17.03.2026
Таҳти ин унвон имрӯз, 17 марти соли 2026 дар Вазорати маориф ва илми Ҷумҳурии Тоҷикистон бахшида ба ҷашни байналмилалии Наврӯз конференсияи илмӣ-назариявӣ баргузор гардид.
Дар оғози чорабинӣ вазири маориф ва илми Ҷумҳурии Тоҷикистон Раҳим Саидзода ҳозирин ва меҳмононро ба муносибати фарорасии ҷашни байналмилалии Наврӯзи оламафрӯз самимона табрик намуда, барои ҳамагон сулҳу осоиш, сарбаландӣ ва муваффақиятҳои нав орзу кард. Таъкид шуд, ки Наврӯз ҳамчун рамзи эҳёи табиат, навсозии зиндагӣ ва ҳамбастагии мардумон дорои арзишҳои баланди маънавӣ буда, дар фарҳанги миллати тоҷик ҷойгоҳи хос дорад.
Гуфта шуд, ки дар замони Истиқлолияти давлатии Ҷумҳурии Тоҷикистон Наврӯз ба сифати ҷашни миллӣ бо шукуҳу шаҳомати хоса таҷлил гардида, бо ибтикори Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мақоми байналмилалӣ касб намуда, тибқи қарори Созмони Милали Муттаҳид ҳамасола 21 март ҳамчун Рӯзи байналмилалии Наврӯз таҷлил мегардад.
Дар идома, доктори илмҳои филологӣ, профессор, мудири кафедраи методикаи таълими забон ва адабиёти Донишгоҳи давлатии омӯзгории Тоҷикистон ба номи Садриддин Айнӣ С. Қосимӣ дар мавзуи «Ҷашни Наврӯз дар дарозаи таърих» маъруза намуда, таърихи ташаккул ва рушди ин ҷашни бостониро аз давраҳои қадим то замони муосир таҳлил кард. Ӯ таъкид намуд, ки Наврӯз дар тӯли асрҳо ҳамчун унсури муҳимми фарҳанги миллӣ ва омили муттаҳидсозандаи мардум нақши муҳим бозидааст. Ҳамчунин, номзади илмҳои филологӣ, дотсенти кафедраи назарияи методикаи таълими забон ва адабиёти тоҷики Донишгоҳи байналмилалии забонҳои хориҷии Тоҷикистон ба номи Сотим Улуғзода М. Раҳимова дар мавзуи «Тасвири баҳор ва Наврӯз дар ашъори шоирони классик» баромад намуд. Қайд гардид, ки дар эҷодиёти шоирони классик Наврӯз ҳамчун рамзи зебоӣ, эҳё, покӣ ва оғози зиндагии нав васеъ инъикос ёфтааст.
Зикр шуд, ки Наврӯз ҳамчун ҷашни эҳёи табиат, рамзи бедории замин ва оғози фасли созандагиву умед аз қаъри асрҳо то ба имрӯз ҳамчун мероси гаронбаҳои фарҳангӣ ҳифз гардида, таҷассумгари арзишҳои олии инсонӣ, аз ҷумла сулҳу дӯстӣ, ҳамдигарфаҳмӣ ва ҳамбастагии мардумон мебошад.
Дар қисмати ҷамъбастӣ таъкид гардид, ки баргузории чунин чорабиниҳои илмӣ ба таҳкими эҳсоси ватандӯстӣ, ҳифзи мероси фарҳангӣ ва тарғиби арзишҳои умумибашарӣ мусоидат менамояд.
