давру замон барои ҳар як шаҳрванди огоҳу соҳибватан ва ҷавонмардони бонангу номус вазифаи муқаддас ва пуршараф ба ҳисоб меравад.

 

Хусусан, равандҳои манфию хатарборе, ки ҷаҳони муосирро таҳти таъсир қарор додаанд, аз ҷумла мухолифатҳои шадиди байни абарқудратҳо, аз нав авҷ гирифтани мусаллаҳшавии бошитоб, «ҷанги сард», инчунин, густариш ёфтани амалиёти тахрибкоронаи созмонҳои террористиву экстремистӣ аз ҳар як хизматчии ҳарбӣ сатҳи баланди омодабошӣ, маҳорату малакаи касбӣ, ҳисси ватандӯстиву ватандорӣ, ҷасорату далерӣ ва мардонагиву фидокориро талаб менамояд.

 

Эътимоду умеди мардум ҳар яки шумо – фарзандони содиқи Ватанро водор месозад, ки ҳамеша ҳушёр бошед, зиракии сиёсиро аз даст надиҳед, сатҳи касбият ва омодагии ҷангии худро мунтазам баланд бардоред, намунаи риояи қонунияту тартибот ва интизоми ҳарбӣ бошед.

 

Ҳамчунин, таъкид менамоям, ки ҳифзи сулҳи пойдор, суботи комили сиёсӣ, таҳкими ваҳдату худшиносии миллӣ ва пояҳои давлатдории тоҷикон вазифаи муқаддаси ҳар фарди ҷомеаи мо мебошад.

 

Ҳамин аст, ки мусоидат ба таъмини сулҳу субот ва ҳаёти осоишта дар паҳнои олам яке аз ҳадафҳои асосии сиёсати хориҷии давлати мо муайян гардидааст.

 

Маҳз ба хотири пайгирии ин ҳадаф ман дар иҷлосияи 79-уми Маҷмаи Умумии Созмони Милали Муттаҳид масъалаи қабули қатъномаи махсусро оид ба эълон кардани «Даҳсолаи таҳкими сулҳ ба хотири наслҳои оянда» пешниҳод намудам.

 

Тоҷикистон чун кишваре, ки ҷанги даҳшатноки таҳмилиро аз сар гузаронидааст, ҳамеша ҷонибдори танҳо бо роҳи осоишта, яъне гуфтушунид ҳаллу фасл кардани ҳама мухолифату низоъҳо мебошад.

 

Мо, ҳамчунин, густариш бахшидани гуфтугӯи тамаддунҳоро аз ҷумлаи заруратҳои замони муосир мешуморем.

 

Бовар дорам, ки мардуми сулҳпарвари тоҷик бо шукргузорӣ аз истиқлолу озодӣ, соҳибватаниву соҳибдавлатӣ ва суботи комили кишварамон минбаъд низ барои ҳифзу гиромидошти ин неъматҳои бузург ва ба хотири наслҳои ояндаи халқамон саъю талоши бештар мекунанд.

 

Бори дигар иштирокчиён ва собиқадорони Ҷанги дуюми ҷаҳон, мардуми шарифи Тоҷикистон ва шумо – ҳомиёни содиқи Ватанро ба ифтихори 80-солагии ғалабаи таърихӣ табрик мегӯям.

 

Ба ҳамаи шумо – ҳамватанони азиз, саломативу хушбахтӣ, рӯзгори обод ва барои Тоҷикистони азизамон ваҳдати ҷовидонаи миллӣ ва сулҳу суботи пойдор орзу менамоям.

 

Ҷашни ғалаба муборак, ҳамдиёрони азиз!

