25.06.2026
25 июни соли 2026 дар толори Муассисаи давлатии «Китобхонаи миллӣ»-и Дастгоҳи иҷроияи Президенти Ҷумҳурии Тоҷикистон мизи мудаввар оид ба муаррифии «Барномаи нави таҳсилотӣ аз рӯйи ихтисосҳои математика ва забон ва адабиёти тоҷик, курси нави методикаи таълими математика ва забон ва адабиёти тоҷик ва нақшаи баргузории озмоиш» баргузор гардид.
Дар чорабинӣ муовини якуми вазири маориф ва илми Ҷумҳурии Тоҷикистон Ҳомид Ҳошимзода, мудири бахши маорифи ЮНИСЕФ дар Тоҷикистон Наоко Хосака, намояндагони Вазорати маориф ва илм, намояндаи Бонки исломии рушд, директори Маркази ҷумҳуриявии таълимию методии назди Вазорати маориф ва илми Ҷумҳурии Тоҷикистон, роҳбарон ва аъзои маъмурияти Донишгоҳи давлатии омӯзгории Тоҷикистон ба номи Садриддин Айнӣ, Донишгоҳи давлатии Бохтар ба номи Носири Хусрав, Донишгоҳи давлатии Кӯлоб ба номи Абуабдуллоҳи Рӯдакӣ, Донишкадаи омӯзгории Тоҷикистон дар ноҳияи Рашт, Донишкадаи омӯзгории Тоҷикистон дар шаҳри Панҷакент, Донишгоҳи давлатии Хуҷанд ба номи академик Бобоҷон Ғафуров, инчунин намояндагони ЮНИСЕФ, ЮНЕСКО ва мушовирони миллӣ иштирок намуданд.
Чорабиниро муовини якуми вазири маориф ва илм ифтитоҳ намуда, аҳаммияти таҷдиди барномаҳои таҳсилотии муассисаҳои таҳсилоти олии касбиро дар заминаи талаботи муосири низоми маориф ва мутобиқ намудани муҳтавои таълим ба меъёрҳои байналмилалӣ таъкид намуд. Зикр гардид, ки таҳия ва татбиқи барномаҳои нави таҳсилотӣ қадами муҳим дар самти баланд бардоштани сифати омодасозии омӯзгорони оянда, тақвияти салоҳиятҳои касбии онҳо ва рушди низоми таҳсилоти омӯзгорӣ дар мамлакат ба ҳисоб меравад.
Дар идомаи чорабинӣ мудири бахши маорифи ЮНИСЕФ дар Тоҷикистон баромад намуда, аз ҳамкории самараноки ЮНИСЕФ бо Вазорати маориф ва илми Ҷумҳурии Тоҷикистон ёдовар шуд. Қайд гардид, ки ЮНИСЕФ дар самти такмили барномаҳои таълимӣ, баланд бардоштани сифати таҳсилот ва рушди касбии омӯзгорон пайваста дастгирӣ менамояд. Мавсуф таҳияи барномаҳои нави таҳсилотӣ ва курсҳои методикаи таълимро қадами муҳим дар роҳи ислоҳоти соҳаи маориф арзёбӣ намуда, омодагии ЮНИСЕФ-ро барои идомаи ҳамкорӣ ва дастгирии татбиқи онҳо таъкид кард.
Чорабинии мазкур дар ҳамкории муштараки зерсохторҳои Вазорати маориф ва илми Ҷумҳурии Тоҷикистон ва бо дастгирии шарикони рушд -ЮНИСЕФ ба роҳ монда шуд.
