22.05.2025
Бо мақсади сазовор таҷлил намудани Рӯзи ҷавонони Тоҷикистон ва мусоидат дар татбиқи сиёсати давлатии ҷавонон, 22 майи соли 2025 дар толори маҷлисгоҳи Вазорати маориф ва илми Ҷумҳурии Тоҷикистон ҳамоиши илмӣ-назариявӣ баргузор гардид.
Чорабинии мазкур бо ташаббуси Ташкилоти ҷамъиятии ҷавонон “Созандагони Ватан” дар назди ташкилоти ибтидоии ҳизбии «Ганҷ»-и Ҳизби Халқии Демократии Тоҷикистон дар вазорат ташкил ва баргузор карда шуд.
Ҳамоишро муовини якуми вазири маориф ва илм Ҳошимзода Ҳомид оғоз бахшида, дар суханронии худ вобаста ба саҳми ҷавонон дар рушди кишвар, сиёсати ҷавонпарваронаи давлат ва Ҳукумати Ҷумҳурии Тоҷикистон ва дастгирии пайвастаи Пешвои миллат муҳтарам Эмомалӣ Раҳмон изҳори назар намуд. Зикр гардид, ки ҷавонон қувваи пешбарандаи ҷомеа ба шумор рафта, таҳким бахшидани ҷаҳонбинӣ, баланд бардоштани маърифати сиёсӣ ва рушди қобилияти зеҳнии онҳо вазифаи муҳимми ҳамаи сохторҳои давлатӣ ва ҷомеа мебошад.
Дар идома муовини якуми вазир аз натиҷаҳои амалигардонии барномаҳои давлатӣ оид ба ҷавонон ёдовар шуда, қайд намуд, ки имрӯзҳо барои таҳсилу фаъолияти илмӣ, татбиқи ташаббусҳо ва амалисозии иқдомоти созандаи ҷавонон дар соҳаи маориф ва илм шароити мусоид фароҳам оварда шудааст.
Дар ҷараёни ҳамоиш инчунин намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Академияи идоракунии давлатии назди Президенти Ҷумҳурии Тоҷикистон ширкат намуда, вобаста ба масъалаҳои марбут ба ҳаёти иҷтимоӣ, фаъолсозии неруи ҷавонон, худшиносӣ ва таълиму тарбияи онҳо дар руҳияи ватандӯстиву худогоҳӣ баромад намуданд.
Маврид ба зикр аст, ки баргузории чунин чорабиниҳо боиси таҳкими ҳисси масъулиятшиносӣ, фаъолсозии неруи созандаи ҷавонон дар ҷомеа, афзоиши донишу малакаи сиёсиву фарҳангӣ ва саҳмгузории бештари онҳо дар раванди рушди соҳаи маориф мегардад.
Дар қисмати хотимавии ҳамоиш як қатор кормандони вазорат барои саҳми арзандаи худ дар рушди фаъолияти ҷамъиятӣ ва маърифатӣ бо “Сипоснома”-и Кумитаи кор бо ҷавонон ва варзиш қадрдонӣ карда шуданд.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
БОЗДИД АЗ РАФТИ СОХТМОНИ МУАССИСАИ ТАЪЛИМӢ ДАР НОҲИЯИ ДАРВОЗ 22 майи соли 2025 муовини вазири маориф ва илми Ҷумҳурии Тоҷикистон Бадриддин Музаффарзода аз раванди сохтмони Муассисаи таҳсилоти миёнаи умумии №40-и ноҳияи Дарвоз боздид намуд. Зимни боздид ба муовини вазири маориф ва илм иттилоъ дода шуд, ки муассисаи таълимӣ бо шароити муосири таълим аз 3 ошёна барои 560 хонанда дар ду баст пешбинӣ шудааст ва аз 8 синфхона иборат аст. Ҳоло сохтмони муассисаи мазкур бомаром идома дошта, дар назар аст соли ҷорӣ ба истифода дода шавад. Дар идома муовини вазир бо масъулини сохтмони иншоот доир ба масъалаҳои саривақт ба итмом расонидан ва мавриди истифода қарор додани иншоот мулоқоти судманд анҷом дод. Сипас, муовини вазир аз рафти дарси омӯзгорон, вазъи таълиму тарбия, сифати таҳсилот ва риояи сару либоси хонандагон дидан намуда, ба масъулини шуъбаи маориф ва муассисаи таълимӣ ҷиҳати беҳтар намудани вазъи таълиму тарбия, иштироки хонандагон дар озмуну олимпиадаҳои ҷумҳурӣ ва рафъи мушкилоти мавҷудбуда дастуру супоришҳои мушаххасс дод. Боиси зикр аст, ки дар доираи сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон солҳои охир бунёду сохтмон ва азнавсозии муассисаҳои таҳсилоти томактабӣ ва миёнаи умумӣ, ба истифода додани муассисаҳои таълимии типи нав вусъат ёфта, заминаҳои мазкур ба баланд гаштани сатҳу сифати таҳсилот дар кишвар мусоидат намудааст. Маркази матбуоти Вазорати маориф ва илми Ҷумҳурии Тоҷикистон
23
22.05.2025 -
