16.04.2025
Дар бинои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷаласаи навбатии Шурои ҳамоҳангсозии байнисоҳавӣ оид ба ғизои мактабӣ баргузор гардид.
Дар ҷаласа Музаффарзода Бадриддин, муовини вазири маориф ва илми Ҷумҳурии Тоҷикистон, масъулини соҳа ва аъзоёни Шуро ширкат варзида, масъалаҳои муҳими марбут ба ғизои мактабӣ мавриди баррасӣ қарор гирифтанд.
Зимни нишаст раванди амалисозии “Барномаи давлатии рушди ғизои мактабӣ дар Ҷумҳурии Тоҷикистон барои солҳои 2022 -2027” ҷамъбаст гардида, дурнамо ва масъалаҳои ҷорӣ дар самти таъмини ғизои солим ба кӯдакону наврасон муҳокима шуданд.
Аъзоёни Шуро ҳамчунин пешниҳодҳои худро доир ба такмили бандҳои дахлдори лоиҳаи Кодекси маорифи Ҷумҳурии Тоҷикистон ҷиҳати беҳтарсозии ташкил ва танзими ғизои мактабӣ дар муассисаҳои томактабӣ, таҳсилоти умумӣ ва махсус ироа намуданд.
Дар ҷаласа инчунин масъалаҳои омодагӣ ба сафари назоратӣ ба муассисаҳои таълимии манотиқи кишвар, баргузории ҷаласаҳои сайёр ва Форуми байналмилалии ғизои мактабӣ, ки моҳи ноябри соли 2025 баргузор хоҳад шуд, мавриди баррасӣ қарор гирифтанд.
Хабарҳои дигар
-
БОЗДИДИ ВАЗИРИ МАОРИФ ВА ИЛМИ ҶУМҲУРИИ ТОҶИКИСТОН АЗ ГУРӮҲИ ИДОРАКУНИИ ЛОИҲАИ STEM Вазири маориф ва илми Ҷумҳурии Тоҷикистон Раҳим Саидзода аз дафтари кории Гурӯҳи идоракунии лоиҳаи «Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика» дидан намуд. Зимни боздид аз утоқҳои кории кормандони лоиҳа ва шарту шароити он аз наздик шинос гардида, бо аҳли кормандони лоиҳа вохӯрӣ анҷом дод ва аз ҳар яки онҳо даъват ба амал овард, то ҷиҳати иҷрои вазифаҳои дар наздашон гузошташуда содиқона ва одилона фаъолият намоянд. Зикр карда шуд, ки бо фармони Президенти Ҷумҳурии Тоҷикистон аз 22.12.2023, №664 Созишномаи грантӣ байни Ҷумҳурии Тоҷикистон ва Бонки Осиёии Рушд (БОР) оид ба лоиҳаи «Такмили таҳсилоти миёна дар соҳаи илмҳои табиӣ, технологӣ, муҳандисӣ ва математика» аз 22 декабри соли 2023 ба имзо расидааст. Бояд тазаккур дод, ки бо мақсади рушди фанҳои дақиқ, табиӣ ва риёзӣ солҳои 2020-2040 “Солҳои омӯзиш ва рушди фанҳои риёзӣ, дақиқ ва табиӣ дар соҳаи илму маориф” эълон гардид. Лоиҳаи “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика” маҳз дар партави сиёсати хирадмандонаи Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон ба хотири боз ҳам беҳтар ба роҳ мондани омӯзиши илмҳои табиатшиносӣ, дақиқ ва риёзӣ дар назди Вазорати маориф ва илми Ҷумҳурии Тоҷикистон татбиқ гашта истодааст.
12
18.04.2025 -
Ҳамкории Иттиҳоди Аврупо ва ҷонибҳои манфиатдори миллӣ барои беҳтарсозии сиёсатҳои бозори меҳнат дар асоси далелҳо Як семинари муҳими миллӣ дар доираи барномаи маблағгузоришудаи Иттиҳоди Аврупо таҳти унвони «Дастгирӣ дар соҳаҳои маориф ва меҳнати Ҷумҳурии Тоҷикистон» рӯзи 17 апрели соли 2025 дар шаҳри Душанбе баргузор гардид. Ин чорабинӣ мутахассисон, таҳиягарони сиёсати давлатӣ ва шарикони муассисавиро барои пешбурди дурнамоии малакаҳо ва мутобиқсозии сиёсати бозори меҳнат дар кишвар ҷамъ овард. Семинари дуюми миллӣ таҳти унвони «Пешбинии малакаҳо: баррасӣ ва тасдиқ» ҳамчун платформаи ҳамкорӣ барои баррасии натиҷаҳои таҳқиқот, тасдиқи афзалиятҳои соҳаҳо ва банақшагирии стратегияҳои ояндабин барои рушди нерӯи корӣ дар Тоҷикистон хизмат кард. Чорабинӣ таҳти роҳбарии муштараки ҷаноби Лоиқҷон Миров, коршиноси калони миллӣ оид ба бозори меҳнат ва хонум Клеофе МС Гуардигли, коршиноси калони байналмилалӣ оид ба бозори меҳнат сурат гирифт. Намояндагони Вазорати меҳнат, муҳоҷират ва шуғли аҳолӣ, аз ҷумла муассисаҳои тобеи он, Вазорати рушди иқтисод ва