МАКТАБУ МАОРИФ ДАР МЕҲВАРИ ПАЁМ
07.01.2025
Ҳамасола, аз ҷониби Президенти кишвар, муҳтарам Эмомалӣ Раҳмон самтҳои асосии сиёсати дохилӣ ва хориҷии кишвар барномарезӣ гардида, дар шакли паём ба мақоми олии қонунгузории кишвар Маҷлиси Олии Ҷумҳурии Тоҷикистон ироа мегардад. Аз ҷумла, 28 декабри соли 2024 дар бинои нави мақоми олии қонунгузори мамлакат – Маҷлиси Олӣ Паёми Президенти Ҷумҳурии Тоҷикистон, муҳтарам Эмомалӣ Раҳмон дар бораи самтҳои асосии сиёсати дохилӣ ва хориҷии ҷумҳурӣ ироа гардид.
Дар он натиҷаву дастовардҳои ҳамаи соҳаҳои иқтисодӣ ва иҷтимоии кишвар таҳлилу баррасӣ гардида, зимнан зикр гардид, ки «корҳое, ки дар ин самт анҷом дода шуданд, ба таъмин гардидани нишондиҳандаҳои пешбинигардидаи рушди иҷтимоиву иқтисодӣ ва пешрафту ободии шаҳру деҳоти мамлакат мусоидат намуданд».
Аз ҷониби Президенти кишвар, муҳтарам Эмомалӣ Раҳмон бори дигар ба масоили мактабу маориф, ки ҳамчун соҳаи афзалиятнок эълон гардидааст, таваҷҷуҳи хос зоҳир гардид. Воқеан, соҳаи маориф ва илм ягона соҳае дар кишвар маҳсуб меёбад, ки ҳеҷ нафар имрӯзу ояндаи худро бе он тасаввур карда наметавонад ва хурсандибахш аст, ки ин соҳаи калидӣ ҳамеша зери таваҷҷуҳи давлату ҳукумати кишвар қарор дорад. Паёми имсола низ аз ҷониби Сарварӣ кишвар бо диди нав ва таҳлилҳои амиқ баррасӣ гардид ва бо назардошти рушди ҷомеаи ҷаҳонӣ афзалият ба масъалаҳои рушди иқтисод, инноватсия ва илму маориф дода шуд.
Ба андешаи Пешвои миллат: - «то вақте ки тамоми ҷомеа ба мактаб ва низоми маориф рӯй наоварад, миллат дастнигар, хору зор, таҳқиргашта ва афроди он моил ба ҳама гуна ҷиноятҳои сангину пешгӯйинашаванда боқӣ хоҳанд монд».
Вобаста ба муҳайё кардани шароити беҳтарин барои тарбияи кадрҳо, таъмин намудан бо имтиёзҳои гуногун, ҳавасмандгардонии мутахассисони самти технологияҳои иттилоотӣ ва бозомӯзӣ дар муассисаҳои пешқадами хориҷӣ таваҷҷуҳ зоҳир гардида, дар ин масъала нақши устодону омӯзгорон муҳиму ҳалкунанда арзёбӣ гардид. Воқеан, омӯзгор дар раванди таълиму тарбия бо китобу барномаҳои дарсӣ маҳдуд нашуда, бояд бештар худомӯзӣ намояд, барои беҳтар гардидани самаранокии машғулиятҳояш аз адабиёту сарчашмаҳои илмию методӣ огоҳона истифода намояд. Дар ин росто, аз курсҳои такмили ихтисос ва бозомӯзӣ гузаштани омӯзгорон ҳам дар дохил ва ҳам дар хориҷи кишвар ба пешравии сифати таълим ва донишазхудкунии хонандагон такони ҷиддӣ мебахшад. Бояд хотирнишон кард, ки бо ин мақсад дар заминаи Донишкадаи технология ва менеҷменти инноватсионии шаҳри Кӯлоб Донишгоҳи инноватсия ва технологияхои рақамӣ таъсис дода шуд, ки боз як қадами муҳим дар омода кардани мутахассисони варзида дар самти рақамикунонии кишвар мебошад.
