21.08.2025
21-уми август Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар шаҳраки 192-и ноҳияи Шоҳмансури пойтахт Муассисаи таҳсилоти миёнаи умумии №4-ро мавриди баҳрабардорӣ қарор доданд.
Иншооти мазкур дар доираи тавааҷҷуҳу ғамхориҳои Сарвари давлат ба соҳаи маориф ва таълиму тарбияи насли наврас ва иқдомҳои созандаи Раиси шаҳри Душанбе муҳтарам Рустами Эмомалӣ аз ҳисоби маблағҳои буҷети Мақомоти иҷроияи ҳокимияти давлатии пойтахт бунёд гардидааст.
Ифтитоҳи иншооти нави соҳаи маориф дар идомаи тадбирҳои ободонӣ ба истиқболи ҷашни 35-солагии Истиқлоли давлатӣ ва оғози соли нави таҳсил барои омӯзгорону хонандагон ва сокинони ин маҳалла туҳфаи арзишманд унвон гардид.
Ба Сарвари давлат муҳтарам Эмомалӣ Рањмон иттилоъ доданд, ки бинои муассисаи таълимӣ аз се ошёна ва таҳхона иборат буда, барои 1450 нафар хонанда дар як баст пешбинӣ шудааст.
Иншоот бо назардошти талаботи соҳа, унсурҳои меъмории миллӣ ва ҷавобгӯ ба зарфиятҳои муосир бо сифати баланд сохта шуда, синфхона ва дигар кабинетҳои фаннӣ бо таҷҳизот ва аёнияти дарсӣ муҷаҳҳаз гардонида шудааст.
Бинои дигари бунёдгардида дар муассисаи таълимӣ аз 4 ошёна иборат буда, барои синфҳои ибтидоӣ пешбинӣ гардидааст.
Сохтмони бинои Муассисаи таҳсилоти миёнаи умумии №4 соли 2024 оғоз гардида, дар асоси лоиҳа мутобиқ ба талаботи муосир дар масоҳати 16 ҳазору 400 метри мураббаъ бунёд шудааст.
Аснои шиносоӣ бо шароиту имконоти ин муассисаи наву замонавӣ Пешвои миллат ба сифати корҳои сохтмонӣ баҳои баланд дода, саҳмгузорӣ дар соҳибилм шудани насли наврасро амали шоиста унвон намуданд.
Бинои муассиса дорои 64 синфхонаи муҷаҳҳаз бо муҳимтарин лавозимоти хониш, аз ҷумла 26 кабинети фаннӣ, мебошад.
Кабинетҳои фаннии химия, биология, физика, география, технологияи меҳнат, омодагии ибтидоии ҳарбӣ, инчунин синфхонаҳои технологияи иттилоотӣ ва лингафонӣ мутобиқ ба талабот сохта шуда, ба ташаккули зеҳну тафаккури хонандагон заминаи мусоид хоҳад гузошт.
Вобаста ба талаботи муосир муассиса дорои зиёда аз 70 компютери пайваст бо шабакаи байналмилалии интернет мебошад.
Озмоишгоҳҳои фаннӣ ва китобхона бо теъдоди 10 ҳазор нусха адабиёт, гӯшаи ҳунарҳои мардумӣ ва синфхонаҳои муҷаҳҳаз бо асбоби мусиқӣ барои рушди ҷаҳонбинии муҳассилин пешбинӣ гардидааст.
Толори барҳаво ва муҷаҳҳази варзишӣ дорои 40 ҷои нишаст буда, ба тарғибу ташаккули тарзи ҳаёти солим ва обутоби ҷисмонию рӯҳии хонандагон мусоидат хоҳад кард. Майдончаи варзишӣ низ бо 135 ҷои нишаст аз бартариҳои дигари муассиса дар самти рушди тарбияи ҷисмонӣ ва варзиш унвон мешавад.
Муассисаи таълимӣ, ҳамчунин дорои толори маҷлис бо 386 курсӣ ва ошхонаи дорои 192 ҷои нишаст мебошад.
Дар иншооти наву замонавӣ барои инкишофи зеҳни кӯдакон, аз худ кардани донишҳои замонавӣ ва машғул шудани онҳо ба бозиҳои гуногуни шавқовар низ шароити хуб фароҳам оварда шудааст.