савдо, ва Агентии омор назди Президенти Ҷумҳурии Тоҷикистон фаъолона ширкат варзиданд. Ҳузури хонум Диана Димова, мудири барномаи Намояндагии Иттиҳоди Аврупо дар Ҷумҳурии Тоҷикистон, дастгирии доимии ИА-ро аз таҳияи сиёсати далеласос ва рушди институтсионалӣ боз ҳам таъкид намуд. Ҳадафҳои семинар иборат буданд аз: • Роҳандозии муколама оид ба воситаҳои пешгӯии малакаҳо ва воридсозии онҳо ба низоми миллии банақшагирӣ; • Пешниҳоди натиҷаҳои Платформаи Делфи: • Муайян намудани соҳаҳои калидӣ барои таҳлили амиқтар дар марҳилаи ояндаи лоиҳа;
16
17.04.2025 -
СУПОРИДАНИ МАВОДИ ҒИЗОИ МАКТАБӢ ДАР ДОИРАИ БАРНОМАИ ҒИЗОИ МАКТАБӢ 8 апрели соли 2025 дар деҳаи Навободи ноҳияи Рӯдакӣ дар доираи “Барномаи давлатии рушди ғизои мактабӣ барои солҳои 2022-2027” маросими супоридани маводи ғизои мактабӣ баргузор гардид. Дар чорабинии мазкур муовини вазири маориф ва илми Ҷумҳурии Тоҷикистон Музаффарзода Бадриддин, мушовир – фиристодаи Сафорати Федератсияи Россия дар Тоҷикистон Вера Валеревна Хуторская, намоянда ва директори Барномаи озуқавории ҷаҳонии СММ дар Ҷумҳурии Тоҷикистон Адҳам Мусаллам, инчунин намояндагони муассисаҳои дахлдор иштирок намуданд. Муовини вазири маориф ва илм изҳор дошт, ки ҳамкориҳои судманд миёни Ҷумҳурии Тоҷикистон, Федератсияи Россия ва Барномаи озуқавории ҷаҳонии Созмони Милали Муттаҳид самти муҳим ва устувори сиёсати иҷтимоии давлатро ташкил медиҳанд. Ӯ ҳамзамон таъкид намуд, ки таъмини амнияти озуқаворӣ ва дастрасии аҳолӣ ба маводи хушсифати ғизоӣ яке аз ҳадафҳои стратегии Ҳукумати Ҷумҳурии Тоҷикистон маҳсуб ёфта, барои расидан ба он пайваста тадбирҳои муассир роҳандозӣ мегарданд. Сипас, Вера Валеревна иброз намуд, ки ҳамкориҳои самарабахш миёни Федератсияи Россия ва Ҷумҳурии Тоҷикистон дар соҳаи таъмини амнияти озуқаворӣ ва рушди маориф таҳкими муносибатҳои дуҷониба ва байналмилалӣ мебошанд. Мавсуф афзуд, ки рушди ғизои мактабӣ ва дастрасии оқилона ва дуруст ба ғизои солим як изҳори масъулиятнокии давлати Россия ва ҷонибдории устувори лоиҳаҳои муҳим ва стратегии озуқаворӣ мебошад. Ҳамчунин, Адҳам Мусаллам таъкид кард, ки Барномаи озуқавории ҷаҳонӣ ба дастгирии кишварҳо, аз ҷумла Тоҷикистон, барои таъмини амнияти озуқаворӣ ва беҳтар кардани шароити ғизоии мактаббачагон идома медиҳад. Амалӣ кардани чунин барномаҳо барои рушди сармояи инсонӣ ва баланд бардоштани сифати зиндагии ҷомеаҳо, махсусан кӯдакон, аҳамияти калон дорад ва дар таҳкими иртибототи мустаҳкам бо шарикон нақши муҳим мебозад. Бо зикри нақши муҳимми ғизои солим дар рушди миллӣ ва беҳдошти саломатии аҳолӣ, қайд гардид, ки аз соли 2022 бо дастгирии Ҳукумати Ҷумҳурии Тоҷикистон маблағгузорӣ аз ҳисоби буҷети давлатӣ барои ташкили ғизои гарм дар муассисаҳои таҳсилоти миёнаи умумӣ роҳандозӣ шудааст. Дар доираи Барномаи ғизои мактабӣ, ки бо мақсади таъмин кардани мактаббачагон бо ғизои солим ва хушсифат амалӣ мешавад, дар навбати аввал аз ҷониби Федератсияи Россия 270 тонна орди ғанигардонидашуда ба муассисаҳои таълимии кишвар фиристода мешавад. Маводҳои хӯрокворӣ дар рӯзҳои наздик ба муассисаҳои таҳсилоти миёнаи умумии ВМКБ, вилоятҳои Суғду Хатлон ва шаҳру ноҳияҳои тобеи ҷумҳурӣ дастрас карда мешаванд. Дар интиҳо муовини вазири маориф ва илм изҳор намуд, ки соҳаи ғизои мактабӣ яке аз самтҳои афзалиятноки иҷтимоии давлат ва Ҳукумати Ҷумҳурии Тоҷикистон ба шумор рафта, Вазорати маориф ва илм дар ҳамкорӣ бо Барномаи озуқавории ҷаҳонии СММ барои рушди устувори он тадбирҳои зарурӣ меандешад. Маркази матбуоти Вазорати маориф ва илми Ҷумҳурии Тоҷикистон
124
08.04.2025