Ҳамзамон, дар Паём иброз гардид, ки: - «дар шароити рушди босуботи ҳамкориҳои байналмилалӣ ва вусъат ёфтани ҳамгироии Тоҷикистон бо ҷомеаи ҷаҳонӣ талабот ба мутахассисоне, ки сатҳи касбияти баланд дошта забонҳои хориҷӣ, махсусан, русӣ ва англисиро хуб медонанд, рӯз ба рӯз меафзояд».
Таъкиди мазкур моро бори дигар водор мекунад, ки ҳамчун омӯзгори замони муосир аз ҳамин дидгоҳ ба ҳирфаи хеш мутаваҷҷеҳ шавем ва ҳамзамон рисолати азалии худро ба ҳайси муаллим-тарбиятгари насли даврони ҷадид иҷро намоем. Замони муосир аз мо, омӯзгорон, тақозо менамояд, ки аз муҳимтарин омил-сармояи тафаккур баҳравар бошем, ҷиҳати ба камол расонидани насли донишманду забондон ва насли созанда, заҳмат кашида, ҳифзи арзишҳои миллӣ ва падидаи нодири сиёсӣ-Истиқлоли давлатиро ба ин насли маърифатпазиру донишманд вогузорем. Дар иртибот ба ин назарияи бебаҳс омӯзгор бояд роҳу усул ва навҳои фаъолияте пеша намояд, ки дар ба вуҷуд овардани муҳити созгори педагогию психологӣ мусоидат намояд. Вобаста ин, дар Донишкада соли 2025 «Соли муҳити психологӣ дар ҷараёни таҳсилот» эълон гардидааст ва ҷиҳати омӯзиши ҳарчи бештару беҳтари технологияи таълиму тарбияи муосир, дастрасӣ ба методу усулҳои замонавӣ, фароҳам овардани шароит барои омӯзиши забонҳои русӣ ва англисӣ ва муҳимтар аз ҳама, муҳайё намудани муҳити психологӣ иқдомҳои муҳим рӯйи даст гирифта шудаанд.
Оре, ҳамеша дар хотир бояд дошт, ки ҳамаи пешравию пирӯзиҳо аз мактабу маориф ва заҳмати омӯзгор ба даст меояд. Бо дарк ва масъулияти баланд аз ҷониби Сарвари кишвар муҳтарам Эмомалӣ Раҳмон бори дигар таъкид гардид, ки – «маҳз барои ҳамин ман аз рӯзҳои аввали роҳбарии худ ба масъалаи илму маориф эътибори доимӣ ва аввалиндараҷа медиҳам!»
Бо дар назардошти таваҷҷӯҳи зиёди Пешвои миллат, ба масоили мактабу маориф моро лозим меояд, ки ҷиҳати баланд бардоштани савияи дониш ва маҳорати педагогии хеш пайваста заҳмат ба харҷ дода, дар тарбия ва таълими насли оянда дар шароити ҷаҳонишавӣ, бархӯрди тамаддунҳо, ҳалли таъҷилии бисёр масъалаҳои ҳаётан муҳим тадбирҳо андешем. Аз ин нуқтаи назар, омӯзгори муосир бояд дорои маърифати баланди ҳирфаӣ бошад ва шогирдонро дар руҳияи садоқат ба Ватан – давлати соҳибистиқлол, худшиносию худогоҳӣ ва ормонҳои миллӣ тарбият намояд, ба таъбири маъмул аз фарҳанги оламиён биёмӯзад ва ҷанбаҳои миллии фарҳанги хешро тарғибу ташвиқ ва муаррифӣ карда тавонад, ҳамвора дар замони пуртазод зиракии сиёсиро аз даст надиҳад.
