26.08.2025
Дар тамоми муассисаҳои таълимии шаҳри Гулистон давраи мутобиқшавии хонандагони синфи якум идома дорад. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Гулистон иттилоъ доданд.
Давраи мутобиқшавии хонандагони синфи якум бо мақсади амалӣ намудани фармоиши Вазири маориф ва илми Ҷумҳурии Тоҷикистон оид ба татбиқи «Барномаи давраи мутобиқшавии хонандагони синфи якум ба муҳити муассисаи таьлимӣ дар соли таҳсили 2025-2026» гузаронида мешавад.
Бояд гуфт, ки давраи мутобиқшавии хонандагони синфи якум ба муҳити муассисаи таълимӣ яке аз давраҳои муҳими таҳсил ба ҳисоб меравад. Ин давра барои хонандагони ин синн лаҳзаҳои озмоишии душвор мебошад, зеро онҳо аз муҳити кӯдакистон ё хонавода якбора ба муҳити дигари иҷтимоӣ, ки тартибу низоми нисбатан дигар дорад, ворид мегарданд. Бо гузаронидани ин давра хонандагони синфи якум ҳарчи зудтар ва ба осонӣ ба муҳити нав мутобиқ мешаванд.
Хабарҳои дигар
-
Дар Нуробод бинои Муассисаи таҳсилоти умумӣ бо 288 ҷой дар ду баст ифтитоҳ шуд Дар доираи сафари Президенти Ҷумҳурии Тоҷикистон муҳтарам Эмомалӣ Раҳмон ба водии Рашт дар ноҳияи Нуробод бинои Муассисаи таҳсилоти миёнаи умумии №32-и деҳаи Душохазамини Ҷамоати деҳоти Меҳробод барои 288 ҷой дар ду баст ба истифода дода шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Нуробод хабар медиҳад. Бинои нав бо саҳми аҳолӣ ва дастгирии Ҳукумати Ҷумҳурии Тоҷикистон бунёд гардида, дорои синфхонаҳои барҳаво, озмоишгоҳҳои фаннӣ, китобхона, ҳуҷраҳои омӯзгорон ва дигар иншооти ёрирасон мебошад. Он бо таҷҳизоти таълимии муосир таъмин гардида, ба меъёрҳои имрӯзаи соҳаи маориф ҷавобгӯ аст. Дар ин рӯз бо саҳми соҳибкорони маҳаллӣ дар назди Муассисаи таҳсилоти миёнаи умумии №3-и деҳаи Лайрони Ҷамоати деҳоти Ҳакимӣ бинои иловагӣ барои 288 ҷой дар ду баст бунёд ва мавриди истифода қарор дода шуд. Ифтитоҳи иншооти мазкур шароити таҳсилро барои хонандагон чанд маротиба беҳтар намуда, имконияти муассиса ба талаботи замони муосир мутобиқ гардонида шуд. Ин иқдом боз як далели равшани таваҷҷуҳи давлату Ҳукумати мамлакат ва саҳми соҳибкорони ватандӯст дар рушди соҳаи маориф мебошад. Зимни ифтитоҳи бинои иловагӣ омӯзгорон ва хонандагони муассиса изҳори миннатдорӣ намуда, таъкид карданд, ки ғамхориҳои Пешвои миллат нисбат ба соҳаи маориф онҳоро водор месозад, ки бо ҳисси баланди ватандӯстӣ ва масъулият ба таҳсилу тарбия машғул гардида, дар рушду пешрафти Тоҷикистон саҳми арзанда гузоранд. Ифтитоҳи ин муассисаи таълимӣ натиҷаи ҳамкории самараноки давлат ва мардум буда, далели равшани ғамхории пайваста нисбат ба соҳаи маориф ва тарбияи насли ояндасоз мебошад. Ҳамзамон дар доираи сафари Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Нуробод муассисаи таълимии томактабӣ барои 40 кӯдак ба истифода дода шуд. Омӯзгорон ва волидайн иброз намуданд, ки ифтитоҳи чунин муассисаҳои муосири томактабӣ қадами муҳим дар самти баланд бардоштани сатҳу сифати таълиму тарбияи кӯдакон мебошад. Онҳо барои таваҷҷуҳу дастгириҳои доимии Пешвои миллат ва саҳми арзандаи соҳибкорони маҳаллӣ изҳори миннатдорӣ карданд.
7
29.08.2025 -
Дар Ҷамоати деҳоти Қаратоғ бинои иловагии таълимӣ, кӯдакистон ва толори варзишӣ ба истифода дода мешавад Ба ифтихори ҷашни 34-солагии Истиқлоли давлатии Ҷумҳурии Тоҷикистон дар Ҷамоати деҳоти Қаратоғи шаҳри Турсунзода муассисаи томактабии хусусӣ бо номи «Олами афсона» мавриди истифода қарор дода мешавад. Дар ин хусус раиси Ҷамоати деҳоти Қаратоғи шаҳри Турсунзода Усмоналӣ Қодирзода ба хабарнигори минтақавии АМИТ «Ховар» Субҳониддини Маҳмуд иттилоъ дод. Кӯдакистон бо беҳтарин шароит бунёд гардида, дар он ошхонаи замонавӣ, ҳуҷраҳои хоби кӯдакон бо катҳои хоб ва дигар имконияти маишӣ муҳайё гардидааст. Дар ин ҷо 80 нафар кӯдакон ба таълиму тарбия фаро гирифта мешаванд. Тибқи иттилои масъулини Ҷамоати деҳоти Қаратоғ, дар арафаи ҷашни 34-солагии Истиқлоли давлатӣ дар ҷамоат 9 иншоот, аз қабили биноҳои иловагӣ дар назди муассисаҳои таълимии №95, №102, №36, №91, №44, №90 бо теъдоди 42 синфхона ба истифода дода мешавад. Дар онҳо барои 1050 хонанда дар як баст ҷойи нишаст муҳайё карда мешавад. Ҳамчунин дар назди Муассисаи таҳсилоти миёнаи умумии №36-и деҳаи Шурхок кӯдакистон барои 30 нафар ва дар деҳаи Имоми Аъзам толори варзишӣ мавриди истифода қарор дода мешавад. Баъди ба истифода додани биноҳои иловагии муассисаҳои таълимӣ мушкилоти ҷойи нишаст бартараф мегардад.
