05.08.2026
5 августи соли 2026 дар Донишкадаи ҷумҳуриявии такмили ихтисос ва бозомӯзии кормандони соҳаи маориф ҷаласаи корӣ таҳти раёсати муовини вазири маориф ва илми Ҷумҳурии Тоҷикистон Илҳомуддин Иброҳимзода баргузор гардид.
Дар ҷаласа сардорони воҳидҳои сохтории Вазорати маориф ва илм, роҳбарону намояндагони муассисаҳои таҳсилоти олии касбӣ ба таври ҳузурӣ ва маҷозӣ иштирок намуданд.
Муовини вазири маориф ва илм зимни суханронӣ таъкид намуд, ки соҳаи маориф таҳти таваҷҷуҳи доимии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, татбиқи саривақтии дастуру супоришҳои роҳбарияти олии мамлакат, баланд бардоштани сифати таҳсилот ва омодагии ҳамаҷониба ба соли нави таҳсил аз вазифаҳои афзалиятноки соҳа мебошанд.
Дар ҷаласа масъалаҳои омодагии муассисаҳои таҳсилоти олии касбӣ ба соли нави таҳсил, иҷрои нақшаи қабули донишҷӯён пас аз тақсимоти Маркази миллии тестӣ, таҷдиди Стандарти давлатии таҳсилоти олии касбӣ ва нақшаву барномаҳои таълимӣ, омода намудани омӯзгорони самти илмҳои табиатшиносӣ, дақиқ ва риёзӣ, таъсиси ихтисосҳо дар самти зеҳни сунъӣ, технологияҳои иттилоотӣ ва низоми дуалии таҳсил, рушди аккредитатсияи байналмилалӣ, густариши ҳамкориҳои байналмилалӣ ва ҷалби донорҳо, тарбияи идеологӣ, татбиқи барномаҳои фарҳангӣ, инчунин иҷрои қарори ҳайати мушовараи Вазорати маориф ва илми Ҷумҳурии Тоҷикистон аз 14 июли соли 2026, №10 «Оид ба ҷамъбасти фаъолияти Вазорати маориф ва илми Ҷумҳурии Тоҷикистон дар нимсолаи якуми соли 2026 ва вазифаҳо то охири сол» мавриди баррасӣ қарор гирифтанд.
Ҳамзамон, иштирокчиён бо омодагии Донишкадаи ҷумҳуриявии такмили ихтисос ва бозомӯзии кормандони соҳаи маориф барои оғози курсҳои такмили ихтисос шинос гардида, аз синфхонаҳо ва маҷмӯи маводи таълимӣ боздид намуданд. Зикр гардид, ки тамоми маводи таълимӣ мутобиқ ба талаботи муосир таҳия гардида, ҳам дар шакли электронӣ ва ҳам чопӣ омода мебошад.
Ректори донишкада Н. Мирзозода зимни муаррифии маҷмӯи маводи таълимӣ иброз дошт, ки аз 10 августи соли 2026 курсҳои такмили ихтисос бо истифода аз низоми модулӣ оғоз гардида, барои ҳамаи шунавандагон маводи таълимӣ пешакӣ омода шудааст. Ба гуфтаи ӯ, Донишкада ва филиалҳои он барои қабули шунавандагон пурра омода буда, таҷрибаи ҷорӣ намудани таҳсилоти ба салоҳият асосёфтаро минбаъд низ густариш хоҳанд дод.
Дар анҷоми ҷаласа ба роҳбарони воҳидҳои сохторӣ ва муассисаҳои таҳсилоти олии касбӣ ҷиҳати иҷрои саривақтии вазифаҳои гузошташуда, таъмини омодагии босифат ба соли нави таҳсил ва татбиқи пурраи дастуру супоришҳои роҳбарияти олии мамлакат супоришҳои мушаххас дода шуданд.
