30.07.2025
30 июли соли 2025 таҳти раёсати вазири маориф ва илм Раҳим Саидзода ҷаласаи навбатии ҳайати мушовараи Вазорати маориф ва илми Ҷумҳурии Тоҷикистон баргузор гардид. Ҷаласа бо иштироки аъзои ҳайати мушовара, муовини якум, муовинони вазир, сардорони раёсату шуъбаҳои дастгоҳи марказӣ, роҳбарони муассисаҳои тобеъ ва ректорони муассисаҳои таҳсилоти олии касбӣ баргузор шуд.
Вазири маориф ва илм дар оғози ҷаласа таъкид намуд, ки соҳаи маориф ҳамеша дар маркази таваҷҷуҳи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, барои рушди ин соҳа дар кишвар шароити мусоид муҳайё карда шудааст. Гуфта шуд, ки дар солҳои охир барои баланд бардоштани сифати таълиму тарбия, беҳтар кардани инфрасохтори соҳа ва баланд бардоштани нуфузи омӯзгорон тадбирҳои мусбӣ амалӣ гардида истодааст.
Дар идома сардори раёсати таҳсилоти олии касбӣ ва баъдидипломӣ Ҳикматулло Саидзода вобаста ба натиҷаҳои комиссияи аттестатсияи хатм дар муассисаҳои таҳсилоти олии касбӣ барои соли таҳсили 2024-2025 гузориш пешниҳод намуда, таъкид дошт, ки замони муосир ва пешрафти илму техника тақозо менамояд, ки ҷиҳати тайёр намудани мутахассисони баландихтисос сифати таълиму тарбия дар муассисаҳои таълимӣ бояд пайваста боло равад ва он бояд ба талаботи таҳсилот дар кишварҳои пешрафта ва бозори меҳнати ватаниву ҷаҳонӣ ҷавобгӯ бошад. Дар ин радиф, аттестатсияи хатм ҳамчун марҳилаи хотимавии таҳсил ба ҳисоб рафта, мутобиқати мазмун, мундариҷа ва сатҳу сифати тайёрии хатмкунандагони муассисаҳои таҳсилоти олии касбиро ба талаботи Стандарти давлатии таҳсилот муқаррар менамояд.
Раиси ҷаласа зимни баррасии масъалаи мазкур иброз дошт, ки аттестатсияи хатм танҳо натиҷаи фаъолияти таълимии донишҷӯ набуда, балки аз фаъолияти тамоми кормандони муассисаҳои таҳсилоти олии касбиро дар раванди таълим натиҷагирӣ менамояд. Роҳбарияти муассисаҳои таҳсилоти олии касбиро зарур аст, ки барои холисона ва воқеъбинона баҳогузорӣ кардани сатҳи дониш ва ҷаҳонбинии донишҷӯён рафти баргузории аттестатсияи хатмро назорат намоянд.
Сипас, директори Маркази ҷумҳуриявии дарёфт ва рушди истеъдодҳо Муҳаммад Ғафорзода дар бораи лоиҳаи Низомномаи Озмуни “Хонандаи сол” ва Тартиби сафарбар намудани хонандагон ба олимпиадаҳои байналмилалӣ маълумот дод.
Дар идома директори Маркази таҳия, нашр ва муомилоти китобҳои дарсӣ, илмию методӣ Умед Ҳасанзода оид ба тасдиқи адабиёти таълимӣ барои муассисаҳои таҳсилоти умумӣ ва муассисаҳои таҳсилоти олии касбӣ гузориш пешниҳод намуд.
