14.05.2025
Имрӯз, 14 майи соли 2025 дар Академияи идоракунии давлатии назди Президенти Ҷумҳурии Тоҷикистон бо иштироки Ректори Академия Сафарзода Даврон Ҷурахон ва сардори раёсати муқовимат ба коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон, подполковники адлия Муқимӣ Нигора вохӯрӣ бо кормандону омӯзгорони Академия баргузор гардид. Ҳадаф аз баргузории вохӯрӣ корҳои фаҳмондадиҳӣ доир ба сиёсати давлатӣ дар самти муқовимат бо коррупсия мебошад.
Ректори Академия зимни баромади худ қайд намуд, ки солҳои охир коррупсия хусусияти умумӣ ва сартосариро пайдо намудааст, ки боиси оқибатҳои манфии иҷтимоӣ ва иқтисодӣ гашта, ба косташавии оромии ҷомеа оварда мерасонад. Бинобар ин, Президенти Ҷумҳурии Тоҷикистон муҳтарам Эмомалӣ Раҳмон вобаста ба хатари коррупсия ба ҷомеа чунин қайд намудаанд: «Чунин як падидаи манфӣ ҳамчун коррупсия дар пешрафти ҷомеаи мо яке аз монеаҳои хеле ҷиддӣ мебошад. Мо бояд тамоми омилҳо ва сабабҳои зуҳури коррупсияро ҳамаҷониба омӯхта, таҳлил намоем ва тамоми қувваҳои солими ҷомеаро барои пешгирии ин зуҳурот ва поён овардани шиддати он сафарбар намоем». Ҳамзамон, ректори Академия иброз дошт, ки бо мақсади муқовимат ба коррупсия дар Академия якчанд семинару мизҳои мудаввар ташкил ва роҳандозӣ гардида, аз ҷониби устодон мақолаҳои илмию оммавӣ нашр карда шудаанд, ки чорабиниҳои банақшагирифташуда ба пешгирӣ намудани хавфи коррупсия ва муқовимат ба он мусоидат менамояд.
Сипас, сардори раёсати муқовимат ба коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон, подполковники адлия Муқимӣ Нигора зикр кард, ки коррупсия ва дигар амалҳои дорои хусусияти коррупсионӣ барои рушди иқтисодиёт ва некуаҳволии мардум, амалишавии ҳуқуқу озодиҳои инсон ва шаҳрванд, суботу оромии ҳар як кишвар монеа эҷод намуда, хавфи аз ҳама калон – нобоварии мардумро нисбат ба мақомоти давлатӣ ба бор меорад.
Гуфта шуд, ки коррупсия дар шароити муосир аз мушкилоти дохилӣ ба проблемаи байналмилалӣ мубаддал гардидааст. Ин зуҳуроти номатлуб дар таҳқиқи худ нишон дод, ки решаҳои амиқи таърихӣ дорад ва баробари ташаккулёбии давлатҳо ба вуҷуд омада, зуҳур намудааст.
Муқимӣ Нигора дар назди ҳозирон доир ба рафти иҷрои санадҳои меъёрии ҳуқуқӣ дар самти муқовимат ба коррупсия, баланд бардоштани маърифати ҳуқуқии шаҳрвандон доир ба поквиҷдонӣ ва мубориза бо фасод тавсияҳои муфид дод. Таъкид карда шуд, ки устодони Академия дар раванди таълиму тарбия доир ба масъалаи муқовимат ба коррупсия мавзуъҳои муҳимро матраҳ намуда, ба ин васила дар рушди иқтисодиёти кишвар саҳми арзандаи худро гузоранд.