Дар идомаи мизи мудаввар сардори раёсати таълими Донишгоҳи давлатии Хуҷанд ба номи академик Бобоҷон Ғафуров С. Рабизода оид ба барномаҳои таҳсилотӣ ва нақшаҳои таълимии ихтисосҳои забон ва адабиёти тоҷик ва математика маърӯза намуда, муҳтавои барномаҳои нави таҳсилотӣ, сохтор ва таркиби нақшаҳои таълимӣ, инчунин имкониятҳои мутобиқсозии онҳоро ба талаботи муосири низоми таҳсилот шарҳ дод. Зикр гардид, ки барномаҳои таҳияшуда бо дарназардошти стандартҳои давлатии таҳсилот, талаботи бозори меҳнат ва рушди салоҳиятҳои касбии омӯзгорони оянда омода гардидаанд.
Дар раванди кори мизи мудаввар муҳокимаҳои судманд ва мубодилаи афкори созанда байни намояндагони Вазорати маориф ва илми Ҷумҳурии Тоҷикистон, муассисаҳои таҳсилоти олии касбӣ, шарикони рушд ва коршиносони соҳа баргузор гардид. Иштирокчиён доир ба муҳтавои барномаҳои нави таҳсилотӣ, курсҳои таҷдидшудаи методикаи таълими математика ва забон ва адабиёти тоҷик, инчунин роҳҳои самараноки татбиқи онҳо дар муассисаҳои таҳсилоти олии кишвар андешаронӣ намуданд.
Зимни муҳокимаҳо масъалаҳои вобаста ба рушди салоҳиятҳои касбии омӯзгорони оянда, такмили таҷрибаи омӯзгорӣ, истифодаи технологияҳои муосири таълимӣ ва мутобиқ намудани мазмуни таҳсилот ба талаботи замони муосир мавриди баррасии ҳамаҷониба қарор гирифтанд. Иштирокчиён ҳамчунин оид ба механизми баргузории озмоиши барномаҳо, тартиби мониторинг ва арзёбии натиҷаҳои он пешниҳодҳои мушаххас ироа намуданд.
Дар фарҷоми чорабинӣ иштирокчиён омодагии худро ҷиҳати идомаи ҳамкориҳои судманд, дастгирии раванди озмоиш ва саҳмгузорӣ дар такмили минбаъдаи барномаҳои таҳсилотӣ иброз намуда, баргузории чунин чорабиниҳоро барои рушди соҳаи маориф муҳим ва саривақтӣ арзёбӣ карданд. Мизи мудаввар дар фазои ҳамдигарфаҳмӣ ва ҳамкории созанда ба анҷом расид.
Хабарҳои дигар
-
Қабули қатъномаи Тоҷикистон зери унвони “Даҳсолаи байналмилалии таҳкими сулҳ ба хотири наслҳои оянда” Бегоҳии 25 июн Маҷмаи Умумии Созмони Милали Муттаҳид қатъномаи махсусро аз рӯи пешниҳоди Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зери унвони "Даҳсолаи байналмилалии таҳкими сулҳ ба хотири наслҳои оянда" қабул намуд. Тавассути қатъномаи мазкур, давлатҳои узв уҳдадории муштараки худро ҷиҳати пешбурди сулҳ, муколама ва ҳамбастагии байни наслҳо ҳамчун пояҳои муҳимми таъмини некӯаҳволии наслҳои оянда тасдиқ карданд. Дар қатънома ҳадафҳо ва принсипҳои Оинномаи СММ, ба вежа иродаи «наҷоти наслҳои оянда аз офати ҷанг» ва уҳдадории ҳалли мусолиматомези баҳсҳо бозтоб ёфтааст. Он инчунин аҳамияти Эъломия ва Барномаи амал