22.04.2026
22 апрели соли ҷорӣ дар Вазорати маориф ва илми Ҷумҳурии Тоҷикистон ҷаласаи навбатии назоратии назди вазири маориф ва илм баргузор гардид.
Ҷаласа таҳти раёсати вазири маориф ва илм Раҳим Саидзода баргузор шуда, дар кори он муовинони вазир, сардорони раёсату шуъбаҳои дастгоҳи марказӣ, роҳбарони муассисаҳои тобеъ, ректорони муассисаҳои таҳсилоти олии касбӣ, инчунин сардорон ва мудирони шуъбаҳои маорифи шаҳру навоҳии кишвар тариқи ҳузурӣ ва маҷозӣ иштирок намуданд.
Вазири маориф ва илм ҷаласаро ифтитоҳ намуда, аз дастгириҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба соҳаи маориф ёдовар шуда, таъкид намуд, ки рушди рӯзафзуни соҳаи маориф омили муҳимми пешрафти ҷомеа ба ҳисоб рафта, таъмини сифати таҳсилот, тарбияи насли соҳибмаърифат ва омода намудани мутахассисони баландихтисос аз вазифаҳои афзалиятноки соҳа маҳсуб меёбанд.
Мутобиқи рӯзномаи ҷаласа, нахуст масъалаи иҷрои қарори Ҳукумати Ҷумҳурии Тоҷикистон “Дар бораи Тартиби баргардонидани маблағҳое, ки аз ҳисоби буҷети давлатӣ барои тайёр намудани мутахассисон харҷ шудаанд” аз ҷониби мутахассисони ҷавоне, ки бо роҳхат дар соли 2025 ба муассисаҳои таълимӣ ба кор фиристода шудаанд, мавриди баррасӣ қарор гирифт. Доир ба ин масъала сардори раёсати кадрҳо ва корҳои махсус Ш. Саъдуллозода гузориши муфассал пешниҳод намуда, оид ба вазъи иҷрои санади мазкур, мушкилоти ҷойдошта ва роҳҳои ҳалли онҳо маълумот дод.
Дар идома, сардори раёсати муносибатҳои байналмилалӣ С. Сироҷзода оид ба вазъи фаъолияти робитаҳои байналмилалии муассисаҳои таҳсилоти олии кишвар дар доираи санадҳои меъёрии ҳуқуқӣ маъруза намуда, аз густариши ҳамкориҳо бо муассисаҳои хориҷӣ, татбиқи барномаҳои муштарак ва ҷалби грантҳо иттилоъ дод.
Сипас, масъалаи вазъи таълиму тарбия дар мактаб-интернатҳои мақоми ҷумҳуриявидошта аз ҷониби сардори раёсати таҳсилоти миёнаи умумӣ Ш. Ассомиддинзода мавриди таҳлилу баррасӣ қарор гирифта, оид ба шароити таҳсил, таъминоти моддию техникӣ ва баланд бардоштани сатҳи тарбия дар ин муассисаҳо пешниҳодҳои мушаххас ироа гардиданд.
Оид ба рафти иҷрои Барномаи давлатии рушди ғизои мактабӣ дар Ҷумҳурии Тоҷикистон барои солҳои 2022-2027 мудири бахши ғизои мактабии назди Вазорати маориф ва илм С. Зиёзода баромад намуда, аз пешрафтҳо, мушкилоти мавҷуда ва тадбирҳои минбаъда иттилоъ дод.
Ҳамчунин, ректори Донишкадаи ҷумҳуриявии такмили ихтисос ва бозомӯзии кормандони соҳаи маориф Н. Мирзозода оид ба рафти ташкил ва баргузории курсҳои бозомӯзӣ ва такмили ихтисоси омӯзгорон суханронӣ намуда, аҳаммияти такмили пайвастаи малакаҳои касбии омӯзгоронро таъкид кард.
Дар фарҷоми ҷаласа вазири маориф ва илм ба масъулон ҷиҳати иҷрои саривақтии қарорҳои қабулшуда, тақвияти назорат аз болои татбиқи барномаҳои давлатӣ, беҳтар намудани сифати таълиму тарбия ва бартараф намудани камбудиҳои ҷойдошта супоришҳои мушаххас дод.
