30.12.2024
30-уми декабри соли 2024 Вазири корҳои дохилӣ, генерал-полковники милитсия Раҳимзода Рамазон Ҳамро бо як зумра донишҷӯёну хонандагоне, ки дар озмунҳои ҷумҳуриявии “Фурӯғи субҳи доноӣ китоб аст» ва «Илм-фурӯғи маърифат» ғолиб гардиданд, инчунин ҷавонони фаъоли гурӯҳи "Авангард" дар Ҷумҳурии Тоҷикистон вохӯрӣ доир намуд.
Зикр гардид, ки озмунҳои ҷумҳуриявии “Фурӯғи субҳи доноӣ китоб аст» ва «Илм-фурӯғи маърифат» таҳти cарпарастии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ ва мусоидат дар рушди ҷаҳони маънавии тамоми сокинони кишвар, бо мақсади боз ҳам бештар ба омӯзиши илмҳои табиатшиносӣ, дақиқ ва риёзӣ ҷалб кардани наврасону ҷавонон, олимону муҳақиқон ва устодону омӯзгорон баргузор мегардад.
Дар идома зикр гардид, ки Пешвои муаззами миллат муҳтарам Эмомалӣ Раҳмон дар рушди пайвастаи илму маориф таваҷҷуҳи рӯзмарра зоҳир намуда, дар баромадҳои худ иброз медоранд, ки барои таъмин намудани пешрафти соҳаҳои илму маориф ҳамчун самти афзалиятноки сиёсати иҷтимоӣ Ҳукумати кишвар аз тамоми имкониятҳо истифода мебарад.
Мавриди зикр аст, ки бо ташаббуси роҳбарияти Вазорати корҳои дохилӣ як гурӯҳ донишҷӯёну хонандагони лаёқатманд дар вақти таътили тирамоҳӣ аз 31-уми октябр то 5-уми ноябри соли равон барои истироҳату фароғат ба «Меҳмонхона - истироҳатгоҳи лаёқатмандон»-и ноҳияи Ховалинг сафарбар гардида, дар таътили зимистонаи хонандагон, яъне моҳи январи соли 2025 сафарбарии як гурӯҳ донишҷӯёну хонандагони лаёқатманд ба нақша гирифта шудааст.
Вазири корҳои дохилӣ Раҳимзода Рамазон зимни суҳбат бо донишҷӯёну хонандагони лаёқатманд онҳоро барои омӯхтани илму дониш, таъриху фарҳанги миллати тамаддунофари тоҷик, омӯхтани забонҳои хориҷӣ, мутолиаи асарҳои безаволи «Шоҳнома»-и Абулқосим Фирдавсӣ, «Тоҷикон»-и Б.Ғафуров, «Восеъ»-и С.Улуғзода ва тақвият додани нерӯи ақлонию зеҳнӣ ҳидоят намуд.
Зикр гардид, ки дар меҳмонхона - истироҳатгоҳи лаёқатмандон ҳамаи шароитҳо барои илмомӯзию истироҳат муҳайё буда, ҷавононро зарур аст, ки ҷиҳати баланд бардоштани малакаю маҳорати касбӣ, омӯхтани касбу ҳунар ва сайқал додани илму дониши худ пайваста саъю талош намоянд. Дар вақти таътил ба чорабиниҳои варзишӣ - фарҳангӣ ва шоҳмотбозӣ машғул гардида, нерӯи зеҳнии худро тақвият бахшанд, зеро рушди нерӯи зеҳнии ҷавонон, ташаккулдиҳандаи тафаккур ва маърифати онҳо арзёбӣ мегардад.
Изҳори итминон карда шуд, ки ҷавонони лаёқатманд рисолати ватандории худро бо садоқат ба Тоҷикистони маҳбуб ва мардуми шарафманди он иҷро менамоянд.