БАРРАСИИ РАВАНДИ РАҚАМИКУНОНӢ ДАР МУАССИСАҲОИ ТАЪЛИМИИ ШАҲРИ ХОРУҒ Хоруғ, 22 майи 2025 — Гурӯҳи кории Маркази ҷумҳуриявии технологияи информатсионӣ ва коммуникатсия (МҶТИК) дар доираи сафари худ ба Вилояти Мухтори Кӯҳистони Бадахшон, рӯзи дуюми фаъолияташонро ба боздиди амалӣ аз муассисаҳои таҳсилоти умумии шаҳри Хоруғ бахшиданд. Ҳадафи аслии боздид – арзёбии сатҳи татбиқи “Барномаи давлатии ҷорӣ намудани технологияҳои иттилоотӣ ва коммуникатсионӣ дар муассисаҳои таҳсилоти умумии Ҷумҳурии Тоҷикистон барои солҳои 2024–2028” дар муҳити таълимии маҳаллӣ буд. Зимни боздид, намояндагони МҶТИК дар шароити воқеии таълимгоҳҳо аз ҷараёни рақамикунонӣ, сатҳи таҷҳизоти техникӣ ва иштироки кадрҳои омӯзгорӣ дар курсҳои бозомӯзӣ маълумот ба даст оварданд. Бинобар гуфтаи масъулин, дар бархе муассисаҳо компютер ва дастгоҳҳои иловагӣ дастрасанд ва омӯзгорон тадриҷан ба истифодаи технологияҳои муосир ҷалб мешаванд. Бо вуҷуди ин, мушкилоти ҷиддие ҳамчунон боқӣ мондаанд — маҳдудияти интернет дар минтақаҳои дур, норасоии мутахассисони соҳаи ТИК ва камбудии муҳтавои рақамии мутобиқ ба муҳити кӯҳӣ аз ҷумлаи монеаҳои асосӣ ба шумор мераванд. Гурӯҳи корӣ дар фарҷоми боздид пешниҳод намуд, ки барои рушди минбаъдаи Барнома бояд ба омодасозии кадрҳо, тавсеаи инфрасохтор ва ҳамкорӣ бо шарикони рушд таваҷҷуҳи бештар дода шавад. Инчунин, таъмини дастрасӣ ба интернет ва таҳияи муҳтавои таълимии рақамии маҳаллӣ ҳамчун афзалиятҳо муайян гардиданд. Боздиди гурӯҳи кории МҶТИК як иқдоми амалӣ ва муҳими марбут ба рушди рақамӣ дар соҳаи маориф арзёбӣ шуда, заминаи устуворе барои тақвияти иқтидори муассисаҳои таълимии минтақа фароҳам меорад.
31
22.05.2025 -
ИШТИРОК ДАР ФОРУМИ УМУМИҶАҲОНИИ ТАҲСИЛОТ Бо ташаббуси Вазорати маориф ва илми Ҷумҳурии Тоҷикистон ва дастгирии Сафорати Ҷумҳурии Тоҷикистон дар Британияи Кабир дар бузургтарин чорабинии ҷаҳонӣ дар бахши таҳсилот - Форуми умумиҷаҳонии таҳсилот – 2025 (Education World Forum) низоми маорифи миллии Тоҷикистон муаррифӣ гардид. Форуми мазкур ҳамасола дар шаҳри Лондони Британияи Кабир бо иштироки намояндагони воломақоми низоми таҳсилоти кишварҳои ҷаҳон баргузор гардида, ҳамчун яке аз платформаҳои калидӣ барои арзёбии дурнамо, таҳлили вазъ ва рушди ҳамкориҳои ҷаҳонӣ дар соҳаи маориф шинохта шудааст. Мавзуъҳои калидии баррасишаванда дар форум масъалаҳои ҷалби технологияҳои рақамӣ ба таҳсилот, татбиқи усулҳои муосири таълим, масъалаи иқлим ва инноватсия дар муассисаҳои таълимӣ, рушди касбии омӯзгорон ва таҳкими низоми ҳамкориҳои байналмилалӣ мебошанд. Соли равон Ҷумҳурии Тоҷикистонро дар форуми мазкур Файзуллозода Амонулло, сардори раёсати муносибатҳои байналмилалии Вазорати маориф ва илм намояндагӣ намуда, зимни суханрониҳо ва вохӯриҳо сиёсати давлатии соҳаи маориф, дастовардҳои солҳои охир, ташаббусҳои байналмилалии Роҳбарияти Олии мамлакат ва омодагии Тоҷикистонро барои таҳкими ҳамкориҳои самарабахш бо кишварҳои шарик дар самти маориф муаррифӣ намуд. Сардори раёсати муносибатҳои байналмилалии вазорат дар доираи форуми мазкур бо як қатор роҳбарон ва коршиносони созмонҳои таҳсилотии Британияи Кабир ва байналмилалӣ вохӯриҳои дуҷониба анҷом дод. Дар ҷараёни вохӯрӣ ва суҳбатҳо таваҷҷуҳи махсус ба густариши ҳамкориҳо дар самтҳои татбиқи барномаҳои таҳсили дудиплома, кушодани филиал ва факултетҳои муштарак, ташкил ва гузаронидани мактабҳои тобистона ва курсҳои такмили ихтисос, нашри маводи таълимӣ ва китобҳои дарсӣ, табодули донишҷӯён ва омӯзгорон, ҳамкории илмӣ ва академӣ дар сатҳи байналмилалӣ зоҳир гардид Иштирокчиёни форум омодагии худро ҷиҳати ташриф ва шиносоӣ бо имкониятҳои мавҷудаи соҳаи маорифи Ҷумҳурии Тоҷикистон иброз намуданд. Маркази матбуоти Вазорати маориф ва илми Ҷумҳурии Тоҷикистон
52
21.05.2025