Хабарҳои дигар
-
ДАВРИ НОҲИЯВИИ ОЗМУНИ ҶУМҲУРИЯВИИ "ШОҲНОМАХОНӢ" ДАР НОҲИЯИ СИНОИ ШАҲРИ ДУШАНБЕ 21 апрели соли 2026 дар Муассисаи таҳсилоти миёнаи умумии №15-и ноҳияи Синои шаҳри Душанбе даври ноҳиявии Озмуни ҷумҳуриявии «Шоҳномахонӣ» баргузор гардид. Дар баргузории озмун муовини раиси ноҳияи Сино иштирок намуда, довталабонро дар баргузории даври ноҳиявии озмуни мазкур, ки таҳти сарпарастии бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ шудааст, табрик намуда, таъкид намуд, ки ҳадафи асосии ин иқдом арҷгузорӣ ба мероси безаволи Ҳаким Абулқосим Фардавсӣ, зинда нигоҳ доштани заковату шуҷоати ниёгон ва таҳкими худшиносиву ватандӯстӣ дар ниҳоди насли наврас мебошад. Инчунин дар озмун мудири шуъбаи рушди иҷтимоӣ ва робита бо ҷомеаи дастгоҳи раиси ноҳияи Сино, мудири шуъбаи маорифи ноҳия, роҳбари муассисаи мазкур, ҳайати ҳакамон ва довталабон дар асоси Низомномаи озмуни ҷумҳуриявии "Шоҳномахонӣ" иштирок намуданд. Иштирокчиёни озмун бо маҳорати баланди суханварӣ ва аз худ намудани достонҳои ҳамосии «Шоҳнома» собит намуданд, ки ҷавонони имрӯз ворисони арзандаи ин ганҷинаи адабӣ буда, таҳти ҳидоятҳои Роҳбари давлат барои ҳифзи забону фарҳанги миллӣ кӯшиш ба харҷ медиҳанд.
37
21.04.2026 -
БАРГУЗОРИИ МАШВАРАТИ КОРӢ ОИД БА ОМОДАГӢ БА ҶАШНИ 35-СОЛАГИИ ИСТИҚЛОЛИЯТИ ДАВЛАТӢ Имрӯз, 17 апрели соли 2026 дар Вазорати маориф ва илми Ҷумҳурии Тоҷикистон таҳти раёсати вазири маориф ва илм Раҳим Саидзода вобаста ба дар сатҳи баланд таҷлил намудани ҷашни муҳимми таърихӣ - 35-солагии Истиқлолияти давлатии Ҷумҳурии Тоҷикистон машварати корӣ баргузор гардид. Дар машварати корӣ муовинони вазир, роҳбарони раёсатҳои дахлдори вазорат, сардори Сарраёсати маорифи шаҳри Душанбе, мудирони шуъбаҳои маорифи ноҳияҳои шаҳри Душанбе, инчунин ректорони муассисаҳои таҳсилоти олии касбии кишвар иштирок намуданд. Зимни машварат вазири маориф ва илм таъкид намуд, ки ҷашни 35-солагии Истиқлолияти давлатӣ яке аз рӯйдодҳои муҳимми таърихӣ ба ҳисоб рафта, таҷлили сазовори он аз ҳар як корманди соҳа масъулияти баланд, ҳисси ватандӯстӣ ва фаъолияти созандаро тақозо менамояд. Қайд гардид, ки дар партави сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тамоми саъю кӯшиш бояд ба он равона гардад, ки ин ҷашни муқаддаси миллӣ бо дастовардҳои назаррас, ободонии муҳити таълим ва болоравии сифати таҳсил истиқбол гирифта шавад. Дар ин замина, зикр гардид, ки аҳли маорифро зарур аст бо омодагии ҷиддӣ, ташаббусҳои созанда ва иҷрои босифати вазифаҳои хизматӣ дар татбиқи нақшаи чорабиниҳои ҷашнӣ саҳми назаррас гузоранд. Ҳар як корманди соҳа бояд ҳиссаи худро дар рушди низоми маориф, тарбияи насли соҳибмаърифат ва таҳкими арзишҳои миллӣ гузошта, дар тамоми зинаҳои таҳсилот, аз муассисаҳои томактабӣ то таҳсилоти олии касбӣ, сатҳу сифати таълимро боз ҳам баланд бардорад. Ҳамзамон, дар машварат масъалаҳои вобаста