Хабарҳои дигар
-
БАРГУЗОРИИ ҶАЛАСАИ НАЗОРАТИИ НАЗДИ ВАЗИРИ МАОРИФ ВА ИЛМ Имрӯз, 21 январи соли 2026 дар Вазорати маориф ва илми Ҷумҳурии Тоҷикистон ҷаласаи навбатии назоратии назди вазири маориф ва илм баргузор гардид. Ҷаласа таҳти раёсати вазири маориф ва илм Раҳим Саидзода доир шуда, дар кори он муовинони вазири маориф ва илм, сардорони раёсату шуъбаҳои дастгоҳи марказии вазорат, роҳбарони муассисаҳои тобеъ ва ректорони муассисаҳои таҳсилоти олии касбӣ ба таври ҳузурӣ ва маҷозӣ иштирок намуданд. Ҷаласаро вазири маориф ва илми Ҷумҳурии Тоҷикистон ифтитоҳ намуда, ҳозиринро бо рӯзномаи ҷаласа шинос намуд. Дар оғози суханронии худ вазир аз таваҷҷуҳи бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба соҳаи маориф ва илм ёдовар шуда, суханони Пешвои миллатро дар бораи нақши ҳалкунандаи маориф дар ташаккули шахсияти комил, баланд бардоштани сатҳи маърифати ҷомеа ва тарбияи насли соҳибмаърифат ва ватандӯст ёдовар шуд. Таъкид гардид, ки сиёсати давлатӣ дар соҳаи маориф таҳти роҳбарии хирадмандонаи Пешвои миллат муҳтарам Эмомалӣ Раҳмон ба таъмини сифати таҳсилот, баланд бардоштани сатҳи касбияти омӯзгорон ва таҳкими заминаи моддиву техникии муассисаҳои таълимӣ равона гардида, такмили сифати таълиму тарбия, истифодаи самараноки усулҳои муосири таълим ва таҳкими масъулияти омӯзгорон аз вазифаҳои аввалиндараҷаи кормандони соҳа ба шумор мераванд. Сипас, сардори раёсати таҳсилоти олии касбӣ ва баъдидипломии Вазорати маориф ва илм Ҳ. Саидзода дар бораи вазъи иҷрои Дастурамал оид ба таҳияи сарбории ҳайати омӯзгорони муассисаҳои таҳсилоти олии касбӣ ва ректори Донишгоҳи аграрии Тоҷикистон ба номи Шириншоҳ Шоҳтемур У. Маҳмадёрзода оид ба фаъолияти муассисаи таълимӣ дар нимослаи соли таҳсили 2025-2026 гузориш пешниҳод намуданд. Дар ҷараёни ҷаласа масъалаҳои муҳим, аз қабили баланд бардоштани сатҳу сифати таълим дар муассисаҳои таълимӣ, такмил ва навсозии муҳтавои барномаҳои таълимӣ ва ба замони муосир мутобиқ намудани он, иҷрои пурраи Дастурамал оид ба таҳияи сарбории ҳайати омӯзгорони муассисаҳои таҳсилоти олии касбӣ, тақвияти омӯзиши фанҳои табиатшиносӣ, дақиқ ва риёзӣ ва ҷалби бештари хонандагону донишҷӯён ба озмуну олимпиадаҳои ҷумҳуриявию байналмилалӣ мавриди баррасии амиқ қарор гирифт. Раиси ҷаласа зимни баррасии масъалаҳои мазкур таъкид намуд, ки ҷиҳати таъмин намудани рушди устувори низоми маориф, боло бурдани сатҳу сифати таълим, татбиқи самараноки барномаҳои таълимӣ, тақвияти фаъолияти илмӣ-тадқиқотӣ дар муассисаҳои таҳсилоти олии касбӣ, ҷалби мутахассисони соҳибтахассус, истифодаи оқилонаи имкониятҳои мавҷуда ва густариши ҳамкориҳо бо шарикони рушд, ҳар як сохтору зерсохтори марбута бояд бо масъулияти баланд, муносибати илмӣ ва равиши муосири идоракунӣ фаъолияти худро ба роҳ монда, барои амалӣ гардидани ҳадафҳои стратегӣ ва таъмини ниёзҳои ҷомеаи муосир дар самти таълиму тарбия саҳми муассир гузорад. Маркази матбуоти Вазорати маориф ва илми Ҷумҳурии Тоҷикистон