15
27.08.2025 -
Аз аввали соли таҳсил маоши вазифавии кормандони соҳаи маориф 30 фоиз зиёд карда мешавад Аз аввали соли таҳсили 2025-2026 маоши вазифавии кормандони муассисаҳои томактабӣ ва таҳсилоти миёнаи умумии соҳаи маориф 30 фоиз зиёд карда мешавад. Дар солҳои соҳибистиқлолӣ музди меҳнати кормандони соҳаи маориф 21 маротиба аст, ки баланд бардошта мешавад. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон масъалаи баланд бардоштани сатҳу сифати зиндагии аҳолиро яке аз афзалияти аввалиндараҷаи сиёсати иқтисодию иҷтимоии давлат муайян намудаанд. 8 феврали соли 2025 фармони Президенти Ҷумҳурии Тоҷикистон «Дар бораи тадбирҳои тақвият бахшидани сатҳи ҳифзи иҷтимоии аҳолӣ, зиёд намудани маоши амалкунандаи вазифавии хизматчиёни давлатӣ, кормандони ташкилотҳои буҷетӣ, андозаи нафақа ва стипендия» ба тасвиб расид. Тибқи ин фармон, маоши вазифавии кормандони муассисаҳои томактабӣ ва таҳсилоти миёнаи умумии соҳаи маориф 30 фоиз зиёд карда мешавад. Маоши вазифавии кормандони дигар муассисаҳои соҳаи маориф, аз ҷумла муассисаҳои таҳсилоти ибтидоӣ, миёна ва олии касбӣ, мактабҳои махсуси варзишӣ, донишкадаю марказҳои такмили ихтисос ва дигар муассисаҳои соҳаи маориф ва муассисаҳои илмӣ ба андозаи 20 фоиз зиёд карда мешавад. Тавре Сарвари давлат 1 сентябри соли 2024 зимни суханронӣ таъкид намуданд, «Давлату Ҳукумати мамлакат аз рӯзҳои аввали соҳибистиқлолӣ ба масъалаи беҳтар кардани вазъи зиндагӣ ва фаъолияти омӯзгорон таваҷҷуҳи доимӣ зоҳир карда, барои онҳо дар санадҳои қонунгузорӣ якчанд имтиёз муқаррар намудааст». Ҳамчунин иброз доштанд, ки «мо вазифадор ҳастем, ки омӯзгорон ва дигар кормандони муассисаҳои таълимиро боз ҳам бештар дастгирӣ кунем ва манзалату обрӯи онҳоро дар ҷомеа баланд бардорем». Бояд гуфт, ки ин иқдом бо мақсади боз ҳам беҳтар намудани вазъи иҷтимоии омӯзгорон ва баланд бардоштани мақоми онҳо дар ҷомеа амалӣ мегардад. Муовини Вазири маориф ва илми Ҷумҳурии Тоҷикистон Бадриддин Музаффарзода 28 июли соли 2025 зимни нишасти матбуотӣ иброз намуд, ки омӯзгорон вобаста ба дараҷаи маълумот аз 1 ҳазору 702 то 2 ҳазору 699 сомонӣ маош хоҳанд гирифт. Музди меҳнати омӯзгорони синфҳои 1-4 ва 5-11 вобаста ба дараҷаи маълумоти онҳо фарқ мекунад. «Омӯзгорони синфҳои 1-4 вобаста ба дараҷаи маълумот аз 1 ҳазору 702 сомонӣ то 2 ҳазору 699 сомонӣ маош мегиранд. Маоши вазифавии омӯзгорони синфҳои 5-11 аз 1 ҳазору 232 сомонӣ то 1 ҳазору 907 сомониро ташкил хоҳад дод. Ин танҳо барои як воҳиди корӣ буда, инчунин баъди гирифтани дараҷа маоши муаллимон баланд карда мешавад ва барои роҳбари синф будан ҳам маоши иловагӣ мегиранд. Масалан, маоши омӯзгори синфҳои 1-4, ки дараҷаи олӣ дорад, аз моҳи сентябр 3 ҳазору 563 сомонӣ мешавад»,-гуфт Бадриддин Музаффарзода. Бо дастгирии Ҳукумати мамлакат барои баланд бардоштани мақоми омӯзгор дар ҷомеа, бартараф намудани норасоии кадрӣ, таъмини шароити созгор барои маорифчиён ва баланд бардоштани савияи дониши хонандагон кӯшиши зиёд ба харҷ дода мешавад. Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олии Ҷумҳурии Тоҷикистон 23 декабри соли 2022 арҷу эҳтиром нисбат ба омӯзгорро аз ҷумлаи масъалаҳои муҳим номиданд. «Мо мактабро ба ҳайси боргоҳи илму дониш, саводу маърифат ва омӯзгорро чун шахси мафкурасозу тарбиятгари насли наврас эътироф карда, ба онҳо арҷу эҳтиром гузоштанро аз ҷумлаи масъалаҳои муҳимтарин медонем», — иброз доштанд Сарвари давлат
18
26.08.2025