оид ба фарҳанги сулҳро ҳамчун ваколати умумиҷаҳонӣ барои таблиғи фарҳанги сулҳ ва адами хушунат эътироф менамояд. Тибқи муқаррароти ин санад, Маҷмаи Умумӣ солҳои 2027-2036-ро ҳамчун Даҳсолаи байналмилалии таҳкими сулҳ ба хотири наслҳои оянда эълон кардааст. Ҳадафҳои асосии Даҳсола аз мусоидат ба таҳкими сулҳ, ташвиқи муколама ва мусолиҳа, инчунин дастгирии таомул миёни наслҳо, аз ҷумла кӯдакон, ҷавонон ва пиронсолон, бо назардошти ниёзҳо ва манфиатҳои наслҳои оянда дар таҳияи сиёсат ва равандҳои қабули қарорҳо иборат мебошанд. Қатънома саҳми давлатҳои узв, роҳбарон ва халқҳоеро, ки тавассути равандҳои сиёсии фарогир, чораҳои эътимодбахш, барқарорсозии пас аз низоъ ва сармоягузориҳои дарозмуддат ба ваҳдати иҷтимоӣ дар таҳкими сулҳ, оштӣ, муколама ва ваҳдати миллӣ саҳм гузоштаанд, истиқбол мекунад. Қатънома хотирнишон месозад, ки ин таҷрибаҳои миллӣ ҳамчун манбаи арзишманди илҳомбахшӣ барои наслҳои имрӯза ва оянда хизмат мекунад. Илова бар ин, дар қатънома аз уҳдадориҳои зимни Саммити оянда дар соли 2024 қабулшуда, инчунин аз қабули "Паймони оянда", ки дар он кишварҳои узв баҳри тақвияти ҳамкорӣ ҷиҳати ҳифзи манфиатҳои наслҳои оянда уҳдадор шудаанд, истиқбол карда мешавад. Дар он инчунин таҳаввулоти мусбат дар Осиёи Марказӣ, хусусан талошҳои Тоҷикистон, Қирғизистон ва Ӯзбекистон дар амри ҳалли мусолиматомези масъалаҳои сарҳадӣ, аз ҷумла имзои созишномаҳои дахлдор истиқбол карда мешавад. Қатънома аз Дабири Кулл, ниҳодҳои махсусгардонидашуда, комиссияҳои минтақавӣ ва дигар ниҳодҳои СММ дархост менамояд, ки ҷиҳати татбиқи Даҳсола дар ҳамкорӣ бо ҳукуматҳо ва ҷонибҳои манфиатдор мусоидат кунанд. Аз давлатҳои узв, созмонҳои ҷомеаи шаҳрвандӣ ва дигар шарикон ҷиҳати дастгирии татбиқи Даҳсола, аз ҷумла табодули таҷрибаву дониш даъват ба амал оварда шудааст. Шоёни зикр аст, ки қабули қатъномаи мазкур бо ташаббуси навбатии Роҳбари давлати мо дар Маҷмаи Умумии СММ ба шароите рост меояд, ки дар минтақаҳои гуногуни сайёра миллионҳо нафар мардуми осоишта ба хавфу таҳдидҳои гуногуни амниятӣ ва ҷангҳои хонумонсӯз дучор мебошанд. Он бешак аз нақши сулҳофару ваҳдатпарвари миллати тоҷик сарчашма гирифта, ҳамакнун саҳме дар таҳкими пешбурди рӯзномаи ҷаҳонии фарҳанги сулҳ хоҳад буд. Гузашта аз ин, иқдоми мазкур аз сӯи шахсияте ба мисли Эмомалӣ Раҳмон ҳамчун Роҳбари давлате, ки мардумонаш даҳшати ҷанги таҳмилии шаҳрвандиро аз сар гузарониданд, ба қадри сулҳу оромӣ, суботи сиёсӣ ва ваҳдати миллӣ мерасанд ва сабақҳои талхи он фоҷиаи миллиро ҳаргиз фаромӯш намекунанд, амри саривақтӣ ва зарурӣ мебошад.
