28.10.2025
Аз 24 то 28 октябри соли ҷорӣ гурӯҳи кории лоиҳаи «Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика (STEM)» бо мақсади густариши ҳамкорӣ ва гузаронидани корҳои фаҳмондадиҳиву иттилоотӣ ҷиҳати роҳандозӣ намудани Барномаи стипендиявӣ барои хонандагон (духтарон) ва донишҷӯдухтарони муассисаҳои таълимии ҳадафӣ, аз як қатор муассисаҳои таҳсилоти миёнаи умумии Вилояти Мухтори Кӯҳистони Бадахшон ва вилояти Хатлон боздид ба амал оварданд.
Дар доираи сафар кормандони лоиҳа аз муассисаҳои таълимии №2 шаҳри Хоруғ, №3 ноҳияи Муминобод, №8 шаҳри Кӯлоб, №4 ва №67 ноҳияи Данғара, №5 шаҳри Норак, №19 ноҳияи Мир Сайид Алии Ҳамадонӣ ва №16 ноҳияи Восеъ боздид намуда, бо омӯзгорон, волидон ва хонандагон вохӯриҳои судманд баргузор карданд.
Зимни ин сафарҳо корҳои фаҳмондадиҳӣ оид ба ташкили комиссияҳои интихоби гирандагони стипендия, рафти ба роҳ мондани мониторинги барномаи стипендиявӣ, инчунин дигар фаъолиятҳои ба нақша гирифташуда амалӣ гардиданд.
Ҳадафи асосии пешниҳоди стипендияҳо ба хонандагон (духтарон) дар доираи лоиҳа - пешгирӣ аз тарки таҳсил, боло бурдани ҳавасмандии онҳо ба омӯзиш ва ҷалби бештари онҳо ба фанҳои табиӣ, технологӣ, муҳандисӣ ва математика мебошад.
Ин иқдом ба таҳкими донишу малакаҳои хонандагон дар соҳаҳои илмҳои дақиқ ва афзудани иштироки духтарон дар равандҳои инноватсионӣ мусоидат мекунад.
Амалӣ шудани чунин барномаҳо дар муассисаҳои таҳсилоти миёна имконият медиҳад, ки муҳити таълимӣ дар кишвар муосиртар гардад, хонандагон ба таҳсилоти босифат бештар дастрасӣ пайдо кунанд ва саҳми духтарон дар рушди илм ва технология зиёдтар шавад.
Хабарҳои дигар
-
ИШТИРОКИ НАМОЯНДАГОНИ ЛОИҲАИ STEM ДАР 11-УМИН ФОРУМИ БАЙНАЛМИЛАЛИИ ТАҲСИЛОТ ВА МАҲОРАТҲО Бонки Осиёии Рушд (ADB) дар идораи марказии худ дар шаҳри Манила “11-умин Форуми Байналмилалии таҳсилот ва маҳоратҳо”-ро таҳти шиори рамзии «Нигоҳи нав ба иқтидори сармояи инсонӣ» баргузор менамояд. Ин ҳамоиши бузург, ки ҳамасола таваҷҷуҳи аҳли маориф ва сиёсатмадоронро ба худ ҷалб мекунад, имсол низ ба майдони мубодилаи андешаҳо ва пешниҳодҳои созанда табдил хоҳад ёфт. Форум намояндагони сатҳи баланд, вазирон, коршиносони байналмилалӣ ва роҳбарони соҳаи маорифро аз кишварҳои гуногуни минтақаи Осиё ва Уқёнуси Ором гирд меорад. Дар меҳвари баҳсҳо масъалаҳои калидии рӯз, аз рақамикунонии низоми таълим ва густариши технологияҳои муосир то маҳоратҳои сабз, устуворӣ ва омодагии наслҳои оянда ба бозори меҳнат қарор хоҳанд гирифт. Барномаи ҳамоиш роҳи бознигарӣ, таҳким ва ояндасозии низоми таълимиро аз се самти калидӣ, мавзуъҳо, стандартҳо ва зинаҳои таҳсил фаро мегирад. Ин қолаб имкон медиҳад, ки муҳокимаҳoи форум ҳам заминаи назариявӣ ва ҳам дурнамои амалӣ дошта бошанд. Дар қатори меҳмонон аз дигар давлатҳо, Ҷумҳурии Тоҷикистон низ бо ҳайати корӣ ҳузур дорад. Аз ҷумла, муовини якуми вазири маориф ва илми Ҷумҳуриии Тоҷикистон Ҳошимзода Ҳомид Ҳасан ва менеҷери лоиҳаи «Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика (STEM)» Абдулмаҷид Бобохон дар кори форум ширкат меварзанд. Ҳайати Тоҷикистон ҳозиринро бо таҷрибаи кишвари мо дар таҳкими пойгоҳи инфрасохтории омӯзиши фанҳои дақиқ, такмили маҳорати омӯзгорон ва боло бурдани сатҳи малакаи хонандагон дар доираи ислоҳоти таълимӣ шинос хоҳад кард. Натиҷаҳои форум барои кишварҳои иштирокчӣ самти тозае дар таҳияи сиёсати таълимӣ ва сармоягузориҳои стратегӣ хоҳад кушод, то низоми маориф тавонад ба талаботи ҷаҳони муосир ва ниёзҳои рӯзмарраи ҷомеа посухи шоиста диҳад.