Хабарҳои дигар
-
ХОНАНДАГОНИ ТОҶИК ДАР ОЛИМПИАДАИ БАЙНАЛМИЛАЛИИ ЗЕҲНИ СУНЪӢ СОҲИБИ ДУ МЕДАЛ ШУДАНД Аз 2 то 8 августи соли 2026 дар шаҳри Остонаи Ҷумҳурии Қазоқистон Олимпиадаи сеюми байналмилалӣ аз фанни зеҳни сунъӣ - International Olympiad in Artificial Intelligence (IOAI-2026) баргузор гардид. Дар ин чорабинии бонуфузи илмӣ беш аз 500 нафар хонандагони болаёқат аз 106 кишвари ҷаҳон иштирок намуда, донишу маҳорати худро дар самтҳои муосири зеҳни сунъӣ, омӯзиши мошинӣ, таҳияи моделҳои рақамӣ, ҳалли масъалаҳои алгоритмӣ ва барномасозии роботҳои худмухтор санҷиданд. Олимпиадаи байналмилалии зеҳни сунъӣ яке аз мусобиқаҳои сатҳи баланди илмӣ барои хонандагони муассисаҳои таҳсилоти миёна ба ҳисоб рафта, таҳти сарпарастии Созмони Милали Муттаҳид оид ба масъалаҳои маориф, илм ва фарҳанг - ЮНЕСКО баргузор гардид. Дар маросими ифтитоҳи олимпиада Президенти Ҷумҳурии Қазоқистон муҳтарам Қосим-Жомарт Тоқаев иштирок ва суханронӣ намуда, мусобиқаро расман ифтитоҳ кард. Сарвари давлати Қазоқистон зимни суханронӣ ба нақши рӯзафзуни зеҳни сунъӣ дар рушди иқтисод, маориф, илм, идоракунии давлатӣ ва дигар бахшҳои ҳаёти ҷомеа таъкид намуд. Ҷумҳурии Тоҷикистонро дар ин олимпиадаи сатҳи ҷаҳонӣ чаҳор нафар хонандаи болаёқат намояндагӣ карданд: - Синан Кандиков, хонандаи синфи 10-уми муассисаи таълимии ба номи Абдуфаттоҳ Ҳотамов; - Диловар Икромов, хонандаи синфи 10-уми муассисаи таълимии ба номи Абдуфаттоҳ Ҳотамов; - Фарангис Ҳаётова, хонандаи синфи 10-уми Литсейи президентӣ барои хонандагони болаёқати Ҷумҳурии Тоҷикистон; - Муродҷон Хайраков, хатмкардаи Литсейи президентӣ барои хонандагони болаёқати Ҷумҳурии Тоҷикистон. Хонандагони тоҷик дар рақобат бо беҳтарин наврасони ҷаҳон донишу маҳорати баланд нишон дода, дар маҷмӯъ соҳиби ду медал гардиданд. Ин дастовард барои дастаи Тоҷикистон, ки бори аввал дар Олимпиадаи байналмилалии зеҳни сунъӣ иштирок намуд, натиҷаи назаррас ва ифтихорофарин ба ҳисоб меравад. Омодасозии аъзои дастаи Тоҷикистон ба ин мусобиқа аз ҷониби Вазорати маориф ва илми Ҷумҳурии Тоҷикистон дар ҳамкорӣ бо ширкати zypl.ai ба роҳ монда шуд. Дар доираи ин ҳамкорӣ хонандагон аз машғулиятҳои махсуси назариявию амалӣ гузашта, барои иҷрои масъалаҳои сатҳи байналмилалӣ дар самтҳои зеҳни сунъӣ ва барномасозӣ омода гардиданд. Ҳамчунин, сафари ҳайати Тоҷикистон ба шаҳри Остона ва иштироки онҳо дар олимпиада таъмин карда шуд. Натиҷаи бадастомада аз имкониятҳои баланди зеҳнии наврасони тоҷик шаҳодат дода, самараи тадбирҳои андешидашуда дар самти рушди таҳсилоти рақамӣ, омӯзиши технологияҳои муосир ва дастгирии хонандагони болаёқат мебошад. Вазорати маориф ва илми Ҷумҳурии Тоҷикистон минбаъд низ барои дарёфт, дастгирӣ ва омода намудани наврасони соҳибистеъдод ба олимпиадаву озмунҳои байналмилалӣ, бахусус дар самтҳои зеҳни сунъӣ, технологияҳои иттилоотӣ ва барномасозӣ, тадбирҳои заруриро амалӣ менамояд. Дастоварди дастаи Тоҷикистон дар IOAI-2026 қадами муҳим дар роҳи муаррифии неруи зеҳнӣ ва имкониятҳои илмии насли ҷавони кишвар дар арсаи байналмилалӣ мебошад.
