10.02.2026
10 феврали соли 2026 бо дастгирии Мақомоти иҷроияи ҳокимияти давлатии ноҳияи Шоҳмансур дар Муассисаи таҳсилоти томактабии №44 бо иштироки муовини раиси ноҳия, сарпарасти соҳа З. Зуҳурзода, мудири шуъбаи маориф А. Бобозода, роҳбарони муассисаҳои томактабии ҳудуди ноҳия дар доираи омодагӣ ва таҷлили 35 - солагии Истиқлолияти давлатии Ҷумҳурии Тоҷикистон байни тарбиягирандагони муассисаҳои таҳсилоти томактабии ноҳия ҷиҳати амалигардонии "Бистсолаи омўзиш ва рушди илмҳои табиатшиносӣ, дақиқ ва риёзӣ дар соҳаи илму маориф" эълон гардидани солҳои 2020-2040", “Стратегияи омӯзиш ва рушди илмҳои табиатшиносӣ, дақиқ ва риёзӣ дар соҳаи маориф ва илм дар давраи то соли 2030" даври ноҳиявии Озмуни шаҳрии "Ахтаракони ҳисобдон" баргузор гардид.
Озмун бо мақсади баланд бардоштани ташаккули малакаҳои фаъолияти маърифатӣ, маҳорати дарки яклухту томи ҳаёти атроф ва истифодаи ахборот барои ҳалли масъалаҳои ҳаётан муҳим, рушди маҳорату малакаи фикррониву мушоҳида, муқоиса, ҷудо намудан ва хулосабарорӣ намудан, ташаккули тасаввуротҳои оддитарини математикӣ тартиб додану ҳал намудани масъалаҳои математикӣ, дарк кардан ва ҳал кардани муаммоҳои арифметикӣ, сайқал додани маҳорати ҷамъу тарҳ кардани рақамҳо, тақвияти неруи зеҳнӣ, рушди малакаҳои таҳлилӣ ва тафаккури мантиқӣ, дарёфти кӯдакони болаёқату боистеъдод, баланд бардоштани маҳорати касбии мураббиёну омўзгорони муассисаҳои таҳсилоти томактабӣ ва паҳн намудани таҷрибаи пешқадами онҳо доир мегардад.
Дар озмун кўдакони гурўҳи калон ва гурўҳи омодагӣ ба мактаби муассисаҳои таълимии томактабии (5-7 сола) новобаста аз шакли моликият ва тобеият иштирок менамоянд.
Иштирокчиёни озмун ба гурўҳҳои зерин ҷудо карда мешаванд:
- тарбиягирандагони гурўҳи калон (5-6 -сола);
- тарбиягирнадагони гурўҳи омодагӣ (6-7-сола).
Дар вақти баҳогузорӣ ва холгузорӣ ба маҳорату малакаи ҳал кардани мисолу масъалаҳои математикӣ, тафаккури мантиқии кӯдакон бартарӣ дода мешавад.
Озмун асосан бо забони тоҷикӣ сурат гирифта, ба довталабоне, ки дар гурӯҳҳои таълим бо забони ғайритоҷикӣ ба таълиму тарбия фаро гирифта шудаанд, имконияти бо забонҳои хориҷӣ (русӣ, англисӣ) баромад кардан дода мешавад.
Маҳорату истеъдоди иштирокчиёни озмун аз рӯи талаботи зерин муайян карда мешавад:
- санҷиши тафаккури математикӣ (диктанти математикӣ)
- ҳалли масъалаи математикӣ аз рӯи расми пешниҳодшуда дар тахта ва ҳисоб карда тавонистани амалҳо (кам ва зиёд кардан);
- бо истифодаи шаклҳои геометрӣ сохтани ашёву манзараҳо (тибқи супориш);
- ҳалли муаммоҳои математикӣ;
- дар маводҳои таълимӣ муайян карда тавонистани тасаввуротҳо оид ба вақту фазо ва тарафҳо;
- маҳорати истифодаи маводҳои таълимӣ ва бозичаҳои тафаккурро таҳрикдиҳанда (сохтани шаклҳои геометрӣ аз қоғаз, расму манзараҳо аз лото, лего, (пазлҳо, мазайкаҳо), пирамидаҳо ва истифода бурда тавонистани кубик - рубик).
Ғолибон аз ҷониби ташкилкунандагони озмун ба таври моддию маънавӣ ҳавасманд гардонида мешаванд.