Зимни шиносоӣ бо шароити таълиму тарбия Сарвари давлат муҳтарам Эмомалӣ Раҳмон таваҷҷуҳи масъулини соҳаро ба истифодаи самарабахш аз имкониятҳои фароҳамшуда, омӯзиши илмҳои дақиқ, забонҳои хориҷӣ ва расидан ба қадри дастовардҳои Истиқлоли давлатӣ ҷалб намуданд.
Пешвои миллат муҳтарам Эмомалӣ Раҳмон таъкид доштанд, ки бунёди биноҳои нав, ворид намудани технологияи муосир барои омӯзиш ва дигар тадбирҳои андешидаи Ҳукумати кишвар ба таъмини имрӯзу фардои босаодати насли наврас равона карда шудааст. Аз ин лиҳоз таълимгирандагонро зарур аст, ки хонанд, илм омӯзанд, соҳибкасбу забондон ва вориси шоистаи гузаштагони хеш бошанд
Хабарҳои дигар
-
БОЗДИДИ ВАЗИРИ МАОРИФ ВА ИЛМ АЗ РАФТИ СОХТМОНИ БИНОИ НАВИ МТМУ №26-И НОҲИЯИ МИР САЙИД АЛИИ ҲАМАДОНӢ Вазири маориф ва илми Ҷумҳурии Тоҷикистон Раҳим Саидзода аз ҷараёни сохтмони бинои нави Муассисаи таҳсилоти миёнаи умумии №26 дар деҳаи Дӯстии ноҳияи Мир Сайид Алии Ҳамадонӣ дидан намуд. Зимни боздид иттилоъ дода шуд, ки бинои нави муассисаи таълимӣ аз ду ошёна иборат буда, барои 480 нафар хонанда дар ду баст пешбинӣ гардидааст. Иншооти мазкур бо риояи меъёрҳои муосири сохтмонӣ бунёд шуда, дорои синфхонаҳои барҳаво, утоқҳои фаннӣ, озмоишгоҳҳо ва дигар шароити зарурӣ барои таълиму тарбияи босифат мебошад. Қайд гардид, ки бинои нави муассисаи таълимӣ тибқи нақша дар нимсолаи аввали соли 2026 ба истифода дода мешавад. Иҷрои ин лоиҳа имкон медиҳад, ки мушкилоти норасоии ҷойи нишаст бартараф гардида, сатҳи фарогирии хонандагон ба таҳсил беҳтар шавад ва инфрасохтори соҳаи маориф дар маҳал рушд ёбад. Бояд гуфт, сохтмон бинои мазкур аз ҷониби Вазорати маориф ва илми Ҷумҳурии Тоҷикистон дар доираи амалигардонии лоиҳаи муштараки Бонки Исломии Рушд/Шарикии Глобалӣ дар соҳаи маориф оид ба дастгирии татбиқи Стратегияи рушди маорифи Ҷумҳурии Тоҷикистон барои давраи то соли 2030 аз ҷониби Гурӯҳи татбиқи лоиҳаи «Таҷдид ва идомаи сохтмони мактабҳои миёна» ба нақша гирифта шудааст.