Конференсия бо таманниёти сулҳу субот, ваҳдати миллӣ ва шукуфоии минбаъдаи кишвар ба кори худ хотима бахшид.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
Дар Донишгоҳи байналмилалии забонҳои хориҷии Тоҷикистон ба номи Сотим Улуғзода даври муассисавии Озмуни ҷумҳуриявии «Шоҳномахонӣ» баргузор гардид. ДУШАНБЕ, 16.13.2026 /АМИТ «Ховар»/. Дар Донишгоҳи байналмилалии забонҳои хориҷии Тоҷикистон ба номи Сотим Улуғзода даври муассисавии Озмуни ҷумҳуриявии «Шоҳномахонӣ» баргузор гардид. Тавре ба АМИТ «Ховар» аз ин донишгоҳ хабар доданд, дар озмун беш аз 21 нафар омӯзгорону донишҷӯён ва хонандагон иштирок намуда, тибқи низомномаи озмун маҳорату истеъдоди худро нишон доданд. Иброз гардид, ки баргузории Озмуни ҷумҳуриявии «Шоҳномахонӣ» рӯйдоди муҳими фарҳангию маърифатӣ барои гиромидошти мероси бузурги адабӣ ва таърихии халқи тоҷик – «Шоҳнома»-и безаволи Абулқосим Фирдавсӣ ба ҳисоб меравад. Ин иқдом на танҳо таваҷҷуҳ ба асари классикии адабиёти халқи тоҷик, балки қадами устувор дар роҳи таҳкими худшиносии миллӣ, эҳёи арзишҳои таърихӣ ва баланд бардоштани ҳисси хештаншиносӣ ва ватандӯстии аҳли ҷомеа ба ҳисоб меравад. Гуфта шуд, ки «Шоҳнома» чун яке аз шоҳкориҳои адабиёти ҷаҳонӣ дар тарбияи ҳисси ватандӯстӣ, ифтихор аз таъриху фарҳанги миллӣ ва баланд бардоштани маърифати маънавии ҷавонон нақши муҳим дорад. Таъкид гардид, ки бо ташаббусҳои пайвастаи давлату Ҳукумат, махсусан иқдоми фарҳангпарваронаи Пешвои миллат муҳтарам Эмомалӣ Раҳмон баргузории чунин озмунҳо ба рушду густариши маърифати китобхонӣ ва эҳтиром ба арзишҳои фарҳангии миллат мусоидат менамояд. Натиҷаи озмун аз тарафи аъзои ҳакамон ҷамъбаст гардида, ғолибон ба даври навбатии озмун роҳхат гирифтанд. Ёдовар мешавем, ки Озмуни ҷумҳуриявии «Шоҳномахонӣ» соли 2026 ба ифтихори 35 — солагии ҷашни муқаддаси миллӣ – Истиқлоли давлатии Ҷумҳурии Тоҷикистон бо мақсади таҳкими ҳамаҷонибаи ҳувияти миллӣ, арҷгузорӣ ба таърихи пурифтихори миллати тоҷик, омӯзиши амиқу ҳамаҷонибаи корномаҳои шоистаи ниёгонамон давоми таърих, тақвияти ҳисси худогоҳӣ ва худшиносии миллӣ, эҳёи ҳофизаи таърихӣ ва бо ҳамин роҳ шинохти беҳтари нақши миллати куҳанбунёду фарҳангсолори тоҷик дар рушди тамаддуни инсоният, ки бо далелҳои раднопазир ва бо такя ба сарчашмаҳои илмию таърихӣ дар асари мондагору пурарзиши Ҳаким Абдулқосими Фирдавсӣ — «Шоҳнома» инъикос ёфтааст, баргузор мешавад. АКС: Донишгоҳи байналмилалии забонҳои хориҷии Тоҷикистон ба номи Сотим Улуғзода
28
16.03.2026 -
Қабули довталабон барои таҳсил дар муассисаҳои таҳсилоти олии Ҷумҳурии Мардумии Чин барои соли таҳсили 2026-2027 оғоз гардид. ДУШАНБЕ, 16.03.2026 /АМИТ «Ховар»/. Қабули довталабон барои таҳсил дар муассисаҳои таҳсилоти олии Ҷумҳурии Мардумии Чин барои соли таҳсили 2026-2027 оғоз гардид. Дар ин хусус АМИТ «Ховар» бо истинод ба Муассисаи давлатии «Маркази барномаҳои байналмилалӣ» иттилоъ медиҳад. Барномаи мазкур ба шаҳрвандони Ҷумҳурии Тоҷикистон имконият фароҳам меорад, ки дар якчанд муассисаи таҳсилоти олии Ҷумҳурии Мардумии Чин аз рӯйи ихтисосҳои гуногун таҳсил намоянд. Қабули довталабон тибқи талаботи донишгоҳҳои қабулкунанда ва пас аз гузаштани мусоҳиба (Interview) амалӣ мегардад. Соли аввали таҳсил бо омӯзиши пешакии забони чинӣ оғоз гардида, баъдан таҳсил аз рӯи ихтисоси интихобшуда идома меёбад. Довталабон метавонанд дар муассисаҳои гуногуни Ҷумҳурии Мардумии Чин аз рӯйи ихтисосҳои технологияҳои мехатроника, технологияҳои татбиқи компютер, ҳамширагӣ, технологияи тасвирбардории тиббӣ, терапияи барқарорсозӣ, дорусозӣ, тиҷорати электронӣ ва дигар ихтисосҳо таҳсил намоянд. Муҳлати ниҳоии қабули ҳуҷҷатҳо то 30 апрели соли 2026 пешбинӣ шудааст. Довталабон метавонанд барои гирифтани маълумоти муфассал оид ба шартҳои қабул, рӯйхати ҳуҷҷатҳои зарурӣ ва тартиби пешниҳоди онҳо ба Муассисаи давлатии «Маркази барномаҳои байналмилалӣ» ба суроғаи шаҳри Душанбе, кӯчаи Мирзо Турсунзода, 47 ё телефони 223-23-59 муроҷиат намоянд.