Мо - омӯзгорон ҳамчун машъалафрӯзи роҳи маърифат барои он ки ин фурӯғ ҳамеша шуълавар бошад, рисолати азалии хеш - меҳнату ранҷи босуботро дар таълиму тарбияи насли давронсоз бояд дареғ надорем ва он гоҳ муваффақ мешавем, ки ҳар як ҳаводиси рухдодаи ҷаҳони муосирро бо чашми хирад, маърифат ва тафаккури созанда таҳлил ва баррасӣ намоем. Ба ин маънӣ Пешвои миллат мефармоянд, ки: «Мо бояд ҳушёр бошем, зиракию ҳушёрии сиёсиро аз даст надиҳем, манфиатҳо ва арзишҳои миллӣ ва истиқлолияти давлатамонро ҳифз намоем.»
Воқеан, ҳамагон барои татбиқи ин дастуру ҳидоятҳои ҳаётан муҳим бояд аз тамоми имконоти мавҷуда самаранок истифода намуда, ҷиҳати татбиқи нуктаҳои Паём сидқан - бо меҳри саршор аз ватандӯстӣ, фидокорона дар ҷодаи таълиму тарбияи насли ояндаи мамлакат саҳми бориз гузорем.
Тамоми тадбирҳое, ки аз тарафи Пешвои миллат дар Паём баён гардиданд, маҳз ба хотири ҳифзи сулҳу субот, рушду пешрафти илму маориф, тандурустӣ, фарҳанг, амнияти ваҳдати миллӣ, ҳимояи истиқлолияти давлатӣ, беҳтар намудани сатҳи зиндагии мардум, ҳифзи ҳуқуқу озодиҳои инсон ва шаҳрванд, таъмини амнияти минтақа ва ҷаҳон ва баланд бардоштани нуфузу эътибори кишвар дар арсаи байналмилалӣ равона гардидааст.
Хулоса, ҳамаи дастовардҳои соҳаи маориф, аз ҷумла, баланд бардоштани маҳорат ва малакаи касбии омӯзгорон, мақоми шоиста пайдо намудани шахсияти омӯзгор дар ҷомеа, таъсиси ҳазорон синфхонаи таълимӣ, бунёду азнавсозии муассисаҳои таълимӣ, баргузории озмунҳои ҷумҳуриявӣ, мунтазам зиёд гардидани маоши кормандони соҳаи маориф ва нашри адабиёти таълимӣ аз рӯйи дастуру супоришҳо ва ғамхориҳои пайвастаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон сарчашма мегирад.
Мирзозода Наврӯз,
ректори Донишкадаи ҷумҳуриявии
такмили ихтисос ва бозомӯзии
кормандони соҳаи маориф
Хабарҳои дигар
-
БОЗДИДИ ВАЗИРИ МАОРИФ ВА ИЛМ АЗ ДОНИШГОҲИ МИЛЛӢ Имрӯз (04.02.2025) вазири маориф ва илми Ҷумҳурии Тоҷикистон Саидзода Раҳим Ҳамро ба Донишгоҳи миллии Тоҷикистон ташриф оварда, аз озмоишгоҳҳои Институти илмию таҳқиқотии Донишгоҳ боздид намуд. Зимни боздид ректори Донишгоҳ, профессор Насриддинзода Э.С. ва намояндагони сохторҳои дахлдори Донишгоҳ аз фаъолияти Институти илмию таҳқиқотӣ сухан намуда, таъкид доштанд, ки Институти илмию таҳқиқотии Донишгоҳи миллӣ дар зарфи беш аз 20 соли фаъолияти худ ба комёбиҳои назаррас ноил гаштааст. Он яке аз марказҳои асосии пажӯҳиш ва таҳқиқот дар миқёси ҷумҳурӣ ба ҳисоб меравад. Имрӯзҳо дар пояи Институт як қатор мактабҳои илмӣ дар соҳаи илмҳои физика, математика, химия, биология, геология, ҳуқуқшиносӣ, таърих ва иқтисодӣ амал мекунанд ва ин мактабҳо аз ҷониби олимони кишварҳои дохил ва хориҷи кишвар эътироф гардидааст. Ёдовар мешавем, ки озмоишгоҳҳои Институт дорои дастгоҳҳои наву замонавӣ барои самтҳои илми химияву биотехнология, аз қабили «Электроспиннинги як насоса», «Спитеринг», «Инфиҷори электрикӣ» ва «Спектрофотометри нури дугона» мебошад, ки дар самти татбиқи барномаи “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф”, солҳои 2020 – 20240 ва пешбурди корҳои илмию тадқиқотӣ мусоидат менамояд.