  • Суханронӣ ба муносибати Рӯзи Ғалаба img

Хабарҳои дигар

  •  img
    ТАҚВИЯТИ РАВАНДИ РАҚАМИКУНОНИИ МАОРИФ ДАР ВМКБ ТАҶҲИЗОТИ МУОСИР БА 21 МУАССИСАИ ТАЪЛИМӢ ДАСТРАС ГАРДИД   Дар доираи татбиқи Қарори Ҳукумати Ҷумҳурии Тоҷикистон дар бораи Барномаи ҷорӣ намудани технологияҳои иттилоотӣ ва коммуникатсионӣ дар муассисаҳои таҳсилоти умумӣ барои солҳои 2024–2028, ба 21 муассисаи таҳсилоти умумии шаҳру ноҳияҳои Вилояти Мухтори Кӯҳистони Бадахшон таҷҳизоти муосири техникӣ, аз ҷумла, компютерҳо, тахтаҳои электронии интерактивӣ ва дигар воситаҳои таълимӣ дастрас гардиданд.   Ин иқдом бо дастгирии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва маблағгузории Фонди захиравии Президенти мамлакат амалӣ гардида, як ҷузъи муҳимми сиёсати давлатии рушди соҳаи маориф маҳсуб меёбад. Он ба раванди рақамикунонии муассисаҳои таълимӣ дар минтақаи дурдасти кишвар таҳким мебахшад.   Дар назар аст, ки дар панҷ соли оянда тамоми муассисаҳои таҳсилоти умумии ВМКБ ба шабакаи интернетӣ, синфхонаҳои компютерӣ, тахтаҳои электронӣ ва китобхонаҳои рақамӣ пайваст гарданд. Ҳамзамон, татбиқи системаи иттилоотии идоракунии соҳаи маориф (EMIS), платформаҳои таълимии электронӣ ва таҳияи ҳазорон китоби рақамӣ ва маводи интерактивӣ дар назар аст.   Барномаи давлатӣ ба баланд бардоштани сатҳи саводнокии рақамии омӯзгорон ва хонандагон, инчунин ташкили муҳити рақамии таълимӣ дар муассисаҳо нигаронида шудааст. Тибқи нақша, дар оянда ҳамаи муассисаҳои таълимии ВМКБ ба шабакаи ягонаи таълимии миллӣ пайваст хоҳанд шуд ва аз платформаҳои муосири рақамӣ истифода хоҳанд бурд.   Ин марҳилаи муҳим дар рушди соҳаи маориф бо дастгирии Ҳукумати Ҷумҳурии Тоҷикистон ва сиёсати дурбинонаи Пешвои миллат амалӣ гардида, заминаи устувор барои ҳамгироии ВМКБ ба ҷомеаи рақамии ҷаҳонӣ мебошад.   Омӯзгорон, роҳбарони муассисаҳо ва хонандагонро зарур аст, ки аз ин имкониятҳо самаранок истифода баранд, то сифати таҳсил боз ҳам баланд гардад.