Хабарҳои дигар
-
ФЕСТИВАЛИ БАЙНАЛМИЛАЛИИ ДОНИШГОҲҲОИ ХОРИҶӢ – ҚАДАМИ МУҲИМ ДАР РУШДИ ҲАМКОРИҲО Дар толори хурди раёсати Донишгоҳи давлатии Хуҷанд ба номи академик Бобоҷон Ғафуров аз ҷониби муовини вазири маориф ва илми Ҷумҳурии Тоҷикистон Лутфия Абдухолиқзода ҷаласаи кумитаи тадорукоти сеюмин Фестивал-намоишгоҳи байналмилалии донишгоҳҳои давлатҳои хориҷӣ баргузор гардид. Дар ҷаласа ректорон ва директорони муассисаҳои таҳсилоти олии касбии вилояти Суғд иштирок намуданд. Зимни баррасии масъалаҳо Лутфия Абдухолиқзода таъкид кард, ки дар доираи сиёсати маорифпарваронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон густариши ҳамкориҳои байналмилалӣ дар соҳаи маориф ва илм аҳаммияти махсус дорад. Ба гуфтаи муовини вазири маориф ва илми Ҷумҳурии Тоҷикистон Лутфия Абдухолиқзода баргузории чунин чорабиниҳо барои таҳкими робитаҳои илмӣ, ҷалби довталабон ва муаррифии имкониятҳои муассисаҳои таҳсилоти олӣ заминаи мусоид фароҳам меорад. Ҳамзамон, масъулини муассисаҳои таҳсилоти олӣ вазифадор гардиданд, ки ҷиҳати дар сатҳи баланд баргузор намудани фестивал омодагии ҳамаҷониба дида, дастовардҳои худро ба таври шоиста муаррифӣ намоянд. Қайд гардид, ки Фестивал-намоишгоҳи байналмилалии донишгоҳҳои давлатҳои хориҷӣ рӯзҳои 9-10 апрел дар Қасри варзиши шаҳри Хуҷанд баргузор мешавад. Интизор меравад, ки чорабинӣ бо иштироки васеи донишгоҳҳои хориҷӣ ва довталабон баргузор гардида, ба рушди минбаъдаи низоми таҳсилоти олӣ ва тақвияти ҳамкориҳои байналмилалӣ мусоидат намояд. Дар ҷамъбаст ректори Муассисаи давлатии таълимии Донишгоҳи давлатии Хуҷанд ба номи академик Бобоҷон Ғафуров Набизода Мирзотоҳир Сайфиддин изҳор намуд, ки баргузории Фестивал-намоишгоҳи байналмилалии донишгоҳҳои давлатҳои хориҷӣ дар сатҳи баланд таъмин гардида, он ба таҳкими ҳамкориҳои байналмилалӣ, табодули таҷрибаи илмӣ ва густариши имкониятҳои таҳсил барои ҷавонон мусоидат хоҳад кард.
47
11.04.2026 -
РАФТИ ИҶРОИ СТРАТЕГИЯИ МИЛЛИИ АРЗЁБИИ СИФАТИ ТАҲСИЛОТ БАРРАСӢ ГАРДИД Дар Вазорати маориф ва илми Ҷумҳурии Тоҷикистон вобаста ба рафти иҷрои Стратегияи миллии арзёбии сифати таҳсилот дар Ҷумҳурии Тоҷикистон барои давраи то соли 2044 ва Нақшаи миёнамуҳлати амалисозии он барои солҳои 2025-2027 таҳти раёсати муовини якуми вазири маориф ва илм Ҳомид Ҳошимзода ҷаласа баргузор гардид. Зимни баррасии масъала, Д Раҳматзода, сармутахассиси шуъбаи сифати таҳсилот, вобаста ба рафти иҷрои бандҳои стратегияи мазкур маълумот пешниҳод намуда, зикр кард, ки дар давраи ҳисоботӣ ҷиҳати татбиқи самараноки ҳадафҳои пешбинишуда як қатор чорабиниҳои муҳим амалӣ гардиданд. Аз ҷумла, такмили низоми арзёбии дохилӣ ва беруна, ҷорӣ намудани воситаҳои муосири санҷиши дониш, баланд бардоштани иқтидори касбии мутахассисони соҳа ва тақвияти заминаи меъёриву ҳуқуқӣ дар самти арзёбии сифати таҳсилот аз ҷумлаи дастовардҳои назаррас ба ҳисоб мераванд. Ҳамзамон, таъкид гардид, ки дар самти ҳамоҳангсозии механизмҳои арзёбӣ ва фарогирии якхелаи муассисаҳои таълимӣ ба низоми ягонаи арзёбӣ ҳанӯз ҳам масъалаҳои ҳалталаб боқӣ мемонанд. Дар идомаи ҷаласа иштирокчиён вобаста ба беҳтар намудани сифати иҷрои бандҳои стратегия, таҳкими назорати дохилӣ ва истифодаи самараноки имкониятҳои мавҷуда пешниҳодҳои мушаххас ироа