52
26.01.2026 -
ШИНОСОИИ МУОВИНИ ВАЗИРИ МАОРИФ ВА ИЛМ АЗ ВАЗЪИ ТАЪЛИМУ ТАРБИЯ ДАР МУАССИСАҲОИ ТАЪЛИМИИ НОҲИЯИ ТОҶИКОБОД Муовини вазири маориф ва илми Ҷумҳурии Тоҷикистон Равшан Каримзода дар доираи сафари корӣ ба ноҳияи Тоҷикобод аз фаъолияти якчанд муассисаҳои таълимӣ шиносӣ пайдо намуд. Дар ин сафар муовини вазир аввалан ба муассисаҳои таҳсилоти миёнаи умумии №13 ва №17 ва ҳамчунин ба Муассисаи таҳсилоти томактабии №1-и ноҳия ташриф оварда, бо муҳити таълимӣ, шароит ва дастовардҳои хонандагон ва омӯзгорон аз наздик шинос шуд. Зимни боздид муовини вазир ба вазъи таълиму тарбия, давомоти хонандагон, тартиботи раванди дарсҳо, дастрасии лавозимоти таълимӣ, таъминот бо кадрҳои омӯзгорӣ, риояи либосҳои тавсиявӣ, насби шиору овезаҳо таваҷҷуҳ намуд. Мавсуф бо омӯзгорону хонандагон вохӯрӣ намуда, дар бораи роҳҳои беҳтар кардани раванди таълим, баланд бардоштани сатҳи саводи илмӣ ва ҷалби бештари хонандагон ба маҳфилҳои беруназсинфии фаннӣ табодули назар намуд. Муовини вазир ҳамчунин ба масъулини муассисаҳои таълимӣ дастур дод, ки барои рушду такмили омӯзиши забонҳои хориҷӣ, истифодаи технологияи иттилоотӣ ва таҳкими малакаҳои компютерии хонандагон чораҳои амалӣ андешанд. Дар ҷараёни боздид муовини вазир ба роҳбарону омӯзгорон тавсия дод, ки бо истифода аз тамоми имкониятҳо муҳити таълимиро ҷоннок сохта, ҳамзамон назорати қатъӣ бар риояи қоидаҳои тартибот ва таълиму тарбияро таъмин намоянд.
19
26.01.2026 -
ДАР НАЗДИ МТМУ №30-И НОҲИЯИ ҲАМАДОНӢ БИНОИ ИЛОВАГИИ ТАЪЛИМӢ СОХТА МЕШАВАД Вазири маориф ва илми Ҷумҳурии Тоҷикистон Раҳим Саидзода дар якҷоягӣ бо иҷрокунандаи вазифаи раиси ноҳияи Мир Сайид Алии Ҳамадонӣ Фаррухуддин Набизода аз қитъаи замини ҷудогардида ҷиҳати сохтмони иловагӣ дар назди Муассисаи таҳсилоти миёнаи умумии №30 барои бартараф намудани норасоии ҷойи нишаст боздид намуданд Зимни боздид иттилоъ дода шуд, ки бинои нави муассисаи таълимӣ барои 480 нафар хонанда дар ду баст пешбинӣ гардида, дар назар аст сохтмони он дар нимсолаи якуми соли ҷорӣ оғоз ёбад. Сохтмон аз ҳисоби маблағҳои мутамаркази буҷети давлатӣ аз ҷониби Вазорати маориф ва илми Ҷумҳурии Тоҷикистон амалӣ гардида, дар муҳлати муқарраргардида бо риояи меъёрҳои муосири сохтмонӣ бо сифати баланд ба анҷом расонида хоҳад шуд. Ҳамчунин, зимни ин боздид масъалаи таъмиру азнавсозии бинои кӯҳнаи назди муассиса мавриди баррасӣ қарор гирифт. Тавре зикр гардид, баъди анҷоми корҳои таъмирӣ дар ин мавзеъ таъсиси муассисаи таҳсилоти томактабӣ дар назар дошта шудааст, ки ба ҷалби бештари кӯдакон ба таҳсилоти томактабӣ мусоидат хоҳад кард. Вазири маориф ва илм дар ҷараёни суҳбат аз таваҷҷуҳи доимии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба соҳаи маориф ёдовар шуда, таъкид намуд, ки маҳз бо дастгирии пайвастаи Пешвои миллат сохтмони муассисаҳои таълимӣ ва беҳтар гардидани инфрасохтори соҳа дар тамоми кишвар мунтазам роҳандозӣ мегардад. Дар идома вазири маориф ва илм вобаста ба пайваста зиёд гардидани музди маош ва болоравии мақоми омӯзгорон ибрози назар намуда, таъкид кард, ки ҳамасола дар заминаи таваҷҷуҳи Сарвари давлат музди маоши омӯзгорон марҳила ба марҳила боло бурда мешавад. Ҳамзамон, ҷиҳати таҳкими мақоми иҷтимоии омӯзгор дар кишвар Қонуни Ҷумҳурии Тоҷикистон “Дар бораи мақоми омӯзгор” қабул гардидааст.
27
26.01.2026