6
26.06.2026 -
ВАҲДАТИ МИЛЛАТ САОДАТИ МИЛЛАТ АСТ! Паёми табрикии вазири маориф ва илми Ҷумҳурии Тоҷикистон Раҳим Саидзода ба муносибати Рӯзи Ваҳдати миллӣ Устодон ва шогирдони азиз! Муҳтарам аҳли маориф ва илми кишвар! Фарорасии Рӯзи Ваҳдати миллиро, ки дар Ватани маҳбубамон ҳар сол бо шукӯҳу тантана ҳамчун шукрона аз ободии диёр ва пойдории истиқлолу сулҳу ваҳдат таҷлил мешавад, ба шумо ва ба тамоми мардуми шарифу сарбаланди ҷумҳурӣ самимона табрик мегӯям. Ваҳдати миллӣ, ки дар натиҷаи талошҳои пайгиронаву бардавом ва ҷоннисоронаи Президенти Ҷумҳурии Тоҷикистон муҳтарам Эмомалӣ Раҳмон ва ба шарофати ақлу хирад ва иродаву матонати қавии халқи тоҷик ба даст омадааст, дар таърихи давлатдории тоҷикони шарафманду ватанапарвар марҳалаи навинеро ифтитоҳ бахшид. Ин марҳала тавъам бо созандагию бунёдкорӣ, ободонӣ ва дӯстию рафоқат аст. Таърих борҳо собит кардааст, ки тоҷикон табиатан халқи фарҳангию тамаддунофаранд ва ҳамеша ба сулҳу ҳамдилӣ, ба зиндагии осоишта арҷ мегузоранд. Ин буд, ки дар солҳои аввали Истиқлоли давлатӣ ҳамагон якдилона ва бо қатъият баҳри бартараф кардани ҷанги таҳмилии дохилӣ ҷидду ҷаҳд намуданд ва мамлакатро аз вартаи ҳалокат берун кашида, парчами ваҳдатро баланд афрохтанд. Тантанаи ваҳдати миллии тоҷикон ҷаҳониёнро ба ваҷд овард ва обрую эътибори Тоҷикистони соҳибистиқлолро дар арсаи олам боло бурд. Имрӯз ҷаҳониён Ватани азизи моро чун ошёни сулҳу ваҳдат, диёри тинҷу осуда ва маҳзари ташаббусҳои башардӯстона мешиносанду эътироф мекунанд. Ба шарофати ваҳдати миллӣ дар кишвар сатҳу сифати зиндагии мардум сол то сол беҳтару муназзамтар мегардад ва зина ба зина ҳадафҳои стратегии миллӣ дар амал татбиқ мешаванд. Ваҳдати миллӣ ба ҳаёту фаъолияти аҳли маориф низ таъсири файзбахш ва нақши пурсамар дорад. Барои баргузории ислоҳоти фарогири маориф, бунёди теъдоди зиёди кӯдакистонҳою муассисаҳои таҳсилоти миёнаи умумӣ, мактабҳои типи нав ва донишгоҳу донишкадаҳо ваҳдати миллӣ шароити созгор фароҳам овард. Имрӯз соҳаи маорифи мамлакат ҳамқадами замон буда, дар муҳимтарин бахшҳо, чун рақамикунонию корбарии ҳадафмандона аз зеҳни сунъӣ ва ривоҷи муносибатҳои байналмилалӣ ба комёбиҳои шоиста ноил гардидааст. Имсол мо Рӯзи Ваҳдати миллиро дар арафаи ҷашни пурифтихору нишотбахши кишвар – 35-солагии Истиқлоли давлатии Ҷумҳурии Тоҷикистон таҷлил менамоем, ки ин шукӯҳу шаҳомати онро боз ҳам меафзояд. Чунонки Асосгузории сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон зикр кардаанд, «имрӯз ҳисси худшиносию худогоҳӣ ва ҳувияти миллӣ, ифтихор аз Ватани соҳибихтиёру озод, пос доштани мероси таърихию