    39

    23.05.2025
  •  img
    ҲАМОИШИ ИЛМӢ-НАЗАРИЯВӢ БАХШИДА БА РӮЗИ ҶАВОНОНИ ТОҶИКИСТОН Бо мақсади сазовор таҷлил намудани Рӯзи ҷавонони Тоҷикистон ва мусоидат дар татбиқи сиёсати давлатии ҷавонон, 22 майи соли 2025 дар толори маҷлисгоҳи Вазорати маориф ва илми Ҷумҳурии Тоҷикистон ҳамоиши илмӣ-назариявӣ баргузор гардид.   Чорабинии мазкур бо ташаббуси Ташкилоти ҷамъиятии ҷавонон “Созандагони Ватан” дар назди ташкилоти ибтидоии ҳизбии «Ганҷ»-и Ҳизби Халқии Демократии Тоҷикистон дар вазорат ташкил ва баргузор карда шуд.   Ҳамоишро муовини якуми вазири маориф ва илм Ҳошимзода Ҳомид оғоз бахшида, дар суханронии худ вобаста ба саҳми ҷавонон дар рушди кишвар, сиёсати ҷавонпарваронаи давлат ва Ҳукумати Ҷумҳурии Тоҷикистон ва дастгирии пайвастаи Пешвои миллат муҳтарам Эмомалӣ Раҳмон изҳори назар намуд. Зикр гардид, ки ҷавонон қувваи пешбарандаи ҷомеа ба шумор рафта, таҳким бахшидани ҷаҳонбинӣ, баланд бардоштани маърифати сиёсӣ ва рушди қобилияти зеҳнии онҳо вазифаи муҳимми ҳамаи сохторҳои давлатӣ ва ҷомеа мебошад.   Дар идома муовини якуми вазир аз натиҷаҳои амалигардонии барномаҳои давлатӣ оид ба ҷавонон ёдовар шуда, қайд намуд, ки имрӯзҳо барои таҳсилу фаъолияти илмӣ, татбиқи ташаббусҳо ва амалисозии иқдомоти созандаи ҷавонон дар соҳаи маориф ва илм шароити мусоид фароҳам оварда шудааст.   Дар ҷараёни ҳамоиш инчунин намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Академияи идоракунии давлатии назди Президенти Ҷумҳурии Тоҷикистон ширкат намуда, вобаста ба масъалаҳои марбут ба ҳаёти иҷтимоӣ, фаъолсозии неруи ҷавонон, худшиносӣ ва таълиму тарбияи онҳо дар руҳияи ватандӯстиву худогоҳӣ баромад намуданд.   Маврид ба зикр аст, ки баргузории чунин чорабиниҳо боиси таҳкими ҳисси масъулиятшиносӣ, фаъолсозии неруи созандаи ҷавонон дар ҷомеа, афзоиши донишу малакаи сиёсиву фарҳангӣ ва саҳмгузории бештари онҳо дар раванди рушди соҳаи маориф мегардад.   Дар қисмати хотимавии ҳамоиш як қатор кормандони вазорат барои саҳми арзандаи худ дар рушди фаъолияти ҷамъиятӣ ва маърифатӣ бо “Сипоснома”-и Кумитаи кор бо ҷавонон ва варзиш қадрдонӣ карда шуданд.   Маркази матбуоти Вазорати маориф ва илми Ҷумҳурии Тоҷикистон

    57

    22.05.2025
  •  img
    БОЗДИД АЗ РАФТИ СОХТМОНИ МУАССИСАИ ТАЪЛИМӢ ДАР НОҲИЯИ ДАРВОЗ 22 майи соли 2025 муовини вазири маориф ва илми Ҷумҳурии Тоҷикистон Бадриддин Музаффарзода аз раванди сохтмони Муассисаи таҳсилоти миёнаи умумии №40-и ноҳияи Дарвоз боздид намуд.   Зимни боздид ба муовини вазири маориф ва илм иттилоъ дода шуд, ки муассисаи таълимӣ бо шароити муосири таълим аз 3 ошёна барои 560 хонанда дар ду баст пешбинӣ шудааст ва аз 8 синфхона иборат аст. Ҳоло сохтмони муассисаи мазкур бомаром идома дошта, дар назар аст соли ҷорӣ ба истифода дода шавад.   Дар идома муовини вазир бо масъулини сохтмони иншоот доир ба масъалаҳои саривақт ба итмом расонидан ва мавриди истифода қарор додани иншоот мулоқоти судманд анҷом дод.   Сипас, муовини вазир аз рафти дарси омӯзгорон, вазъи таълиму тарбия, сифати таҳсилот ва риояи сару либоси хонандагон дидан намуда, ба масъулини шуъбаи маориф ва муассисаи таълимӣ ҷиҳати беҳтар намудани вазъи таълиму тарбия, иштироки хонандагон дар озмуну олимпиадаҳои ҷумҳурӣ ва рафъи мушкилоти мавҷудбуда дастуру супоришҳои мушаххасс дод.   Боиси зикр аст, ки дар доираи сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон солҳои охир бунёду сохтмон ва азнавсозии муассисаҳои таҳсилоти томактабӣ ва миёнаи умумӣ, ба истифода додани муассисаҳои таълимии типи нав вусъат ёфта, заминаҳои мазкур ба баланд гаштани сатҳу сифати таҳсилот дар кишвар мусоидат намудааст.   Маркази матбуоти Вазорати маориф ва илми Ҷумҳурии Тоҷикистон

    56

    22.05.2025