Дар ҷамъбасти ҷаласа, вазири маориф ва илм таъкид намуд, ки бояд дар доираи дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ҷиҳати беҳтар кардани фаъолияти муассисаҳои таълимӣ ва иҷрои Қонуни Ҷумҳурии Тоҷикистон «Дар бораи маориф» тадбирҳои зарурӣ амалӣ гарданд. Таъкид гардид, ки роҳбарони муассисаҳои таълимиро зарур аст, ки барои соли нави хониш ҳамаҷониба омодагӣ дида, атрофи муассисаҳоро тозаву озода намоянд.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
Маҷлиси Ҳукумати Ҷумҳурии Тоҷикистон 31 июл таҳти раёсати Президенти Ҷумҳурии Тоҷикистон, Пешвои миллат, Раиси Ҳукумати Ҷумҳурии Тоҷикистон муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид. Дар маҷлис, нахуст дар бораи Нақшаи амали Барномаи давлатии рушди муассисаҳои соҳаи маорифи вилояти Хатлон барои солҳои 2022-2027, дар марҳилаи дуюм солҳои 2025-2027 гузориши вазири маориф ва илми Ҷумҳурии Тоҷикистон Раҳим Саидзода шунида шуд. Аз ҷумла, таъкид гардид, ки лоиҳаи қарори Ҳукумати кишвар барои ҳалли мушкилоти ҷойи нишаст дар муассисаҳои таълимии вилояти Хатлон, аз байн бурдани биноҳои дар ҳолати садамавӣ қарордоштаи муассисаҳои таълимӣ ва фароҳам намудани шароити мусоиди таҳсил мебошад. Гуфта шуд, ки дар доираи лоиҳаи мазкур бунёди 165 бинои муассисаи таълимӣ барои 53 ҳазору 303 ҷойи нишаст ба маблағи умумии 957 миллиону 850 ҳазор сомонӣ пешбинӣ шудааст. Бо қарори Ҳукумати Ҷумҳурии Тоҷикистон Нақшаи амали Барномаи давлатии рушди муассисаҳои соҳаи маорифи вилояти Хатлон барои солҳои 2022-2027, дар марҳилаи дуюм солҳои 2025-2027 тасдиқ гардид. Сарвари давлат муҳтарам Эмомалӣ Раҳмон супориш доданд, ки сохторҳои марбута барои амалисозии нақшаи амали Барнома тадбирҳои зарурӣ андешида, ҳар сол ба Ҳукумати кишвар оид ба рафти амалишавии он маълумот пешниҳод намоянд. Ҳамчунин дастур дода шуд, ки раванди рақамикунонӣ ва гузаштан ба низоми электронии идораи соҳа ва таълиму тарбия тезонда шуда, ҳарчи зудтар ин тарзи корбарӣ роҳандозӣ гардад. Таъкид гардид, ки татбиқи барномаи ҳукумати электронӣ дар Ҷумҳурии Тоҷикистон низ дар ҳамаи соҳаҳо ҳарчи зудтар ва бо самар таъмин карда шавад. Дар кори маҷлис лоиҳаҳои қонунҳои Ҷумҳурии Тоҷикистон “Оид ба ворид намудани илова ба Кодекси ҳуқуқвайронкунии маъмурии Ҷумҳурии Тоҷикистон”, “Дар бораи мақоми омӯзгор”, “Оид ба ворид намудани тағйиру илова ба Қонуни Ҷумҳурии Тоҷикистон “Дар бораи маориф” ва “Оид ба ворид намудани тағйир ба Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ” маъқул дониста шуда, барои баррасӣ ба Маҷлиси намояндагони Маҷлиси Олии Ҷумҳурии Тоҷикистон ирсол карда шуд. Мақсад аз таҳияи лоиҳаи Қонуни Ҷумҳурии Тоҷикистон “Дар бораи мақоми омӯзгор” баланд бардоштани мақоми омӯзгор, ҳифзи шаъну шарафи ӯ, фароҳам намудани заминаҳои мусоиди рушди касбият ва фаъолият барои омӯзгорон ва пешбинӣ намудани имтиёзҳои бештар баҳри онҳо мебошад. Ҳадаф аз таҳияи лоиҳаи Қонуни Ҷумҳурии Тоҷикистон “Оид ба ворид намудани тағйиру илова ба Қонуни Ҷумҳурии Тоҷикистон “Дар бораи маориф” бошад, мутобиқ намудани меъёрҳои қонуни мазкур ба лоиҳаи Қонуни Ҷумҳурии Тоҷикистон “Дар бораи мақоми омӯзгор” ва ҳамгунасозии меъёрҳои пешбининамудаи онҳо аст. Дар идомаи маҷлис, ҳамчунин, масъалаҳо дар бораи Барномаи амнияти озуқавории Ҷумҳурии Тоҷикистон барои солҳои 2026-2030 ва дар бораи Барномаи омодасозии мутахассисон аз ҳисоби ҷавонон барои соҳаҳои иқтисодиёти Ҷумҳурии Тоҷикистон дар солҳои 2025-2029 баррасӣ шуда, аз руи онҳо қарорҳои дахлдор қабул гардид. Баъди муҳокимаи масъалаҳои рӯзномаи маҷлиси Ҳукумати Ҷумҳурии Тоҷикистон Роҳбари давлат муҳтарам Эмомалӣ Раҳмон барои иҷрои супоришҳо, тайёрии ҷиддӣ ба мавсими тирамоҳу зимистони солҳои 2025-2026, омодагии ҳамаҷониба ба соли нави таҳсили солҳои 2025-2026 ва вусъати корҳои ободонӣ баҳри истиқболи сазовори ҷашни умумимиллӣ - 35-солагии Истиқлоли давлатии Ҷумҳурии Тоҷикистон ба масъулини сохторҳои давлатӣ дастуру тавсияҳо доданд.