намуданд. Муовини якуми вазири маориф ва илм зимни ҷамъбасти ҷаласа таъкид намуд, ки баланд бардоштани сифати таҳсилот дар муассисаҳои таълимии кишвар яке аз ҳадафҳои асосии Ҳукумати Ҷумҳурии Тоҷикистон ба шумор рафта, барои ноил шудан ба он моро зарур аст ҷиҳати иҷрои саривақтии бандҳои нақшаи чорабиниҳои стратегияи мазкур сарҷамъона кӯшиш намоем. Ҳамзамон, ба масъулин ҷиҳати таъмини иҷрои босифати вазифаҳои пешбинишуда дастуру супоришҳои мушаххас дода шуд. Маркази матбуоти Вазорати маориф ва илми Ҷумҳурии Тоҷикистон
56
10.04.2026 -
ТАҲКИМИ ҲАМКОРИҲО БО АССОТСИАТСИЯИ БАЙНАЛМИЛАЛИИ ТАҲСИЛОТИ ФАРОМИЛЛӢ (ITEA) Дар Вазорати маориф ва илми Ҷумҳурии Тоҷикистон мулоқоти муовини якуми вазир Ҳомид Ҳошимзода бо муовини директори Ассотсиатсияи байналмилалии таҳсилоти фаромиллӣ (ITEA) Бенҷамин Леонг баргузор гардид. Дар оғози вохӯрӣ муовини якуми вазир меҳмононро хайрамақдам гуфта, барои таваҷҷуҳ ва ҳавасмандии онҳо ҷиҳати рушди ҳамкориҳо бо Ҷумҳурии Тоҷикистон дар соҳаи маориф ва илм изҳори сипос намуд. Таъкид гардид, ки ин сафар ҳамчун қадами муҳим дар таҳкими робитаҳои байналмилалӣ ва густариши ҳамкориҳои фаромиллӣ арзёбӣ мешавад. Зимни мулоқот қайд карда шуд, ки соҳаи маориф ва илм дар Ҷумҳурии Тоҷикистон яке аз самтҳои афзалиятноки сиёсати давлатӣ ба ҳисоб рафта, дар доираи стратегияҳои миллӣ ба рушди таҳсилоти босифат, мутобиқ ба талаботи иқтисодиёти муосир ва бозори меҳнат диққати махсус дода мешавад. Ҳукумати Ҷумҳурии Тоҷикистон ба ислоҳоти низоми таҳсилот, рақамикунонӣ, тақвияти иқтидори институтсионалӣ ва густариши ҳамкориҳои байналмилалӣ аҳаммияти ҷиддӣ медиҳад. Ҷонибҳо имкониятҳои ҳамкориҳоро мавриди баррасӣ қарор дода, пешниҳодоти Ассотсиатсияро ҳамчун заминаи мусоид барои роҳандозии ҳамкориҳои мутақобилан судманд арзёбӣ намуданд. Аз ҷумла, самтҳои муҳими ҳамкорӣ таҳия ва татбиқи барномаҳои муштараки таълимӣ, навсозии барномаҳои таълимӣ бо дарназардошти талаботи бозори меҳнат, тақвияти мубодилаи академӣ ва барномаҳои таҷрибаомӯзӣ, рушди иқтидори институтсионалӣ ва такмили ихтисоси кадрҳо, инчунин дастгирии раванди рақамикунонии соҳаи маориф арзёбӣ гардиданд. Таъкид шуд, ки татбиқи чунин ташаббусҳо метавонад ба баланд бардоштани сатҳи рақобатпазирии хатмкунандагон, воридшавии муассисаҳои таҳсилоти олӣ ба фазои байналмилалии таҳсилот ва рушди иқтидори инсонӣ мусоидат намояд. Ҳамзамон, ҷонибҳо зарурати муайян намудани самтҳои афзалиятноки ҳамкорӣ, интихоби лоиҳаҳои пилотӣ, таҳияи харитаи роҳ бо нишондиҳандаҳои мушаххаси натиҷа ва ҷалби шарикони байналмилалӣ ва манбаъҳои маблағгузориро муҳим арзёбӣ намуданд. Зикр гардид, ки ҳамкориҳо бояд хусусияти амалӣ дошта, ба натиҷаҳои мушаххас дар шакли барномаҳо ва лоиҳаҳои муштарак оварда расонанд. Дар фарҷоми мулоқот Вазорати маориф ва илм омодагии худро ҷиҳати мусоидат ба ҳамоҳангсозии ҳамкориҳо бо муассисаҳои таҳсилоти олӣ, дастгирии ташаббусҳои муштарак ва иштирок дар таҳияи барномаҳо ва лоиҳаҳои муштарак изҳор намуд. Ҷонибҳо изҳори итминон карданд, ки натиҷаҳои мулоқоти имрӯза метавонанд заминаи устувор барои оғози ҳамкориҳои дарозмуддат ва самаранок гардида, ба рушди минбаъдаи соҳаи маориф ва илм мусоидат хоҳанд кард. Маркази матбуоти Вазорати маориф ва илми Ҷумҳурии Тоҷикистон
67
10.04.2026