33
16.03.2026 -
МУЛОҚОТ БО ВАЗИРИ ТАҲСИЛОТИ ОЛӢ, ИЛМ ВА ИННОВАТСИЯИ ҶУМҲУРИИ ӮЗБЕКИСТОН ДАР ҲОШИЯИ ФОРУМИ СЕЮМИ РЕКТОРОН 13 марти соли 2026, дар ҳошияи Форуми сеюми ректорони муассисаҳои таҳсилоти олии Ҷумҳурии Тоҷикистон ва Ҷумҳурии Ӯзбекистон дар Донишгоҳи давлатии омӯзгории Тоҷикистон ба номи Садриддин Айнӣ вохӯрии вазири маориф ва илми Ҷумҳурии Тоҷикистон Раҳим Саидзода бо вазири таҳсилоти олӣ, илм ва инноватсияи Ҷумҳурии Ӯзбекистон Қунғратбой Шарипов баргузор гардид. Зимни мулоқот ҷонибҳо масъалаҳои муҳимми густариши ҳамкориҳои дуҷониба дар соҳаи маориф ва илм, рушди робитаҳои байни донишгоҳҳои ду кишвар, татбиқи барномаҳои муштараки таълимӣ, густариши табодули донишҷӯёну омӯзгорон ва амалисозии лоиҳаҳои муштараки илмиро мавриди баррасӣ қарор доданд. Вазири маориф ва илми Ҷумҳурии Тоҷикистон меҳмононро ба Тоҷикистон хайрамақдам гуфта, таъкид намуд, ки муносибатҳои ду кишвар дар соҳаи маориф ва илм имрӯз ба марҳилаи сифатан нав ворид шуда, имзои созишномаҳои байниҳукуматӣ, таъсиси факултетҳои муштарак, татбиқи барномаҳои мубодилаи академӣ ва афзоиши ҳамкориҳои мустақими донишгоҳҳо гувоҳи равшани таҳкими робитаҳои илмию таълимии Тоҷикистону Ӯзбекистон мебошад. Таъкид гардид, ки заминаи асосии густариши муносибатҳои дӯстона ва ҳамкориҳои самараноки Тоҷикистону Ӯзбекистон дар соҳаҳои гуногун, аз ҷумла маориф ва илм, сиёсати хирадмандона ва созандаи сарони ду давлат - Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзекистон муҳтарам Шавкат Мирзиёев мебошад. Маҳз бо ташаббус ва иродаи сиёсии роҳбарони ду кишвар муносибатҳои дуҷониба ба марҳилаи нави рушд ворид гардида, ҳамкориҳо дар соҳаҳои илм, маориф, фарҳанг ва дигар самтҳои муҳим ба таври бесобиқа густариш ёфтаанд. Ҳамзамон зикр гардид, ки Ҷумҳурии Ӯзбекистон яке аз шарикони муҳимми Ҷумҳурии Тоҷикистон дар соҳаи маориф ва илм ба ҳисоб меравад ва донишгоҳҳои Тоҷикистон пайваста бо муассисаҳои таҳсилоти олии Ӯзбекистон созишномаҳои нави ҳамкорӣ ба имзо мерасонанд. Дар навбати худ, вазири таҳсилоти олӣ, илм ва инноватсияи Ҷумҳурии Ӯзбекистон аз сатҳи баланди ҳамкориҳои ду кишвар дар соҳаи маориф изҳори қаноатмандӣ намуда, таъкид кард, ки густариши ҳамкориҳои байни донишгоҳҳои Тоҷикистон ва Ӯзбекистон барои таҳкими робитаҳои илмӣ, табодули таҷриба ва татбиқи барномаҳои муштараки таълимӣ аҳамияти муҳим дорад. Изҳори боварӣ карда шуд, ки баргузории форуми навбатии ректорон ба таҳкими бештари робитаҳои илмию таълимӣ, рушди сармояи инсонӣ ва омодасозии мутахассисони баландихтисос барои рушди устувори ду кишвар мусоидат хоҳад кард.
53
13.03.2026