26
31.07.2025 -
НИШАСТИ МАТБУОТӢ ДАР ДОНИШГОҲИ ДАВЛАТИИ ДАНҒАРА 29 июли соли 2025 тибқи ҷадвали тасдиқшудаи баргузории нишастҳои матбуотӣ дар ташкилоту муассисаҳо, дар толори маҷлисгоҳи донишгоҳ бо иштироки ректори Муассисаи давлатии таълимии “Донишгоҳи давлатии Данғара”, доктори илмҳои иқтисодӣ, профессор Хайрзода Шукрулло Қурбоналӣ, муовини аввал, муовинони ректор, сардорони раёсатҳо, шуъбаҳо ва марказҳо, деканони факултетҳо ва 37 нафар намояндагони воситаҳои ахбори омма нишасти матбуотӣ баргузор шуд. Сараввал ректори донишгоҳ Хайрзода Шукрулло Қурбоналӣ ҳузури намояндагони ВАО-ро ба Донишгоҳи давлатии Данғара хайрамақдам гуфта, дар бораи фаъолияти таълимӣ-методӣ, илмӣ-инноватсионӣ, тарбиявӣ, робитаҳои байналмилалӣ, иқтисодӣ ва маъмурию хоҷагидорӣ дар шаш моҳаи аввали соли 2025 резахбор пешниҳод намуд. Гуфта шуд, ки Донишгоҳи давлатии Данғара фаъолияти хешро тибқи дастуру супоришҳо ва ҳидоятҳои маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, қарору қонунҳои амалкунандаи Ҷумҳурии Тоҷикистон марбут ба соҳаи маориф ва илм роҳандозӣ намуда, дар ҳамаи самтҳои фаъолият ба комёбиҳои назаррас ноил гардида истодааст. Дастовардҳо дар самти таълим таҳия ва дар амал татбиқ шудани 49 адад нақшаи таълимӣ аз рӯи дараҷаи бакалавр, 14 адад аз рӯи зинаи магистратура, 10-то барои таҳсилоти олии 2-юми ихтисосҳои роиҷи донишгоҳӣ таҳия шуда, аз ҷониби Вазорати маориф ва илми Ҷумҳурии Тоҷикистон тасдиқ гардида, аз 1-уми сентябри соли таҳсили 2025-2026 мавриди истифода қарор дода мешаванд. Таъминоти кадрии раванди таълим аз ҷумлаи масоли марказии такмили сифати таълим ба ҳисоб рафта, айни замон дар донишгоҳ 3 нафар докторони илм, 67 нафар номзади илм, 223 нафар муаллими калон ва ассистентон дар маҷмуъ 293 нафар устодон ба фаъолияти таълимӣ машғуланд. Шумораи умумии донишҷўён 8050 нафарро ташкил дода, аз шумораи умумии онҳо 3311 нафарро донишҷӯдухтарон ташкил медиҳанд. Дар донишгоҳ тибқи квотаи Президентӣ 120 нафар донишҷӯ аз ҷумла 48 нафар духтар таҳсил менамоянд. Имсол донишгоҳро аз рӯи ҳамаи ихтисосҳо ва шаклҳои таҳсил, ки тибқи фармоиши ректор барои иштирок дар комиссияи аттестатсияи хатм (КАХ) рухсат гирифтанд ва аттестатсияи хатмро ҷамъбаст намуданд, 1673 нафарро ташкил дод. Аз ин шумора, 933 нафар шӯъбаи рӯзона, 524 нафар шӯъбаи ғоибонаи донишгоҳро хатм намуданд. Тақсими донишҷӯёне, ки донишгоҳро хатм карданд, вобаста ба зинаи таҳсил чунин аст: - аз рўи дараљаи бакалавр 1673 нафар, аз он ҷумла омузгорӣ 698 нафар. - аз рӯи дараҷаи магистратура 112 нафар. Дар маҷмӯъ, аз теъдоди умумии донишҷӯёне, ки имтиҳони давлатиро бо баҳои «аъло» супоридаанд 20 нафарашон ба гирифтани дипломи «аъло» мушарраф шуданд. Дар соли таҳсили 2024-2025 1 нафар ба Ҷоизаи Президенти Ҷумҳурии Тоҷикистон барои олимону омӯзгорони фанҳои табиатшиносӣ, дақиқ ва риёзӣ ва 2 нафар бо мукофоти соҳавӣ “Аълочии маориф ва илми Ҷумҳурии Тоҷикистон” сарфароз гардиданд. Дар давраи ҳисоботӣ 8 нафар устодони донишгоҳ рисолаҳои илмии худро дар Шуроҳои диссертатсионии дохил ва