арзишҳои фарҳангӣ ва дарки масъулияти шаҳрвандии мардуми тоҷик бамаротиб густаришу тақвият ёфтааст ва ин падидаи нек моро ба ояндаи дурахшони ҷомеаи демократӣ, ҳуқуқбунёд ва дунявӣ умеди қавӣ мебахшад». Дар ин ҷода боиси ифтихору шарафмандист, ки аҳли маорифу илми ҷумҳурӣ хеле фаъоланд, пайваста баҳри устуворию пойдории истиқлолу сулҳу ваҳдат дар кишвар талош меварзанд, дар таълиму тарбияи сазовори насли наврас, тақвияти хештаншиносию ҳувияти миллии аҳли ҷомеа ва тарғиби илму донишу фарҳанг кӯшишҳои ҳамешагию босамар доранд ва минбаъд низ дар ҷодаи ободонии Ватану рушди хираду маърифат пешсаф хоҳанд буд. Бори дигар аҳли маориф ва тамоми мардуми сарбаланди Тоҷикистонро ба ифтихори Рӯзи Ваҳдати миллӣ самимона муборакбод гуфта, барояшон зиндагии осоишта, ваҳдати поянда, иқболи нек ва дастовардҳои боз ҳам бештарро баҳри рушду шукуфоии Тоҷикистони соҳибистиқлол таманно менамоям. Ваҳдати миллии мо ҷовидону поянда бод!
4
26.06.2026 -
ДАР ВАЗОРАТ БАХШИДА БА ҚАБУЛИ ҚАТЪНОМАИ ТАЪРИХИИ СММ ҲАМОИШ БАРГУЗОР ГАРДИД 26 июни соли 2026 дар Вазорати маориф ва илми Ҷумҳурии Тоҷикистон ба муносибати қабули қатъномаи Маҷмаи Умумии Созмони Милали Муттаҳид таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027-2036», ки бо пешниҳоди Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон қабул гардид, ҳамоиш баргузор шуд. Дар ҳамоиш вазири маориф ва илми Ҷумҳурии Тоҷикистон Раҳим Саидзода, муовинони вазир, сардорони раёсату шуъбаҳои дастгоҳи марказӣ ва роҳбарони муассисаҳои тобеи вазорат иштирок намуданд. Вазири маориф ва илм зимни ифтитоҳи ҳамоиш қабули ин қатъномаро рӯйдоди муҳими таърихӣ ва дастоварди навбатии сиёсати хориҷии Ҷумҳурии Тоҷикистон арзёбӣ намуда, таъкид кард, ки ташаббуси навбатии Пешвои миллат муҳтарам Эмомалӣ Раҳмон бори дигар мақому нуфузи Тоҷикистонро ҳамчун кишвари сулҳпарвар ва ташаббускори масъалаҳои муҳими байналмилалӣ дар арсаи ҷаҳон таҳким бахшид. Зикр гардид, ки қабули ин санади байналмилалӣ дар арафаи таҷлили Рӯзи Ваҳдати миллӣ аҳаммияти рамзии хос дошта, маҳз сулҳу ваҳдати миллӣ барои Тоҷикистон заминаи рушди устувор, пешрафти иқтисодиву иҷтимоӣ ва иштироки фаъолона дар ҳалли масъалаҳои ҷаҳониро фароҳам овардааст. Вазир бо истинод ба Паёми шодбошии Президенти Ҷумҳурии Тоҷикистон муҳтарам Эмомалӣ Раҳмон таъкид намуд, ки “Сулҳ танҳо набудани ҷанг нест. Сулҳ фарҳанг аст. Сулҳ масъулият аст. Сулҳ эҳтиром ба шаъну шарафи инсон аст. Сулҳ таъмин намудани адолат ва имкониятҳои баробар барои ҳамаи инсоният аст”. Ба таъкиди вазир ин андешаҳо моҳияти воқеии ташаббуси Тоҷикистонро таҷассум намуда, барои низоми