35
04.02.2025 -
ҶАЛАСАИ САЙЁРИ ҲАЙАТИ МУШОВАРАИ ВАЗОРАТИ МАОРИФ ВА ИЛМ ДАР МИНТАҚАИ БОХТАРИ ВИЛОЯТИ ХАТЛОН 1-уми феврали соли 2025 дар ноҳияи Дӯстӣ таҳти раёсати вазири маориф ва илм Раҳим Саидзода ҷаласаи сайёри ҳайати мушовараи Вазорати маориф ва илми Ҷумҳурии Тоҷикистон баргузор гардид. Дар кори ҷаласа аъзои ҳайати мушовара, муовини вазири маориф ва илм, сардори Сарраёсати маорифи шаҳри Душанбе, сардорон ва кормандони раёсату шуъбаҳои дастгоҳи марказӣ ва муассисаҳои тобеи вазорат, сардори раёсати маориф, мудирони шуъбаҳои маориф,директорони муассисаҳои таълимии шаҳру ноҳияҳои вилояти Хатлон ва дигар шахсони масъул ширкат доштанд. Нахуст, вазири маориф ва илм ҷаласаи сайёри ҳайати мушовараи Вазорати маориф ва илмро оид ба вазъи иҷрои нақшаву барномаҳои таълимӣ, таъминот бо кадрҳои педагогӣ, китобҳои дарсӣ, сатҳу сифати дониши хонандагон ва татбиқи барномаҳои давлатӣ дар муассисаҳои таълимии шаҳру ноҳияҳои Ҷайҳун, Дӯстӣ, Қубодиён, Шаҳритус, Носири Хусрав ва дар маҷмуъ таҳлили вазъи соҳаи маорифи минтақаи Бохтарро оғоз карда, ҳозиринро ба рӯзномаи ҷаласа ва масъалаҳои ҷории баррасишаванда шинос намуд. Сипас, гузориши сардори раёсати таҳсилоти миёнаи умумии Вазорати маориф ва илм Асомиддинзода Шарофиддин “Оид ба вазъи иҷрои нақшаву барномаҳои таълимӣ, таъминот бо кадрҳои педагогӣ, китобҳои дарсӣ, сатҳу сифати дониши хонандагон ва татбиқи барномаҳои давлатӣ дар муассисаҳои таълимии ноҳияҳои Ҷайҳун, Дӯстӣ, Қубодиён, Шаҳритус ва Носири Хусрави вилояти Хатлон” шунида шуд. Зимни баррасии масъалаҳо раиси ҷаласа таваҷҷуҳи асосиро ба масъалаҳои вазъи иҷрои нақшаву барномаҳои таълимӣ, таъминот бо кадрҳои педагогӣ, китобҳои дарсӣ, сатҳу сифати дониши хонандагон ва татбиқи барномаҳои давлатӣ дар муассисаҳои таълимӣ, мақоми омӯзгор, фарогирӣ ба зинаи таҳсилоти томактабӣ, ташкили марказҳои инкишофи кӯдак дар назди муассисаҳои таълимӣ, фарогирии пурраи хонандагон ба зинаи сеюми таҳсилот, зиёд кардани шумораи муассисаҳои таҳсилоти томактабӣ, риояи талаботи ҳуҷҷатгузорӣ дар муассисаҳои таълимӣ, иштироки хонандагону омӯзгорон дар дарс, аз курсҳои такмили ихтисос гузаштани омӯзгорон, вазъи муассисаҳои таълимӣ дар давраи зимистони соли 2025, пешниҳоди маълумоти омории дуруст оид ба норасоии кадрҳои педагогӣ, ҳозиршавии омӯзгорони ҷавон ба ҷойи кор, таъмини хонандагон бо китобҳои