ба ташкили чорабиниҳои маърифативу фарҳангӣ, ободониву созандагӣ дар муассисаҳои таълимӣ, тақвияти корҳои тарбиявӣ дар руҳияи ватандӯстӣ ва худшиносии миллӣ, инчунин ҷалби хонандагону донишҷӯён ба чорабиниҳои ҷашнӣ мавриди баррасӣ қарор дода шуданд. Дар анҷоми машварат таъкид гардид, ки роҳбарону масъулони соҳа бояд иҷрои саривақтӣ ва босифати супоришҳои додашударо таъмин намуда, ҷиҳати дар сатҳи баланд баргузор намудани ҷашни 35-солагии Истиқлолияти давлатии Ҷумҳурии Тоҷикистон тадбирҳои муассир андешанд. Маркази матбуоти Вазорати маориф ва илми Ҷумҳурии Тоҷикистон
124
17.04.2026 -
БОЗДИДИ ВАЗИРИ МАОРИФ ВА ИЛМ АЗ РАФТИ БАРГУЗОРИИ АРЗЁБИИ БАЙНАЛМИЛАЛИИ PIRLS - 2026 Бо дастгирӣ ва таваҷҷуҳи доимии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Эмомалӣ Раҳмон ҷиҳати рушди соҳаи маориф ва илм дар Ҷумҳурии Тоҷикистон ва мутобиқ намудани низоми таҳсилот ба меъёрҳои байналмилалӣ тадбирҳои муҳиму саривақтӣ амалӣ гардида истодаанд. Яке аз чунин иқдомҳои муҳим иштироки кишвар дар арзёбиҳои байналмилалӣ, аз ҷумла арзёбии PIRLS - 2026 мебошад. Дар идомаи баргузории давраи асосии арзёбии байналмилалии PIRLS - 2026 миёни хонандагони синфҳои 4-ум, ки аз 14 апрел то 6 майи соли ҷорӣ дар 171 муассисаи таҳсилоти умумии 52 шаҳру ноҳияҳои ҷумҳурӣ ба нақша гирифта шудааст, имрӯз, 17 апрели соли 2026 вазири маориф ва илми Ҷумҳурии Тоҷикистон Раҳим Саидзода, муовини вазири маориф ва илм Б. Музаффарзода, директори Маркази миллии тестии назди Президенти Ҷумҳурии Тоҷикистон С. Ҷаъфарзода, сардори Сарраёсати маорифи шаҳри Душанбе, намояндагони лоиҳаи «Муҳити таълим – асоси таҳсилоти босифат» ва дигар шахсони масъул дар Муассисаи давлатии таълимии «Литсейи №4 барои хонандагони болаёқати шаҳри Душанбе» иштирок намуданд. Татбиқи арзёбии PIRLS - 2026 дар доираи лоиҳаи «Муҳити таълим – асоси таҳсилоти босифат» ба таври самаранок ба роҳ монда шуда, ҳадафи он фароҳам овардани шароити мусоиди таълимӣ, такмили муҳити омӯзиш ва баланд бардоштани сатҳи дастрасии хонандагон ба захираҳои таълимӣ мебошад. Дар ин замина, истифодаи усулҳои муосири таълим, технологияҳои иттилоотӣ ва рушди қобилияти тафаккури интиқодии хонандагон низ тақвият дода мешавад. Зикр гардид, ки натиҷаҳои арзёбии PIRLS - 2026 барои муайян намудани вазъи воқеии сатҳи саводнокии хонандагон, такмили барномаҳои таълимӣ ва таҳияи сиёсати минбаъдаи соҳа заминаи муҳим фароҳам меоранд. Ҳамзамон, ин раванд имконият медиҳад, ки Ҷумҳурии Тоҷикистон мавқеи худро дар муқоиса бо кишварҳои дигар муайян намуда, таҷрибаи пешқадамро дар низоми миллии маориф ҷорӣ намояд. Дар маҷмӯъ, иштироки фаъолона дар арзёбиҳои байналмилалӣ ва татбиқи лоиҳаҳои инноватсионӣ бозгӯи таваҷҷуҳи пайвастаи роҳбарияти давлат ва Ҳукумати кишвар ба рушди устувори соҳаи маориф ва баланд бардоштани сифати таҳсилот дар Ҷумҳурии Тоҷикистон арзёбӣ мегардад.
136
17.04.2026