Хабарҳои дигар
-
ҶАЛАСАИ ҲИСОБОТИ МУШТАРАКИ ЛОИҲАҲОИ САРМОЯГУЗОРӢ ВА ҶАЛБИ САРМОЯИ ХОРИҶӢ БА СОҲАИ МАОРИФ 13 майи соли 2025 дар Китобхонаи миллии Тоҷикистон бо ташаббуси Вазорати маориф ва илми Ҷумҳурии Тоҷикистон ҷаласаи «Ҳисоботи муштараки лоиҳаҳои сармоягузорӣ ва ҷалби сармояи хориҷӣ ба соҳаи маориф» баргузор гардид. Чорабинии мазкур дар асоси дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба тақвияти сифати таҳсилот, рушди устувори соҳаи маориф ва ҷалби манбаъҳои сармоявии дохиливу хориҷӣ сурат гирифт. Ҷаласаро муовини якуми вазири маориф ва илми Ҷумҳурии Тоҷикистон Ҳомид Ҳошимзода бо сухани ифтитоҳӣ оғоз намуда, иброз дошт, ки чорабинии мазкур ҳамчун платформаи муҳимми таҳлили дастовардҳо ва баҳодиҳии самаранокии ҳамкориҳои амалкунанда дар соҳаи маориф хизмат менамояд. Дар идома муовини якуми вазир самтҳои асосии сиёсати маориф, аҳамияти ҷалби сармояи хориҷӣ ва татбиқи ислоҳоти институтисионалӣ дар соҳаро таъкид намуд. Зикр гардид, ки бо кумаки шарикони рушд натиҷаҳои назаррас дар татбиқи Стратегияи миллии рушди маориф ба даст омадааст. Ҳамзамон, намояндагони ташкилоту созмонҳои байналмилалӣ – Иттиҳоди Аврупо, ЮНИСЕФ ва Барномаи озуқавории ҷаҳонӣ, бо маърузаҳои худ саҳми шарикони байналмилалиро дар татбиқи лоиҳаҳои муҳимми таълимӣ, рушди инфрасохтори соҳа, таҳкими сифати таълим ва дастгирии табақаҳои осебпазир мавриди таҳлил қарор доданд. Ҳамоҳангсозон ва роҳбарони лоиҳаҳои амалкунанда – аз ҷумла, Лоиҳаи “Такмили таҳсилоти миёнаи умумӣ дар соҳаи STEM”, “Инкишофи барвақтии кӯдакон”, “Дастгирии пешбурди таҳсилоти асосӣ ва беҳтарсозии инфрасохтори санитарӣ”, “Сохтмон ва муҷаҳҳазгардонии мактабҳо” ва “Татбиқи Стратегияи миллии рушди маориф” дар хусуси дастовардҳо, мушкилот ва дурнамои ҳамкориҳо маълумоти муфассал пешниҳод намуданд. Дар идома сардорони раёсатҳои таҳсилоти томактабӣ, таҳсилоти миёнаи умумӣ, таҳсилоти олии касбӣ, илм ва инноватсия низ маърузаҳои муфассал доир ба сиёсати соҳа, механизмҳои ҷалби сармоя, натиҷаҳои татбиқи барномаҳои мавҷуда ва пешниҳодҳои нав барои густариши ҳамкориҳои бисёрҷониба ироа карданд. Иштирокдорони ҷаласа бо изҳори миннатдорӣ ба шарикони рушд, махсусан Иттиҳоди Аврупо, ЮНИСЕФ, Барномаи озуқавории ҷаҳонӣ ва дигар созмонҳо, омодагии худро барои идомаи ҳамкорӣ ва татбиқи ҳадафҳои муштарак дар самти таъмини таҳсилоти босифат ва фарогир баён намуданд. Дар интиҳо, марҳилаи муҳокимаи маърузаҳо ва мубодилаи назарҳо бо иштироки фаъолонаи намояндагони ҳамаи ҷонибҳо доир гардида, пешниҳоди тадбирҳои мушаххас ҷиҳати таҳкими равандҳои ҳамкорӣ ва ҷалби бештари сармоя ба соҳаи маориф ироа гардид. Маркази матбуоти Вазорати маориф ва илми Ҷумҳурии Тоҷикистон
53
13.05.2025 -
ТАҲЛИЛИ ВАЗЪИ ТАҲСИЛОТИ ТОМАКТАБӢ ДАР ШАҲРИ ДУШАНБЕ 13 майи соли ҷорӣ дар Муассисаи таҳсилоти миёнаи умумии назди Сарраёсати маорифи шаҳри Душанбе ҷаласаи корӣ оид ба рафти иҷрои стандарт, нақша ва барномаҳои таълимию давлатӣ дар муассисаҳои томактабӣ ва шуъбаҳои маорифи шаҳри Душанбе бо иштироки муовини вазири маориф ва илм Равшан Каримзода, сардори Сарраёсати маорифи шаҳри Душанбе, мудирони шуъбаҳои маорифи ноҳияҳои шаҳри Душанбе, мушовирони томактабӣ, мудирони муассисаҳои таҳсилоти томактабӣ ва муҳосибон баргузор гардид. Дар оғоз, муовини вазир қайд намуд, ки таҳсилоти томактабӣ ҳамчун марҳалаи муҳимтарини ташаккули шахсияти кӯдак, асоси донишомӯзии муназзам ва тарбияи насли оянда мебошад. Таъкид гардид, ки дар ҳамин