дарсӣ ва пардохти маблағи иҷораи китобҳои дарсӣ, баланд бардоштани сифати таҳсилот, риояи санадҳои меъёрии батанзимдарорандаи соҳа, дастгирии омӯзгорони ҷавон, омӯзиши забони давлатӣ, омӯзиши забонҳои русиву англисӣ, иштироки хонандагон дар олимпиадаҳои фаннӣ ва озмунҳои ҷумҳуриявии “Фурӯғи субҳи доноӣ китоб аст”, “Илм – фурӯғи маърифат”, ва “Тоҷикистон – Ватани азизи ман” ва дастгирии омӯзгорони онҳо, риояи талаботи қонунҳои Ҷумҳурии Тоҷикистон “Дар бораи маориф”, “Дар бораи тарбияи ватандӯстии шаҳрвандон”, “Дар бораи масъулияти тарбияи кӯдак” равона карда, ба масъулин ҷиҳати иҷрои ҳатмию саривақтии стратегия, барнома, консепсия, қарорҳои ҳайати мушовара ва фармоишҳои вазири маориф ва илм, супоришҳои қатъӣ дод. Дар идома вобаста ба масъалаҳои баррасишуда сардори раёсати маорифи вилояти Хатлон Зиёдулло Абдулзода баромад карда, ба гурӯҳи кории вазорати маориф ва илми Ҷумҳурии Тоҷикистон ҷиҳати таваҷҷуҳ ба соҳаи маорифи вилоят ва баргузории ҷаласаи сайёр изҳори сипос намуда, баргузории ҷаласаи мазкурро амри зарурӣ маънидод кард. Бо назардошти ироаи таклифу пешниҳодҳои аҳли толор вобаста ба масъалаҳои баррасишуда қарорҳои дахлдор қабул гардид. Дар охир, вазири маориф ва илм иброз дошт, ки ҷиҳати босифат иҷро намудани дастуру супоришҳои маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳар яки мо вазифадорем, фарзандонамонро хононем, илму дониш, касбу ҳунар ва забон омӯзонем,аз истифодаи техникаву технологияҳои муосир бархурдор намоем, ба зиндагии мустақилона ҳаматарафа омода созем, ҳамчун шахсиятҳои худшиносу худогоҳ, масъулиятшинос ва ватанпарвару заҳматдӯст ба камол расонем, дар замони ҳассоси ҷаҳонишавӣ сулҳу оромӣ, суботи сиёсӣ ва ваҳдати миллии ба қимати ҷони даҳҳо ҳазор ҳамватанонамон бадастомадаро ҳифзу эҳтиёт кунем, дар шароити бесуботи ҷаҳон барои ҳимояи истиқлолу озодии давлат ва Ватани маҳбубамон ҳамеша кӯшишу талош намоем. Маркази матбуоти Вазорати маориф ва илми Ҷумҳурии Тоҷикистон
99
01.02.2025 -
Маросими қабули эътимодномаҳо аз сафирони навтаъини давлатҳои хориҷӣ 31 январ дар Қасри миллат Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон эътимодномаҳои сафирони навтаъини як қатор кишварҳои хориҷиро қабул намуданд. Зимни маросим ба Президенти Ҷумҳурии Тоҷикистон муҳтарам Эмомалӣ Раҳмон сафирони фавқулода ва мухтори Шоҳигарии Муттаҳидаи Британияи