11.12.2025
11 декабри соли ҷорӣ дар бинои Донишгоҳи давлатии омўзгории Тоҷикистон ба номи Садриддин Айнӣ маросими ҷамъбастии озмуни ҷумҳуриявии «Нобиғаи наврас» миёни хонандагони муассисаҳои таҳсилоти миёнаи умумӣ баргузор гардид.
Чорабинӣ бо иштироки муовини вазири маориф ва илми Ҷумҳурии Тоҷикистон Каримзода Равшан, муовини якуми ректори Донишгоҳи давлатии омўзгории Тоҷикистон ба номи Садриддин Айнӣ Айнулозода Наҳтулло, ҳайати роҳбарият ва кормандони маркази ҷумҳуриявӣ омӯзгорон ва наврасони лаёқатманд аз вилоят ва шаҳру ноҳияҳои ҷумҳурӣ доир гардид.
Зимни суханронӣ муовини вазири маориф ва илм бо такя ба сиёсати маорифпарваронаи давлат ва Ҳукумати Ҷумҳурии Тоҷикистон таҳти роҳбарии Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон, қайд намуд, ки омӯзиши фанҳои табиатшиносӣ, дақиқ ва риёзӣ барои пешрафти иқтисодиву иҷтимоии ҷомеа, рушду такомули тафаккури насли наврас ва омода намудани кадрҳои баландихтисос аҳамияти басо калон дорад.
Озмуни мазкур бо мақсади ҷалби хонандагон ба илмҳои дақиқ, дарёфти истеъдодҳои нав, таҳкими тафаккури муҳандисӣ ва баланд бардоштани қобилияти таҳлилӣ ташкил гардида, аз чор марҳила - мактабӣ, (ноҳиявӣ, шаҳрӣ), вилоятӣ ва ҷумҳуриявӣ иборат буд.
Дар тамоми марҳилаҳо зиёда аз 2720 нафар хонандагони фаъол ва соҳибистеъдоди муассисаҳои таҳсилоти миёнаи умумии ҷумҳурӣ иштирок намуданд.
Дар даври ҷумҳуриявӣ хонандагон дониши худро аз рӯи чор номинатсия - математика, физика, химия, биология, нишон дода, тибқи натиҷаи баҳогузории ҳайати ҳакамони озмун сатҳи омодагии иштирокчиён назаррас баланд гардида, рақобати солим миёни наврасон таъмин шуд.
Дар анҷоми чорабинӣ ғолибон ва иштирокчиёни фаъол аз тарафи Маркази ҷумҳуриявии муассисаҳои таҳсилоти иловагӣ бо ифтихорнома, медал ва туҳфаҳои хотиравӣ сарфароз гардонида шуданд.
Хабарҳои дигар
-
Иштирок ва суханронӣ дар Форуми байналмилалии сулҳ ва эътимод дар Ашхобод 12 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Ашхободи Туркманистон дар Форуми байналмилалии сулҳ ва эътимод, ки дар доираи “Соли байналмилалии сулҳ ва эътимод, 2025” баргузор мегардад, иштирок ва суханронӣ намуданд. Дар оғози сухан Сарвари давлати мо ба роҳбарияти Туркманистон ва Созмони Милали Муттаҳид барои роҳандозии ин ҳамоиши байналмилалии муҳим арзи сипос намуда, мардуми Туркманистонро бо 30-солагии бетарафии доимии кишвар табрику таҳниат гуфтанд. Муҳтарам Эмомалӣ Раҳмон зимни суханронӣ аз рӯбарӯшавии ҷомеаи ҷаҳонӣ бо рақобати печидаи геосиёсӣ ва заиф шудани меъёрҳои ҳуқуқи байналмилалӣ ёдовар шуда, изҳор намуданд, ки болоравии таҳдиду хатарҳои ҷаҳони муосир боиси коҳиши суръати пешрафти иқтисодию иҷтимоӣ мегардад. Таъкид гардид, ки “сулҳ ва эътимод дар пешбурди муносибатҳои байналмилалӣ, коҳиш додани таҳдиду хатарҳо, муҳайёсозии шароити муносиб барои ҳамкорӣ ва рушди устувор дар арсаи ҷаҳонӣ нақши муҳимтарин мебозанд”. Ба андешаи