маориф низ вазифаҳои навро дар самти тарбияи насли сулҳпарвар, ватандӯст ва дорои фарҳанги баланди шаҳрвандӣ муайян месозанд. Дар ҳамоиш гуфта шуд, ки Ҷумҳурии Тоҷикистон дар даврони соҳибистиқлолӣ таҳти роҳбарии Пешвои миллат тавонист сиёсати хориҷии худро бар пояи сулҳ, ҳамкорӣ ва ҳамдигарфаҳмӣ роҳандозӣ намояд ва ташаббусҳои байналмилалии кишвар дар самтҳои об, рушди устувор, ҳифзи пиряхҳо, тағйирёбии иқлим ва дигар масъалаҳои глобалӣ аз ҷониби ҷомеаи ҷаҳонӣ мавриди пуштибонӣ қарор гирифтаанд. Ҳамзамон таъкид гардид, ки муассисаҳои таълимӣ дар татбиқи ҳадафҳои даҳсолаи байналмилалии нав нақши калидӣ дошта, бояд тарбияи ҷавононро дар рӯҳияи сулҳпарварӣ, таҳаммулгароӣ, эҳтиром ба арзишҳои миллӣ ва умумибашарӣ, инчунин муқовимат ба ҳама гуна зуҳуроти ифротгароӣ боз ҳам тақвият бахшанд. Сипас, сардори шуъбаи таъминоти ҳуқуқии Вазорати маориф ва илм А. Ҷӯразода дар мавзуи “Ташаббуси Пешвои миллат оид ба қабули қатъномаи Созмони Милали Муттаҳид “Даҳсолаи таҳкими сулҳ ба хотири наслҳои оянда, солҳои 2027–2036” маъруза намуд. Мавсуф зимни баромади худ аҳаммияти сиёсӣ ва таърихии ташаббуси нави байналмилалии Пешвои миллатро таҳлил намуда, иброз дошт, ки он идомаи мантиқии сиёсати сулҳпарваронаи Ҷумҳурии Тоҷикистон буда, ба таҳкими сулҳи байналмилалӣ, рушди муколама, ҳамдигарфаҳмӣ ва ҳамбастагии байни наслҳо мусоидат менамояд. Қайд карда шуд, ки Тоҷикистон дар тӯли зиёда аз се даҳсолаи соҳибистиқлолӣ ҳамчун кишвари ташаббускор ва масъули ҷомеаи ҷаҳонӣ эътироф гардида, бо ибтикори Пешвои миллат як қатор қатъномаҳои муҳими Созмони Милали Муттаҳид дар самтҳои об, рушди устувор ва тағйирёбии иқлим қабул шудаанд. Дар маъруза ҳамчунин таъкид гардид, ки таҷрибаи сулҳи тоҷикон имрӯз ҳамчун намунаи муваффақи ҳалли низоъҳо тавассути музокирот ва ризоияти миллӣ дар сатҳи байналмилалӣ эътироф гардидааст. Аз ин рӯ, пешниҳоди Ҷумҳурии Тоҷикистон оид ба эълони “Даҳсолаи байналмилалии таҳкими сулҳ ба хотири наслҳои оянда” пешниҳоди кишварест, ки арзиши сулҳро бо таҷрибаи худ дарк намуда, мехоҳад ин таҷрибаро ба манфиати тамоми башарият истифода барад. Дар фарҷоми ҳамоиш иштирокчиён қабули қатъномаи Маҷмаи Умумии Созмони Милали Муттаҳидро дастоварди бузурги сиёсати хориҷии Ҷумҳурии Тоҷикистон ва самараи сиёсати хирадмандонаву сулҳҷӯёнаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон арзёбӣ намуда, омодагии худро барои саҳмгузорӣ дар татбиқи ҳадафҳои он ва тарбияи насли дорои маърифати баланд, фарҳанги сулҳ ва ҳисси баланди ватандӯстӣ изҳор доштанд. Маркази матбуоти Вазорати маориф ва илми Ҷумҳурии Тоҷикистон
6
26.06.2026