65
03.12.2025 -
БАРГУЗОРИИ ТРЕНИНГ БО ИШТИРОКИ ШИРКАТҲОИ СОХТМОНӢ 28 ноябри соли 2025 дар толори тренингии Гурӯҳи идоракунии лоиҳаи «Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика» аз ҷониби кормандони лоиҳа марҳилаи дуюми тренинг оид ба коҳиш додани хатарҳои марбут ба истисмори шаҳвонӣ, зӯроварӣ ва озори ҷинсӣ ва вокуниш ба шикоятҳо, ҳифзи иҷтимоӣ, масъалаҳои муҳофизатӣ ва фаъолиятҳои гендерӣ барои ширкатҳои сохтмонии дар раванди тендер ғолибгашта доир гардид. Тренинг дар доираи бастаи хариди CW01 - сохтмони биноҳои иловагӣ бо озмоишгоҳҳои замонавӣ дар назди муассисаҳои таҳсилоти миёнаи умумии №35 Ваҳдат, №8 Кӯлоб, №3 Муъминобод ва №4 Данғара гузаронида шуд. Дар тренинги мазкур 13 намоянда аз 2 ширкатҳои сохтмонӣ, аз ҷумла ҶДММ “Дашти Гулҳо”, ҶДММ “Фаридун” ва аз ширкат оид ба тарроҳӣ ва назорати корҳои сохтмонӣ ҶДММ “Мусаввир” иштирок намуданд. Ҳамзамон, дар рафти баргузории тренинг намояндагони раёсати сохтмони асосии назди Вазорати маориф ва илми Ҷумҳурии Тоҷикистон ва лоиҳаи STEM низ иштирок намуданд. Тибқи барнома дар тренинг аз ҷониби кормандони масъули лоиҳа ба иштирокчиёни тренинг муаррифиҳо оид ба шарҳи умумии истисмори шаҳвонӣ, зӯроварӣ ва озори ҷинсӣ дар доираи лоиҳаҳои аз ҷониби БОР маблағгузоришуда, шарҳи умумии Нақшаи амали ИШЗОҶ, хатарҳои ИШЗОҶ ва вокуниш ба ИШЗОҶ, таъмини риояи кафолатҳои экологӣ ва иҷтимоии БОР ва фаъолиятҳои гендерӣ ҳангоми татбиқи лоиҳаи STEM ва уҳдадориҳои пудратчиён дар марҳилаи сохтмон пешниҳод карда шуд. Ҳамзамон, дар чорабинии болозикр намояндаи Бонки Осиёии Рушд низ иштирок ва суханронӣ намуд.
78
28.11.2025 -
ТАҶЛИЛИ РӮЗИ ПАРЧАМИ ДАВЛАТӢ ДАР ДАФТАРИ КОРИИ ГУРӮҲИ ИДОРАКУНИИ ЛОИҲАИ STEM Дар дафтари кории Гурӯҳи идоракунии лоиҳаи “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика (STEM)” бахшида ба Рӯзи Парчами давлатии Ҷумҳурии Тоҷикистон чорабинии идона баргузор гардид. Чорабинӣ бо садо додани Суруди миллӣ оғоз шуда, суханони табрикотии Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон шунида шуд. Сипас, чорабиниро роҳбари лоиҳа Абдулмаҷид Бобохон бо сухани табрикӣ идома дода, Парчами давлатии Тоҷикистонро рамзи Истиқлол, ваҳдати миллӣ, худшиносии миллӣ ва шиносномаи давлатдории муосири тоҷикон номид. Қайд шуд, ки парчам ҳамчун рамзи ягонагӣ ва пешравии миллат моро ба эҳсоси масъулият, меҳнатдӯстӣ ва талош барои рушду пешрафти соҳаҳои гуногун, аз ҷумла, маориф, даъват мекунад. Дар идомаи ҳамоиш ҳуқуқшиноси лоиҳа Сафарзода Беҳрӯз оид ба таърихи рамзҳои давлатӣ, аз ҷумла Парчам суханронӣ намуд. Дар анҷом, кормандон бо аксбардории рамзӣ ва мубодилаи суханони табрикотӣ чорабиниро ҷамъбаст карданд. Рӯзи Парчами давлатӣ ба ҳайати лоиҳа рӯҳияи тоза бахшида, онҳоро барои идомаи фаъолияти созанда дар роҳи рушди соҳаи маориф ҳидоят намуд.
188
24.11.2025