Кабир ва Ирландияи Шимолӣ хонум Кэтрин Эллен Смиттон, Япония хонум Фурута Кэйко, Ҷумҳурии Корея Ҷон Сонг Шик, Давлати Фаластин Адҳам Муҳаммад Алӣ Ҳасан Зайналдин, Австрия хонум Андреа Бахер, Италия Пиер-Габриеле Пападиа де Боттини де Сант Анезе, Канада Кристофер Дагган, Австралия Ҷон Уилям Гиринг, Алҷазоир Муҳаммад Ирқӣ, Сомалӣ Фатҳудин Алӣ Моҳамед Биау, Камбоҷа Сок Чеа ва Боливарии Венесуэла Кристофер Алберто Мартинез Берротеран эътимодномаҳои худро бо паёму дуруд аз роҳбарияти кишварҳояшон тақдим карданд. Роҳбари давлат муҳтарам Эмомалӣ Раҳмон зимни суханронӣ сафирони навро ба муносибати оғози фаъолияти дипломатиашон дар ин маснади масъул дар Ҷумҳурии Тоҷикистон табрику таҳният гуфтанд. Изҳори итминон карда шуд, ки сафирон бо иқдомот ва тадбирҳои амалии худ ба таҳкими робитаҳои миёни кишварҳои худ ва Тоҷикистон мусоидати ҳамаҷониба хоҳанд кард. “Сиёсати хориҷии давлати мо аз солҳои аввали соҳибистиқлолӣ ба таҳкиму тавсеаи муносибатҳои дӯстӣ ва ҳамкории судманд бо шарикони байналмилалӣ нигаронда шудааст”, - таъкид намуданд Сарвари давлат муҳтарам Эмомалӣ Раҳмон. Гуфта шуд, ки Тоҷикистон бо доираи васеи кишварҳои ҷаҳон ҳам дар сиғаи дуҷониба ва ҳам дар чорчӯби бисёрҷониба дар арсаҳои гуногуни мавриди манфиати муштарак равобити фаъолу созанда роҳандозӣ намудааст. Дар идомаи суханронӣ Президенти кишвар муҳтарам Эмомалӣ Раҳмон оид ба рушду таҳкими робитаҳои дӯстӣ ва ҳамкории гуногунҷанбаи судманди Тоҷикистон бо Шоҳигарии Муттаҳидаи Британияи Кабир ва Ирландияи Шимолӣ, Япония, Ҷумҳурии Корея, Давлати Фаластин, Австрия, Италия, Канада, Австралия, Алҷазоир, Сомалӣ, Камбоҷа ва Венесуэлаи Боливарианӣ андешаронӣ намуданд. Сарвари давлат муҳтарам Эмомалӣ Раҳмон таваҷҷуҳи сафирони навтаъинро ба вазъи имрӯзаи ҷаҳон ва зарурати дарёфти роҳҳои ҳалли мушкилоти рӯзномаи ҷаҳонӣ, аз ҷумла масъалаҳои вобаста ба обу иқлим ҷалб намуданд. Ҳамкорӣ дар чаҳорчуби созмонҳои байналмилалӣ, дастгирии ташаббусҳои глобалии якдигар дар арсаи байналмилалӣ, таҳкими ҳусни тафоҳум ва робитаҳои пурсамари байнидавлатӣ аз мавзӯоти дигари суҳбат буд. Дар хотима Президенти кишвар муҳтарам Эмомалӣ Раҳмон ба дипломатҳо комёбӣ хоста, ба сарварони давлатҳои онҳо салому паёми гарм ирсол намуданд. Дар охири маросим миёни Пешвои миллат ва сафирони навтаъин суҳбати озоду самимӣ доир гардид.
109
31.01.2025