хориҷи кишвар дифоъ намуда, 4 нафар соҳиби шаҳодатномаи дотсентӣ гардиданд. Дар баробари ин, то охири соли ҷорӣ аз рӯи маълумотҳои пешакӣ 10 нафар устодони ҷавон бояд рисолаҳои илмии худро дифоъ намоянд. Аз ҷониби ҳайати профессорону устодон 10 китоби дарсӣ, 15 монография, 60 дастури методӣ, 25 васоити таълимӣ ва зиёда аз 500 фишурдаю мақола ва маърӯзаҳои илмӣ ва илмӣ-оммавӣ таҳия гардида, ба чоп расидаанд. Дар олимпиадаи ҷумҳуриявии донишҷӯёни муассисаҳои таҳсилоти олии касбӣ 2 нафар сазовори ҷойи дуюм ва 1 нафар сазовори ҷойи сеюм гардиданд. Дар озмуни ҷумҳурияви “Фурӯғи субҳи доноӣ китоб аст” ба даври сеюми озмун 15 нафар донишҷӯ, 2 нафар магистрант ва 4 нафар омӯзгор роҳ ёфтанд. Дар озмуни ҷумҳуриявии “Илм фуруғи маърифат” ба даври сеюми озмун 18 нафар роҳ ёфтанд. Дар озмуни ҷумҳуриявии “Тоҷикистон - Ватани азизи ман” ба даври сеюм 3 нафар омӯзгор ва 6 нафар донишҷӯ барои иштирок роҳхат гирифтанд. Дар давоми шашмоҳаи якуми соли 2025 зиёда аз 60 чорабиниҳои маърифатӣ-фарҳангӣ ва варзишӣ-оммавӣ, мизҳои мудаввар, вохӯриву суҳбатҳо гузаронида шуд. Дар донишгоҳ 10 нафар донишҷӯи ятими кулл дар шуъбаи рӯзона таҳсил менамоянд, ки мунтазам нисбати онҳо таваҷҷӯҳи хоса зоҳир карда мешавад. Шуруъ аз моҳи январи соли 2025 то имрўз донишгоҳ бо 11 муассисаҳои олии хориҷи кишвар аз ҷумла Донишгоҳи давлатии информатика ва радиоэлектроника, Донишгоҳи давлатии Гомел ба номи П.О. Сухо, Донишгоҳи давлатии Брест ба номи А.С. Пушкин ва Донишгоҳи давлатии Гродненск ба номи Янки Купалия шартномаҳои ҳамкорӣ ба имзо расонидааст. Дар шаш моҳи аввали соли 2025 теъдоди иштироки устодон ва кормандони ДДД дар курсҳои бозомӯзӣ, семинарҳо, конфронсҳои илмӣ ва симпозиумҳо дар дохил ва хориҷи кишвар ба 12 нафар мерасад. Дар давраи ҳисоботи 2 лоиҳа бо мувафақият ҷамбаст шуда, ба Вазорати маориф ва илми Ҷумҳурии Тоҷикистон ҳисобот манзур гардид. Дар донишгоҳ айни ҳол 220 донишҷӯи хориҷӣ аз ҷумла Федератсияи Россия 1 нафар, Ҷумҳурии Туркменистон 6 нафар, Ҷумҳурии Ӯзбекистон 213 нафар дар гуррӯҳҳои рӯзона ва ғоибона таҳсил намуда истодаанд. Дар нимсолаи якуми соли 2025 аз ҷониби раёсати донишгоҳ 20000 (бист ҳазор) дона гули ороишӣ дар гирду атроф ва саҳни биноҳои таълимӣ шинонида шуд, ки ҳусни донишгоҳро зеботар менамоянд. Инчунин дар ҳудуди заминҳои корам аз нав киштгардон карда шуда, зиёда аз 30 бех дарахтони ороишии серено ва капатало шинонида шудаанд. Дар бахши дигари нишасти матбуотӣ аз ҷониби намояндагони ВАО вобаста ба самтҳои фаъолияти донишгоҳ маҷмуи саволҳо пешниҳод гардид, ки ректори Донишгоҳи давлатии Данғара Хайрзода Шукрулло Қурбоналӣ ба саволҳои мазкур бо овардани нишондиҳандаҳо ва мисолҳои возеҳ ҷавобҳои мушаххас ва қаноатмандкунанда доданд. Раёсати Донишгоҳи давлатии Данғара эълом дошт, ки минбаъд низ ҳамкориҳоро бо намояндагони воситаҳои ахборӣ омма баҳри дар амал татбиқ намудани ҳадафҳои созандаи Ҳукумати Ҷумҳурии Тоҷикистон ва баланд бардоштани сатҳу сифати таълиму тарбия зимни тайёр намудани мутахассисони рақобатпазир ба роҳ хоҳад монд.