36
10.08.2026 -
СЕМИНАРҲОИ ОМӮЗИШИЮ ФАҲМОНДАДИҲӢ ОИД БА ТАРТИБИ КОР БО ПОРТАЛИ ЭЛЕКТРОНИИ ОЗМУНИ ҶУМҲУРИЯВИИ «ИЛМ-ФУРӮҒИ МАЪРИФАТ» Бо мақсади иҷрои талаботи Амри Президенти Ҷумҳурии Тоҷикистон аз 1 январи соли 2026, №АП-950 ва ҷиҳати омодагии ҳамаҷониба ба Озмуни ҷумҳуриявии «Илм-фурӯғи маърифат» барои котибони масъули комиссияҳои қабули ҳуҷҷатҳои довталабон дар шаҳру ноҳияҳои ҷумҳурӣ семинарҳои омӯзишию фаҳмондадиҳӣ баргузор гардид. Семинарҳои мазкур аз ҷониби намояндагони Вазорати маориф ва илми Ҷумҳурии Тоҷикистон - А. Раҳмонзода, сардори раёсати илм ва инноватсия ва Қ. Фатҳуллозода, сармутахассиси раёсати таҳсилоти олии касбӣ ва баъдидипломӣ гузаронида шуданд. Ҳадафи асосии баргузории семинарҳои омӯзишӣ баланд бардоштани сатҳи омодагии масъулон, такмили малакаи кор бо Портали электронии озмуни ҷумҳуриявии «Илм-фурӯғи маърифат» ва таъмини дурусту шаффофи раванди бақайдгирӣ ва ҳуҷҷатгузории иштирокчиёни озмун мебошад. Дар ҷараёни семинарҳо ба иштирокчиён тартиби бақайдгирии довталабон, ворид намудани маълумот, қабулу санҷиши ҳуҷҷатҳои зарурӣ, истифодаи дурусти имкониятҳои Портали электронӣ ва талаботи марбут ба ҳуҷҷатгузории иштирокчиёни озмун ба таври муфассал шарҳу тавзеҳ дода шуд. Ҳамчунин, ба директорони Марказҳои дарёфт ва рушди истеъдодҳои шаҳру ноҳияҳо оид ба дуруст ва сари вақт ворид намудани маълумот, риояи талаботи ҳуҷҷатгузорӣ, пешгирии хатогиҳо ҳангоми бақайдгирӣ ва масъулияти шахсони масъул ҳангоми кор бо Портали электронӣ тавсияҳои мушаххас пешниҳод гардид. Дар доираи семинарҳо масъалаҳои вобаста ба роҳандозии дурусти раванди қабули ҳуҷҷатҳо, санҷиши маълумоти воридшаванда ва таъмини ҳамоҳангии фаъолияти комиссияҳои қабул мавриди баррасӣ қарор гирифтанд. Бояд таъкид намуд, ки ба ҳар як шаҳру ноҳия се нусхагӣ Дастури раҳнамо оид ба омодагии довталабони Озмуни ҷумҳуриявии «Илм-фурӯғи маърифат» тариқи ройгон дастрас карда шуд. Баргузории чунин семинарҳои омӯзишию фаҳмондадиҳӣ қадами муҳим дар самти баланд бардоштани сатҳи омодагии масъулон, таъмини шаффофият ва сифатнокии раванди бақайдгирӣ, инчунин, фароҳам овардани шароити мусоид барои иштироки васеи хонандагони болаёқат дар Озмуни ҷумҳуриявии «Илм-фурӯғи маърифат» ба ҳисоб меравад. Дар фарҷоми семинарҳо таъкид гардид, ки барои дар сатҳи баланди ташкилӣ ва омодагӣ баргузор намудани даври сеюми озмун, дарёфти истеъдодҳои наврасу ҷавон ва фароҳам овардани имкониятҳои муносиб барои рушди қобилиятҳои зеҳнии онҳо, ҳамоҳангии фаъолияти масъулони соҳаи маориф ва Марказҳои дарёфт ва рушди истеъдодҳо аҳаммияти муҳим дорад. Ҳар як шахси масъул вазифадор аст, ки ба раванди омодагӣ, бақайдгирӣ ва ҳуҷҷатгузории довталабон бо масъулияти баланд муносибат намояд. Маркази матбуоти Вазорати маориф ва илми Ҷумҳурии Тоҷикистон
43
08.08.2026 -
ЧОРАБИНИИ ФАРҲАНГӢ-ФАРОҒАТИИ ДОНИШГОҲИ ТЕХНИКИИ ТОҶИКИСТОН БА МУНОСИБАТИ 35-СОЛАГИИ ИСТИҚЛОЛИ ДАВЛАТӢ Ба муносибати 35-солагии Истиқлоли давлатии Ҷумҳурии Тоҷикистон дар Боғи фарҳангии «Устод Рӯдакӣ» чорабинии фарҳангӣ-фароғатии Донишгоҳи техникии Тоҷикистон ба номи академик М.С. Осимӣ баргузор гардид. Чорабинӣ бо мақсади дар сатҳи баланди ташкилӣ таҷлил намудани ҷашни муқаддаси миллӣ, таҳкими ҳисси худшиносии миллӣ, ватандӯстӣ, арҷгузорӣ ба арзишҳои фарҳангиву маънавии миллӣ ва фароҳам овардани фазои солими фарҳангиву фароғатӣ барои устодону кормандон ва донишҷӯён баргузор шуд. Дар чорабинӣ роҳбарияти донишгоҳ, устодону кормандон, донишҷӯён ва дастаи ҳаваскорон иштирок намуда, барномаи рангини фарҳангиро пешкаши ҳозирин гардониданд. Дар доираи барнома суруду таронаҳои ватандӯстона, рақсу мусиқӣ ва дигар намоишҳои фарҳангӣ иҷро гардида, муҳаббат ба Ватан, эҳтиром ба арзишҳои миллӣ ва дастовардҳои даврони Истиқлоли давлатӣ васф карда шуданд. Таъкид гардид, ки баргузории чунин чорабиниҳо дар баланд бардоштани рӯҳияи ватандӯстии ҷавонон, таҳкими ҳисси ифтихори миллӣ ва муаррифии фарҳангу ҳунари тоҷик нақши муҳим дошта, барои сазовор истиқбол гирифтани ҷашни 35-солагии Истиқлоли давлатии Ҷумҳурии Тоҷикистон заминаи мусоид фароҳам меорад.
23
08.08.2026
