24.06.2025
24 июни соли 2025 дар Вазорати маориф ва илми Ҷумҳурии Тоҷикистон Конференсияи илмӣ-назариявӣ бахшида ба Рӯзи Ваҳдати миллӣ таҳти унвони «Ваҳдати миллӣ – ҳастии давлат ва бақои миллат» баргузор гардид. Дар ҳамоиш муовини якуми вазири маориф ва илм Ҳомид Ҳошимзода, муовини вазири маориф ва илм, сардорони раёсату шуъбаҳои дастгоҳи марказӣ, роҳбарони муассисаҳои тобеъ ва устодони муассисаҳои таҳсилоти олӣ иштирок намуданд.
Зимни сухани ифтитоҳии муовини якуми вазири маориф ва илм Ваҳдати миллиро муҳимтарин дастоварди таърихии даврони Истиқлол арзёбӣ намуда, онро заминаи асосии субот, рушди устувор ва таҳкими пояҳои давлатдории миллӣ маънидод намуд. Мавсуф иброз дошт, ки Ваҳдати миллӣ ҳамчун падидаи сарнавиштсоз ба хотири таъмини сулҳ ва барқарорсозии амнияту оромӣ дар Ҷумҳурии Тоҷикистон баъди солҳои душвору пурфоҷеаи ҷанги шаҳрвандӣ ба даст омада, маҳсули иродаи қавии сиёсӣ, хиради таърихӣ ва талошҳои пайвастаи Пешвои миллат муҳтарам Эмомалӣ Раҳмон мебошад. Дар таърихи навини миллат Рӯзи Ваҳдати миллӣ – 27 июни соли 1997, ки рӯзи имзои Созишномаи умумии истиқрори сулҳ ва ризоияти миллӣ дар Ҷумҳурии Тоҷикистон аст, ҳамчун рамзи олии сулҳу субот ва оғози марҳилаи созандагиву бунёдкорӣ ба ҳисоб меравад.
Дар ҷараёни конференсия баромадҳои муҳимми илмӣ ироа гардиданд. Аз ҷумла, доктори илмҳои таърих, омӯзгори Академияи идоракунии давлатии назди Президенти Ҷумҳурии Тоҷикистон Ализода Баҳриддини Пирмуҳаммад дар мавзуи «Истиқрори сулҳу ваҳдати миллӣ – омили муҳимми рушди устувори Ҷумҳурии Тоҷикистон» маъруза намуд. Мавсуф Ваҳдати миллиро на танҳо дастоварди сиёсиву ҳуқуқӣ, балки падидаи фарҳангию маънавии ҷомеаи тоҷик номид, ки дар шароити печидаи минтақа ва ҷаҳон, пойдории онро вазифаи ҳар як шаҳрванди миллат донист.
Ҳамзамон, доктори илмҳои сиёсӣ, декани факултети фалсафаи Донишгоҳи миллии Тоҷикистон Сафарализода Хуҷамурод дар мавзуи «Ваҳдати миллӣ – такягоҳи устувори ҷомеа» суханронӣ намуда, таъкид кард, ки маҳз ваҳдат шароити мусоиди рушди иқтисодӣ, иҷтимоӣ ва маънавии кишварро фароҳам оварда, ҷомеаи тоҷикро ба марҳилаи сифатан нави рушди миллӣ ворид сохт.
Қайд гардид, ки мақсади асосии баргузории конференсия бознигарии аҳамияти таърихии Ваҳдати миллӣ, таҳкими мафкураи миллӣ, арҷгузорӣ ба сулҳу субот ва тарғиби эҳсоси худшиносиву ватандӯстӣ миёни ҷавонон мебошад. Конференсия дар фазои ҳамандешӣ ва таҳлил ҷараён гирифта, иштирокчиён дар муҳокимаҳо ва музокираҳо андешаву пешниҳодҳои худро оид ба роҳҳои ҳифзу густариши Ваҳдати миллӣ баён доштанд.