24
30.07.2025 -
Баргузории озмуни ҷумҳуриявии «Ҳозирҷавобон» байни истироҳаткунандагони истироҳатгоҳҳои беруназшаҳрӣ Бо ташаббуси бевоситаи Маркази ҷумҳуриявии муассисаҳои таҳсилоти иловагии Вазорати маориф ва илми Ҷумҳурии Тоҷикистон, бо мақсади баланд бардоштани шавқу завқи бадеӣ ва ҳозирҷавобии кўдакону наврасон дарёфт ва муаррифии чеҳраҳои нави сарояндагию овозхонӣ ва ҳунарҳои бадеии халқӣ, такмил ва баланд бардоштани дониш, қобилият ва маҳорати иҷрокунандагӣ, ташаккули истеъдод, инчунин фароҳам овардани шароити мусоиди эҷодӣ арҷ гузоштан ба таъриху фарҳанги миллӣ ва арҷгузорӣ ба арзишҳои соҳибистиқлолии милливу давлатӣ Озмуни ҷумҳуриявии «Ҳозирҷавобон» бори аввал миёни истироҳаткунандагони истироҳатгоҳҳои беруназшаҳрии ҷумҳурӣ роҳандозӣ ва баргузор гардидааст.. Боиси қайд аст, ки озмун миёни истироҳаткунандагони истирозатгоҳҳои беруназшаҳрӣ бо иштироки 7 даста аз вилоят ва шаҳру ноҳияҳои чумҳурӣ баргузор гардид,ки иштирокчиён аз рўйи шартҳои саломнома, суруди ҳаҷвїӣ, тақлидкорӣ, саҳначаи ҳаҷвӣ, саволу ҷавоб, ки яке аз шартҳои муҳими озмун ба ҳисоб меравад иштирокчиён бо зеҳни равшан, ҳозирҳавобӣ, донишҳои фарохи худ ва бо самимияту эҷодкорїӣ ҳунари овозхонӣ ҳунару истеъдоди худро ба ҳайати ҳакамон нишон доданд. Иштирокчиёни озмуни имрўза яке аз беҳтарин фарзандони содиқи ин сарзамин ва кўдакони хушбахти даврони истиқлол ба ҳисоб рафта, бовари дорем, ки ҳамчун кўдакону наврасони миллатдўст, ватанпараст бо омўхтани донишу малка эътибору нуфузи ватани азизамонро дар дохил ва хорҷиї кишвар муаррифӣ менамоянд. Бо итминон гуфта метавонем,ки озмуни мазкур низ чеҳраҳои наврро муаррифи месозад ва дастаҳое, ки имрўз дар озмуни мазкур сазовори ҷойҳои ифтихори мегарданд аз ҷониби ташкилкунандагони озмун бо ифтихорнома ва тўҳфаҳои хотиравӣ ҳавасманд гардонида мешаванд. Умед бар он мебандем, ки Маркази ҷумҳуриявии муассисаҳои таҳсилоти иловагии Вазорати маориф ва илми Ҷумҳурии Тоҷикистон, дар оянда низ бо ташкил ва баргузор намудани озмуну мусобиқаҳо дар тарбияи намудани хонандагон дар руҳи ватандустїӣ хештаншиносїӣ ва ба воя расонидани онҳо ҳамчун насли ояндасози давлату миллат саҳми арзандаи худро мегузорад. Дар ҷамъбаст дастаи “Файзи Истиулол»-и Кумитаи иттифоқи касабаи кормандони маориф ва илми Ҷумҳурии Тоҷикистон, «Сомон-айр»-и вилояти Суғд ва «Зимчуруд»-и ноҳияи Шоҳмансур ғолиби озмун гардида, аз ҷониби ташкилкунандагони озмун бо ифтихорнома ва тӯҳфаҳои хотиравӣ ҳавасманд гардонида шуданд.
15
30.07.2025