марҳала иқтидори зеҳнӣ, ахлоқӣ, ҷисмонӣ ва иҷтимоии кӯдак шакл мегиранд, ки барои муваффақиятҳои минбаъдаи ӯ дар тамоми марҳалаҳои ҳаёт замина мегузоранд. Дар ҷаласаи мазкур иҷрои барномаҳои таълимию давлатӣ дар муассисаҳои таҳсилоти томактабии шаҳри Душанбе ва натиҷаҳои санҷишҳои гузаронидашуда ҷиҳати иҷрои стандартҳо ва нақшаҳои таълимӣ дар ин муассисаҳо, норасоии мутахассисони тахассусманд, камбуди лавозимоти муосири таълимӣ, риояи мукаммали стандартҳо ва дигар мушкилоти ҷойдошта мавриди муҳокима қарор гирифт. Дар идома доир ба рафти иҷрои стандарт, нақша ва барномаҳои таълимию давлатӣ дар муассисаҳои таҳсилоти томактабии шаҳри Душанбе андешаҳои иштирокчиён ироа гардид. Ҷаласа бо муҳокимаи роҳҳои ҳалли масъалаҳо ва пешниҳодҳои амалӣ барои беҳтар намудани ҳолати таълиму тарбия дар муассисаҳои томактабӣ, ташкили шароити беҳтар барои кӯдакон ва таъмини онҳо бо лавозимоти зарурии таълимӣ анҷом ёфта, муовини вазири маориф ва илм ба сардори Сарраёсати маорифи шаҳри Душанбе, мудирони шуъбаҳои маорифи ноҳияҳои шаҳри Душанбе, мушовирони томактабӣ, мудирони муассисаҳои таҳсилоти томактабӣ ва муҳосибон ҷиҳати рафъи мушкилоти ҷойдошта дастуру супоришҳои мушаххас дод. Ёдовар мешавем, ки дар оғози ҷаласа муовини вазири маориф ва илм аз намоиши лоиҳаи барномаи электронии Kudak.tj дидан намуд. Қайд гардид, ки барномаи мазкур ҷиҳати беҳтар намудани таҳсилоти томактабӣ пешбинӣ шуда, дар рақамикунонии соҳаи маориф дар самти таҳсилоти томактабӣ заминаи муосир фароҳам меорад. Маркази матбуоти Вазорати маориф ва илми Ҷумҳурии Тоҷикистон
30
13.05.2025 -
ВОХӮРӢ БО МУОВИНИ ВАЗИРИ МАОРИФИ ҶУМҲУРИИ МАРДУМИИ ЧИН 13 майи соли 2025 дар шаҳри Урумчии Ҷумҳурии Мардумии Чин дар доираи нахустин ҷаласаи вазирони маорифи кишварҳои Чин ва Осиёи Марказӣ вохӯрии вазири маориф ва илми Ҷумҳурии Тоҷикистон Раҳим Саидзода бо муовини вазири маорифи Ҷумҳурии Мардумии Чин У Ян баргузор гардид. Дар ҷараёни суҳбат вазири маориф ва илм ба ҷониби Чин барои ташкили сатҳи баланди ҳамоиши мазкур изҳори сипос намуда, таъкид кард, ки баргузории ин ҷаласа саҳифаи наверо дар таърихи ҳамкориҳои кишварҳои минтақа ва Чин дар соҳаи маориф хоҳад кушод. Тарафҳо ҷараёни рушди ҳамкориҳои дуҷониба дар соҳаи маорифро натиҷаи равобити мустаҳками роҳбарони олии ду кишвар — Президенти Ҷумҳурии Тоҷикистон муҳтарам Эмомалӣ Раҳмон ва Раиси Ҷумҳурии Мардумии Чин муҳтарам Си Ҷинпин арзёбӣ намуданд. Зикр гардид, ки айни ҳол дар муассисаҳои таҳсилоти олии касбии Ҷумҳурии Мардумии Чин зиёда аз 5000 донишҷӯи тоҷик таҳсил доранд, ки ин далели равшани рушди робитаҳои мутақобилан судманд дар самти маориф мебошад. Ҳамзамон, ба фаъолияти пурсамари Пажӯҳишгоҳи Конфутсий, ки дар назди Донишгоҳи миллии Тоҷикистон амал мекунад, баҳои мусбат дода шуда, он ҳамчун намунаи муваффақи ҳамкориҳо дар самти фарҳангу маориф арзёбӣ гардид. Ҷониби Тоҷикистон таъкид дошт, ки бо назардошти афзоиши талабот ба мутахассисони самтҳои инноватсионӣ, ҷалби бештари донишҷӯёни тоҷик ба таҳсил дар донишгоҳу донишкадаҳои Чин, махсусан дар самти технологияҳои иттилоотӣ ва зеҳни сунъӣ, барои ояндаи рушди кадрии кишвар аҳамияти аввалиндараҷа дорад. Дар анҷом, ҷонибҳо омодагии худро барои густариши ҳамкориҳои амалии дуҷониба дар бахши маориф иброз дошта, оид ба тавсеаи барномаҳои муштарак ва ҷудо гардидани бурсияҳо барои донишҷӯёни тоҷик мубодилаи афкор намуданд. Маркази матбуоти Вазорати маориф ва илми Ҷумҳурии Тоҷикистон
53
13.05.2025