25
21.01.2026 -
ВОХӮРӢ БО ДИРЕКТОРОНИ МУАССИСАҲОИ ТАЪЛИМИИ НОҲИЯИ НУРОБОД Бо мақсади баррасии масъалаҳои мубрами соҳаи маориф, баланд бардоштани сатҳу сифати таҳсил ва тақвияти масъулияти роҳбарони муассисаҳои таълимӣ бо иштироки муовини вазири маориф ва илми Ҷумҳурии Тоҷикистон Равшан Каримзода, муовини якуми раиси ноҳияи Нуробод Ҳ.Зафар, кормандони шуъбаи маориф ва директорони муассисаҳои таълимии ноҳия ҷаласаи корӣ доир гардид. Дар ҷаласа масъалаҳои муҳимми соҳаи маориф мавриди баррасӣ қарор гирифта, таъкид гардид, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барҳақ таъкид намудаанд, бунёди миллати мутамаддин аз маориф оғоз меёбад. Аз ин рӯ, ғамхорӣ ба илму маориф, яъне ҳалли масъалаҳои ҷойдошта дар ин самт, сармоягузорӣ ба хотири рушди неруи инсонӣ мебошад. Муовини вазири маориф ва илми Ҷумҳурии Тоҷикистон зикр намуд, ки аҳли маорифи ноҳия бояд ҷиҳати фарогирии ҳарчи бештари кӯдакон ба таҳсилоти томактабӣ, баланд бардоштани сатҳу сифати таҳсилот ва омода намудани хонандагон ба озмуну олимпиадаҳои ҷумҳуриявӣ бо истифодаи пурраи шароит ва имкониятҳои мавҷуда тамоми неру ва дониши худро равона намоянд. Ба роҳбарони муассисаҳои таълимӣ дастур дода шуд, ки ҷиҳати ҳолати тозагӣ, рӯзномадорӣ, бо худ овардани китобҳои дарсӣ, иштироки хонандагон дар озмуну олимпиадаҳои ҷумҳуриявӣ, ҷонок намудани маҳфилҳои фаннӣ ва баланд бардоштани сатҳу сифати таҳсилот чораҳои судманд андешанд.
20
21.01.2026 -
ШИНОСОИИ МУОВИНИ ВАЗИРИ МАОРИФ ВА ИЛМ БО ВАЗЪИ ТАЪЛИМ ДАР МУАССИСАҲОИ ТАЪЛИМИИ ШАҲРИ РОҒУН Муовини вазири маориф ва илми Ҷумҳурии Тоҷикистон Равшан Каримзода аз фаъолияти муассисаҳои таълимии №1 ва 2-и шаҳри Роғун дидан намуда, бо омӯзгорону хонандагон суҳбату вохӯрӣ анҷом дод. Дар рафти вохӯрӣ бо ҳамзамон муовини вазир бо вазъи таълиму тарбия, давомоти хонандагон, рафти дарсҳо, лавозимоти хониши хонандагон, таъминот бо кадрҳои омӯзгорӣ, сару либоси ягонаи мактабӣ, насби шиору овеза шинос шуд. Муовини вазир бо омӯзгорону хонандагон суҳбат анҷом дода, барои беҳтар намудани сифати таҳсилот, бештар намудани маҳфилҳои беруназсинфии фаннӣ, ҷоннок кардани омӯзиши забонҳои хориҷӣ ва технологияи информатсионӣ, мусоидат дар баланд бардоштани масъулиятнокии волидон ва ҷалби бештари онҳо ба муассисаи таълимӣ, бештар кардани ишғоли ҷойҳои намоён дар олимпиада ва озмунҳои ҷумҳуриявию байналмилалӣ ба масъулин дастуру супориш дод.
96
20.01.2026