муҳтарам Эмомалӣ Раҳмон, сулҳу эътимод имкон медиҳанд, ки мушкилоти печидаи ҷаҳони имрӯза дар фазои ҳамдигарфаҳмӣ ва масъулияти муштарак ҳалли худро пайдо намоянд. Дар ин робита таъкид гардид, ки паёмадҳои нохуши хатарҳои экологӣ, ба мисли тағйирёбии иқлим, обшавии босуръати пиряхҳо, олудашавии муҳити зист ва дигар мушкилот низ тадбирҳои муштараку ҳамбастаи ҷомеаи ҷаҳониро талаб менамояд. Сарвари давлати мо муҳтарам Эмомалӣ Раҳмон аз равандҳои ҷаҳонии Душанбе доир ба об ва муқовимат ба терроризм ёдовар шуда, таъкид доштанд, ки Тоҷикистон дар ҳалли мушкилоти глобалӣ пайваста саҳми муносиби худро мегузорад. Муҳтарам Эмомалӣ Раҳмон изҳор доштанд, ки “Тоҷикистон аз ҳамаи ташаббусҳо доир ба таҳкими сулҳу амонӣ дар ҷаҳон пайваста пуштибонӣ менамояд”. Дар ин робита аз пешниҳоди порсолаи Тоҷикистон ба СММ доир ба эълон намудани “Даҳсолаи таҳкими сулҳ дар ҷаҳон барои наслҳои оянда” бори дигар ёдоварӣ карда шуд. Дар хулосаи сухан Сарвари давлати мо муҳтарам Эмомалӣ Раҳмон “тантанаи сулҳ”-ро “гарави таъмини адолат, баробарӣ, эҳтироми ҳуқуқ ва озодиҳои инсон” номида, изҳор доштанд, ки “ҷомеаи ҷаҳонӣ ба ин арзиши воло бояд бо такя ба эътимод, гуфтугӯ ва ҳамкорӣ муносибати эҳтиёткорона дошта бошад”. Таъкид гардид, ки Тоҷикистон минбаъд низ омода аст, бо истифода аз анъанаҳои мақбули дипломатӣ, гуфтугӯи васеи созанда ва дигар воситаҳои сулҳомез дар таъмини амну субот ва рушди устувор саҳми намоёни худро гузорад.
53
12.12.2025 -
Оғози сафари корӣ ба Туркманистон 11 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо сафари корӣ вориди шаҳри Ашқободи Туркманистон шуданд. Дар саҳн ва толори фурудгоҳи байналмилалии Ашқобод Президенти Ҷумҳурии Тоҷикистон муҳтарам Эмомалӣ Раҳмонро Раиси Халқ Маслаҳатии Туркманистон муҳтарам Гурбангули Бердимухамедов ва дигар шахсони расмӣ гарму самимӣ истиқбол гирифтанд. Зимни ин сафар Сарвари давлат муҳтарам Эмомалӣ Раҳмон дар Форуми байналмилалии сулҳ ва эътимод иштирок менамоянд.
40
11.12.2025 -
Вохӯрӣ бо Президенти Туркманистон Сердар Бердимуҳамедов 11 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ҳошияи Форуми сулҳ ва эътимод дар шаҳри Ашхобод бо Президенти Туркманистон Сердар Бердимуҳамедов мулоқот намуданд. Дар мулоқот як зумра масоили вобаста ба таҳким ва густариши минбаъдаи ҳамкории гуногунҷанбаи ду кишвар баррасӣ шуд. Сарвари давлати мо муҳтарам Эмомалӣ Раҳмон таъкид доштанд, ки Тоҷикистон ҷонибдори дар руҳияи шарикии стратегӣ рушд додани ҳамкорӣ бо Туркманистон мебошад. Таваҷҷуҳи зиёд ба тақвияти ҳамкории тиҷоратию иқтисодӣ ва сармоягузорӣ, густариши робитаҳо дар соҳаҳои нақлиёт, энергетика, саноат, кишоварзӣ ва дигар самтҳо зоҳир гардид. Алоқамандии ҳарду кишвар ба густариши робитаҳои фарҳангию башарӣ таъкид гардид. Дар ҷараёни суҳбат, ҳамчунин, масъалаҳои ҳамкорӣ дар доираи созмонҳои минтақавию ҷаҳонӣ мавриди назари ҷонибҳо қарор доштанд.
42
11.12.2025