Дар ҷамъбасти конференсия таъкид гардид, ки Ваҳдати миллӣ арзиши муқаддас ва кафили бақои давлату миллат буда, посдориву ҳифзи он вазифаи муқаддаси ҳар як фарди бедордили ҷомеа ба шумор меравад.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
БОЗДИД АЗ РАФТИ КОРҲОИ СОХТМОНӢ ДАР БИНОИ ШУЪБАИ МАОРИФИ НОҲИЯИ ТОҶИКОБОД Имрӯз, 4 июли соли 2025 вазири маориф ва илми Ҷумҳурии Тоҷикистон Раҳим Саидзода аз ҷараёни сохтмони бинои нави маъмурии шуъбаи маорифи ноҳияи Тоҷикобод боздид намуд. Сохтмони бинои шуъбаи маорифи ноҳия бо дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар доираи маблағҳои мутамаркази буҷети давлатӣ аз ҷониби Вазорати маориф ва илм ба нақша гирифта шуда, раёсати сохтмони асосии назди вазорат ҳамчун фармоишгар фаъолият менамояд. Тибқи лоиҳа, иншоот аз се ошёна ва таҳхона иборат буда, дар он утоқҳои кории мудир, муовин, муҳосибот ва 14 утоқи кории дигар, толори маҷлисгоҳ, инчунин ҳуҷраҳои хоб (меҳмонхона бо 3 ҳуҷра дар ошёнаи сеюм) ва дигар ҳуҷраҳои ёрирасону техникӣ пешбинӣ шудаанд. Ҳамзамон, дар ҳудуди қитъаи замини иншоот сохтмони бинову иншооти ёрирасон, корҳои ободонӣ ва кабудизоркунӣ ба назар гирифта шуда, ҷараёни корҳои сохтмонӣ бо маром идома дорад. Зимни боздид вазири маориф ва илм ҷиҳати таъмини сифат ва сари вақт ба анҷом расонидани сохтмон ба масъулин дастуру тавсияҳои мушаххас дод. Маркази матбуоти Вазорати маориф ва илми Ҷумҳурии Тоҷикистон
31
04.07.2025 -
Мулоқот бо Раиси Фонди Саудии Рушд Султон Абдурраҳмон ал-Маршад 3 июл Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Раиси Фонди Саудии Рушд Султон Абдурраҳмон ал-Маршад мулоқот намуданд. Дар мулоқот масоили ҳамкории Ҷумҳурии Тоҷикистон бо Фонди мазкур баррасӣ шуд. Тавсеаи ҳамкории Тоҷикистону Фонди Саудии Рушд барои маблағгузории лоиҳаҳои муҳими соҳаҳои маориф, нақлиёт, тандурустӣ, гидроэнергетика ва идоракунии об аз мавзӯъҳои муҳими мулоқот буд. Дар робита ба ин ба роҳбарияти Подшоҳии Арабистони Саудӣ ва Фонди Саудии Рушд барои иқдоми ҷудо намудани 100 миллион доллари амрикоӣ барои татбиқи лоиҳаи неругоҳи барқи обии Роғун ва 30 миллион доллари амрикоӣ барои амалисозии лоиҳаи сохтмони роҳи ҳалқавии шаҳри Кӯлоб арзи сипосу қадрдонӣ карда шуд. Ҷалби васеи Фонд ба маблағгузории лоиҳаҳои иҷтимоиву иқтисодии кишвари мо мувофиқи мақсад дониста шуд. Изҳори итминон карда шуд, ки дар доираи ҳамкории судманд ҷиҳати рушду тавсеаи муносибатҳо аз дигар имкониятҳои мавҷуда истифода карда мешавад.
52
03.07.2025 -
Боздиди муовини вазири маориф ва илми Ҷумҳурии Тоҷикистон Равшан Каримзода аз истироҳатгоҳҳои беруназшаҳрӣ Рӯзи 2 июли соли ҷорӣ муовини вазири маориф ва илми Ҷумҳурии Тоҷикистон Равшан Каримзода аз фаъолияти истироҳатгоҳҳои беруназшаҳрии «Шарора»-и шуъбаи маорифи ноҳияи Исмоили Сомонӣ, «Зимчуруд»-и шуъбаи маорифи ноҳияи Шоҳмансур ва «Файзи Истиқлол»-и Иттифоқи касабаи кормандони маориф ва илми Ҷумҳурии Тоҷикистон шиносоӣ намуд. Зимни сафари корӣ муовини вазири маориф ва илм Равшан Каримзода дар ҳузури мудирони шуъбаҳои маорифи ноҳияҳои болозикр Кучарзода Ҳусния, Нуряминзода Саида ва директори Маркази ҷумҳуриявии муассисаҳои таҳсилоти иловагӣ Муяссара Давлатзода бо ҳайати кормандони омӯзгорӣ ва истироҳаткунандагон суҳбат ороста, аз ташкили раванди истироҳатгоҳ, ҷои хоб, майдончаҳои варзишӣ, ҳавзҳои шиноварӣ, таъминот бо маводи хӯрокворӣ аз наздик шинос шуданд. Мавриди қайд аст, ки дар басти дуюми истироҳатгоҳи «Шарора» 190 нафар кӯдакону наврасон, аз ҷумла кӯдакони ятиму бепарастор, аз оилаҳои ниёзманд, ғолибони олимпиадаҳои фаннии даврҳои шаҳрию ҷумҳуриявӣ, инчунин 30 нафар хонандагони мактаб-интернат ба истироҳат ҷалб карда шудаанд. Дар истироҳатгоҳи «Зимчуруд» дар басти дуюм 250 нафар кӯдакону наврасон, аз ҷумла 30 нафар хонандагони мактаб-интернат ва дар истироҳатгоҳи «Файзи Истиқлол» 450 нафар наврасон ба истироҳату солимгардонӣ фаро гирифта шудаанд. Зимни мулоқот муовини вазири маориф ва илми Ҷумҳурии Тоҷикистон Равшан Каримзода ба ҳайати кормандони истироҳатгоҳҳо барои фароҳам овардани шароити мусоид миннатдорӣ баён намуда, ҷиҳати омодагӣ ба басти сеюм супоришҳои мушаххас дод.
61
02.07.2025